Vahe 72
Fekauʻi Atu ʻe Sīsū ʻa e Toko 70
KO E faʻahitaʻu fakatōlau ia ʻo e 32 T.S., ʻa ia ko e taʻu ʻe tolu kakato ia talu mei he papitaiso ʻo Sīsuú. Naʻá ne toki maʻu foki mo ʻene kau ākongá ʻa e Kātoanga Fale-Louʻakaú ʻi Selusalema, pea ʻoku ngalingali naʻa nau kei ʻi he feituʻu ofi ai. Ko hono moʻoní, naʻe fakamoleki ʻe Sīsū ʻa e lahi taha ʻo e toenga māhina ʻe ono ʻo ʻene ngāue fakafaifekaú ʻi Siutea pe ʻi he tafaʻaki ʻe taha ʻo e Vaitafe Sioataní he vahefonua ʻo Pēleá. Naʻe fiemaʻu foki ke ʻosi mo e feituʻu ko ʻení hono malangaʻi.
Ko e moʻoni, ʻi he hili ʻa e Laka-Atu ʻo e 30 T.S., naʻe fakamoleki ʻe Sīsū ʻa e meimei māhina ʻe valu heʻene malanga ʻi Siutea. Ka ʻi he hili ʻa e feinga ʻa e kau Siú ke tāmateʻi ia ʻi he Laka-Atu ʻo e 31 T.S., naʻá ne fakamoleki ʻe ia ʻa e taʻu ʻe taha mo e konga hono hokó ʻi heʻene faiako ʻo meimei ʻi Kāleli ʻataʻatā pē. ʻI he lolotonga ʻa e taimi ko iá, naʻá ne fakatupu ai ha kautaha akoʻi-lelei mo lahi ʻo e kau malangá, ʻa ia ko e meʻa naʻe ʻikai te ne maʻu ki muʻa. Ko ia naʻá ne kamata leva ha feingangāue fakamoʻoni fakaʻosi lahi ʻaupito ʻi Siutea.
Naʻe kamataʻi ʻe Sīsū ʻa e feingangāué ni ʻaki ʻene fili ʻa e kau ākonga ʻe toko 70 peá ne fekauʻi atu kinautolu ʻo tautau toko ua. Ko ia, naʻe feʻunga mo e hoangāue fakakātoa ʻe 35 ʻo e kau malangaʻi ʻo e Puleʻangá ke nau ngāueʻi ʻa e feituʻú ni. Ko e faʻahingá ni ke nau ʻalu muʻomuʻa ki he ngaahi koló mo e feituʻu kotoa pē ʻa ia naʻe fokotuʻutuʻu ʻe Sīsū ke ne toki ʻalu fakataha ki ai mo ʻene kau ʻaposetoló.
ʻI he ʻikai te ne fakahinohino ʻa e toko 70 ke nau ō ki he ngaahi sinakoké, naʻe fekau ʻe Sīsū ia kinautolu ke nau hū ki he ngaahi ʻapi tāutaha, ʻaki ʻene pehē: “Pea ʻilonga ha fale te mou hū ki ai mou fuofua lea ʻo pehē, ‘Siʻotoʻofa ki he falé ni.’ Pea kapau ʻoku ʻi ai ha hoa ʻo hoʻomou ʻofá, pea ʻe nofo kiate ia ʻa hoʻomou tāpuakí.” Ko e hā ʻenau pōpoakí? “Mou pehē kiate kinautolu,” ko e lea ia ʻa Sīsuú, “kuo ofi mai kiate kimoutolu ʻa e puleʻanga ʻo e ʻOtuá.” Fekauʻaki mo e ngāue ʻa e toko 70, ʻoku pehē ʻe he Matthew Henry’s Commentary: “Hangē pē ko honau Takí, ʻilonga ha feituʻu naʻa nau ʻaʻahi ki ai, naʻa nau malanga mei he fale ki he fale.”
Ko e ngaahi fakahinohino ʻa Sīsū ki he toko 70 ʻoku meimei tatau mo ia naʻá ne ʻoange ki he toko 12 ʻi heʻene fekauʻi atu ʻa e toko 12 ʻi ha feingangāue fakamalanga ʻi Kāleli he taʻu nai ʻe taha ki muʻa ai. Naʻe ʻikai ngata pē ʻi heʻene fakatokanga ki he toko 70 fekauʻaki mo e fakafepaki te nau fehangahangai mo iá, pea pehē ki hono teuʻi kinautolu ke fakahoko ʻa e pōpoakí ki he kau tauhiʻapí, ka naʻá ne toe fakaivia kinautolu ke fakamoʻui mahaki. Ko ia, ʻi he hili ha taimi siʻi pē ʻo e aʻu ki ai ʻa Sīsuú, naʻe vēkeveke ʻa e tokolahi ke fakafeʻiloaki ki he Pule ʻa ia ko ʻene kau ākongá ē naʻa nau malava ke fai ʻa e ngaahi meʻa fakaofo pehē.
