Ko e Founga ke Fiefia Aí

ʻOKU tau saiʻia kotoa ke tau fiefia, ʻikai ko ia?— Ka ʻoku ʻikai moʻoni ke pehē ʻa e kakai tokolahi. ʻOkú ke ʻilo ʻa hono ʻuhingá?— ʻOku peheé koeʻuhí he kuo teʻeki te nau ʻilo ʻa e fakapulipuli ki he fiefiá. ʻOku nau fakakaukau ko hono maʻu ʻo lahi ʻa e ngaahi meʻá ko e founga ia ke maʻu ai ʻa e fiefiá. Ka ʻi heʻenau maʻu ʻa e ngaahi meʻa ko ení, ʻoku ʻikai ke fuoloa ʻa ʻenau fiefiá.

Ko e fakapulipuli mahuʻingá leva eni. Naʻe pehē ʻe he Faiako Lahí: “ʻOku lahi ange ʻa e fiefia ʻi he foaki atú ʻi he maʻu maí.” (Ngāue 20:​35, NW) Ko ia, ko e hā ʻa e founga ke maʻu ai ʻa e fiefiá?— ʻIo, ʻoku maʻu ia ʻi he foaki ha ngaahi meʻa ki he niʻihi kehé pea ʻi hono fai ha ngaahi meʻa maʻa kinautolú. Naʻá ke ʻilo ia?—

Ta toe fakakaukau lahi angé ʻo fekauʻaki mo e meʻá ni. Naʻe pehē ʻe Sīsuú ko ha tokotaha ʻokú ne maʻu ha meʻaʻofá ʻe ʻikai te ne fiefia?— ʻIkai, naʻe ʻikai te ne lea pehē. ʻOkú ke saiʻia ke maʻu ha ngaahi meʻaʻofa, ʻikai ko ia?— ʻOku pehē ʻa e tokotaha kotoa. ʻOkú ta fiefia ʻi he taimi ʻokú ta maʻu ai ʻa e ngaahi meʻa leleí.

Ka naʻe pehē ʻe Sīsū ʻoku toe lahi ange ʻa e fiefiá ʻi heʻeta fai ha foaki. Ko ia, ko hai te ke pehē kuó ne foaki ha ngaahi meʻa lahi ange ki he kakaí ʻo laka ia ʻi ha toe taha kehe?— ʻIo, ko Sihova ko e ʻOtuá.

ʻOku pehē ʻe he Tohitapú ko e ʻOtuá ʻokú ne “foaki mai kiate kitautolu fulipe ʻa e moʻui, mo e manava, mo e meʻa kotoa pe.” ʻOkú ne foaki mai kia kitaua ʻa e ʻuha mei he langí pea mo e maama foki mei he laʻaá, koeʻuhí ke tupu ai ʻa e ʻakaú pea maʻu ai ha meʻakai ke ta kai. (Ngāue 14:17; 17:25) ʻOku ʻikai fakaʻohovale ʻa hono ui ʻe he Tohitapú ʻa Sihova ko e “ʻOtua fiefiá”! (1 Timote 1:​11, NW) Ko e fai ha foaki ki he niʻihi kehé ʻa e taha ʻo e ngaahi meʻa ʻoku ʻai ai ke fiefia ʻa e ʻOtuá. Pea ʻi heʻeta fai ha foakí, ʻe lava ke ʻai ai kitaua ke ta fiefia foki.

Ko e hā leva ʻa e meʻa ʻe lava ke ta foaki ki he kakai kehé? Ko e hā haʻo lau?— ʻI he taimi ʻe niʻihi, ko ha meʻaʻofa ʻoku totongi paʻanga ia. Kapau ko ha meʻaʻofa ʻokú ke ʻomai mei ha falekoloa, ʻe pau ke ke totongi ia. Ko ia, kapau ʻokú ke fiemaʻu ke foaki ʻa e faʻahinga meʻaʻofa ko iá, ʻe pau nai ke ke tātānaki ha paʻanga kae ʻoua kuó ke maʻu ha paʻanga feʻunga ke fakatau mai ʻaki ʻa e meʻaʻofá.

