Fehuʻi mei he Kau Lautohí

Naʻe tohi ʻe he ʻapositolo ko Paulá ko Sihova “ʻe ʻikai te ne tuku ke ʻahiʻahiʻi kimoutolu ʻo fakalaka atu ia ʻi he meʻa ʻoku malava ke mou kātekiná.” (1 Kol. 10:13) ʻOku ʻuhinga ení ʻoku tomuʻa fili ʻe Sihova ʻa e meʻa ʻe lava ke tau kātekiná peá ne fili leva ʻa e ngaahi ʻahiʻahi te tau fehangahangai mo iá?

Ko e fakatātaá, naʻe taonakita ha foha ʻo ha tokoua ʻe taha. Naʻe loto-mamahi lahi ʻa e tamaí. Naʻá ne fifili pe naʻe ʻosi ʻiloʻi ʻe Sihova ia ʻa e meʻa ʻe hoko ʻi he kahaʻú pea fakapapauʻi te ne malava mo hono uaifí ke kātekina ʻa e faingataʻa ko ení. ʻI he fokotuʻutuʻu lolotonga ko ení, ko e tokolahi ʻo kitautolu te tau fehangahangai mo e ngaahi faingataʻa. Ko ia ʻoku totonu ke tau tui ʻoku puleʻi ʻe Sihova ʻa e meʻa kotoa pē ʻoku hoko ʻi heʻetau moʻuí?

ʻI heʻetau sivisiviʻi ʻa e 1 Kolinitō 10:13, te tau ʻiloʻi ai ʻoku ʻikai ke poupouʻi ʻe he Tohi Tapú ʻa e fakakaukau ʻo pehē ʻoku tomuʻa ʻiloʻi ʻe Sihova ʻa e meʻa ʻe lava ke tau kātekiná, peá ne fakapapauʻi leva ʻa e ʻahiʻahi te tau fehangahangai mo iá. Ko e hā ʻoku lava ke tau leaʻaki ai ení? Tau sivisiviʻi ʻa e ʻuhinga ʻe fā.

ʻUluakí, naʻe ʻoange ʻe Sihova ki he faʻahinga ʻo e tangatá ʻa e tauʻatāina ke filí, ko e tauʻatāina ke fai ʻa e ngaahi fili. ʻOkú ne loto ke tau fai pē ʻe kitautolu ʻetau filí. (Teu. 30:19, 20; Sios. 24:15) Kapau te tau fai ai ʻa e ngaahi fili ʻoku fakahōifua kia Sihová, ʻe lava ke tau falala kiate ia ke ne tataki kitautolu. (Pal. 16:9) Ka ʻi he taimi te tau fai ai ha ngaahi fili kovi, kuo pau ke tau utu ʻa e ngaahi nunuʻa ko iá ʻi heʻetau moʻuí. (Kal. 6:7) Ko ia kapau naʻe fili ʻe Sihova ʻa e ngaahi ʻahiʻahi naʻa tau fehangahangai mo iá, ʻoku tau tauʻatāina moʻoni ai ʻi hono fai ʻetau ngaahi filí?

Uá, ʻoku ʻikai ke maluʻi kitautolu ʻe Sihova mei he ngaahi meʻa ʻoku “hokonoa.” (Koh. 9:11) ʻE hokosia nai ʻe ha taha ha fakatamaki koeʻuhí pē ko ʻene ʻi he feituʻu hala ʻi he taimi hala. Naʻe lea ʻa Sīsū ʻo fekauʻaki mo ha fakatamaki ʻa ia naʻe mate ai ʻa e kakai ʻe toko 18 ʻi he taimi naʻe holo ai ha taua ʻiate kinautolu. Naʻá ne fakahaaʻi mahino naʻe ʻikai ko e ʻOtuá naʻá ne fakatupunga ʻenau maté. (Luke 13:1-5) ʻOku ʻikai ʻuhinga lelei ke tau fakakaukau ko e ki muʻa ke hoko ha fakatamakí, ʻoku ʻosi fakapapauʻi ʻe he ʻOtuá ia ʻa e tokotaha ʻe moʻuí pe maté.

