ʻUnuʻunu Ofi ki he ʻOtuá

“Otua oe Fiemalie Kotoabe”

2 Kolinito 1:3, 4, “PM”

KO E ngaahi meʻa lahi ʻi he moʻuí—ʻa e faingataʻaʻiá, siva e ʻamanakí, taʻelatá—ʻoku lava ke ʻomai ai ʻa e loto-mamahi, naʻa mo e ʻamanaki-tōnoa. ʻI he ngaahi taimi peheé ʻokú ke fifili nai ai, ‘Ko fē te u hanga ki ai ki ha tokoní?’ Ko e ngaahi lea ʻa e ʻapositolo ko Paulá ʻoku hā ʻi he 2 Kolinito 1:3, 4 (PM), ʻoku fakahaaʻi ai ha matavai lavameʻa ʻo e fakafiemālié—ko Sihova ko e ʻOtuá.

ʻI he 2 Kolinito vahe 1 veesi 3, ʻoku ui ai ʻa e ʻOtuá ko e “Tamai ae gaahi aloofa.” ʻOku ʻuhinga ia ki he hā? Ko e foʻi lea faka-Kalisi ʻoku liliu ko e “gaahi aloofa” ʻoku lava ke fakahaaʻi ai ʻa e fakakaukau ʻo e ongoʻi manavaʻofa ki he faingataʻaʻia ʻa e niʻihi kehé.a ʻOku pehē ʻi ha tohi maʻuʻanga fakamatala Tohi Tapu ʻe taha ko e foʻi leá ni ʻe lava nai ke liliu ko e “ongoʻi fakaʻofaʻia” pe “tokanga lahi ʻaupito.” Ko e “gaahi aloofa” ʻa e ʻOtuá ʻoku ueʻi ai ia ke ne fai ha meʻa. Ko hono ʻiloʻi ʻa e tafaʻaki ko eni ʻo e ʻulungāanga ʻo e ʻOtuá ʻokú ne ʻai ai ke tau loto ke ʻunuʻunu atu kiate ia, ʻikai ko ia?

ʻOku toe lave ʻa Paula kia Sihova ko e “Otua oe fiemalie kotoabe.” ʻOku ngāueʻaki heni ʻe Paula ha foʻi lea ʻoku pehē ʻoku kau ʻi he “fakakaukau ki hono fakafiemālieʻi ha taha ʻoku faingataʻaʻia pe mamahi mo e fakakaukau ki hono fai ha tokoni pe fakalototoʻa lahi.” ʻOku fakamatala ʻi he Interpreter’s Bible: “ʻOku tau fakafiemālieʻi ha tokotaha faingataʻaʻia ʻi he taimi ʻoku tau fakalototoʻaʻi ai ke ne ʻūkuma ʻene mamahí.”

Te ke ʻeke nai, ‘ʻOku anga-fēfē hono fakafiemālieʻi kitautolu ʻe he ʻOtuá mo ʻomai ʻa e loto-toʻa ke ʻūkuma ʻetau mamahí?’ ʻOkú ne fai tefito ia fakafou ʻi heʻene Folofolá, ʻa e Tohi Tapú, pea fakafou ʻi he meʻaʻofa ko e lotú. ʻOku tala mai ʻe Paula ʻoku ʻomai anga-ʻofa ʻe he ʻOtuá kiate kitautolu ʻa ʻEne Folofolá koeʻuhi fakafou ʻi he “fakafiemalie oe gaahi tohi, ke tau maʻu ai ae amanaki lelei.” Tānaki atu ki ai, fakafou ʻi he lotu fakamātoató, ʻe lava ke tau hokosia ai ʻa e “nonga ʻa e ʻOtua, ʻa ia ʻoku mamaʻo ʻi he tatae ʻa e ʻatamai kotoa pe.”—Loma 15:4; Filipai 4:7.

Ko e hā hono lahi ʻo hono fakafiemālieʻi ʻe Sihova ʻa hono kakaí? ʻOku pehē ʻe Paula ko e ʻOtuá ʻokú ne “fakafiemalieʻi akimautolu i he e mau mamahi kotoabe.” (2 Kolinito 1:4, PM) Tatau ai pē pe ko e hā ʻa e tenge, mamahi, pe faingataʻaʻia nai ʻoku tau hokosiá, ʻoku lava ke ʻomai ʻe he ʻOtuá kiate kitautolu ʻa e loto-toʻa mo e mālohi ʻoku fiemaʻú ke ʻūkuma ai. ʻIkai ʻoku fakafiemālie ia?

Ko e fakafiemālie ʻoku ʻomai ʻe he ʻOtuá ʻoku ʻikai fakangatangata pē ia ʻi he tokotaha ʻokú ne maʻu iá. ʻOku hoko atu ʻa Paula ʻo pehē ʻoku fakafiemālieʻi kitautolu ʻe he ʻOtuá koeʻuhi ke tau “fakafiemalieʻi akinautolu oku mamahiia, aki ae fakafiemalie koia aia oku fakafiemalieʻi aki [kitautolu] e he Otua.” ʻI hono maʻu ʻa e fakafiemālie ki heʻetau mamahí, ʻoku tokoniʻi ai kitautolu ke tau mau ʻa e kaungāongoʻi ki he niʻihi kehé pea ueʻi ai ke tau fai ha tokoni ki he faʻahinga ʻoku faingataʻaʻiá.

ʻI hono tuʻunga ko e “Otua oe fiemalie kotoabe,” ʻoku ʻikai papau ia ʻe ʻai ʻe Sihova ke mole ʻetau ngaahi palopalemá pe mamahí. Neongo ia, ʻoku lava ke tau fakapapauʻi ʻa e meʻá ni: Kapau te tau hanga kiate ia ki ha fakafiemālie, ʻe lava ke ne fakaivia kitautolu ke tau fekuki mo ha mamahi pe faingataʻaʻia pē ʻe hoko mai nai ʻi he moʻuí. Ko ha ʻOtua manavaʻofa pehē ʻokú ne tuha moʻoni mo ʻetau lotú mo e fakahīkihikí.

[Fakamatala ʻi lalo]