Ka ʻoku ʻikai ko e ngaahi meʻaʻofa kotoa pē kuo pau ke ʻomai mei he falekoloá. Ko e fakatātaá, ʻi ha ʻaho vela, ko ha ipu vai mokomoko ʻoku ifo ʻaupito ia. Ko ia, ʻi hoʻo foaki ʻa e meʻaʻofa ko iá ki ha taha ʻoku fieinua, ʻe malava ke ke maʻu ai ʻa e fiefia ʻoku maʻu mei he foakí.

ʻE ʻi ai nai ha ʻaho te ke lava ai mo hoʻo faʻeé ʻo fakapaku ha laʻi keke. ʻE fakafiefia ia. Ka ko e hā ʻe lava ke ke fai ki ha niʻihi ʻo e laʻi keke ko iá ʻe ʻai ke lahi ange ai hoʻo fiefiá ʻi hoʻo kai tokotaha kātoa pē iá?— ʻIo, ʻe lava ke ke foaki ha laʻi keke ʻe niʻihi ki he taha ʻo ho ngaahi kaumeʻá. Te ke fie fai ia ʻi ha taimi?—

Ko e Faiako Lahí mo ʻene kau ʻapositoló naʻa nau ʻilo kotoa ʻa e fakafiefia ʻo e foakí. ʻOkú ke ʻilo ʻa e meʻa naʻa nau foaki ki he kakai kehé?— Ko e meʻa lelei taha ia ʻi he māmaní! Naʻa nau ʻilo ʻa e moʻoni fekauʻaki mo e ʻOtuá, pea naʻa nau vahevahe fiefia ʻa e ongoongo lelei ko ení ki he niʻihi kehé. Naʻa nau fai eni ʻo ʻikai ʻai ha taha ke ne ʻoange ha paʻanga kia kinautolu koeʻuhi ko e meʻa naʻa nau foakí.

ʻI he ʻaho ʻe taha, ko e ʻapositolo ko Paulá mo hono kaungāmeʻa lelei ko e ākonga ko Luké naʻá na fetaulaki mo ha fefine ʻa ia naʻá ne fiemaʻu foki ke ne maʻu ʻa e fiefia ʻi he foakí. Naʻá na fetaulaki mo ia ʻi ha veʻe vaitafe. Naʻe ʻalu ʻa Paula mo Luke ki aí koeʻuhí naʻá na fanongo ko ha feituʻu faiʻanga lotu ia. Pea naʻe moʻoni, ʻi heʻena aʻu atú, naʻá na ʻilo ai ha kau fefine ʻoku nau lotu.

Naʻe kamata ke tala ʻe Paula ki he kau fefiné ni ʻa e ongoongo lelei ʻo fekauʻaki mo Sihova ko e ʻOtuá pea mo hono Puleʻangá. Ko e tokotaha ʻo kinautolu ko hono hingoá ko Litia, pea naʻá ne tokanga lelei ʻaupito. Hili iá, naʻe fiemaʻu ʻe Litia ke ne fai ha meʻa ke fakahaaʻi naʻá ne saiʻia ʻaupito ʻi he ongoongo lelei naʻá ne fanongo ki aí. Ko ia, naʻá ne kole kia Paula mo Luke: ‘Kapau leva kuo mo lau au ko e toko taha ʻoku tui ki he ʻEikí, pea mo hu ki hoku falé, ʻo nofo ai.’ Pea naʻá ne ʻai leva kinaua ke na haʻu ki hono ʻapí.—Ngāue 16:​13-15.