Naʻe taimi nounou pē ʻa e malanga ʻa e toko 70 mo e ngāue muiaki atu ai ʻa Sīsuú. Ko ia naʻe kamata leva ke foki kia Sīsū ʻa e hoangāue ʻe 35 ʻo e kau malangaʻi ʻo e Puleʻangá. “ʻEiki,” naʻa nau lea fiefia, “naʻa mo e kau tēmenioó ʻoku nau vaivai kiate kimautolu koeʻuhi ko ho huafá.” ʻOku hā mahino naʻe fakatupu-fiefia kia Sīsū ʻa e ngāue lelei peheé ʻi hono lipooti maí, he naʻá ne tali: “Ne u toutou sio ki he tō ʻa Sētane mei he langí, ʻo hangē ha ʻuhilá. Ko eni kuó u tuku kiate kimoutolu ʻa e mafai ke mala ʻi he fanga ngata mo e fanga sikopio.”
Naʻe meaʻi ʻe Sīsū ko e hili hono fanauʻi ʻo e Puleʻanga ʻo e ʻOtuá ʻi he taimi ʻo e ngataʻangá, ʻe lī hifo ʻa Sētane mo ʻene kau tēmenioó mei hēvani. Ka ʻi hono lī hifo ko ʻeni ʻo e kau tēmeniō taʻehāmaí ni ʻe he faʻahinga pē ʻo e tangatá, ʻoku hangē pē ia ko hano toe fakapapauʻi ʻo e meʻa ʻe hokó. Ko ia ai, naʻe lave ʻa Sīsū ki he tō ʻa Sētane mei hēvani ʻi he kahaʻú ko ha meʻa papau ʻaupito. Ko ia, naʻe ʻi he ʻuhinga fakaefakaʻilonga ʻa hono foaki ʻo e mafai ki he toko 70 ke malaki ʻa e fanga ngatá mo e fanga sikopió. Ka, naʻe pehē ʻe Sīsū: “ʻOua te mou fiefia ʻi he meʻa ko iá, ʻa e vaivai ʻa e ngaahi faʻahikehé kiate kimoutolú, ka ko e meʻa ke mou fiefia aí, ko e tuʻu ʻa homou ngaahi hingoá ʻi he tohi ʻi hevāní.”
Naʻe fiefia ʻaupito ʻa Sīsū mo fakahīkihikiʻi fakahāhā ʻene Tamaí ʻi hono ngāueʻaki ʻene kau sevāniti anga-vaivaí ni ʻi ha founga mālohi pehē. ʻI heʻene hanga ki heʻene kau ākongá, naʻá ne pehē: “Monuʻiaā ʻa e ngaahi mata ʻoku sio ki he ngaahi meʻa ʻoku mou sioá. Seuke, ʻoku ou tala atu, kuo tokolahi ʻa e kau palōfita, mo e ngaahi tuʻi, naʻa nau feinga ke mamata ki he ngaahi meʻa ʻoku mou sioá, ka naʻe ʻikai te nau mātā, pea ke fanongo ki he ngaahi meʻa ʻoku mou fanongo ki aí, ka naʻe ʻikai te nau fanongoa.” Luke 10:1-24; Mātiu 10:1-42; Fakahā 12:7-12.
▪ Ko fē naʻe malanga ai ʻa Sīsū he lolotonga ʻo e ʻuluaki taʻu ʻe tolu ʻo ʻene ngāue fakafaifekaú, pea ko e hā ʻa e feituʻu naʻe aʻu ki ai ʻi heʻene māhina ʻe ono fakaʻosí?
▪ Ko fē naʻe fakahinohino ki ai ʻe Sīsū ʻa e toko 70 ke maʻu ai ʻa e kakaí?
▪ Ko e hā naʻe pehē ai ʻe Sīsū naʻá ne sio kuo tō ʻa Sētane mei hēvaní?
▪ ʻI he ʻuhinga fē naʻe malaki ai ʻe he toko 70 ʻa e fanga ngatá mo e fanga sikopió?