ʻAloʻi ʻo Sīsuú​—Founga ʻo ʻEne ʻOmai ʻa e Melinó

KO E fanongonongo ʻo e “melino . . . ki he kakai kuo hoifua” ki aí naʻe ʻikai ko e kikite pē ia ʻe taha naʻe fehokotaki mo e ʻaloʻi ʻo Sīsuú. ʻI he tānaki atu ki he meʻa naʻe fanongonongo ʻe he kau ʻāngeló ki he kau tauhi-sipi ne nau ʻohovalé, naʻe fai ʻe he kau talafekau fakahēvaní ha ngaahi fakamatala naʻe fakamānavaʻi fakaʻotua ʻo fekauʻaki mo Sīsū ʻi hono ʻaloʻí kia Mele mo hono husepānití ʻa Siosefa. Ko ha lāulea ki he ngaahi pōpoakí ni ʻe ʻai ai ke tau malava ʻo maʻu ha fakakaukau lahi ange ki he ʻaloʻi ʻo Sīsuú pea ke mahinoʻi ʻa e ʻuhinga moʻoni ʻoku tuʻu mei mui ʻi he talaʻofa fakaeʻāngelo ʻo e melino ki he kakaí.

Ki muʻa ʻi he ʻaloʻi ʻo Sīsuú, naʻa mo e ki muʻa ke ne hoko ʻo feitamá, naʻe ʻaʻahi ai kia Mele ha ʻāngelo ʻa ia ʻoku fakahaaʻi ʻe he Tohi Tapú ko Kepaleli. “Siʻotoʻofa, ʻa koe kuo ʻofeina: ʻoku ʻiate koe ʻa e ʻEiki” pe Sihova, ko e fetapa ange ia ʻa e ʻāngeló. Hangē ko ia te ke fakaʻuta atu nai ki aí, naʻe fakahohaʻasi lahi ʻa Mele ʻe he meʻá ni ʻo ne kiʻi ilifia nai. Ko e hā nai ʻa e ʻuhinga ʻo e fetapa ko iá?

Naʻe fakamatalaʻi ange ʻe Kepaleli: “Ko ʻeni, te ke tuʻituʻia, pea te ke ʻaloʻi ha tama, pea te ke fakahingoa ia ko Sisu. Pea ʻe hoko ko e lahi ʻa e toko taha ko ia; pea ʻe lau ia ko e ʻAlo ʻo e ʻEiki Taupotu; pea ʻe foaki kiate ia ʻe he ʻEiki ko e ʻOtua ʻa e taloni ʻo ʻene kui ko Tevita: pea te ne tuʻi ki he hako ʻo Sekope ʻo lauikuonga; pea ko ʻene pule ʻe ʻikai ngata.” Naʻe fehuʻi ange ʻe Mele pe ʻe lava fēfē ke hoko eni, koeʻuhi ko iá ko ha tāupoʻou, ne teʻeki ke ne mohe mo ha tangata. Naʻe tali ange ʻe Kepaleli ʻe tuʻituʻiaʻi ʻa e tamá fakafou ʻi he laumālie māʻoniʻoni ʻo e ʻOtuá. ʻE ʻikai ko ha kiʻi tama anga-maheni eni.​—Luke 1:28-35.

Ko ha Tuʻi Ne Tomuʻa Tala

Ko e ngaahi lea ʻa Kepalelí kuo pau pē naʻá ne tokoniʻi ʻa Mele ke ne ʻiloʻi ko e tama te ne fanauʻí ʻa e tokotaha naʻe fai ki ai ʻa e ngaahi kikite ʻi he kuonga muʻá. Ko hono fakahaaʻi ko ia ʻe ʻoange ʻe Sihova ki he tama ʻa Melé “ʻa e taloni ʻo ʻene kui ko Tevita” te ne ʻai ai ʻa Mele​—pea mo ha tokotaha Siu pē naʻe maheni mo e Tohi Tapú—​ke fakakaukau ʻo fekauʻaki mo e talaʻofa naʻe fai ʻe he ʻOtuá kia Tuʻi Tēvita ʻo ʻIsilelí.

