Ko e Hā Te Tau Lavaʻi he Lolotonga ʻa e Taʻu Fakangāue ko ʻEní?

¹ ʻI he kamata ʻa e taʻu fakangāue ʻo e 1994 ʻi Sēpitema 1, ko e taimi feʻunga leva ʻeni ki he kotoa ʻo kitautolu ko e kakai ʻa Sihová ke tau fokotuʻu mahino ʻi heʻetau fakakaukau ʻa e meʻa ʻoku tau loto ke lavaʻi tāutaha pea pehē ʻi he tuʻunga ko e kautahá ʻi he lolotonga ʻa e taʻu fakangāue foʻou ko ʻení.

² ʻAi ke Tupu Fakalaumālie ai Pē: Kapau ko ʻetau toki feohi mo e moʻoní, ʻoku totonu ke tau loto ke hoko ʻo mālohi ʻi he tuí. (Hep. 6:​1-3) Kapau kuo tau ʻosi mālohi fakalaumālie, ʻoku ʻikai ke totonu ke ngata pē ʻi heʻetau tokoni ki he kau foʻoú mo e niʻihi kehe ka kuo pau ke tau toe fai ha tokanga ki hotau tuʻunga fakalaumālié tonu, ʻo ʻoua ʻaupito ʻe fakakaukau kuo tau ʻosi maʻu ʻa e ʻilo kotoa fekauʻaki mo e Tohi Tapú mo taukei ʻi he moʻui faka-Kalisitiané. ʻOku tau vakai ki he potutohi fakaʻahó, mo laka tatau mo e polokalama lau Tohi Tapu ʻoku fokotuʻu mai ʻi he Fakahokohoko Ako Fakafaifekau Fakateokalatí, mo teuteu ki he Ako Tohi Fakaefakatahaʻangá mo e Ako Taua Leʻó? ʻOku totonu ko e taumuʻa siʻi taha ia kiate kitautolu kotoa. Kuo pau ke tau tupu fakalaumālie ai pē ʻo kapau ʻoku tau fie hao moʻui atu ʻi he fakaʻauha ʻo e ngaahi meʻa ʻo e fokotuʻutuʻu fulikivanu ko ʻení pea mo maluʻi kitautolu ʻo aʻu ki he māmani foʻou ʻa e ʻOtuá.​—Fakafehoanaki mo Filipai 3:​12-16.

³ Tauhi ke Maʻa Fakalaumālie ai Pē: Ke mātuʻaki tali kitautolu ʻi he ʻao ʻo Sihová, kuo pau ke fakamaʻa kitautolu mei he “ʻuli kotoa pe ʻo e kakano mo e loto.” (2 Kol. 6:19 [7:​1, PM]) ʻI heʻetau hoko ʻo maʻá, ko e hā te tau toe loto ai ke toe “fakapelepela” ʻi he māmani fulikivanu ko ʻení? (Fakafehoanaki mo 2 Pita 2:22.) Kuo pau ke tau loto-ʻalovili ke tauhi ke mālohi mo maʻa fakalaumālie ai pē. Pea ʻe ʻikai te tau mūnoa ki he ngaahi filioʻi kākā ʻa Sētané ʻo ne ikuna kitautolu, ʻo tō ki he angahala mo tō mamaʻo mei he hōifua ʻa Sihová.​—2 Kol. 2:11.

⁴ Tokaʻi ʻa e Akonaki Fakapotopotó: ʻOku fakahā mai ʻi he tohi Palōvepi 15:22 (PM): “Oku ikai hoko ae gaahi mea kuo tuutuuni, . . . ka i he toko lahi hono kau fakakaukauʻi oku toki mau ai ia.” Ka, manatuʻi leva, ko e tangata naʻá ne leaʻaki ʻa e ngaahi lea ko ʻení, ko Solomone, ki mui mai naʻá ne fakangofua ‘hono ngaahi uaifí ke nau ofeʻi hono lotó ke muimui ki he ngaahi ʻotua kehe’ koeʻuhi naʻe ʻikai te ne tokaʻi ʻa e akonaki ʻa e ʻOtuá ke ʻoua ʻe maʻu ha ngaahi uaifi muli. (1 Tuʻi 11:​1-4) Ko ia ʻe lava fēfē ke tau ʻamanekina te tau ola lelei ʻi he ngāue ʻa Sihová pe fokotuʻu ha faʻifaʻitakiʻanga taau ke muimui ki ai ʻo ka ʻikai te tau tokaʻi tāutaha ʻa e akonaki fakapotopotó? (1 Tīm. 4:15) ʻE tokoniʻi kitautolu ʻe he akonaki ʻa e Tohi Tapú ke tau maluʻi hotau lotó. (Pal. 4:23) Ko e maluʻanga papaú ko ʻetau ʻofa ki he meʻa ʻoku ʻofa ki ai ʻa Sihová, mo fehiʻa ki he meʻa ʻokú ne fehiʻa ki aí, toutou fekumi maʻu pē ki heʻene tatakí pea mo fai ʻa e meʻa ʻoku fakahōifua kiate iá.​—Pal. 8:13; Sione 8:29; Hep. 1:9.

⁵ Ko ʻetau lotu kia Sihová ʻoku ʻikai ko ha meʻa ke fai fakafounga, ʻoku ʻikai ko e founga ngeʻesi ʻo e anga-līʻoa fakaʻotuá ʻo hangē ko ia ʻoku fai ʻe he kau Kalisitiane lau pē ʻi he māmaní, ka ʻoku fai longomoʻui, ʻo fakatatau ki he moʻoni ʻoku maʻu ʻi he Folofola ʻa e ʻOtuá.​—Sione 4:​23, 24.

⁶ ʻE poleʻi nai ʻi he ʻaho taki taha ʻa ʻetau loto-ʻalovili ke fai ʻa e finangalo ʻo e ʻOtuá. ʻOku totonu ke fakaongoʻimālohi kitautolu ʻe he ʻilo ko e “kaiga oku i mamani” ko hotau ngaahi tokouá ʻoku nau fehangahangai mo e ngaahi ʻahiʻahi meimei tatau pea ko Sihova ʻokú ne fakakaukaua kitautolú. (1 Pita 5:​9, 10, PM) Ko ia te tau malava ke lavaʻi kakato ʻetau ngāue fakamalanga he lolotonga ʻo e taʻu fakangāue 1994.​—2 Tīm. 4:5.