Puha Fehuʻi

◼ ʻOku totonu ko e hā hono fuoloa ʻetau ako mo ha tokotaha ako Tohi Tapu ʻoku fakalakalaka?

ʻOku lelei tahá ke hokohoko atu ʻa e ako mo ha tokotaha ako Tohi Tapu ʻoku fakalakalaka kae ʻoua kuó ne ʻosiki ʻa e tohi ʻe ua—Ko e Hā ʻOku Akoʻi Moʻoni ʻe he Tohi Tapú? mo e “Tauhi Kimoutolu ʻi he ʻOfa ʻa e ʻOtuá.” ʻOku moʻoni eni neongo kapau kuo ʻosi papitaiso ʻa e tokotaha akó ki muʻa ke ʻosi ʻa e ongo tohí. Hili ʻene papitaisó ʻe lava ke tau hokohoko atu ke līpooti ʻa e taimí, ngaahi toe ʻaʻahí, mo e akó. Kapau ʻoku tau kaungā ō mo ha tokotaha malanga pea kau ʻi he akó, ʻe lava ke ne toe lau ʻe ia ʻa e taimí.—Sio ki he Ko ʻEtau Ngāue Fakafaifekau ʻo Maʻasi 2009, peesi 2. 

ʻOku mahuʻinga ki he faʻahinga foʻoú ke maʻu ha makatuʻunga lelei ʻi he moʻoní ki muʻa ke tuku ange kinautolu ʻia kinautolu pē. ʻOku fiemaʻu ke nau hoko ʻo “aka” ʻia Kalaisi pea “kaukaua ʻi he lotu,” pe tui, koeʻuhi ke matuʻuaki ʻa e ngaahi ʻahiʻahi kuo pau ke nau fehangahangai mo iá. (Kol.2:6, 7; 2 Tim. 3:12; 1 Pita 5:8, 9) ʻIkai ko ia pē, ke akoʻi ola lelei ʻa e niʻihi kehé, kuo pau ke nau maʻu ʻa e “ʻilo kanokano ki he moʻoni.” (1 Tim. 2:4) ʻI hono ʻosiki ʻa e ongo tohi ʻe uá mo ʻetau kau akó, ʻoku tau tokoniʻi ai kinautolu ke maʻu ha fakavaʻe fefeka ʻi he “hala, ʻoku fakatau ki he moʻuí.”—Mt. 7:14.

Ki muʻa ke tali ha taha ke papitaisó, ʻoku totonu ki he kau mātuʻá ke nau fakapapauʻi ʻokú ne mahinoʻi lelei ʻa e ngaahi akonaki tefito ʻa e Tohi Tapú pea moʻui ʻo fehoanaki mo ia. ʻOku totonu ke mātuʻaki tokanga ʻa e kau mātuʻá ʻi he taimi ʻoku nau lāulea ai ki ha tokotaha ako ʻa ia kuo teʻeki ai ke ne ʻosiki ʻa e ʻuluaki tohi akó. Kapau ʻoku ʻikai feʻunga ha taha ke papitaiso, ʻe fakapapauʻi ʻe he kau mātuʻá ʻokú ne maʻu ʻa e tokoni fakafoʻituitui ʻoku fiemaʻú koeʻuhi ke taau ai ke papitaiso ʻi he kahaʻú.—Sio ki he Fokotuʻutuʻu Maau ke Fai ʻa e Finangalo ʻo Sihová, peesi 217-218.

[Fakamatala ʻi he peesi 2]

ʻOku mahuʻinga ki he faʻahinga foʻoú ke maʻu ha makatuʻunga lelei ʻi he moʻoní