“Ko Hoku Tokoni ʻOku Meia Sihova”

Taimi ʻOku Hoko Ai ʻa e Taʻumotuʻá “ko e Kalauni Matamatalelei”

“KO E moʻui lelei taha ia ʻoku ala lavá,” ko e lau ia ʻa e taʻu 101 ko Muriel. “Ko ha monū moʻoni!” ko e anga ia hono fakanounou ʻa e meʻá ni ʻe he taʻu 70 ko Theodoros. “Naʻe ʻikai mei lava ke u ngāueʻaki ʻeku moʻuí ʻi ha founga lelei ange,” ko e fakamatala ia ʻa Maria ʻi hono taʻu 73. Ko kinautolu kotoa kuo nau fakamoleki ʻa e kotoa ʻo ʻenau moʻuí ʻi he ngāue kia Sihova ko e ʻOtuá.

Ko e faʻahinga taʻumotuʻa peheé ʻoku anga-maheni ʻaki ia ʻi he kau lotu longomoʻui tokolahi ʻa Sihová ʻi māmani lahi. Neongo ʻa e hoholo ʻo motuʻá, ngaahi hohaʻa ki he moʻui leleí, pea mo e ngaahi tuʻunga ʻikai lelei kehé, ʻoku nau kei tauhi pē kia Sihova ʻi ha founga ʻaufuatō. ʻI he fakatahaʻanga Kalisitiané, ko e faʻahinga taʻumotuʻa faitōnunga peheé ko e ngaahi faʻifaʻitakiʻanga fakaʻapaʻapaʻi kinautolu ʻo e anga-līʻoa fakaʻotuá. ʻOku fakamāʻolungaʻi lahi ʻe Sihova ʻa e ngāue ʻa e faʻahinga taʻumotuʻá, neongo ʻoku fakangatangata nai ʻa honau ngaahi tuʻungá.a​—2 Kolinito 8:​12.

ʻOku fai ʻe he tohi Sāmé ha fakamatala mātuʻaki feʻungamālie fekauʻaki mo e tuʻunga ʻo e moʻuí ʻe lava ke ʻamanekina ʻe he faʻahinga faitōnunga taʻumotuʻá te nau maʻú. ʻE lava ke nau hangē ha fuʻu ʻakau motuʻa mo kāfakafa ʻa ia ʻoku fua maʻu pē. Naʻe hiva ʻa e tokotaha-tohi-sāmé ʻo fekauʻaki mo e faʻahinga taʻumotuʻa faitōnungá: “E kei tubu ae fua iate kinautolu i he e nau motua; te nau jino lelei mo lau mauiui.”—Sāme 92:​14, PM.

ʻE ilifia nai ʻa e niʻihi naʻa siʻaki mo tukunoaʻi kinautolu ʻi he fakatupunga ʻe he taʻumotuʻá ke hōloa ʻenau longomoʻuí. Naʻe kōlenga ʻa Tēvita ki he ʻOtuá: “Oua naa jiaki au i he aho o eku motua; oua naa liaki au oka mole iate au eku malohi.” (Sāme 71:​9, PM) Ko e hā ʻa e faikehekehe ʻi he vahaʻa ʻo e vaivaí mo e lakalakaimonū ʻi he taʻumotuʻá? Ko e ʻulungāanga fakaʻotua ʻo e māʻoniʻoní. “ʻE toʻulu hange ha paame ʻa e maʻoniʻoni,” ko e hiva ia ʻa e tokotaha-tohi-sāmé.—Sāme 92:12.

