‘Mou Ō ʻo Ngaohi Ākonga’

1-2. (a) Fakatatau ki he fekau ʻa Sīsū ʻoku lēkooti ʻi he Mātiu 28:18-20, ko e hā ʻa e taumuʻa tefito ʻa e fakatahaʻanga Kalisitiané? (e) Ko e hā ʻa e ngaahi fehuʻi te tau lāulea ki ai ʻi he kupu ko ení?

KUO pau pē naʻe mātuʻaki fiefia ʻa e kau ʻapositoló ʻi heʻenau fakatahataha atu ki ha veʻe moʻunga. Hili hono fokotuʻu hake ʻo Sīsuú, naʻá ne fokotuʻutuʻu ke nau fetaulaki ʻi he feituʻu ko iá. (Māt. 28:16) Mahalo ko e taimi ia “naʻá ne hā [ai] ki he fanga tokoua ʻe toko 500 tupu ʻi he foʻi taimi pē ʻe taha.” (1 Kol. 15:6) Ko e hā naʻe kole ai ʻe Sīsū ki heʻene kau ākongá ke nau fetaulaki ki aí? Ke ʻoange kiate kinautolu ʻa e fekau fakafiefia: “Ko ia ai, mou ō ʻo ngaohi ko e kau ākonga ʻa e kakai ʻo e ngaahi puleʻanga kotoa pē.”​—Lau ʻa e Mātiu 28:18-20.

² Ko e kau ākonga naʻa nau fanongo ki he ngaahi lea ʻa Sīsuú naʻa nau hoko ko e konga ʻo e fakatahaʻanga Kalisitiane ʻi he ʻuluaki senitulí. Ko e taumuʻa tefito ʻa e fakatahaʻanga ko iá ke ngaohi ha kau ākonga tokolahi ange ʻa Kalaisi.b ʻI he ʻahó ni, ʻoku ʻi ai ʻa e fakatahaʻanga Kalisitiane ʻe laui mano ʻi he kotoa ʻo e māmaní pea ʻoku kei tatau pē ʻenau taumuʻa tefitó. ʻI he kupu ko ení, te tau lāulea ki he fehuʻi ʻe fā: Ko e hā ʻoku mātuʻaki mahuʻinga ai ʻa e ngaohi ākongá? Ko e hā ʻoku kau ki aí? ʻOku kau ʻa e kotoa ʻo e kau Kalisitiané ʻi he ngaohi ākongá? Pea ko e hā ʻoku fiemaʻu ai ke tau kātaki ʻi he ngāue ko ení?

KO E HĀ ʻOKU MĀTUʻAKI MAHUʻINGA AI ʻA E NGAOHI ĀKONGÁ?

3. Fakatatau ki he Sione 14:6 mo e 17:3, ko e hā ʻoku mātuʻaki mahuʻinga ai ʻa e ngāue ngaohi ākongá?

³ Ko e hā ʻoku mātuʻaki mahuʻinga ai ʻa e ngāue ngaohi ākongá? Koeʻuhi ko e kau ākonga pē ʻa Kalaisí ʻe lava ke nau hoko ko e kaumeʻa ʻo e ʻOtuá. Tānaki atu ki aí, ko e faʻahinga ʻoku nau muimui ʻia Kalaisí ʻoku nau fakaleleiʻi ʻenau moʻuí he taimí ni pea maʻu ʻa e ʻamanaki ʻo e fiefia ʻi he moʻui taʻengata ʻi he kahaʻú. (Lau ʻa e Sione 14:6; 17:3.) Ko e moʻoni, kuo tuku mai ʻe Sīsū ha fatongia mahuʻinga kiate kitautolu, ka ʻoku ʻikai ke tau fai ʻa e ngāué ni ʻiate kitautolu pē. Naʻe tohi ʻe he ʻapositolo ko Paulá fekauʻaki mo ia mo hano kaungāngāue ofi ʻe taha: “Ko e ongo kaungāngāue kimaua ʻo e ʻOtuá.” (1 Kol. 3:9) Ko ha monū ia kuo ʻoange ʻe Sihova mo Kalaisi ki he faʻahinga ʻo e tangata taʻehaohaoá!

