Ngaahi Fakataha Ngāue ki Sanuali

Uike Kamata Sanuali 6

Hiva 151

10 min: Ngaahi fanongonongo fakalotofonua. Fanongonongo kuo filifili mei he ʻEtau Ngāue Fakafaifekau ʻo e Puleʻanga. Lave ki he līpooti ngāue fakamalanga ʻi ʻOkatopa ki he fonuá mo e fakatahaʻanga ʻi ho feituʻú.

20 min: Taimi ke Fakafoʻou ʻa e Advance Medical Directive/Release Card. Ke fakamatalaʻi ʻe ha tokotaha mātuʻa taau ʻa e mahuʻinga ʻo hono fakafonu fakalelei ʻa e kaatí pea toʻotoʻo maʻu pē ia he taimi kotoa. Ko e kaati ko ʻení ʻe lea maʻau kapau ʻe ʻikai malava ke ke lea maʻau ʻi ha tuʻunga fakafokifā. (Fakafehoanaki mo Palovepi 22:3.) ʻOku fiemaʻu ha kaati foʻou ke fakafonu he taʻu kotoa pē ke ne ʻoatu ha fakamatala fakamuimui ʻi he fakafisi mei he totó, koeʻuhi ko e kau toketā ʻe niʻihi mo ha niʻihi kehe kuo nau pehē ko e ngaahi kaati ʻoku motuʻa ange ʻi he taʻu ʻe tahá ʻoku ʻikai te ne ʻomai ʻe ia ʻa e tuipau lolotonga ʻa ha tokotaha. ʻI he hili ʻa e fakatahá, ko e kau malanga ʻosi papitaiso kotoa pē ʻe ʻoange ki ai ʻa e kaati Advance Medical Directive/Release, pea ko e faʻahinga ʻoku ʻi ai ʻenau fānau iiki ʻoku teʻeki ke papitaisó te nau maʻu ha Identity Card ki he kiʻi tama taki taha. Fakamatalaʻi ange ko e ngaahi kaati ko ʻení ʻe ʻikai ke fakafonu ia ʻi he pō ko ʻení. ʻOku totonu ke nau fakafonu fakalelei ia ʻi ʻapi kae ʻOUA ʻe fakamoʻoni hingoa ai. Ko e fakamoʻoni hingoá, fakamoʻoní, pea mo e ʻahó ki he ngaahi kaatí kotoa ʻe fai ia ʻi he Ako Tohi ʻa e Fakatahaʻangá ka hoko maí, ʻo tokangaʻi ʻe he tokotaha faiako ʻo e ako tohí. Te ne vakaiʻi pe ko e tokotaha kotoa pē ʻi heʻene kulupú ʻokú ne maʻu ha kaati pea maʻu mo e tokoni ʻoku fiemaʻú. Ko e faʻahinga ʻoku nau fakamoʻoni hingoa ko e fakamoʻoní ʻoku totonu ke nau sio totonu ʻi he fakamoʻoni hingoa ʻa e tokotaha ʻoku ʻaʻana ʻa e kaatí. Ko ha taha ʻe liʻaki ʻi he taimi ko iá ʻe tokoniʻi ia ʻe he kau faiako/mātuʻa ʻi he Fakataha Ngāue hono hokó kae ʻoua ke fakafonu fakalelei ʻe he kau malanga ʻosi papitaiso kotoa pē ʻenau ngaahi kaatí mo fakamoʻoni hingoa ai. (Toe vakai ki he tohi ʻo ʻOkatopa 15, 1991.) ʻI hono liliu lea mei he kaati ko ʻení ki honau ngaahi tuʻunga mo e ngaahi tuipau pē ʻa kinautolú, ko e kau malanga teʻeki papitaisó te nau hiki nai haʻanau fakahinohino pē ʻa kinautolu ke nau ngāueʻaki pea mo ʻenau fānaú. Lave ki he Puha Fehuʻi ʻo ʻEtau Ngāue Fakafaifekau ʻo e Puleʻanga ʻo Tīsema 1995. Ko hono ngāueʻaki ʻa e ʻiloʻilo ʻi hono fai ʻo e ngaahi fakaikiiki mahuʻingaʻia ko ʻení te ne ʻomai ha lelei meia Sihova.​—Pal. 16:20.

15 min: “Taau pea Mateuteu ke Akoʻi ʻa e Niʻihi Kehé.” (Palakalafi 1-6) Fai ha ngaahi fakamatala nounou ʻi he palakalafi 1-2, ʻo fakamamafaʻi ʻa e fiemaʻu kiate kitautolu ke hoko ʻo falala pau ko e tokoni ʻa Sihová te tau lava ai ke akoʻi ola lelei ʻa e niʻihi kehé. ʻAi ha ongo malanga mo e tokotaha-ʻapi ʻe toko ua ke nau fakahāhaaʻi ʻa e ngaahi tuʻuaki ʻi he palakalafi 3-6, fakataha mo e hoa taki taha ke fakahaaʻi ʻa e founga ke fai ai ha ʻuluaki ʻaʻahí pea mo ha toe ʻaʻahi. Fakamanatu ki he kau malangá ʻi he taimi ʻoku tuku ai ha tohi, ʻoku feʻungamālie kiate kitautolu ke lave ki he ngaahi tokoni ki heʻetau ngāue ʻi māmani lahí ʻoku talitali lelei.