Tolú, ko kitautolu taki taha kuo pau ke tau tauhi maʻu ʻetau anga-tonú kia Sihova. Naʻe pehē ʻe Sētane ʻoku tauhi pē ʻa e kau sevāniti ʻa Sihová kiate Ia koeʻuhí ko e meʻa ʻokú Ne ʻoange kia kinautolú. Naʻe taukaveʻi ʻe Sētane ʻe ʻikai ke tau hanganaki mateaki kia Sihova kapau te tau hokosia ha ngaahi ʻahiʻahi. (Siope 1:9-11; 2:4; Fkh. 12:10) Kapau naʻe maluʻi kitautolu ʻe Sihova mei ha ngaahi ʻahiʻahi pau, ʻe hā ngali naʻe moʻoni ʻa Sētane.

Faá, ʻoku ʻikai ke fili ʻe Sihova ke ne ʻiloʻi ʻa e meʻa kotoa pē ʻe tomuʻa hoko kiate kitautolú. Ko e moʻoni, ʻoku lava ke ʻiloʻi ʻe Sihova ʻa e meʻa ʻe hoko ʻi he kahaʻú kapau te ne loto ki ai. (ʻAi. 46:10) Ka ʻoku fakahaaʻi mai ʻi he Tohi Tapú ʻoku ʻikai ke fili ʻe Sihova ia ke ne tomuʻa ʻiloʻi ʻa e meʻa kotoa pē. (Sēn. 18:20, 21; 22:12) ʻOku ʻofa mo māʻoniʻoni ʻa Sihova, ʻi heʻene peheé ʻoku ʻikai ai ke ne kaunoa ʻi he tauʻatāina ʻoku tau maʻu ki heʻetau ngaahi fili ʻoku faí.—Teu. 32:4; 2 Kol. 3:17.

Ko e hā leva naʻe ʻuhinga ki ai ʻa Paula ʻi heʻene pehē ko Sihová “ʻe ʻikai te ne tuku ke ʻahiʻahiʻi kimoutolu ʻo fakalaka atu ia ʻi he meʻa ʻoku malava ke mou kātekiná”? ʻI hení, naʻe fakamatalaʻi ʻe Paula ʻa e meʻa ʻe fai ʻe Sihova lolotonga ʻa e ngaahi ʻahiʻahí, kae ʻikai ko e ki muʻa ʻi he ngaahi ʻahiʻahí.a (Sio ki he fakamatala ʻi lalo.) Kapau te tau falala kia Sihova, te ne tokoniʻi kitautolu ʻi ha faʻahinga ʻahiʻahi pē ʻi heʻetau moʻuí. (Saame 55:22) Te tau sivisiviʻi ʻi he taimí ni ʻa e ʻuhinga ʻe ua naʻe lava ke lea pehē ai ʻa Paulá.

Ko e ʻuhinga ʻuluakí he ko e ngaahi ʻahiʻahi ʻoku tau hokosiá “ʻoku anga-maheni ki ai ʻa e tangatá.” Koeʻuhí ko ʻetau moʻui ʻi he fokotuʻutuʻu ʻa Sētané, te tau hokosia kotoa ha ngaahi tuʻunga faingataʻa, ʻo aʻu nai ki ha ngaahi fakatamaki. Ka ʻo kapau te tau falala kia Sihova, ʻe lava ke tau kātekina ʻa e ngaahi ʻahiʻahi ko ení pea hanganaki mateaki. (1 Pita 5:8, 9) ʻI he ngaahi veesi ki muʻa ʻo e 1 Kolinitō vahe 10, naʻe tohi ai ʻa Paula ʻo fekauʻaki mo e ngaahi ʻahiʻahi ʻe niʻihi naʻe fehangahangai mo e kau ʻIsilelí ʻi he toafá. (1 Kol. 10:6-11) Ko e faʻahinga naʻe falala kia Sihová naʻe lava ke nau kātekina ʻa e ngaahi ʻahiʻahi ko iá. Ka naʻe talangataʻa ʻa e kau ʻIsileli ʻe niʻihi kia Sihova. Naʻe ʻikai ke nau hanganaki mateaki ai pē koeʻuhí he naʻe ʻikai ke nau falala kiate ia.