Ko e faʻahinga kuo nau fakafonu ʻenau moʻuí ʻaki ʻa e ngāue faitōnunga ki he ʻOtuá ʻoku nau hehema ke hanganaki ʻomi ʻa e fua lelei ʻi honau taʻumotuʻá. Ko hono moʻoní, ko e lahi ʻo e ngaahi tenga kuo nau tō ʻi heʻenau moʻuí tonu pe ko e moʻui ʻa e niʻihi kehé ʻoku tupu hake pea matuʻotuʻa ʻo hoko ai ha utu-taʻu lelei. (Kaletia 6:​7-​10; Kolose 1:​10) Ko e moʻoni, ko e kakai kuo nau fakamoleki tavale ʻenau moʻuí ʻi he ngaahi ngāue siokita ʻoku tukunoaʻi ai ʻa e ngaahi founga ʻa e ʻOtuá ʻoku faʻa siʻi honau mahuʻingá ʻi heʻenau hoko ʻo motuʻa angé.

Ko e māʻoniʻoní ʻi he tuʻunga ko ha teuteu ʻo e taʻumotuʻá ʻoku toe fakamamafaʻi ia ʻi he tohi Tohi Tapu ʻa Palovepí. ʻOku tau lau ai: “Ko e ʻuluhina ko e kalauni matamatalelei ʻoku maʻu ʻi he hala ʻo e faitotonu [pe māʻoniʻoní].” (Palovepi 16:31) ʻIo, ko e māʻoniʻoní ko ha fakahāhā ia ʻo e fakaʻofoʻofa ʻi loto. Ko e tuli ki ha ʻalunga māʻoniʻoni lolotonga ha moʻui fuoloá ʻoku ʻomai ai ʻa e fakaʻapaʻapa. (Livitiko 19:32) Ko e ʻulu hinaá ʻi heʻene ʻalu fakataha mo e potó pea mo e ʻulungāanga leleí ʻoku iku ia ki he lāngilangi.​—Siope 12:12.

ʻOku fakaʻofoʻofa kia Sihova ha moʻui faitotonu ʻoku fakamoleki ʻi heʻene ngāué. ʻOku pehē ʻe he Tohi Tapú: “ʻIo, ʻo aʻu ki hoʻomou motuʻa ka ko au [Sihova] ai pe, pea ko au te u fafa ʻo aʻu ki hoʻomou ʻuluhiná: ko au kuo u fai, pea ko au te u fua; ʻio, ko au te u fafa mo fakahaofi.” (Aisea 46:4) He fakafiemālie ē ke ʻiloʻi ʻoku talaʻofa mai ʻetau Tamai fakahēvani ʻofá ke ne fakaivia mo poupouʻi ʻene faʻahinga mateakí ʻi heʻenau taʻumotuʻá!​—Sāme 48:14.

Koeʻuhi ʻoku fakaʻofoʻofa mei heʻene vakaí ha moʻui ʻoku fakamoleki ʻi he ngāue faitōnunga kia Sihová, ʻikai ʻoku toe tuha ia mo e fakaʻapaʻapa ʻa e niʻihi kehé? ʻI he fakakaukauloto atu ki he vakai ʻa e ʻOtuá, ʻoku tau koloaʻaki ʻa e vakai ʻa e ngaahi kaungātui taʻumotuʻá. (1 Timote 5:​1, 2) Ko ia tau kumi ki ha ngaahi founga ʻaonga ke fakahāhā ai ʻa e ʻofa faka-Kalisitiané ʻi hono tokangaʻi ʻa ʻenau ngaahi fiemaʻú.