Naʻe fiefia ʻa Litia ke tali ʻa e ongo sevāniti ko eni ʻa e ʻOtuá ki hono ʻapí. Naʻá ne ʻofa ʻia kinaua koeʻuhí naʻá na tokoniʻi ia ke ne ʻilo ʻo fekauʻaki mo Sihova pea mo Sīsū pea mo e founga ʻe malava ai ki he kakaí ke nau moʻui taʻengatá. Naʻe ʻai ia ke ne fiefia ʻi he malava ke ne foaki kia Paula mo Luke ha meʻakai ke na kai pea mo ha feituʻu ke na mālōlō ai. Ko ia, ko e foaki ʻa Litiá naʻá ne ʻai ia ke fiefia koeʻuhí he naʻá ne fiemaʻu moʻoni ke fai ha foaki. Ko ha meʻa ia ʻoku totonu ke ta manatuʻi. ʻE tala mai nai ʻe ha taha kia kitaua kuo pau ke ta foaki ha meʻaʻofa. Ka ʻo kapau ʻoku ʻikai te ta loto moʻoni ke fai ia, ko e foaki ko iá ʻe ʻikai te ne ʻai kitaua ke ta fiefia.

Ko e fakatātaá, fēfē kapau naʻe ʻi ai haʻo lole naʻá ke fiemaʻu ke ke kai? Kapau naʻá ku tala atu kia koe kuo pau ke ke foaki ha konga ʻo ia ki ha kiʻi tama ʻe taha, te ke fiefia ke foaki atu ia?— Kae fēfē kapau naʻe ʻi ai haʻo lole ʻi haʻo fetaulaki mo hao kaumeʻa ʻokú ke saiʻia ʻaupito ai? Kapau naʻá ke maʻu ʻiate koe pē ʻa e foʻi fakakaukau ke vahevahe ha niʻihi ʻo ia mo ho kaumeʻá, ʻikai te ke fiefia ai?—

ʻI he taimi ʻe niʻihi, ʻokú ta ʻofa lahi ʻaupito ʻi ha taha ʻo ta loto ai ke foaki kiate ia ʻa e meʻa kotoa pē pea ʻoua naʻa toe tuku ha meʻa maʻataua. ʻI he tupulaki ʻeta ʻofa ki he ʻOtuá, ʻoku totonu ke pehē ʻa e anga ʻo ʻeta ongoʻi ʻo fekauʻaki mo Iá.

Naʻe ʻilo ʻe he Faiako Lahí ha fefine masiva ʻa ia naʻá ne ongoʻi pehē. Naʻá ne sio kiate ia ʻi he temipalé ʻi Selusalema. Naʻá ne maʻu ha ongo kiʻi foʻi koini pē ʻe ua; ko e meʻa pē ia naʻá ne maʻú. Ka naʻá ne tuku fakatouʻosi kinaua ʻi he puhá ko ha tokoni, pe meʻaʻofa ki he temipalé. Naʻe ʻikai ha taha naʻá ne ʻai ia ke ne fai pehē. Ko e kakai tokolahi taha ʻi aí naʻe ʻikai ʻaupito haʻanau ʻilo ki he meʻa naʻá ne faí. Naʻá ne fai iá koeʻuhí naʻá ne loto ki ai pea koeʻuhí he naʻá ne ʻofa ʻaupito ʻia Sihova. Naʻe ʻai ia ke ne fiefia ʻi he malava ke ne fai ha foakí.—Luke 21:​1-4.

ʻOku lahi ʻa e ngaahi founga ʻe malava ke ta fai ai ʻa e foakí. ʻE lava ke ke fakakaukau ki ha niʻihi?— Kapau ʻokú ta foaki koeʻuhi ko ʻeta loto moʻoni ki aí, te ta fiefia. Ko e ʻuhinga ia ʻoku tala mai ai ʻe he Faiako Lahí kia kitaua: “Foaki.” (Luke 6:​38, PM) Kapau te ta fai pehē, te ta ʻai ai ʻa e kakai kehé ke nau fiefia. Pea ko e toki fiefia tahá ē ka ko kitaua!