4. Ko e hā ʻe lava ke tau ako mei he hokosia ʻa Ivan mo Matilde?

⁴ Ko e ngāue ngaohi ākongá ʻe lava ke tau maʻu ai ʻa e fiefia lahi. Fakakaukau ki he faʻifaʻitakiʻanga ʻa Ivan mo hono uaifí, ʻa Matilde, ʻi Kolomupia. Naʻá na faifakamoʻoni ki ha kiʻi talavou ko Davier, ʻa ia naʻá ne tala ange kiate kinaua: “ʻOku ou loto ke fai ʻa e ngaahi liliu ʻi heʻeku moʻuí, ka ʻoku ʻikai te u lava.” Ko Davier ko ha tokotaha fuhu naʻá ne ngāueʻaki ʻa e faitoʻo kona tapú, inu tōtuʻa peá ne nonofo mo hono kaumeʻa, ko Erika. ʻOku fakamatala ʻa Ivan: “Naʻá ma kamata ʻaʻahi kiate ia ʻi hono kiʻi kolo tuʻu mavahé, ʻa ia naʻá ma heka pasikala ki ai ʻi he laui houa ʻi he ngaahi hala pelepela. Hili hono fakatokangaʻi ʻa e fakalakalaka ʻa e tōʻonga ʻa Davier, naʻe kau ʻa Erika he ako Tohi Tapú.” ʻI he faai atu ʻa e taimí, naʻe tuku ʻe Davier hono ngāueʻaki ʻa e faitoʻo kona tapú, inú mo e fuhú. Naʻá ne mali foki mo Erika. ʻOku pehē ʻe Matilde: “ʻI he papitaiso ʻa Davier mo Erika ʻi he 2016, naʻá ma manatuʻi ʻa e meʻa naʻe leaʻaki ʻe Davier ki muʻá, ‘ʻOku ou loto ke liliu, ka ʻoku ʻikai te u lava.’ Naʻe ʻikai lava ke ma kei mapukepuke homa loʻimatá.” ʻOku ʻikai ha veiveiua, ʻoku tau ongoʻi fiefia lahi ʻi he taimi ʻoku tau tokoniʻi ai ʻa e kakaí ke nau hoko ko e kau ākonga ʻa Kalaisí.

KO E HĀ ʻOKU KAU KI HE NGAOHI ĀKONGÁ?

5. Ko e hā ʻa e ʻuluaki sitepu ʻo e ngaohi ākongá?

⁵ Ko e ʻuluaki sitepu ʻo e ngaohi ākongá ko e “kumi” ki he faʻahinga ʻoku nau loto-totonú. (Māt. 10:11) ʻOku tau fakamoʻoniʻi ʻetau hoko moʻoni ko e Kau Fakamoʻoni ʻa Sihová ʻaki ʻetau faifakamoʻoni ki he tokotaha kotoa ʻoku tau fetaulaki mo iá. ʻOku tau fakamoʻoniʻi ko e kau Kalisitiane moʻoni kitautolu ʻaki ʻetau muimui ki he fekau ʻa Kalaisi ke malangá.

6. Ko e hā ʻe lava ke tokoni kiate kitautolu ke lavameʻa ʻi he ngāue fakafaifekaú?

⁶ ʻOku ʻi ai ʻa e kakai ʻe niʻihi ʻoku nau vēkeveke ke ako ʻa e ngaahi moʻoni Fakatohitapú, ka ko e tokolahi ʻoku tau fetaulaki mo iá ʻoku hā ngali ʻoku ʻikai ke nau tokanga ʻi he ʻuluaki taimí. ʻE fiemaʻu nai ke tau langaʻi ʻenau mahuʻingaʻiá. Ke hoko ʻo lavameʻa ʻi he ngāue fakafaifekaú, ʻoku fiemaʻu ke tau teuteu lelei. Fili ʻa e ngaahi kaveinga pau ʻa ia ʻoku ngalingali fakamānako ki he faʻahinga te ke fetaulaki mo iá. Pea palani ʻa e founga te ke fakafeʻiloaki ai ʻa e kaveingá.

7. ʻE anga-fēfē nai haʻo kamataʻi ha fetalanoaʻaki mo ha tokotaha, pea ko e hā ʻokú ke fakakaukau ai ʻoku mahuʻinga ke fanongo mo fakahāhā ʻa e fakaʻapaʻapá?

