Vahe 94

Ko e Fiemaʻu ke Lotu mo Anga-Fakatōkilalo

KI MUʻA ATU, ʻi heʻene ʻi Siuteá, naʻe tala ai ʻe Sīsū ha talanoa fakatātā ʻo fekauʻaki mo e mahuʻinga ʻo e kīvoi ʻi he lotú. ʻI heʻene fononga fakaʻosi ko ʻeni ki Selusalemá, naʻá ne toe fakamamafaʻi ai ʻa e fiemaʻu ke ʻoua naʻa fiu ʻi he lotú. ʻOku ngalingali naʻe kei ʻi Samēlia pe ʻi Kāleli pē ʻa Sīsū ʻi heʻene tala ki heʻene kau ākongá ʻa e toe talanoa fakatātā ko ʻení:

“Tokua naʻe nofo ʻi he kolo ʻe taha ha fakamaau, ʻa ia naʻe ʻikai te ne ʻaʻapa ki he ʻOtuá, pe tokaʻi ʻa e tangatá. Pea naʻe ai ha fefine uitou ʻi he kolo ko iá, ʻa ia naʻe faʻa haʻu kiate ia heʻene pehē, ‘Ke ke fai fakamaau maʻaku mo fakahaofi au mei hoku filí.’ Pea fuoloa mo e ʻikai te ne tali, ka naʻe faifai peá ne pehē ʻi hono lotó, ‘Neongo ʻoku ʻikai te u ʻaʻapa ki he ʻOtuá, ʻumaʻā haʻaku tokaʻi ha tangata, ka koeʻuhiā ko e fakafiu mai ʻa e uitoú ni te u taukapoʻi ia, naʻa tou tuʻu mai ia ʻo taʻengata, peá u kina ai.’”

Naʻe fakahā leva ʻe Sīsū ʻa e kaunga ʻo ʻene talanoá, ʻo ne pehē: “Fanongo ā ki he lau ʻa e fakamaau taʻemāʻoniʻoní! Pea ʻe ʻikai koā ke fai ʻe he ʻOtuá ʻa e fakamaau totonú maʻa hono kakai filí, ʻa ia ʻoku nau tangi kiate ia ʻi he ʻaho mo e pō, neongo ʻene fakatotoka ange kiate kinautolú?”

Naʻe ʻikai ke ʻuhinga ʻa Sīsū ia ke fakahuʻuhuʻu ʻoku tatau ʻa e ʻOtua ko Sihová ʻi ha founga mo e fakamaau taʻemāʻoniʻoní. Ka, ʻo kapau ʻoku aʻu ē ki he fakamaau taʻemāʻoniʻoní ʻokú ne tali ʻa e ngaahi kōlenga kīvoí, ʻoku ʻikai ha toe fehuʻia ko e ʻOtuá ʻa ia ʻoku māʻoniʻoni mo lelei fakaʻaufulí, te ne tali ʻo kapau ʻe ʻikai fiu hono kakaí ʻi he lotú. Ko ia naʻe hoko atu ʻe Sīsū: “Talaatu, [ko e ʻOtuá] te ne fai pē ha fakamaau totonu maʻanautolu, pea ʻe vave.”

ʻOku ʻikai ke faʻa fai ʻa e fakamaau totonú ki he māʻulaló mo e masivá, kae faʻa fai pē ia ki he mālohí mo e koloaʻiá. Kae kehe, ʻe ʻikai ke ngata pē hono tautea totonu ʻe he ʻOtuá ʻa e anga-fulikivanú ka te ne toe fakapapauʻi ʻoku fai ʻa e meʻa totonu ki heʻene kau sevānití ʻaki hono foaki kiate kinautolu ʻa e moʻui taʻengatá. Ka ko e kakai ʻe toko fiha ʻoku nau tui pau ʻe vave hono fai ʻe he ʻOtuá ʻa e fakamaau totonú?

ʻI he lave ʻo tautefito ki he felāveʻi ʻa e tuí mo e mālohi ʻo e lotú, naʻe ʻeke ʻe Sīsū: “Ka hoko mai ʻa e Fanautama ʻa tangatá, te ne ʻilo koā ha kei tui pehē ʻi māmani?” Neongo naʻe ʻikai ke ʻi ai ha tali ia ki he fehuʻí, ka naʻe fakahuʻuhuʻu nai ʻo pehē ʻe ʻikai ke loko lahi ha tui pehē ʻi he hoko mai ʻa Kalaisi ʻi he mafai ʻo e Puleʻangá.

