ʻOku Tau “Malangaʻaki ʻa e Folofola”
1 ʻI he moʻoni fekauʻaki mo e fakamatala ʻa e Tohitapú ki he “kuonga fakamui,” ko e kakai tokolahi ʻi he ʻahó ni ʻoku nau maʻu pē “ʻa e ngeʻesi ʻo e lotu.” (2 Tim. 3:1, 5) ʻOku hoko ʻení koeʻuhi ʻoku ʻikai malava ʻe he kau taki lotú ke ʻoange ʻa e fakahinohino fakalaumālie moʻoní ki heʻenau ngaahi tākangá. Ko e haʻa faifekau ʻo e Puleʻanga-Haʻa-Kalisitiané ʻoku ʻikai te nau poupouʻi ʻa e Tohitapú. ʻOku nau saiʻia ange ke nau toe fakaongo mai ʻa e ngaahi akonaki taʻeʻaonga ʻa e kau filōsefá mo e kau lotukalafí pe ko hono talanoaʻi ʻa e ngaahi fakakikihi fakasōsialé mo e fakapolitikalé kae ʻikai ko hono malangaʻaki ʻa e Folofola ʻa e ʻOtuá. ʻOku ʻikai ke tui ʻa e kau taki lotu tokolahi ki he Tohitapú. ʻOku nau ongoʻi ʻoku fakaeonoʻaho ia, pea ko ia ai ʻoku nau hakeakiʻi angakehe ʻa e fakakaukau ʻo e tuputupu māmālié kae ʻikai ko e akonaki ʻa e Tohitapú fekauʻaki mo ha Tokotaha-Fakatupu Maʻongoʻongá. Ko e kau faifekau tokolahi ʻoku ʻikai pē ke nau ngāueʻaki ʻa e huafa tonu ʻo e ʻOtuá, pea ʻoku ʻikai te nau fakahā ha taʻeloto ki hono toʻo ia mei he ngaahi liliu Tohitapu ʻi onopooní.
2 Hangē ko ia naʻe moʻoni ʻi he kau taki lotu ʻi he ngaahi ʻaho ʻo Sīsuú, ʻi he ʻahó ni ʻoku taʻeʻaonga ʻa e malanga ʻa e haʻa faifekaú. (Mt. 15:8, 9) ʻOku hangē pē ko ia naʻe tala ki muʻa ʻe he palōfita ko ʻĒmosí. ʻE ʻi ai “ha honge ki he fonua; ʻo ʻikai ko ha honge meʻakai, pe ko e honge meʻainu, ka ko e honge ʻi he fanongo ki he folofola ʻa Sihova.” (Emosi 8:11) Laka hake ʻi ha toe meʻa kehe, ʻoku fiemaʻu ki he kakaí ʻa e meʻakai fakalaumālie ʻi he Folofola ʻa e ʻOtuá.
3 Founga ke Fakafiemālieʻi Ai ʻa e Fiemaʻu Fakalaumālie ʻa e Kakaí: Naʻe enginakiʻi ʻe Paula ʻa Tīmote ke nofo ki he “gaahi tohi maonioni, aia oku faa fakaboto [ha taha] ki he fakamoui,” pea naʻá ne fekauʻi fakamātoato ia ke “malangaʻaki ʻa e folofola” ki he niʻihi kehé. (2 Tim. 3:14, 15, PM; 4:2) ʻI he tuʻunga ko e Kau Fakamoʻoni ʻa Sihová, kuo pau ke tau pipiki ki he meʻa ʻoku akoʻi ʻe he Tohitapú ʻi he taimi ʻoku tau malanga aí, ʻo faʻifaʻitaki ki hotau Faʻifaʻitakiʻangá, ko Sīsū, ʻa ia naʻá ne pehē: “Ko ʻeku tokāteline ʻoku ʻikai aʻaku, ka ʻoku aʻana naʻa ne fekau mai au.” (Sione 7:16) ʻOku tau ngāueʻaki ʻa e Folofola ʻa e ʻOtuá ko e makatuʻunga ia ki heʻetau akonakí koeʻuhi ʻoku tau ʻiloʻi ʻoku ʻi ai ʻa e poto fakaʻotuá, pea ʻoku tau fiemaʻu ʻa e kakaí ke nau ʻilo ki he matavai ʻo e fakamatala ʻoku tau vahevahe mo kinautolú.—1 Kol. 2:4-7.
4 Kuo pau ke tomuʻa fanongo ʻa e kakaí ki he moʻoni mei he Tohitapú koeʻuhí ke nau ako fekauʻaki mo Sihova pea tui kiate ia. Naʻe tohi ʻuhinga-totonu ʻe Paula: “Te nau lava fefe ke tui ki ha toko taha kuo teʻeki ke nau fanongo ki ai? pea fefe haʻanau fanongo ʻoka ʻikai ha taha ke malanga?” (Loma 10:14) ʻI hono malangaʻaki ʻa e Folofola ʻa e ʻOtuá, ʻoku tau tokoniʻi ai ʻa e niʻihi kehé ke nau maʻu ʻa e tuí fakafou ʻi he ʻilo kānokano. ʻOku malava ʻe he ʻilo peheé ke ne liliu ʻa e moʻuí ki he lelei angé. Naʻe tohi ʻe ha faʻutohi Pilitānia ko Charles Dickens fekauʻaki mo e Tohitapú: “Ko e tohi lelei taha ia kuo ʻi he māmaní ʻi ha toe taimi, koeʻuhí ʻokú ne akoʻi kiate koe ʻa e ngaahi lēsoni lelei taha ʻa ia ʻe lava ke tataki ai ʻa e faʻahinga ʻo e tangatá ʻa ē ʻoku feinga ke lea moʻoni mo faitotonú.”
5 Ko e faʻahinga ʻoku nau fiekaia ki he moʻoni fakalaumālié ʻoku nau ʻiloʻi ʻoku poupouʻi ʻaki ʻa e mafai ʻo e Folofola ʻa e ʻOtuá. ʻI he 1913, ko Frederick W. Franz, ʻi hono tuʻunga ko ha tokotaha ako māʻolunga kei talavoú, naʻe ʻoange kiate ia ha kiʻi tohi naʻe fakakaveinga ko e Where Are the Dead? ʻI he hili hono laú fakataha mo e houngaʻia ʻi he tali ʻa e Tohitapú ki he fehuʻí ni, naʻá ne fakahā: “Ko e moʻoní ʻeni.” ʻOku laui miliona ʻa e kau fekumi ki he moʻoní kuo nau maʻu ʻa e ongoʻi tatau. ʻOfa ke tau hokohoko atu tōtōivi mo faivelenga hono malangaʻaki ʻa e Folofolá pea kau foki he fiefia ʻi he fanongo ki ha niʻihi kehe ʻoku nau pehē: “Ko e moʻoní ʻeni.”