ʻIlo Lelei ʻa Ho Ngaahi Tokouá
1 Ko hotau vahaʻangatae mo hotau kaungālotu ʻoku lahi ange ʻa e ngaahi meʻa ʻoku fekauʻaki mo ia ʻi heʻetau ʻalu pē ki he ngaahi fakataha mo kinautolu ʻi he Kingdom Hall. ʻOku tau fai ʻa e finangalo ʻo e ʻOtua, pea ʻoku tau hoko ai ki he vahaʻangatae fakalaumālie mo Sīsū. (Mk. 3:34, 35) Pea ʻi heʻene pehē, ʻoku tau hoko ai ki he vahaʻangatae fakafāmili fakalaumālie mo e niʻihi kehe ʻi he fakatahaʻanga Kalisitiane, ko hotau ngaahi tokoua mo e ngaahi tuofāfine fakalaumālie, ʻa ia kuo fekau ke tau ʻofa ki ai. (Sione 13:35) Ko ia, ko kinautolu ʻoku feohi mo e kau mēmipa ʻo e “Famili ʻo e ʻOtua,” ʻoku totonu ke, feinga ke nau maheni lelei.—ʻEf. 2:19.
2 ʻIlo ʻa e Hingoa ʻo Ho Ngaahi Tokouá: ʻOkú ke ʻilo ʻa e hingoa hono kotoa ʻo e ngaahi tokoua mo e ngaahi tuofāfine ʻi hoʻo Ako Tohi ʻa e Fakatahaʻanga? Ko e kulupu ʻoku faʻa tokosiʻi pē, ʻo faingofua ange ai ke ʻilo ʻa e lahi taha ʻo e ngaahi hingoa, ʻo kinautolu ʻoku nau kau ki ai. Kapau ʻoku ʻikai te ke ʻilo ʻa honau ngaahi hingoa, ʻoku malava ke ke pehē ʻokú ke ʻilo lelei kinautolu?
3 Fēfē ke ʻilo ʻa e niʻihi kehe, kau ki ai mo e fānau ʻoku nau kau ki he ngaahi fakataha ʻi he Kingdom Hall? Kuo tau hehema nai ke feohi mo ha kulupu tokosiʻi pē ʻo e ngaahi kaumeʻa. Neongo ʻoku ʻikai ke hala ia ke feohi maʻu pē mo ha niʻihi pau, ka ʻoku ʻikai totonu ke tau fakangatangata pē ʻa ʻetau ngaahi lea fakafeʻiloaki māfana mo e fetalanoaʻaki fakatupu langa hake ki ha tokosiʻi pē. ʻOku totonu ke tau “fano atu,” fai ha feinga ke ʻilo lelei kotoa ʻa hotau ngaahi tokoua mo e ngaahi tuofāfine. (2 Kol. 6:11-13) ʻOku mahino ʻe kau ki ai mo e ʻiloʻi honau hingoa.
4 Ko e ngaahi tokoua ʻoku nau fai ʻa e ngaahi fakataha ʻa e fakatahaʻanga ʻoku totonu ke nau feinga ke ʻilo ʻa e ngaahi hingoa ʻo kinautolu hoko kotoa ʻoku kau ki ai. ʻI he ngāueʻaki ʻa honau hingoa taki taha mei he peletifoomu ʻoku nau ongoʻi ai ko ʻenau ngaahi fakamatala ʻoku fakahoungaʻi, pea ʻi he taimi tatau pē, ʻoku tokoni ia ki he niʻihi kehe ke nau ʻilo ʻa honau hingoa. Ko e moʻoni, ʻoku ʻi ai maʻu pē ha kau foʻou ia pe kau ʻaʻahi ʻi he kau fanongo, ʻo faingataʻa ai ki ha tokotaha ke ne ʻilo ʻa e ngaahi hingoa kotoa pē. Ka neongo ia, ko e hokohoko atu ʻa e feinga moʻoni ʻoku fakalototoʻa ia ki he niʻihi kehe pea ʻoku tapua mei ai ʻa e mahuʻingaʻia moʻoni ʻi he tokotaha kehe.—Loma 1:11, 12.
5 Tomuʻa Fai ʻe Kita Ha Meʻa ke Maheni Lelei Ai: ʻOku faʻa malava ʻe he kau ʻovasia fefonongaaki ke maheni lelei mo ha ngaahi tokoua mo e ngaahi tuofāfine tokolahi. Ko e hā ʻa e meʻa ʻoku nau fai? Ko e ngaahi founga tefito ʻe tolu: (1) ʻOku nau ngāue maʻu pē mo kinautolu ʻi he ngāue fakamalanga; (2) ʻo fakatatau mo honau ngaahi tuʻunga, ʻoku nau tali ʻa e ngaahi fakaafe ke ʻaʻahi ange ki honau ngaahi ʻapi; pea (3) ʻoku nau tomuʻa fai ʻe kinautolu ʻa e talitali fakatouʻosi ʻo e kakai lalahi mo e fānau ʻi he ngaahi fakataha.
6 ʻOkú ke ʻilo ha ngaahi founga ke fakalahi atu ai ʻa hoʻo feohi mo feinga ke ʻilo lelei ange ʻa ho ngaahi tokoua? ʻOku malava ke tau fakaafeʻi ʻa e niʻihi ke tau ō ʻi he ngāue fakamalanga. Ko e ʻalu mei he fale ki he fale, fai ʻo e ngaahi toe ʻaʻahi, ʻalu ki he ngaahi ako Tohi Tapu, pe fai ʻa e ngāue fakamoʻoni ʻi he hala mo e makasini ko e ngaahi founga lelei ʻaupito ke hoko ʻo maheni lelei ai. ʻOku toe lelei foki ke fakaafeʻi ʻa e niʻihi kehe ke nau ʻaʻahi atu ki ho ʻapi, ki ha maʻu meʻatokoni nai pe ko ha kai maʻamaʻa pē ʻi ha taimi. Ko e tomuʻa lea ki he kau foʻou pe ko kinautolu ʻoku nau hehema ke mā ʻoku ʻikai ke ngata pē ʻa hono langa hake lahi fakalaumālie kinautolu ka ʻoku toe maʻu ai ʻa e fiefia lahi.—Ng. 20:35; 1 Tes. 5:11.
7 Naʻe ʻilo lelei ʻe Paula ʻa hono ngaahi tokoua. Naʻá ne fai ha lave ki he tokolahi ʻaki honau hingoa ʻi heʻene ngaahi tohi naʻe fakamoʻoniʻi ai ʻa ʻene mahuʻingaʻia taʻesiokita mo ʻene ʻofa moʻoni kiate kinautolu. (1 Tes. 2:17; 2 Tīm. 4:19, 20) Ko ʻetau ngaahi feinga ke ʻilo lelei ʻa hotau ngaahi tokoua ʻe hoko ai ha ngaahi tāpuaki kiate kitautolu hono kotoa pē.