Fakafou he palōfita ko Nētané, naʻe tala ai ʻe Sihova kia Tēvita: “ʻE fakapapau ho fale mo ho puleʻanga kiate koe ʻo taʻengata: ʻe fokotuʻu ho taloni ʻo taʻengata.” (2 Samiuela 7:4, 16) Naʻe fakahaaʻi ʻe Sihova fekauʻaki mo Tēvita: “Te u ʻai ke taʻengata hono famili, pea ko hono taloni ke hange ko e ngaahi ʻaho fakalangi. Ko hono hako ʻe taʻengata, pea ko hono taloni ʻe feʻao mo au ʻo hange ko e laʻa.” (Sāme 89:20, 29, 35, 36) Ko ia ai, naʻe ʻikai hokonoa pē ʻa e haʻu ʻa Mele pea pehē kia Siosefa mei he fale ʻo Tēvitá.

Naʻe ʻikai ko e ongo kikite pē eni ʻi he Ngaahi Konga Tohi Tapu Faka-Hepeluú ʻo fekauʻaki mo ha foha fakatuʻi ʻo Tēvita. Naʻe toe maheni nai ʻa Mele mo e kikite ʻa ʻAiseá: “Kuo ʻaloʻi mai ha Tama, kuo tuku mai ha Foha: pea ʻe ʻi hono uma ʻa e puleʻanga. Pea ko e huafa ʻe uiʻaki ko Fakaofo-ʻene-faleʻi, ko e Helo-ʻOtua, ko e Tamai Taʻengata, ko e ʻEiki ʻo e Melino. ʻE ʻikai fakangatangata ʻa e tupu o ʻene pule mo e melino, ʻene ʻafio ʻi he taloni ʻo Tevita, ‘mo ʻene pule ki hono puleʻanga, ke fokotuʻu ia, pea ke pouʻaki ʻa e fakakonisitutone mo e faitotonu, mei he taimi ni ʻo fai atu ki he taʻengata. Ko e fuaʻa ʻo Sihova Sapaoti te ne fai ʻa e meʻa ko ia.”​—Aisea 9:6, 7 (9:5, 6, PM).

Ko ia ai, ko e meʻa naʻe fanongonongo ʻe Kepaleli kia Melé, naʻe lahi ange ia ʻi hono fanauʻi fakaemana mai pē ʻo ha pēpē tangata. Ko ʻene tamá ʻe hoko ko e ʻea fakatuʻi ʻo Tuʻi Tēvitá​—ko e ʻea tuʻuloa mo taʻengata ki ha Puleʻanga kuo fokotuʻu fakaʻotua. Ko e ngaahi kikite ʻa Kepaleli fekauʻaki mo e ngafa ʻo Sīsū ʻi he kahaʻú ʻoku ʻi ai hono ʻuhinga lahi kia kitautolu kotoa.

ʻI hono ʻiloʻi ʻe Siosefa naʻe feitama ʻa hono uaifi ʻi he kahaʻú, naʻá ne fakapapauʻi ai ke fakangata ʻa ʻena fakamaʻú. Naʻá ne ʻiloʻi naʻe ʻikai ko hano foha koeʻuhi ko ia mo e fefine naʻá ne teu mali mo iá ne ʻikai ʻaupito ke na mohe. ʻE lava ke ke fakaʻuta atu kuo pau pē naʻe faingataʻa kia Siosefa ke ne tui ki he fakamatala ʻa Mele ʻo fekauʻaki mo ʻene feitamá. ʻOku pehē ʻe he fakamatala Kōsipelí: “Naʻe ha kiate ia ha angelo ʻa e ʻEiki ʻi he misi, ʻo ne pehe, ʻE Siosefa, hako ʻo Tevita, ʻoua naʻa ke teteki ke ʻomi ʻa Mele ko ho uaifi; he ko ia kuo ne tuʻituʻia ai ʻoku mei he Laumalie Maʻoniʻoni. Pea te ne ʻaloʻi ha tama, pea te ke fakahingoa ko Sisu; he ko ia ia te ne fakamoʻui hono kakai mei heʻenau ngāhi angahala.”​—Mātiu 1:20, 21.

