Foaki Loto-Lelei Atu Kitautolu
1 Naʻe kikiteʻi ʻe he tokotaha-tohi-sāme ko Tēvitá ko e kakai ʻa Sihová “te nau foaki loto-lelei atu kinautolu”; ʻa ia ko e, “kau ngāue pole vave.” (Sāme 110:3, NW, fakamatala ʻi lalo) Ko e meʻa ko ʻení ʻoku fakahoko moʻoni ia ʻi he lotolotonga ʻo ʻetau fetokouaʻaki ʻi māmani lahí. ʻI he lolotonga ʻo e taʻu fakangāue taki taha ʻe fā kuohilí, naʻe fakamoleki ai ʻe he kakai ʻa Sihová ʻo laka hake ʻi he houa ʻe taha piliona ke fakamafola atu ʻa e ongoongo lelei ʻo e Puleʻangá. Pea ʻoku ʻi ai ʻa e ngaahi founga lahi, ke tānaki atu ki he ngāue fakamalangá mo e ngaohi ākongá, ʻa ia ʻe lava ke tau foaki loto-lelei atu ai kitautolu ke tokoniʻi ʻa e niʻihi kehé.
2 Ngaahi Founga ʻe Lava ke Tau Fakahā Ai ʻEtau Loto-Leleí: Ko e niʻihi ʻi he fakatahaʻangá ʻoku nau fiemaʻu nai ha tokoni ke nau maʻu ʻa e ngaahi fakatahá. Fēfē ke ke pole ke ke ʻave kinautolu? Ko e niʻihi kehe ʻoku puke nai, vaivai, pe ʻi he falemahakí. ʻE lava ke ke ʻuluaki ʻaʻahi kiate kinautolu pe hoko ʻo tokoni ʻi ha founga ʻe niʻihi? ʻOku ʻi ai nai ha tokotaha pe ko ha fāmili ʻoku fiemaʻu ki ai ha fakalototoʻa. Kuo ʻai mo ke fakakaukau ke fakaaʻu atu ha fakaafe ki ha faʻahinga pehē ke nau kau ʻi hoʻo ako fakafāmilí ʻi he taimi ki he taimi? ʻE fiemaʻu nai ʻe ha tāimuʻa pe ko ha tokotaha malanga ha kaungāngāue ʻi he ngāue fakafaifekaú. Fēfē ke ke talaange ke mo ngāue fakataha ʻi he ngāue fakamalangá? Ko e ngaahi founga ʻeni ʻa ia ʻe lava ke tau ngāue pole ai maʻá e lelei ʻa e faʻahinga ʻoku tau felāveʻi ʻi he tuí.—Kal. 6:10.
3 ʻE lava ke fakahā ʻe he ngaahi tokouá ʻenau loto-lelei ke ngāueʻaki ʻi he kautaha ʻa Sihová ʻaki ʻenau feinga ke hoko ʻo maʻu ʻa e tuʻunga taau ke hoko ko e kau mātuʻa mo e kau sevāniti fakafaifekau. (1 Tīm. 3:2-10, 12, 13; Tai. 1:5-9) ʻI heʻetau hokohoko atu ke tupulekina ʻi he tokolahí, ʻoku ʻi ai ʻa e fiemaʻu ki ha ngaahi tokoua taau ʻa ia ʻoku nau loto-lelei ke takimuʻa ʻi he malangá mo e faiakó pea ʻi hono tauhi ʻa e ngaahi fakatahaʻangá.—1 Tīm. 3:1.
4 Mahalo ko e niʻihi ʻiate kitautolu ʻe lava ke tau fakaʻatā kitautolu ki he ngāue ʻa Sihová ʻi ha founga lahi ange ʻaki ʻa e hoko ko e kau tāimuʻa tokoni mei he taimi ki he taimi. Pehē foki, fakataha mo ha ngaahi feʻunuʻaki feʻungamālie siʻi pē ʻi heʻetau taimi-tēpilé, te tau malava nai ke hokohoko atu pe naʻa mo e kau ki he ngāue tāimuʻa tuʻumaʻú. ʻOku tau maʻu ʻa e ngaahi tuʻunga ʻa ia ʻe lava ke tau hiki ai ki ha feituʻu ʻoku lahi ange ai ʻa e fiemaʻu tokoní? ʻE lava ke tau fakaʻatā kitautolu ke ngāue ʻi he Pētelí pea tokoni fakahangatonu ai ki he fakalakalaka ʻo e ngāue ʻi māmani lahí? ʻOku lahi foki ʻa e meʻa ke fai ʻi he langa ʻo e ngaahi Fale Fakatahaʻangá, ngaahi Fale ʻAsemipilī, pea mo e ngaahi fale ʻo e vaʻá takatakai ʻi māmani, ʻa ia ʻoku fiemaʻu moʻoni ai ʻa e loto-lelei ki he ngāué. Ko e faʻahinga kuo nau foaki atu kinautolu ki he ngaahi ngāue leleí ni ʻoku fakahoungaʻi lahi, pea kuo tāpuakiʻi lahi ʻaupito kinautolu!—Luke 6:38.
5 Ko e taimi ko ʻení ko ha taimi fakatupu-fiefia. Ko Sihova, fakafou ʻi hono laumālié, ʻokú ne fakahoko ha ngāue fakaofo ʻi māmani ʻaki ʻene kakai loto-leleí! ʻI ha taimi pē ʻoku fakaaʻu mai ai ʻe Sihova, fakafou mai ʻi heʻene kautahá, ha fakaafe ke kau ʻi hono fakalahi ʻa e ngāue ʻo e Puleʻangá, ʻoku totonu ke tau ʻeke hifo kiate kitautolu, ‘ʻOku ou kei foaki loto-lelei atu au?’ ʻOku totonu leva ke tau sivisiviʻi hotau lotó mo e ngaahi tuʻungá ʻi he lotu. Ko ʻetau anga-līʻoa fakaʻotuá te ne ueʻi kitautolu ke tau fai ʻa e lelei taha te tau malavá ʻi he ngāue toputapú, ʻo ʻai ai ʻa e loto ʻo Sihová ke fiefia lahi!—Sēf. 3:17.