Ko e ʻuhinga hono uá “ko e ʻOtuá ʻoku faitōnunga.” ʻOku ʻuhinga eni ki he hā? ʻI heʻetau sio ki he anga hono tokangaʻi ʻe Sihova ʻene kau sevānití ʻi he tukuʻau mai ʻa e hisitōliá, ʻoku tau ʻiloʻi ai ʻokú ne tokoniʻi mateaki ʻa e faʻahinga ʻoku ‘ʻofa kiate ia, mo tauhi ʻene ngaahi tuʻutuʻuní.’ (Teu. 7:9) ʻOku tau ʻiloʻi ai ʻoku fakahoko maʻu pē ʻe Sihova ʻene ngaahi talaʻofá. (Sios. 23:14) ʻE lava ke tau fakapapauʻi ai (1) ʻE ʻikai ke fakaʻatā ʻe Sihova ha ʻahiʻahi ʻo fuʻu faingataʻa ke tau taʻemalava ʻo kātekina ia, pea (2) te ne “ʻai foki mo ha haoʻanga” maʻatautolu.

ʻOku anga-fēfē hono hanga ʻe Sihova ʻo “ʻai foki mo ha haoʻanga” maʻá e faʻahinga ʻoku falala kiate iá? Ko e moʻoni, ʻe lava ke ne toʻo atu ʻa e ʻahiʻahí. Kae manatuʻi, naʻe pehē ʻe Paula ʻe hanga ʻe Sihova ʻo “ʻai foki mo ha haoʻanga koeʻuhi ke mou malava ai ke kātakiʻi ia.” Ko ia ai, ʻoku faʻa hanga ʻe Sihova ʻo ʻai ha haoʻanga maʻatautolu ʻaki hono fakaivimālohiʻi kitautolu ke tau kei lava ʻo mateaki ai pē. Tau lāulea ki ha niʻihi ʻo e ngaahi founga ʻokú ne fai ai ení.

• ʻOku hanga ʻe Sihova ʻo “fakafiemālieʻi kitautolu ʻi he kotoa ʻo ʻetau mamahí.” (2 Kol. 1:3, 4) ʻOku lava ke ne fakanonga hotau ʻatamaí, lotó mo e ngaahi ongoʻí fakafou ʻi he Tohi Tapú, ko hono laumālie māʻoniʻoní mo e tamaioʻeiki anga-tonú.—Māt. 24:45; Sione 14:16, fakamatala ʻi lalo; Loma 15:4.

• ʻOku lava ke ngāueʻaki ʻe Sihova hono laumālie māʻoniʻoní ke tataki kitautolu. (Sione 14:26) ʻOku lava ʻe he laumālie māʻoniʻoní ke ne tokoniʻi kitautolu ke tau manatuʻi ʻa e ngaahi fakamatala Fakatohitapú mo e ngaahi tefitoʻi moʻoní, koeʻuhi ke tau lava ʻo fai ha ngaahi fili ʻoku fakapotopotó.

• ʻOku lava ʻe Sihova ke ne ngāueʻaki ʻene kau ʻāngeló ke tokoniʻi kitautolu.—Hep. 1:14.

• ʻOku lava ʻe Sihova ke ne ngāueʻaki hotau fanga tokouá mo e fanga tuofāfiné ke tokoniʻi kitautolu. Te nau lava ʻo fakaivimālohiʻi kitautolu ʻi he meʻa ʻoku nau leaʻakí mo e meʻa ʻoku nau faí.—Kol. 4:11.

Ko ia, ko e hā kuo tau ako mei he ngaahi lea ʻa Paula ʻi he 1 Kolinitō 10:13? ʻOku ʻikai ke fili ʻe Sihova ʻa e ngaahi ʻahiʻahi te tau fehangahangai mo iá. Ka ʻoku lava ke tau fakapapauʻi kapau te tau falala kia Sihova, ʻe lava ke tau kātekina ha faʻahinga ʻahiʻahi pē. ʻOku tau ʻiloʻi ʻe hanga ʻe Sihova ʻo ʻai maʻu pē ha haoʻanga maʻatautolu koeʻuhí ke tau kei lava ʻo mateaki ai pē kiate ia.