⁷ Ko e fakatātaá, te ke ʻeke nai ki ha tokotaha-ʻapi: “ʻE sai pē ke ke fakahaaʻi mai hoʻo fakakaukau fekauʻaki mo e meʻá ni? Ko e ngaahi palopalema lahi ʻoku tau fehangahangai mo ia he ʻaho ní ʻokú ne uesia ʻa e kakai takatakai he māmaní. ʻOkú ke fakakaukau ʻe fiemaʻu ha puleʻanga fakaetangata ke ne fakaleleiʻi ʻa e ngaahi palopalema he māmaní?” ʻE lava leva ke ke lāulea ki he Taniela 2:44. Pe te ke pehē nai ki ha kaungāʻapi: “ʻOkú ke pehē ko e hā ʻa e kī ki hono ʻohake ha fānau talangofua? Te u fiefia ke fanongo ki hoʻo fakakaukaú?” Lāulea leva ki he Teutalōnome 6:6, 7. Pe ko e hā pē ʻa e kaveinga ʻokú ke fili ke lāulea ki aí, fakakaukau fekauʻaki mo e kakai te nau fanongo atú. Sioloto atu ki he founga te nau maʻu ʻaonga ai mei hono ako ʻa e meʻa ʻoku akoʻi moʻoni ʻe he Tohi Tapú. ʻI he talanoa mo kinautolú, ʻoku mahuʻinga ke ke fanongo kiate kinautolu pea fakaʻapaʻapaʻi ʻenau vakaí. ʻI he founga ko iá te ke mahinoʻi lelei ange ai kinautolu pea ngalingali te nau fie fanongo ange kiate koe.

8. Ko e hā kuo pau ai ke tau kīvoi ʻi hono fai ʻa e ngaahi toe ʻaʻahí?

⁸ Ki muʻa ke fili ha tokotaha ke ako ʻa e Tohi Tapú, ʻoku fiemaʻu nai ke ke vaheʻi ʻa e taimi mo e feinga ʻi hono fai ʻa e ngaahi toe ʻaʻahí. Ko e hā hono ʻuhingá? Koeʻuhí heʻikai nai faingamālie ʻa e kakaí ʻi he taimi ʻoku tau toe ʻaʻahi atu aí. Pehē foki, ʻe fiemaʻu nai ke ke toutou foki ki he tokotaha-ʻapí ki muʻa ke ne ongoʻi fiemālie ke tali ha ako Tohi Tapu. Manatuʻi, ko ha fuʻu ʻakau ʻoku ngalingali ʻe tupu ʻi he taimi ʻe fuʻifuʻi maʻu pē aí. ʻI he tuʻunga meimei tatau, ko e ʻofa ʻa ha tokotaha mahuʻingaʻia kia Sihova mo Kalaisi ʻoku ngalingali ʻe tupulaki ange ʻi heʻetau lāulea maʻu pē ki he Folofola ʻa e ʻOtuá mo e tokotaha ko iá.

ʻOKU KAU ʻA E KOTOA ʻO E KAU KALISITIANÉ ʻI HE NGAOHI ĀKONGÁ?

9-10. Ko e hā ʻoku lava ai ke tau pehē ko e kau faifekau Kalisitiané kotoa ʻoku nau kau ʻi he kumi ki he faʻahinga loto-totonú?

⁹ Ko e kau faifekau Kalisitiané kotoa ʻoku nau kau ʻi he tokoni ke kumi ki he faʻahinga loto-totonú. ʻOku lava ke tau fakahoa ʻa e ngāué ni ki hono kumi ha kiʻi leka mole. ʻI he founga fē? Fakakaukau atu ki ha kiʻi tamasiʻi taʻu tolu naʻe hē mei honau ʻapí. ʻOku fakafuofua ki he kakai ʻe toko 500 naʻe kau ʻi hono kumi iá. Faai atu pē, hili ha houa ʻe 20 nai mei he mole ʻa e kiʻi leká, naʻe maʻu ia ʻe ha tokotaha mei ha ngoue koane. Naʻe fakafisi ʻa e tokotaha ko iá ke fakahīkihikiʻi ia koeʻuhi ko ʻene maʻu ʻa e kiʻi tamasiʻí. Naʻá ne pehē: “Naʻe maʻu ia koeʻuhi ko e fekumi ʻa e kakai ʻe lauingeau.”

