ʻOku Tau Maʻu ha Fekau
1 Naʻe fekauʻi ʻe Sīsū ʻa hono kau muimuí ke “ngaohi ʻa e ngāhi kakai kotoa pe ko ʻeku kau ako.” (Mt. 28:19) ʻI he ngaahi fonua mo e ʻotu motu ʻe 232 takatakai ʻi he māmaní, ʻoku laka hake ʻi he kau fakahīkihiki ʻe nima miliona ʻo e ʻOtua ko Sihová ʻoku nau ʻomai ʻa e fakamoʻoni moʻoni ki hono fakahoko ʻo e fekau ʻa Sīsuú. Kae fēfē ʻa kitautolu fakafoʻituituí? ʻOku tau fai fakamātoato ʻa e fekau ke malangá?
2 Ko ha Fatongia Totonu: Ko ha fekau ko “ha tuʻutuʻuni ke fakahoko ha ngaahi ngāue kuo vaheʻi.” ʻOku tuʻutuʻuniʻi kitautolu ʻe Kalaisi ke malanga. (Ng. 10:42) Naʻe ʻiloʻi ʻe he ʻaposetolo ko Paulá ʻoku hilifaki ʻiate ia ha fiemaʻu, pe fatongia totonu, ke fanongonongo ʻa e ongoongo leleí. (1 Kol. 9:16) Ke fakatātaaʻi: Fakakaukau atu ko ha kauvaka koe ʻi ha vaka ʻoku ngoto. ʻOku tuʻutuʻuniʻi koe ʻe he ʻeikivaká ke fai ha fakatokanga ki he kau pāsesé, pea fakahinohino kiate kinautolu ʻa e ngaahi vaka fakahaofi moʻuí. Te ke tukunoaʻi ʻa e tuʻutuʻuni ko iá pea hangataha pē ki hono fakahaofi ʻoʻoú? ʻIkai ʻaupito. ʻOku fakatuʻotuʻa mai ha niʻihi kehe kiate koe. ʻOku tuʻu taʻepau ʻenau moʻuí. Ko ho fatongia totonú ke fai ho fekaú ke tokoniʻi kinautolu.
3 Kuo tau maʻu ha fekau fakaʻotua ke fai ha fakatokanga. Kuo vavé ni ke ʻomai ʻe Sihova ʻa e ngataʻangá ki he kotoa ʻo e ngaahi meʻa ʻoku tuʻu fulikivanu ko ʻení. Ko e moʻui ʻe laui miliona ʻoku ʻi ha tuʻunga taʻepau. ʻE totonu nai kiate kitautolu ke tukunoaʻi ʻa e fakatuʻutāmaki ʻe hoko ki he niʻihi kehé kae tokangataha pē fekauʻaki mo hono fakahaofi kitautolú? Ko hono moʻoní, ʻoku ʻikai. ʻOku fakafatongiaʻi totonu kitautolu ke tokoni ki hono fakahaofi ʻa e moʻui ʻa e niʻihi kehé.—1 Tīm. 4:16.
4 Ngaahi Faʻifaʻitakiʻanga Anga-Tonu ke Muimui ki Ai: Naʻe ongoʻi ʻe he palōfita ko ʻIsikelí ʻokú ne moʻuaʻaki ke fai ha pōpoaki fakatokanga ki he kau ʻIsileli taʻeangatonú. Naʻe fakatokanga mālohi ʻa Sihova kiate ia ʻo kau ki he nunuʻa kapau ʻe ʻikai te ne fai hono fatongiá: “O kau ka behe ki he agahala, Koe mooni te ke mate; ka oku ikai te ke valoki, be lea ke fakatafoki ae agahala mei hono hala kovi, . . . e mate moʻoni ʻi he ene agahala ae agahala koia; ka ko hono toto teu eke ia kiate koe.” (ʻIsi. 3:18, PM) Naʻe fakahoko mateaki ʻe ʻIsikeli ʻa hono fekau iá neongo ʻa e ʻi he tuʻunga ʻo e fakatanga fefeká. Ko ia ai, naʻá ne fiefia ʻi he taimi naʻe fakahoko ai ʻa e fakamaau ʻa Sihová.
5 ʻI he ngaahi senituli ki mui maí, naʻe tohi ʻe he ʻaposetolo ko Paulá fekauʻaki mo hono fatongia ke malangá. Naʻá ne pehē: “Kuo u ʻataʻatā mei homou toto. He naʻe ʻikai te u taetae ʻa e finangalo ʻo e ʻOtua ka naʻa ku fakahā atu hono kotoa.” Naʻe malanga ʻa Paula ki he kakaí pea mei he fale ki he fale koeʻuhi he naʻá ne fakatokangaʻi ko e ʻikai ke fai peheé, ʻokú ne hoko ai ʻo halaia he totó ʻi he ʻao ʻo e ʻOtuá.—Ng. 20:20, 26, 27.
6 ʻOku tau maʻu ʻa e faivelenga ʻa ʻIsikelí? ʻOkú ke ongoʻi ʻoku ueʻi koe ke malanga ʻo hangē ko ia naʻe fai ʻe Paulá? Ko hono fekauʻi kitautolú ʻoku tatau tofu pē mo kinautolu. Kuo pau ke tau hokohoko atu ʻa hono fakahoko hotau fatongia ke fakatokanga ki he niʻihi kehé, neongo ʻa ʻenau loto-noá, taʻetokangá, pe fakatangá. ʻE lava ke tali ʻe he laui afe ʻa e pōpoaki ʻo e Puleʻangá mo nau pehē: “Te tau ō mo kimoutolu; he kuo mau fanongo ʻoku ʻiate kimoutolu ʻa e ʻOtua.” (Sāk. 8:23) ʻOfa ke ueʻi kitautolu ʻe heʻetau ʻofa ki he ʻOtuá mo hotau kaungā-tangatá ke ʻoua te tau foʻi. ʻOku tau maʻu ha fekau ke malanga!