ʻOku ʻikai tala ʻe he Tohi Tapú ʻa e lahi ʻo hono mahinoʻi ʻe Siosefa ʻa e founga ʻe hanga ai ʻe he tamasiʻí ʻo “fakamoʻui hono kakai mei heʻenau ngāhi angahala.” Neongo ia, naʻe feʻunga ʻa e pōpoakí ni ke fakapapauʻi ai kia Siosefa ko e faʻē ʻoku ʻamanekiná naʻá ne tonuhia mei ha faihala pē. Naʻá ne fai ʻa e meʻa naʻe fakahinohino ange ʻe he ʻāngeló ʻo ne ʻave ʻa Mele ki hono ʻapí, ko ha foʻi ngāue naʻe tatau mo hono fai ʻo e malí.

ʻI he tokoni ʻa e toe fakamatala ʻoku maʻu ʻi he Tohi Tapú, ʻoku lava ke tau mahinoʻi ai ʻa e meʻa naʻe ʻuhinga ki ai ʻa e ʻāngeló. ʻI he konga ki muʻa ʻo e hisitōlia ʻo e tangatá, naʻe poleʻi ai ʻe ha ʻāngelo angatuʻu ʻa e tuʻunga-hau ʻo Sihová. ʻOku fakahaaʻi ʻe he Ngaahi Konga Tohi Tapu Faka-Hepeluú naʻe taukaveʻi ʻe he tokotaha angatuʻú ni, ʻo kau ai mo e ngaahi meʻa kehe, naʻe taʻetotonu ʻa e founga pule ʻa e ʻOtuá pea heʻikai ha tangata te ne tauhi maʻu ʻene anga-tonu kia Sihová ʻi he taimi ʻe ʻahiʻahiʻi aí. (Senesi 3:2-5; Siope 1:6-12) Ko ʻĀtamá, ko e toko taha ia naʻe ʻikai te ne tauhi maʻu ʻene anga-tonú. Ko ha nunuʻa ʻo ʻene angahalá, ʻoku maʻu tukufakaholo ai ʻe he faʻahinga kotoa ʻo e tangatá ʻa e angahalá, pea ko e ikuʻanga ʻo e angahala ko iá ko e mate. (Loma 5:12; 6:23) Kae kehe, naʻe ʻaloʻi ʻa Sīsū taʻeʻiai haʻane angahala koeʻuhi ko hono tuʻituʻiaʻí naʻe ʻikai fakatupunga ia ʻe ha tamai fakaetangata. ʻI heʻene tukuange loto-lelei ʻa ʻene moʻui haohaoa fakaetangatá ko ha huhuʻi fehoanakimālie tofu pē mo e meʻa ko ia naʻe fakamoleki ʻe ʻĀtamá, naʻe ʻi ha tuʻunga ai ʻa Sīsū ke ne fakahaofi ʻa e tangatá mei heʻenau angahalá pea ʻoange ai kia kinautolu ʻa e ʻamanaki ko e moʻui taʻengata.​—1 Timote 2:3-6; Taitusi 3:6, 7; 1 Sione 2:25.

Lolotonga ʻene ngāue fakafaifekau ʻi he māmaní, naʻe ʻai ai ʻe Sīsū ke tomuʻa aʻusia ʻa e meʻa ʻe ʻuhinga ki ai ʻa hono toʻo ʻo e ngaahi nunuʻa ʻo e angahalá. Naʻá ne fakatauʻatāinaʻi ʻa e kakaí mei he alanga mahaki fakaesino kotoa pē pea aʻu ʻo ne fokotuʻu hake mo e maté. (Mātiu 4:23; Sione 11:1-44) Ko e ngaahi mana ko iá ko ha tomuʻa fakaʻali pē ia ʻo e meʻa te ne fai ʻi he kahaʻú. Naʻe pehē ʻe Sīsū tonu: “ʻOku ʻunu mai ha taimi, ʻa ia ʻe fanongo ai ki [hoku] leʻo ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai.”​—Sione 5:28, 29.

