ʻOku Lava ke Tau Fai ʻa e Ngaahi Ngāue Lahi Ange
1 Naʻe fakaʻilongaʻi ʻe ha ngaahi ngāue tuʻu-ki-muʻa ʻa e ngāue fakafaifekau ʻa Sīsū Kalaisí. Naʻá ne fafangaʻi fakaemana ʻa e laui afe, fakamoʻui ʻa e tokolahi, pea fokotuʻu hake ʻa e niʻihi mei he maté. (Mt. 8:1-17; 14:14-21; Sione 11:38-44) Naʻe tohoakiʻi ʻe heʻene ngāué ʻa e tokanga ʻa e fonuá kotoa. Ka, ko e efiafi fakaʻosi ki muʻa ke ne pekiá, naʻá ne tala ki hono kau muimui anga-tonú: “Ko ia ʻoku tui pikitai kiate au, ko e ngaahi ngāue ʻoku ou fai ʻe fai ʻe he toko taha ko ia foki; ʻio, te ne fai ʻa e ngaahi meʻa ʻoku hulu atu ʻi he ngaahi meʻa ni.” (Sione 14:12) ʻE lava fēfē ke tau fai ʻa e ngaahi ngāue “ʻoku hulu atu”?
2 ʻAki Hono Ngāueʻi ʻa e Feituʻu Lahi Ange: Ko e tafaʻaki ʻo e ngāue ʻa Sīsuú naʻe fakangatangata pē ia ki Pālesitaine, ʻa ia naʻe tala ai ki heʻene muʻaki kau ākongá ke faifakamoʻoni “ki he ngataʻanga ʻo māmani,” ʻo mamaʻo atu ia mei he feituʻu naʻe malanga tonu ai ʻa Sīsuú. (Ng. 1:8) Ko e ngāue fakamalanga naʻá ne kamatá kuo fai ia ʻi he kolopé he taimí ni, ʻo ngāueʻi ai ʻa e ngaahi fonua ʻe 232. (Mt. 24:14) ʻOkú ke kau kakato ki hono ngāueʻi ʻa e feituʻu kuo vaheʻi ki hoʻo fakatahaʻangá?
3 ʻAki ʻa e Aʻu ki he Kakai Tokolahi Ange: Naʻe tuku ʻe Sīsū ki he kau ākonga tokosiʻi pē ke nau hoko atu ʻa e ngāue fakamalangá. Kae kehe, ko e ola ʻo ʻenau faifakamoʻoni faivelenga ʻi he Penitekosi ʻo e 33 T.S., ko e faʻahinga naʻa nau maʻu ʻa e moʻoní pea naʻa nau papitaiso ʻi he ʻaho ko iá ko honau tokolahí ko e ngaahi soulu ʻe toko tolu afe nai. (Ng. 2:1-11, 37-41) Ko hono fakatahatahaʻi ʻa e faʻahinga “ʻoku hehema totonu ki he moʻui taʻengatá” kuo hokohoko atu ʻo aʻu mai ki hotau taimí, ʻi heʻetau papitaiso ha ʻavalisi ʻoku laka hake ʻi he toko 1,000 ʻi he ʻaho. (Ng. 13:48, NW) ʻOkú ke fai ʻa hoʻo lelei taha ʻe malavá ke aʻu ki he kakai loto-totonú ʻi he feituʻu pē ʻe maʻu kinautolu ki aí pea toe foki ki he kau mahuʻingaʻiá ʻi he vave taha ʻe malavá?
4 ʻAki ʻa e Malanga ʻo Fuoloa Atu: Naʻe fakangatangata pē ʻa e ngāue fakafaifekau ʻa Sīsū ʻi he māmaní ki he taʻu ʻe tolu mo e konga. Ko e tokolahi taha ʻo kitautolú kuo malanga ʻo toe fuoloa ange ai. Neongo pe ko e hā hono fuoloa ʻe fakaʻatā ai kitautolu ke hokohoko atu ai ʻa e ngāué ni, ʻoku tau houngaʻia ke tokoniʻi ʻa e ākonga foʻou taki taha ke ne kamata ʻi he hala ʻoku taki atu ki he moʻuí. (Mt. 7:14) ʻOku lahi ʻa e meʻa ke ke fai ʻi he māhina kotoa pē ʻi he ngāue ʻa e ʻEikí?—1 Kol. 15:58.
5 ʻOku lava ke tau tuipau maʻu pē ko hono poupouʻi kitautolu ʻe Sīsuú, te tau kei fai ai ʻa e ngaahi ngāue lahi ange ʻi he tuʻunga ko ʻene kau ākonga moʻoni.—Mt. 28:19, 20.