¹⁰ Ko e kakai tokolahi ʻoku nau hangē ko e kiʻi leka ko iá. ʻOku nau ongoʻi ʻoku nau mole. ʻOku ʻikai haʻanau ʻamanaki, ka ʻoku nau fiemaʻu tokoni. (ʻEf. 2:12) Laka hake ʻi he toko valu miliona ʻo kitautolu ʻoku kau ʻi he feinga ke maʻu ʻa e faʻahinga taau ko ení. ʻOku ʻikai nai ke ke maʻu ʻe koe ha taha te ne ako ʻa e Tohi Tapú mo koe. Kae kehe, ko e kau malanga kehe ʻoku nau ngāue ʻi he feituʻu ngāue tatau te nau maʻu nai ha taha ʻokú ne loto ke ako ʻa e moʻoni mei he Folofola ʻa e ʻOtuá. ʻI he taimi ʻoku fetaulaki ai ha tokoua pe tuofefine mo ha taha ʻoku hoko ko ha ākonga ʻa Kalaisi, ʻoku maʻu ʻe he tokotaha kotoa ʻoku kau ʻi he fekumí ha ʻuhinga lelei ke fiefia.

11. Neongo kapau ʻoku ʻikai ke ke fai ha ako Tohi Tapu, ko e hā ʻa e ngaahi founga kehe ʻe lava ke ke tokoni ai ʻi he ngaohi ākongá?

¹¹ Neongo kapau ʻoku ʻikai ke ke fakahoko he taimí ni ha ako Tohi Tapu, ʻe lava ke ke tokoni ʻi he ngaohi ākongá ʻi he ngaahi founga kehe. Ko e fakatātaá, ʻe lava ke ke talitali lelei ʻa e faʻahinga foʻoú pea fakakaumeʻa kiate kinautolu ʻi heʻenau haʻu ki he Fale Fakatahaʻangá. ʻI he founga ko iá ʻe lava ai ke ke tokoni ki hono fakatuipauʻi kinautolu ko e ʻofá ʻokú ne fakaʻilongaʻi kitautolu ko e kau Kalisitiane moʻoní. (Sione 13:34, 35) Ko e ngaahi tali ʻokú ke fai ʻi he lolotonga ʻa e fakatahá, neongo ʻoku nounou, ka ʻoku lava ke tokoni ia ki he faʻahinga foʻoú ke fakahaaʻi ʻenau tuipaú ʻi ha founga loto-moʻoni mo anga-fakaʻapaʻapa. ʻE lava foki ke ke ngāue fakataha mo ha tokotaha malanga foʻou ʻi he ngāue fakafaifekaú pea tokoniʻi ia ke ngāueʻaki ʻa e Folofolá ke fakaʻuhinga mo e kakaí. ʻI hono fai iá, te ke akoʻi ai ia ke ne faʻifaʻitaki kia Kalaisi.​—Luke 10:25-28.

12. ʻOku tau fiemaʻu ha ngaahi malava makehe ke ngaohi ākonga? Fakamatalaʻi.

¹² ʻOku ʻikai totonu ke ʻi ai ha taha ʻo kitautolu te ne fakakaukau ʻoku fiemaʻu ke tau maʻu ha ngaahi malava makehe ke akoʻi ʻa e niʻihi kehé ke nau hoko ko e kau ākonga ʻa Sīsū. He ko e hā? Fakakaukau ki he faʻifaʻitakiʻanga ʻa Faustina, ʻoku nofo ʻi Polivia. Naʻe ʻikai lava ke ne lautohi ʻi heʻene kamata feohi mo e Kau Fakamoʻoni ʻa Sihová. Talu mei ai, kuó ne ako ke kiʻi poto he lautohí. ʻOkú ne ʻosi papitaiso he taimí ni, pea ʻokú ne saiʻia ke akoʻi ʻa e niʻihi kehé. ʻOkú ne faʻa fai ʻa e ako Tohi Tapu ʻe nima he uike taki taha. Neongo ʻoku ʻikai lava ʻa Faustina ʻo lautohi lelei ʻo hangē ko e tokolahi taha ʻo ʻene kau akó, kuó ne tokoniʻi ʻa e toko ono ke nau aʻu ʻo papitaiso.​—Luke 10:21.

