Maluʻi Koe ʻi he Akoʻangá
1 ʻI he māhina ko Sepitemá, ʻoku hū ai ʻa ʻetau fānaú ʻi Tongá ni ki he teemi fakaʻosi ʻo e taʻu fakaakó. ʻE kamata nai ha ngaahi faingataʻaʻia ʻi he ofi ki he sivi fakaʻosi ʻi he taʻú. Kapau ʻokú ke kei ʻalu ki he akó, ʻoku taimi totonu ke ke fakakaukau ki he anga ʻo haʻo maluʻi koe ʻi he akoʻangá. ʻOku loto ʻa ʻetau kau talavoú ke nau ngāue fakataha mo e kau pule ʻi he ʻapiakó mo alāanga mo honau kaungāakó, ka ʻoku totonu ke ʻoua naʻa ngalo kuo pau ke nau fakaʻehiʻehi mei ha meʻa pē ʻe hoko ko ha fakatupu-kovi fakalaumālie.—1 Kol. 15:33.
2 ʻOku fai ha tokangaekina lahi ki he fānau mo e kau talavou Fakamoʻoní ke fakaʻehiʻehi mei he tākiekina ʻuli ʻo e māmaní, ʻa ia ʻoku hūhū ʻi he ngaahi tuʻunga fakaako ʻi he ngaahi fonua lahi ʻi he ʻahó ni. Kuo pau ke lototoʻa ʻa e kau talavou mo e mātuʻa Kalisitiané ʻi hono talitekeʻi ʻa e ngaahi tuʻunga mo e fakakaukau fakaemāmani kuo poupouʻi ʻo fekauʻaki mo e ngaahi meʻa ʻoku kau ki he ʻulungāangá, pea kuo pau ke nau ‘tauhi’ kinautolu ʻaki ʻa hono fakatokangaʻi mo tataki ʻe he Folofola ʻa e ʻOtuá. (Sāme 119:9) ʻOku totonu ke ʻilo ʻa e ngaahi mātuʻá ʻo fekauʻaki mo e ngaahi lesoni kehekehe ʻoku akoʻi ʻi he ʻapiakó koeʻuhi ke nau fai ha fakahinohino feʻunga ki heʻenau fānaú. Kapau ko e meʻa ʻoku akoʻi ʻi he ʻapiakó pe ko ha feituʻu kehé ʻoku fepaki mo e māʻoniʻoni mo e maʻa ʻoku fiemaʻu mei he kau sevāniti ʻa Sihová, kuo pau ke fakaʻehiʻehi mei ai.—1 Pita 1:15, 16.
3 ʻOku faʻa hoko foki ʻa e fepaki mo e ngaahi meʻa ʻo fekauʻaki mo e ngaahi kātoanga fakapuleʻanga, ngaahi kātoanga ʻo e ʻaho mālōlō, ngaahi feʻauhi sipoti, pe ngaahi fakataha fakafiefia. Ko e polosiua School and Jehovah’s Witnesses ko ha tokoni ia ki he kau talavou Kalisitiané ʻo fekauʻaki mo e ngaahi meʻa ko ʻení. Ko e ngaahi tuʻunga faingataʻá ʻe ikuʻi nai pe fakasiʻisiʻi kapau ʻe ʻuluaki ʻalu ʻa e ngaahi mātuʻa ʻa e fānaú ki he kau faiakó mo e tatau ʻo e tohi ko ʻení. ʻOku lava ke nau pehē ko e tohi ko ʻení ʻe tokoni ki he faiakó ke ne maʻu ai ha mahino ki he ʻuhinga ʻoku fili ai ʻa e Kau Fakamoʻoni ʻa Sihová ke ʻoua te nau kau ki he ngaahi kātoanga ʻe niʻihi. ʻI hono ala maʻu ʻe he faiakó ʻa e fakamatala ko ʻení ʻoku lava ke fakatupunga ai ha loto ke ngāue fakataha.
4 ʻIkai ko ia pē, ʻe lelei ki he fānau ako Kalisitiané ke ʻi ai haʻanau tatau ʻo e polosiua ki he Akó fakataha mo ʻenau naunau akó. ʻOku faʻa hoko ha ngaahi faingamālie ki he fai ʻo ha fakamoʻoni ki he kau ako kehe ʻoku nau ʻeke ha ngaahi fehuʻí ʻi hono fakahanga ʻa e tokangá ki heʻetau tuí. ʻOku totonu foki ki he fānau Fakamoʻoní ke nau ʻalu maʻu pē mo ʻenau kaati Advance Medical Directive/Release pe Identity Card ʻoku kei ʻaonga ke ngāueʻaki, ʻosi fakamoʻoni fakalelei, mo fakamoʻoni hingoa ki ai. Ko kinautolu ʻoku nau ngāueʻaki ʻa e ekinaki ko ʻení te nau hangē moʻoni “ko e fakapotopoto ʻoku ne sio ki he kovi, ʻo ne toi.”—Pal. 22:3.