ʻOku fakamatalaʻi ʻe he talaʻofa ko ia ki ha toetuʻu ʻi he kahaʻú ʻa e ʻuhinga ʻoku hoko ai ʻa e ʻaloʻí​—pea tautefito ki he pekia—​ʻa Sīsuú ʻo mahuʻinga lahi taha kia kitautolú. Naʻe fekauʻi mai ʻe he ʻOtuá ʻa hono ʻAló ki he māmaní “koeʻuhi ke moʻui ʻa mamani ʻiate ia,” ko e lau ia ʻa e Sione 3:17. Ko e ongoongo fisifisimuʻa ko ení ʻokú ne fakamanatu mai kia kitautolu ʻa e fanongonongo naʻe fai ki he kau tauhi-sipi naʻa nau leʻohi ʻenau ngaahi tākangá ʻi he pō naʻe ʻaloʻi ai ʻa Sīsuú.

“Ogoogolelei oe Fiefia Lahi”

Ko e moʻoni ko e “ogoogolelei oe fiefia lahi” ki he faʻahinga ʻo e tangatá ʻa e taimi naʻe fanongonongo ai ʻe he kau ʻāngeló ʻa e ʻaloʻi ʻo ha “Fakamoui, aia ko Kalaisi koe Eiki.” (Luke 2:10, 11, PM) Ko e tamasiʻí ni te ne hoko ko e Mīsaia, ko e Palōfita lahi mo e Pule ʻa ia naʻe fuoloa e ʻamanaki ki ai ʻa e kakai ʻa e ʻOtuá. (Teutalonome 18:18; Maika 5:2) Ko ʻene moʻui mo ʻene pekia ʻi he māmaní ʻe fakahoko ai ha ngafa mahuʻinga ʻi hono fakatonuhiaʻi ʻa e tuʻunga-hau fakaleveleva ʻo Sihová, ʻo lava ai ke pehē ʻe he kau ʻāngeló: “Kolōlia ki he ʻOtua ʻi langi taupotu.”​—Luke 2:14.

Ko Sīsū, ʻa ia ʻoku ui ʻe he Tohi Tapú ko e “Atama ki mui,” naʻá ne fakahaaʻi ʻoku malava ki ha tangata ke faitōnunga kia Sihova naʻa mo e ʻi he malumalu ʻo e ʻahiʻahi fefeka tahá. (1 Kolinito 15:45) Naʻá ne fakamoʻoniʻi ai ko Sētané ko ha tokotaha-loi fulikivanu. Ko e ʻuhinga eni ki he fiefia ʻi he langí ʻi he haʻohaʻonga ʻo e kau ʻāngelo faitōnungá.

Kae kehe, tau foki angé ki he fehuʻí, “ʻOku ʻi ai moʻoni ha ʻamanaki ʻe fakahoko ʻa e fanongonongo fakaeʻāngelo ʻi he pō ʻaloʻi ʻo Sīsuú?” Ko e talí ko ha ʻio papau! Ko e melinó ko ha tuʻunga mātuʻaki fiemaʻu ia ki hono fakahoko ʻo e taumuʻa fakaʻotua ki he māmaní, ʻa ia ʻoku kau ai ʻa hono toe fakafoki mai ʻa e ngaahi tuʻunga fakaepalataisí. ʻI he taimi ʻe fakahoko ai ia ʻi māmani lahí, ʻe ueʻi ai ʻa e kakai kotoa pē ʻe he ʻofá mo e mateakí. Ko ia ai, ko e fakahoko ʻo e taumuʻa ʻa Sihová ʻoku toe ʻuhinga ia ko e fakangata ʻa e fakafepaki kotoa pē ki hono tuʻunga-haú. ʻOku ʻikai ko ha ongoongo lelei eni ki ha taha pē ʻoku faʻahi mo Sētane ʻi he fakamatematē ʻoku kovi ʻa e ngaahi tuʻunga ʻa Sihová. Kia kinautolu, ʻe ʻuhinga iá ko e fakaʻauha.​—Sāme 37:11; Palovepi 2:21, 22.