13. Neongo kapau ʻoku tau fuʻu femoʻuekina, ko e hā ʻa e ngaahi tāpuaki ʻe niʻihi ʻoku lava ke tau maʻu ʻi he ngāue ngaohi ākongá?

¹³ Ko e kau Kalisitiane tokolahi ʻoku nau fuʻu femoʻuekina ʻi hono tokangaʻi ʻa e ngaahi fatongia mahuʻinga. Neongo ia, ʻoku nau vaheʻi ʻa e taimi ke fakahoko ai ʻa e ngaahi ako Tohi Tapú, pea ʻoku nau maʻu ʻa e fiefia lahi mei ai. Fakatokangaʻi ʻa e faʻifaʻitakiʻanga ʻa Melanie. Ko ha mātuʻa taʻehoa ia, ʻokú ne tauhi ʻene kiʻi taʻahine taʻu valu ʻi ʻAlasikā. ʻOku ʻi ai foki mo ʻene ngāue paʻanga taimi-kakato pea tokoni ʻi hono tokangaʻi ʻene tamaí ʻoku kanisā. Ko Melanie pē ʻa e Fakamoʻoni ʻi hono kiʻi kolo tuʻu mavahé. Naʻá ne faʻa lotu ki ha mālohi ke fekuki mo e momokó pea ʻalu ʻi he ngāue fakamalangá koeʻuhi naʻá ne loto moʻoni ke maʻu ha taha ʻe lava ke ne ako Tohi Tapu mo ia. Faai atu pē naʻá ne fetaulaki mo Sara, naʻá ne fiefia ke ʻilo ʻoku ʻi ai ʻa e huafa fakafoʻituitui ʻo e ʻOtuá. Hili ha vahaʻa taimi, naʻe tali ʻe Sara ha ako Tohi Tapu. ʻOku pehē ʻe Melanie: “ʻI he ngaahi efiafi Falaité, ʻoku ou helaʻia, ka naʻá ku maʻu ʻaonga mo ʻeku kiʻi taʻahiné ʻi he ʻalu ke fakahoko ʻa e ako ko iá. Naʻá ma fiefia ʻi hono kumi ʻa e tali ki he ngaahi fehuʻi ʻa Sara, pea naʻá ma fiefia lahi ke sio ki heʻene hoko ko e kaumeʻa ʻo Sihová.” Naʻe fehangahangai loto-toʻa ʻa Sara mo e fakafepakí, mavahe mei hono siasí, pea papitaiso.

ʻUHINGA ʻOKU FIEMAʻU AI ʻA E KĀTAKÍ ʻI HE NGAOHI ĀKONGÁ

14. (a) ʻOku anga-fēfē ʻa e hangē ʻa e ngaohi ākongá ko e toutaí? (e) Ko e hā ʻa e kaunga ʻo e lea ʻa Paula ʻi he 2 Tīmote 4:1, 2 kiate koé?

¹⁴ Neongo kapau ʻoku hā ngali ʻikai ola lelei hoʻo ngāue fakafaifekaú, ʻoua ʻe siva hoʻo ʻamanakí ʻi he kumi ki he faʻahinga ʻe lava ke nau hoko ko e kau ākongá. Manatuʻi ʻoku fakahoa ʻe Sīsū ʻa e ngaohi ākongá ki he toutaí. ʻE fakamoleki nai ʻe he kau toutaí ʻa e ngaahi houa lahi ki muʻa ke nau maʻu ha ika. ʻOku nau faʻa ngāue ʻo aʻu ki he fuoloa ʻa e poʻulí pe pongipongia, pea ʻi he taimi ʻe niʻihi ʻoku nau folau ki he ngaahi feituʻu mamaʻo. (Luke 5:5) ʻI he founga tatau, ko e niʻihi ʻo e kau ngaohi ākongá ʻoku nau fakamoleki ʻa e ngaahi houa lahi ʻi he “toutai” anga-kātaki ʻi he ngaahi taimi kehekehe pea ʻi he ngaahi feituʻu kehekehe. Ko e hā hono ʻuhingá? Ke lahi ange ʻa e faingamālie ke nau fetaulaki mo e kakaí. Ko e faʻahinga ʻoku nau toe feinga lahi angé ʻoku faʻa fakapaleʻi kinautolu ʻaki ʻa e fetaulaki mo e kakai ʻoku nau mahuʻingaʻia ʻi heʻetau pōpoakí. ʻE lava ke ke feinga ke malanga ʻi ha taimi ʻo e ʻahó ʻoku ngalingali te ke fetaulaki ange ai mo e kakaí pe ʻi ha feituʻu ʻa ia ngalingali te ke maʻu ai kinautolu?​—Lau ʻa e 2 Tīmote 4:1, 2.

