‘Fano Atu’
1. Ko e hā ʻa e fatongia ʻoku tau taki taha maʻú?
1 ʻI he fetokouaʻaki faka-Kalisitiané, ko kitautolu taki taha ʻoku tau maʻu ha fatongia ke tokoni ki he māfana ʻi he fakatahaʻangá. (1 Pita 1:22; 2:17) Ko e māfana ko iá ʻoku tupu ia ʻi he taimi ʻoku tau ‘fano atu’ ai ʻi heʻetau ʻofa ongongofua fakaekitautolú. (2 Kol. 6:12, 13) Ko e hā ʻoku mahuʻinga ai ke hoko ʻo ʻiloʻi lelei hotau fanga tokouá mo e fanga tuofāfiné?
2. Ko e hā ʻoku mahuʻinga ai ke fakatupu ha ngaahi kaumeʻa mo e kaungātuí?
2 Tupu ʻo Mālohi Ange ʻa e Ngaahi Kaumeʻá: ʻI heʻetau hoko ʻo maheni lelei ange mo e kaungātuí, ʻoku tau hoko ai ʻo fakamahuʻingaʻi lahi ange ʻenau tuí, kātakí mo e ngaahi ʻulungāanga lelei kehé. Ko ʻenau ngaahi tōnounoú ʻoku hā ngali iiki ange kia kitautolu pea ʻoku tupulaki ʻa e ngaahi haʻi ʻo e kaumeʻá. ʻI he feʻilongaki leleí, ʻoku tau ʻi ha tuʻunga lelei ange ai ke felangahakeʻaki mo fefakafiemālieʻaki. (1 Tes. 5:11) ʻE lava ke tau hoko “ko ha tokoni fakaivimālohi” fakaekitautolu ke talitekeʻi ʻa e ngaahi tākiekina kovi ʻa e māmani ʻo Sētané. (Kol. 4:11, NW) ʻI he vakai atu ki he ngaahi ʻaho fakaʻosi fonu faingataʻa ko ení, he houngaʻia ē ko kitautolu ke maʻu ʻa e ngaahi kaumeʻa lelei ʻi he lotolotonga ʻo e kakai ʻa Sihová!—Pal. 18:24.
3. ʻE lava fēfē ke tau hoko ko ha tokoni fakaivimālohi ki he niʻihi kehé?
3 Ko e ngaahi kaumeʻa ofí ʻe lava ke hoko ia ko ha matavai makehe ʻo e mālohi mo e fakafiemālie ʻi he taimi ʻoku tau fehangahangai ai mo e ngaahi ʻahiʻahi kakahá. (Pal. 17:17) Ko ha Kalisitiane ʻe taha ʻa ia naʻá ne fāinga mo e ngaahi ongoʻi taʻemahuʻingá ʻokú ne manatu: “Naʻe ʻi ai ʻa e ngaahi kaumeʻa naʻa nau leaʻaki ʻa e ngaahi meʻa lelei fekauʻaki mo au ke tokoniʻi au ke ikuʻi ʻa e ngaahi fakakaukau ʻikai lelei naʻá ku maʻú.” Ko e ngaahi kaumeʻa peheé ko ha tāpuaki ia meia Sihova.—Pal. 27:9.
4. ʻE lava fēfē ke tau hoko ʻo ʻiloʻi lelei ange ʻa e niʻihi kehe ʻi he fakatahaʻangá?
4 Kakapa Atu ki he Niʻihi Kehé: ʻE lava fēfē ke tau fano atu ʻi heʻetau ʻofa ongongofua ki he kaungātuí? Tānaki atu ki he lea fakafeʻiloaki ki he niʻihi kehé ʻi he ngaahi fakataha faka-Kalisitiané, fai ha feinga ke fakakau kinautolu ʻi ha fetalanoaʻaki mohu ʻuhinga. ʻI he ʻikai fieʻilo ki heʻenau ngaahi meʻa fakaekinautolú pē, fakahaaʻi ha mahuʻingaʻia fakafoʻituitui. (Fili. 2:4; 1 Pita 4:15) Ko e toe founga ʻe taha ke kakapa atu ai ki he niʻihi kehé ko hono fakaafeʻi kinautolu ki ha houa kai. (Luke 14:12-14) Pe te ke fokotuʻutuʻu nai ke ngāue fakataha mo kinautolu ʻi he malaʻe fakafaifekaú. (Luke 10:1) ʻI heʻetau tamuʻomuʻa ke hoko ʻo ʻiloʻi lelei ange ʻa hotau fanga tokouá, ʻoku tau pouaki ai ʻa e fāʻūtaha ʻi he fakatahaʻangá.—Kol. 3:14.
5. Ko e hā ʻa e founga ʻe taha ke fakalahi ai hotau ngaahi kaumeʻá?
5 ʻOku tau hehema ke fili hotau ngaahi kaumeʻa ofí mei he faʻahinga pē ʻi he kulupu ʻo hotau taʻumotuʻá pe ko e faʻahinga ʻoku nau mahuʻingaʻia ʻi he ngaahi meʻa tatau mo kitautolú? ʻOku ʻikai totonu ke tau tuku ʻa e ngaahi meʻa tefito ko iá ke ne fakangatangata ʻa e ngaahi kaumeʻa ʻoku tau fakatupulekina ʻi he fakatahaʻangá. Ko Tēvita mo Sionatane, pehē kia Lute mo Nāomi naʻa nau fakatupu ha ngaahi haʻi mālohi ʻo e kaumeʻá neongo ʻa e ngaahi faikehekehe ʻi he taʻumotuʻá mo e ʻātakaí. (Lute 4:15; 1 Sam. 18:1) ʻE lava ke ke fakalahi ʻa ho ngaahi kaumeʻá? Ko hono fai iá ʻe lava ke ʻomai ai ʻa e ngaahi tāpuaki taʻeʻamanekina.
6. Ko e hā ʻa e ngaahi ʻaonga ʻe niʻihi ʻo e fano atu ʻi heʻetau ʻofa ongongofua ki hotau fanga tokouá?
6 ʻI he fano atu ʻi heʻetau ʻofa ongongofua ki he niʻihi kehé, ʻoku tau fefakaivimālohiʻaki ai pea pouaki ʻa e melino ʻi he fakatahaʻangá. ʻIkai ko ia pē, ko Sihova tonu ʻokú ne tāpuakiʻi kitautolu ʻi he ʻofa ʻoku tau fakahāhā ki hotau fanga tokouá. (Sāme 41:1, 2; Hep. 6:10) Ko e hā ʻoku ʻikai ai ke ke ʻai ia ko hoʻo taumuʻa ke hoko ʻo maheni lelei ange mo e tokolahi taha ʻe ala lavá?