Kātaki ʻo fakatokangaʻi naʻe ʻikai ke tala ʻe he kau ʻāngeló ia ki he kau tauhi-sipí ʻe ʻi ai ʻa e melino mo e hōifua ki he tangata kotoa pē. ʻI hono kehé, naʻa nau fanongonongo ʻa e “melino . . . ki he kakai kuo hoifua ki ai.” ʻA ia ko e pehē, ʻi he lotolotonga ʻo e faʻahinga ʻoku hōifua ki ai ʻa e ʻOtuá peá ne loto-lelei kia kinautolu. Ko e faʻahinga ʻoku nau fakahāhā ʻa e tui moʻoni kia Sihová ʻoku nau hoko ko e kau muimui faitōnunga mo e kau faʻifaʻitaki kia Sīsū. Ko e kau tangata mo e kau fefine ko iá ʻoku nau loto-lelei ke fakahāhā ʻa e nima-homo pea mahinoʻi ʻa e niʻihi kehé, ʻo ʻikai ʻi ha ngaahi ʻaho siʻi pē ʻi he taʻu taki taha, ka ʻi he ʻaho kotoa pē.

Ko ha Laumālie Faka-Kalisitiane ʻi he Taʻú Kotoa?

Ko e mālohi ʻo e ongoongo lelei naʻe malangaʻi ʻe Sīsuú naʻe maongo ia ki he moʻui ʻa e faʻahinga tāutaha taʻefaʻalaua. Kuo ngāueʻaki ʻe he tokolahi ʻa e ngaahi tefitoʻi moʻoni faka-Kalisitiané ʻi he tafaʻaki kotoa pē ʻo ʻenau moʻuí. Ko e kakai ʻa ia naʻa nau siokita ʻi he tuʻunga lahi taha ki muʻá kuo nau kamata ke ʻeke pe ko e hā nai ne mei fai ʻe Sīsū kapau naʻá ne ʻi honau tuʻungá. Ko e niʻihi kuo fakatefito ʻenau moʻuí ʻi he koloá mo e ngaahi mālié kuo nau hoko ʻo ʻiloʻi ʻa e mahuʻinga ʻo e ngaahi tuʻunga fakalaumālié pea mo hono vahevahe atu ʻa e ngaahi meʻá ni ki honau ngaahi kaungāʻapí. Ko e kakai ʻoku nau fai ení ʻoku nau feinga ke fakahaaʻi ʻa e nima-homo mo e anga-lelei ʻi he taʻú kotoa. ʻIkai ko e meʻa ia te ke ʻamanekina mei he kau Kalisitiane moʻoní?

Kapau ʻe kiʻi tuʻu hifo ʻa e faʻahinga loto-moʻoni tāutaha kotoa ʻo fakakaukau ki he mahuʻinga ʻo e pōpoaki fakaeʻāngelo ʻo e melinó pea ngāue ʻo fehoanaki mo e ngaahi fakakaukau ko iá, ko e moʻoni ʻe hoko ʻa e māmaní ko ha feituʻu ʻoku kehe.

Ko e ngaahi kikite takatakai ʻi he ʻaloʻi ʻo Sīsuú ʻoku fakapapauʻi ai ki he faʻahinga ʻoku nau maʻu ʻa e hōifua ʻa e ʻOtuá ʻe lava ke nau maʻu ʻa e melino moʻoní ʻo taʻengata. ʻIkai ko e meʻa ia ʻokú ke holi ki aí? ʻOku lava ke tau fakapapauʻi ko e fanongonongo fakaekikite lāngilangiʻia ʻo e melino naʻe fai ʻe he kau ʻāngeló ʻi he ʻaloʻi ʻo Sīsuú ʻe fakahoko papau ia. ʻI he ʻikai hoko ko e ngaahi lea taʻeʻuhinga ʻi he taimi Kilisimasí, ko e melinó ʻoku pau ke hoko moʻoni ia ʻo taʻengata.

[Fakatātā ʻi he peesi 7]

ʻOku lava ke ʻi ai ha laumālie faka-Kalisitiane pea ʻoku totonu ke fakahāhā ia ʻi he taʻú kotoa