ʻI he Hala ʻo e Māʻoniʻoní ʻi he Fakaʻosiʻosi ʻo e Moʻuí

“Oku ai ae moui i he hala oe maonioni,” ko e fakapapauʻi mai ia ʻe Solomone kia kitautolú. (Palovepi 12:​28, PM) Ko e taʻumotuʻá ʻoku ʻikai ke taʻofi ai ha taha ia mei he fou ʻi he hala ko ení ʻi he fakaʻosiʻosi ʻo e moʻuí. Hangē ko ení, ʻi Molotova, naʻe līʻoa ai ʻe he tangata taʻu 99 ʻa hono tuʻunga talavoú ki hono pouaki ʻa e ngaahi fakakaukau faka-Kominiusí. Naʻá ne laukauʻaki ʻa ʻene ngaahi fetalanoaʻaki fakafoʻituitui mo e kau taki Kominiusi ʻiloá, hangē ko V. I. Lenin. Kae kehe ʻi he hōloa ʻo tō ʻa e tuʻunga faka-Kominiusí, naʻe mole ai mei he moʻui ʻa e tangata taʻumotuʻá ni ʻa e taumuʻá mo e tatakí. Ka ʻi he taimi naʻe fakahaaʻi ai kiate ia ʻe he Kau Fakamoʻoni ʻa Sihová ko e Puleʻanga ʻo e ʻOtuá ʻa e fakaleleiʻanga moʻoni pē taha ki he ngaahi palopalema ʻa e faʻahinga ʻo e tangatá, naʻá ne tali ʻa e moʻoni Fakatohitapú pea hoko ko ha tokotaha ako tōtōivi ʻo e Tohi Tapú. Ko e maté pē taha naʻá ne taʻofi ia mei heʻene hoko ko ha sevāniti papitaiso ʻa Sihová.

ʻI he ako fekauʻaki mo e ngaahi fiemaʻu fakaeʻulungāanga ʻa e ʻOtuá, naʻe ʻiloʻi ai ʻe ha fefine taʻu 81 ʻi Hungali naʻe fiemaʻu ke ne mali mo e tangata ʻa ia naʻá ne nofo mo ia ʻi he ngaahi taʻu lahi. Naʻe loto-lahi ʻa e fefiné ʻo ne fakamatalaʻi ʻa ʻene vakai makatuʻunga ʻi he Tohi Tapú ki hono hoá. ʻI heʻene ʻohovale lahi mo e fiefiá, naʻá ne loto ke mali mo ia. Hili ʻa e fakalao ʻa ʻena nofo malí, naʻá ne fai ʻa e fakalakalaka vave fakalaumālie. ʻI loto ʻi he māhina ʻe valu hili ʻa e kamata ʻo ʻene ako Tohi Tapú, naʻá ne hoko ai ko ha tokotaha malanga teʻeki papitaiso, pea naʻe vave ʻene papitaiso ʻi he hili iá. He moʻoni ē ko ia ʻa e lava ke fakakalauni ʻe he māʻoniʻoní ʻa e faʻahinga taʻumotuʻá ʻaki ʻa e fakaʻofoʻofa moʻoní!

ʻIo, ko e kau Kalisitiane faitōnunga taʻumotuʻa angé ʻe lava ke nau fakapapauʻi ʻa e mahuʻingaʻia ʻa e ʻOtuá ʻia kinautolú. ʻE ʻikai ke liʻaki ʻe Sihova ʻa e faʻahinga ʻoku hanganaki mateaki kiate iá. ʻI hono kehé, ʻokú ne talaʻofa ke ne tataki, poupouʻi, mo fakaivia kinautolu naʻa mo e ʻi he taʻumotuʻá. Pea ʻoku nau fakamoʻoniʻi ʻa e ngaahi lea ʻa e tokotaha-tohi-sāmé: “Ko hoku tokoni ʻoku meia Sihova.”—Sāme 121:2.

[Fakamatala ʻi lalo]

[Fakamatala ʻi he peesi 9]

“Ko e ʻuluhina ko e kalauni matamatalelei ʻoku maʻu ʻi he hala ʻo e faitotonu [pe māʻoniʻoní].”—PALOVEPI 16:31

[Puha ʻi he peesi 8]

ʻOKU TOKANGA ʻA SIHOVA KI HEʻENE KAU SEVĀNITI TAʻUMOTUʻÁ

“Te ke tuʻu ki ʻolunga ʻi he ʻao ʻo e ʻuluhinā, pea te ke fakaʻapaʻapa kiate ia ʻoku motuʻa.”—Livitiko 19:32.

“ʻIo, ʻo aʻu ki hoʻomou motuʻa ka ko au ai pe, pea ko au te u fafa ʻo aʻu ki hoʻomou ʻuluhiná.”—Aisea 46:4.