Polokalama ʻAsemipilī Fakasēketi Foʻou

ʻOku loto ʻa e māmaní ke tau tui ʻe tolonga ʻo taʻengata ʻa e fokotuʻutuʻu lolotonga ní. Kae kehe, ʻoku tala mai ʻe he Folofola ia ʻa e ʻOtuá ʻa e meʻa kehe. (1 Sione 2:​15-17) ʻOkú ne tokoniʻi kitautolu ke tau ʻiloʻi ko e ‘faʻoaki koloa ʻi māmaní’ ko ha ngāue taʻeʻaonga ia. Ke fakaivimālohiʻi e kakai ʻa e ʻOtuá, ko e polokalama ʻasemipilī fakasēketi ki he taʻu fakangāue 2007 ʻe fakamatalaʻi ai ʻa e kaveinga ko e “Faʻoaki Koloa . . . ʻi Langi.”—Mt. 6:​19, 20.

Ko e fakakaukau ki he meʻa fakamatelié ʻoku fakakau ia ʻi he meʻa ʻoku lave ki ai he Efeso 2:2 ko e “ʻeiki ʻo e puleʻanga ʻo e ʻatā, ko e ʻeiki ʻo e faʻahinga laumalie ʻoku lolotonga ngaue ni ʻi he hako ʻo talangataʻa.” Hangē pē ko e ʻi he feituʻu kotoa ʻa e ʻeá ke mānavaʻakí, ko e “laumalie ʻoku ʻo mamani” ʻokú ne kāpui ʻa e fokotuʻutuʻu ko ení. (1 Kol. 2:12) Koeʻuhí ko ʻene tākiekiná ʻoku fuʻu mālohi, ʻoku pehē ai ko ha “ʻeiki” ia. ʻE tokoniʻi kitautolu ʻe he polokalama ʻasemipilī fakasēketi foʻoú ke fakaʻehiʻehi mei he fakakaukau fakamatelie ʻa e māmaní pea ke hanganaki tokanga lelei ki he ngaahi meʻa ʻoku mahuʻinga angé. (Mt. 6:33) Tānaki atu ki ai, ʻe tokoniʻi kitautolu ʻe he polokalamá ke tau falala kia Sihova ʻi heʻetau fakahoko ʻetau ngāue fakafaifekaú neongo ʻa e ngaahi tenge mo e ʻahiʻahi ʻoku tau fehangahangai nai mo iá.

Fakapapauʻi te ke ʻi ai fakatouʻosi he ʻaho ʻe uá peá ke “tokaga lahi.” (Hep. 2:​1, PM) Hiki ha nouti nounou ʻo e ngaahi poini te ke lava ke ngāueʻaki fakafoʻituitui ʻi hoʻo moʻuí pea ʻi hoʻo ngāue fakafaifekaú. ʻI hoʻo ʻi ai mei he kamatá ʻo aʻu ki he ngataʻanga ʻo e polokalama fakakoloa fakalaumālie ko ʻení, te ke hoko ai ʻo loto-toʻa mo fakaivimālohi ke hokohoko atu ʻa e ‘faʻoaki koloa ʻi langí’!