Tuʻuaki ʻa e Ngaahi Makasiní ʻi he Taimi Kotoa Pē
1 ʻOku ʻi ai ha ʻuhinga lelei ke tau houngaʻia ai ʻi he Taua Leʻo mo e Awake! ʻOku manakoa fakavahaʻapuleʻanga pehē ʻa e ngaahi makasini kehé? ʻI he māhina ko ʻení ʻe fakaeʻa ai ʻa e ngaahi makasiní ʻi heʻetau ngāue fakamalangá, pea ko ha fakamatala mālohi ē ʻe ʻi he ngaahi tatau ʻo ʻOkatopá! ʻOku tau faʻa tuku ʻa e lahi taha ʻo ʻetau ngaahi makasiní ʻi he ngāue fale-ki-he-falé; kae kehe, te tau fie teuteu ke tuʻuaki foki kinautolu ʻi he taimi kehe kotoa pē ʻoku faingamālié.
2 ʻI hono tuʻuaki ʻa e “Taua Leʻo” ʻo ʻOkatopa 1, te ke langaʻi nai ʻa e mahuʻingaʻiá ʻi he kupu “Ko e Talaʻofa ki ha Māmani ʻIkai ʻI Ai ha Fakameleʻi?” ʻaki haʻo pehē:
◼ “Ko e kakai tokolahi ʻoku nau fifili ki he ʻuhinga ʻoku ngali ʻikai ala maʻu ai ha māmani ʻoku ʻikai fakameleʻí neongo ʻa e ngaahi feinga kotoa pē ʻa e tangatá. Ko e hā ʻa hoʻo fakakaukau ki he ngaahi fakamatala ko ʻení, ʻi he peesi 3 ʻo e Taua Leʻo ʻo ʻOkatopa 1? [Lau ʻa e ʻuluaki sētesí pē ʻi he ongo ʻuluaki palakalafí, pea tuku ke ne tali.] Ko e moʻoni, ʻoku ʻikai ke ʻuhinga ʻeni ia ʻe ʻi ai maʻu ai pē ʻa e fakameleʻí. Fakatokangaʻi ʻa e lea ʻi he Koheleti 8:12, 13.” Te ke lau nai ʻa e konga tohí ni mei hoʻo Tohitapú pe ko ia kuo hiki ʻi he kupu ʻo e Taua Leʻo ʻi he peesi 5. Fakamatala nounou Ko e Taua Leʻo ʻoku fanongonongo ai ʻa e Puleʻanga ʻo Sihová ko e ʻamanaki pē ia ʻe taha ki ha māmani melino, pea fakalototoʻaʻi ia ke ne lau ʻa e kupú.
3 ʻI haʻo maʻu ha kakai ʻoku nau hehema fakalotu, fēfē ke ke fakaeʻa ʻa e kupu mei he “Taua Leʻo” ʻo ʻOkatopa 1? Ko e tuʻuaki ko ʻení ʻe langaʻi nai ai ha tali fakafiemālie:
◼ “ʻOku ou loto ke ʻilo ki hoʻo fakakaukaú ʻi he fehuʻi ko ʻení: ʻOku malava ke ʻofa ki he ʻOtuá mo manavahē kiate ia ʻi he taimi tatau pē?” Tuku ke ne tali, pea lau ʻa e ngaahi konga mei he palakalafi 5 mo e 6 ʻi he peesi 20 ʻi he kupu “Ko e Hā ʻOkú Ne Ueʻi Koe ke Ke Ngāue ki he ʻOtuá?” (Koh. 12:13) Ngāueʻaki ha taha ʻo e ngaahi fakatātā ʻi he peesi 199 ʻo e tohi Reasoning, pea tuʻuaki ʻa e makasiní kapau ʻoku hā mai ha mahuʻingaʻia.
4 ʻI he ngāue mei he fale ki he falé, ʻoua ʻe fakalaka ʻi he ngaahi fale koloá. ʻOku fakamatalaʻi ʻa e ngāue ko ʻení ʻoku fakafiefia mo ola lelei ʻe kinautolu ʻoku nau ʻaʻahi maʻu pē ki he ngaahi fale koloá. ʻOku lava ke ke ʻahiʻahi ha tuʻuaki faingofua ʻo hangē ko ʻení ʻi hono tuʻuaki ʻa e “Taua Leʻo” ʻo Sepitema 1:
“ʻOku mau ʻiloʻi ʻoku houngaʻia ʻa e kakai pisinisí ke fakaeonopooni ʻa ʻenau ʻilo ki he ngaahi meʻa mahuʻinga ʻoku kaunga ki he kakai ʻo e fonuá. ʻOku ou fakapapauʻi ko e ngaahi kupu ko ʻení ʻe mahuʻinga ia kiate koe.” Pea lave nounou ki ha poini mei he kupu ko e “ʻOku Vavé Ni, Ke ʻIkai ha Taha ʻe Toe Masiva!”
5 Kapau ʻoku moʻua moʻoni ʻa e tokotaha ʻokú ke fakaofiofi atu ki aí, ʻoku lava ke ke fakaʻaliʻali ʻa e ngaahi makasiní peá ke pehē:
◼ “ʻOku ou ʻiloʻi naʻe ʻikai te ke ʻamanaki ki ha ʻaʻahi mai ʻi he ʻahó ni, ko ia te u fakanounou pē. ʻOku ou fie ʻoatu hao faingamālie ke ke lau ha meʻa ʻoku mahuʻinga.” Fakahā ʻa e kupu naʻá ke filifilí, pea tuʻuaki ʻa e ngaahi makasiní.
6 Tauhi lelei ha lekooti fale-ki-he-fale, pea toe ʻaʻahi ki he ngaahi makasini kotoa pē naʻe tukú. Kapau ʻoku hā ʻa e mahuʻingaʻia moʻoni ʻi he toe ʻaʻahí, tuʻuaki ha tukuhau ʻe taha pe fakatouʻosi ki he ongo makasiní. Ke tau mateuteu muʻa mo tokanga ke tuʻuaki ʻa ʻetau ngaahi makasiní ʻi he taimi faingamālie kotoa pē.