15. Ko e hā ʻoku fiemaʻu ai ʻa e kātaki ki hono fakahoko ʻa e ngaahi ako Tohi Tapú?

¹⁵ Ko e hā ʻoku fiemaʻu ai ʻa e kātakí ki hono fakahoko ʻa e ngaahi ako Tohi Tapú? Ko e ʻuhinga ʻe taha ʻoku fiemaʻu ke tau fai ʻa e meʻa lahi ange ʻi hono tokoniʻi pē ʻa e tokotaha akó ke ne ʻilo mo ʻofa ʻi he ngaahi tokāteline ʻoku maʻu ʻi he Tohi Tapú. ʻOku fiemaʻu ke tau tokoniʻi ʻa e tokotaha akó ke ne ʻiloʻi pea ʻofa ʻi he Faʻutohi ʻo e Tohi Tapú, ʻa Sihova. Pea tānaki atu ki hono akoʻi ha tokotaha ako fekauʻaki mo e meʻa ʻoku fiemaʻu ʻe Sīsū mei heʻene kau ākongá, ʻoku fiemaʻu ke tau tokoniʻi ʻa e tokotaha akó ke ne ʻiloʻi ʻa e founga ke moʻui ai ʻi he tuʻunga ko ha Kalisitiane moʻoní. Kuo pau ke tau tokoniʻi anga-kātaki ia ʻi heʻene feinga ke ngāueʻaki ʻa e ngaahi tefitoʻi moʻoni Fakatohitapú. Ko e niʻihi ʻoku malava ke nau liliu ʻenau fakakaukaú mo e tōʻongá ʻi he laui māhina siʻi pē; ko e niʻihi kehe ʻoku fuoloa ange.

16. Ko e hā naʻá ke ako mei he hokosia ʻa Raúl?

¹⁶ Ko ha misinale ʻi Pelū ko ʻene hokosiá ʻoku fakatātaaʻi ai ʻa e ʻaonga ʻo e kātakí. “Naʻá ku ako ʻa e tohi ako ʻe uá mo ha tokotaha ako Tohi Tapu ko Raúl,” ko e lau ia ʻa e misinalé. “Ka naʻá ne kei fehangahangai mo e ngaahi pole lahi ʻi heʻene moʻuí. Naʻe palopalema ʻene nofo malí, leakovi, pea ko ʻene fānaú naʻe ʻikai ke nau fakaʻapaʻapaʻi ia. Naʻá ne haʻu maʻu pē ki he fakatahá, ko ia naʻe hokohoko atu ʻeku ʻaʻahi kiate ia ke tokoniʻi ia mo hono fāmilí. Laka hake ʻi he taʻu ʻe tolu hili ʻeku fetaulaki mo iá, naʻá ne taau ke papitaiso.”

17. Ko e hā te tau lāulea ki ai ʻi he kupu hono hokó?

¹⁷ Naʻe tala mai ʻe Sīsū ke tau “ō ʻo ngaohi ko e kau ākonga ʻa e kakai ʻo e ngaahi puleʻanga kotoa pē.” Ke fakakakato ʻa e fekau ko iá, ʻoku tau faʻa talanoa mo e kakai ʻa ia ko e anga ʻenau fakakaukaú ʻoku kehe ʻaupito ia mei haʻatautolú, kau ai ʻa e faʻahinga ʻoku ʻikai ke nau kau ki ha faʻahinga kautaha fakalotu pe ʻoku ʻikai nai ke nau tui ʻoku ʻi ai ha ʻOtua. Ko e kupu hono hokó te tau lāulea ai ki he founga ʻe lava ke tau ʻoatu ai ʻa e ongoongo leleí ki he kakai mei he ngaahi puipuituʻa kehekehé.