ʻE Fakamoʻui ʻa e Faʻahinga Kakai Kotoa Pē

¹ Ko e finangalo ʻo Sihová “ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (1 Tim. 2:4) Neongo ʻoku tākiekina lahi ʻa e kakaí ʻe he tukufakaholó, tupuʻangá, mo e ʻātakaí, ʻoku nau maʻu ʻa e tauʻatāina ke fili pea malava ke fili fakafoʻituitui ki he founga te nau ngāueʻaki ai ʻenau moʻuí. ʻE lava ke nau fai ʻa e meʻa ʻoku leleí pea moʻui, pe ʻe lava ke nau fai ʻa e meʻa ʻoku koví pea ʻauha. (Mt. 7:​13, 14) ʻOku anga-fēfē hono ueʻi ʻe he mahino ko ʻení ʻetau vakai atu ki he kakai ʻoku tau fakaofiofi ki ai mo e ongoongo lelei ʻo e Puleʻangá?

² ʻOku ʻikai totonu ke tau fakamahalo ko e mahuʻingaʻia ʻa ha taha ʻi he moʻoní ʻoku tupu ia mei he ngaahi meʻa hangē ko e tupuʻanga fakafonua pe tukufakaholó pe ko e tuʻunga fakasōsialé. ʻOku lava ke fakamānako ʻa e moʻoní ki he faʻahinga ʻoku fakangatangata pe hokohoko atu ʻi he akó, ki he faʻahinga ʻoku kau ʻi he tulimui ki he meʻa fakapolitikalé, pea ki he kau maʻu lakangá, kau fakaʻikaiʻi-ʻOtuá, kau ʻakinositiká, pea pehē ki he kau ongoongoa he faikoví. Ko e kakai mei he ngaahi tupuʻanga mo e ngaahi tuʻunga fakasōsiale kehekehe kotoa kuo nau liliu mei heʻenau tōʻonga anga ki muʻá pea ʻoku nau ʻi ha tuʻunga ke maʻu ʻa e moʻuí ʻi he maama foʻou ʻa e ʻOtuá. (Pal. 11:19) Ko ia ai, ʻoku totonu ke ʻoua te tau toumoua ke fakaofiofi mo e pōpoaki ʻo e Puleʻangá ki he kakai ʻi he ngaahi tuʻunga kehekehe kotoa pē ʻo e moʻuí.

³ Fakakaukau ki he Ngaahi Fakatātaá Ni: Ko ha tangata naʻá ne palani ke tāmateʻi ʻene tamai-ʻi-he-fonó ka naʻe ʻikai malava. Ki mui maí, naʻá ne fakakaukau ke taonakita ka naʻe ʻikai malava. ʻI he hili hono tuku pilīsone ia ki he kaihaʻa mo e fefakatauʻaki ʻo e faitoʻo kona tapú, naʻe ʻikai lava ʻene malí. ʻI he ʻahó ni ko e tangatá ni ʻokú ne ʻi ha moʻui faitotonu pea ʻoku nofo mali fiefia pea pehē ki ha vahaʻangatae lelei mo ʻene tamai-ʻi-he-fonó. Ko e hā naʻe hoko ai ʻa e faikehekehé ni? Naʻá ne ako ʻa e Tohitapú mo e Kau Fakamoʻoni ʻa Sihová pea ngāueʻaki ʻa e meʻa naʻá ne akó. Naʻe ʻikai ke vakai ʻa Sihova ia kiate ia heʻikai toe lava ke fakatafokiʻi.

⁴ Ko e ʻiloa ʻa ha fefine kei talavou ʻi he ʻeti faiva TV naʻe ʻikai te ne ʻomai ha fiefia kiate ia. Ka ʻi he maongo kiate ia ʻa e ʻulungaanga lelei ʻa e Kau Fakamoʻoní, naʻá ne tali ha ako Tohitapu, pea naʻe vave ʻene tokoniʻi ʻa e niʻihi kehé ke ako fekauʻaki mo e ongoongo lelei ʻo e Puleʻangá. Pe ko fē pē ha feituʻu naʻá ne ʻalu ai ʻi he ngāue fakafaifekau fale-ki-he-falé naʻe ʻiloʻi ia, ka naʻá ne fakamatalaʻi fiefia ʻokú ne fiemaʻu ke ʻiloa ia ko e taha ʻo e Kau Fakamoʻoni ʻa Sihová kae ʻikai ko ha fefine ʻeti faiva.

⁵ ʻI he taimi naʻe fokotuʻutuʻu ai ʻe ha tokotaha Fakamoʻoni ha ako Tohitapu mo ha tokotaha tukuhau he Taua Leʻo, naʻe fanongo ai ha kaungāʻapi peá ne haʻu ki he akó. Naʻe vave leva hono fakatokangaʻi ʻe he tokotaha kaungāʻapí ʻa e moʻoni ʻa ia naʻá ne kumi ki aí! Ko ia mo hono husepānití naʻá na kaniseli leva ʻa e vete naʻe fakaʻatā ke faí peá na fakamelino. Naʻá ne kau kakato ʻi he vavalo fakaʻasitalōnomá pea naʻá ne hoko ʻo kau ki ha fakahaʻele faʻahikehe, ka naʻá ne loto-lelei ke liʻaki ʻa e ngaahi tohi totongi mamafa pea mo e ngaahi meʻa kehe kotoa pē naʻá ne maʻu ʻoku fekauʻaki mo e fakatēmenioó. Naʻe vave ʻa ʻene kamata ke maʻu ʻa e ngaahi fakatahá pea talanoa ki he ngaahi kāingá pea mo e ngaahi kaungāmeʻá fekauʻaki mo ʻene tui foʻoú. ʻI he taimí ni ʻokú ne faifakamoʻoni faivelenga ki he niʻihi kehé.

⁶ ʻOku totonu ke ʻoua te tau tomuʻa fakamāuʻi ha taha. Ka, ke tau vahevahe faivelenga atu ʻa e ongoongo leleí ki he kakai ʻi he feituʻu kotoa pē. ʻOku tau maʻu ʻa e ngaahi ʻuhinga lahi ke falala pau ko Sihova, ʻa ia ʻokú ne “afioʻi . . . ae loto,” te ne hoko ko e “Fakamoʻui ʻo e kakai kotoa pe.”​—1 Sam. 16:7, PM; 1 Tim. 4:​10.