ʻI he lotolotonga ʻo kinautolu naʻe fanongo kia Sīsuú naʻe ʻi ai ʻa e faʻahinga naʻa nau ongoʻi fiemālie ʻiate kinautolu pē ʻo fekauʻaki mo ʻenau tuí. Naʻa nau falala kiate kinautolu pē ʻoku nau māʻoniʻoni, pea naʻa nau sio lalo ki he niʻihi kehé. Naʻa mo ha niʻihi nai ʻo e kau ākonga ʻa Sīsuú naʻe kau ai. Ko ia naʻá ne fakahanga ʻa e talanoa fakatātā hono hokó ki he faʻahinga peheé:

“Tokua ko ha ongo tangata naʻá na ō hake ki he temipalé ke fai ʻena lotu, ko e Fālesi ʻa e taha pea ko e taha ko e tokotaha tānaki tukuhau. Ko e Fālesí naʻá ne tuʻu taha atu, ʻo ne lotu, ʻo pehē, ‘ʻE ʻOtua, ʻoku ou fakafetaʻi atu, ʻoku ʻikai te u hangē ko hono toe ʻo e kakaí, ʻa e kau fakamālohí, mo e kau kākaá, mo e kau feʻauakí, kaeʻumaʻā haʻaku hangē ko e tokotaha tānaki tukuhau ko ʻení. ʻOku ou ʻaukai tuʻo ua ʻi he uike, ʻoku ou ʻatu ki he siasí hono vahehongofulu ʻo e meʻa kotoa ʻoku ou maʻu ʻi heʻeku ngāué.’”

Naʻe ʻiloa ʻa e kau Fālesí ʻi heʻenau fakahā fakahāhā ki he kakaí ʻenau māʻoniʻoní ke maongo ki he kakai kehé. Ko e ngaahi ʻaho naʻe faʻa fai ai ʻa ʻenau ʻaukai naʻe tuʻutuʻuni ʻe kinautolu peé ko e Mōnite mo e Tuʻapulelulu, pea naʻa nau mātuʻaki totongi ʻa e vahe hongofulú ʻo aʻu ki he lauʻi ʻakau kai ʻi he ngoué. ʻI ha ngaahi māhina siʻi ki muʻa atu, naʻe fakahāhā ʻa ʻenau paetaku ki he kakai lāuvalé ʻi he lolotonga ʻo e Kātoanga Fale-Louʻakaú ʻi heʻenau pehē: “Ko lāuvalé na taʻeʻilo ki he Laó [ʻa ia ko e fakaʻuhinga faka-Fālesi ia naʻe ʻai ki aí], ko e kakai koto malaʻia.”

ʻI he hoko atu ʻa ʻene talanoa fakatātaá, naʻe lave ʻa Sīsū ki ha tokotaha “malaʻia” pehē: “Ka ko siʻi tokotaha tānaki tukuhaú naʻá ne tuʻu pē mei ha potu, ʻo mamaʻo atu, pea naʻa mo hono matá naʻe ʻikai te ne faʻa hiki ki he langí, ka ka sī fatafata pē ia, ʻo ne pehē, ‘ʻE ʻOtua, ke ke fakamolemole au, ʻa au angahala.’” Koeʻuhi naʻe fakahā anga-fakatōkilalo ʻe he tokotaha tānaki tukuhaú ʻa ʻene ngaahi tōnounoú, naʻe pehē ai ʻe Sīsū: “Tala atu, naʻe ʻalu atu ʻa e tokotaha ko iá ki hono ʻapí, kuó ne maʻu ha tonuhia naʻe lahi ange ʻi he tonuhia ʻa e tangata ʻe tahá; he ko ia ʻokú ne hakeakiʻi iá ʻe fakavaivaiʻi, pea ko ia ʻokú ne fakavaivaiʻi iá ʻe hakeakiʻi.”

Ko ia, naʻe toe fakamamafaʻi ʻe Sīsū ʻa e fiemaʻu ke anga-fakatōkilaló. Koeʻuhi ko e tupu hake ʻi ha ʻātakai ʻa ia naʻe maʻu-ivi lahi ai ʻa e kau Fālesi fie māʻoniʻoní pea fakamamafaʻi maʻu pē ai ʻa e tuʻungá mo e lakangá, ʻoku ʻikai ke fakaʻohovale naʻa mo e kau ākonga ʻa Sīsuú naʻe uesia ai. Ka, ko ha ngaahi lēsoni lelei ē ʻi he anga-fakatōkilaló naʻe akoʻi mai ʻe Sīsuú! Luke 18:​1-14; Sione 7:49.

▪ Ko e hā naʻe tali ai ʻe he fakamaau taʻemāʻoniʻoní ʻa e kole ʻa e uitoú, pea ko e hā ʻa e lēsoni kuo akoʻi mai ʻe he talanoa fakatātā ʻa Sīsuú?

▪ Ko e hā ʻa e tui ʻe fakatuʻotuʻa ki ai ʻa Sīsū ʻi heʻene hoko maí?

▪ Ko hai naʻe fakahanga ki ai ʻe Sīsū ʻa ʻene talanoa fakatātā ʻo kau ki he Fālesí mo e tokotaha tānaki tukuhaú?

▪ Ko e hā ʻa e fakakaukau ʻa e kau Fālesí ke fakaʻehiʻehi mei aí?