Hiva 14 mo e lotu tuku.

Uike Kamata Sanuali 13

Hiva 107

15 min: Ngaahi fanongonongo fakalotofonua. Fakamatala paʻangá. Fakaeʻa ha ngaahi poini fakatupunga talanoa ʻi he ngaahi makasini lolotongá. ʻOatu ha ngaahi fokotuʻu ki he founga ke fakafeʻiloaki ai kitautolu ʻi he taimi ʻoku tau fakaofiofi ai ki he kakaí ʻi he faifakamoʻoni ʻi he founga ʻikai anga-mahení. Fakaafeʻi ʻa e kau fanongó ke nau lave ki he ngaahi lea kamata naʻa nau ngāueʻaki ʻi he taimi ʻoku nau lea ai ki ha niʻihi ʻi he ngaahi falekoloá, ʻi he halá, ʻi he paʻaké, ʻi he tauʻanga meʻalele maʻá e kakaí, pea mo e hā fua.

15 min: “Taau pea Mateuteu ke Akoʻi ʻa e Niʻihi Kehé.” (Palakalafi 7-9) Lave ki ha meʻa naʻe hoko fekauʻaki mo hono fai ʻa e ngaahi toe ʻaʻahí ʻoku maʻu ʻi he 1995 Yearbook, peesi 45, ʻo fakamamafaʻi ʻa e mahuʻinga ke ʻaʻahi ki ha mahuʻingaʻia pē ʻoku maʻu. ʻAi ha tokotaha malanga taau ke ne fakahāhaaʻi ʻa e ongo tuʻuaki ʻi he palakalafi 7-8. Neongo ko ha ngaahi tohi kehe naʻe ʻuluaki tuʻuakí, ʻoku totonu ke fakahangataha ʻetau ngaahi feingá ke faifai atu ʻo fai ha ngaahi ako ʻi he tohi ko e ʻIlo. Fakalototoʻaʻi kotoa ke fokotuʻutuʻu ha ngaahi taimi he lolotonga ʻo e uike ka hoko maí ke fai ai ha ngaahi toe ʻaʻahi.

15 min: Ngaahi fiemaʻu fakalotofonua. Pe “Lī Maʻu Pē Hoʻo Kavengá kia Sihova.” Ko ha malanga fakalototoʻa ʻoku makatuʻunga ʻi he Watchtower ʻo ʻEpeleli 1, 1996, peesi 27-29.

Hiva 222 mo e lotu tuku.

Uike Kamata Sanuali 20

Hiva 162

10 min: Ngaahi fanongonongo fakalotofonua.

15 min: “ʻE Fakamoʻui ʻa e Faʻahinga Kakai Kotoa Pē.” Fehuʻi mo e tali. Fakaafeʻi ʻa e kau fanongó ke lave nounou ki ha ngaahi meʻa naʻe hoko ʻo hā ai ʻa e founga naʻa nau maʻu ai ha tali fakafiemālie mei he kakai ʻoku nau haʻu mei he ngaahi tuʻunga kehekehe ʻo e moʻuí.

20 min: Faifakamoʻoni ʻAki ʻa e ʻUlungaanga Lelei. Ko ha tokotaha mātuʻa ʻokú ne fai ha fetalanoaʻaki mo ha ongo talavou ʻe toko ua pe tolu. Ko e fetalanoaʻakí ʻoku makatuʻunga ʻi he Watchtower ʻo ʻAokosi 15, 1987, peesi 10-​20. Fakakau atu ki ai ʻa e ngaahi meʻa naʻe hoko kuo ʻosi pulusi pea pehē ki he ngaahi meʻa naʻe hoko fakalotofonua ʻoku fakahaaʻi ai ʻa e founga ʻoku maongo ai ki he kau mamata maí ʻa e ʻulungaanga totonu ʻa e kau talavou Kalisitiané.

Hiva 149 mo e lotu tuku.

Uike Kamata Sanuali 27

Hiva 130

5 min: Ngaahi fanongonongo fakalotofonua.

10 min: Fakamanatu ʻo e Puha Fehuʻí ke fai ʻe he sekelitalí.

15 min: “ʻOku Tau ‘Malangaʻaki ʻa e Folofola.’” Fehuʻi mo e tali. Fakakau atu ki ai mo e ngaahi fakamatala ʻe niʻihi ʻoku hā ai ʻa e ʻuhinga ʻoku tau tokanga loloto ai ki he mahuʻinga ʻo e Folofola ʻa e ʻOtuá.​—Sio ki he Awake! ʻo Maʻasi 22, 1984, peesi 9-​11.

15 min: Fakamanatu ʻa e Tohi ke Tuʻuaki ʻi Fepuelí. Lave ki ha ngaahi meʻa mahuʻinga ʻi he tohí, hangē ko e: (1) Ngaahi kaveinga ʻo e vahé, (2) ngaahi fakamatala ʻi lalo he fakatātaá mo e ngaahi fakatātā fakaeako, pea mo e (3) ngaahi fehuʻi fakatupunga-fakakaukau kuo ʻosi pulusí. ʻI he fehoanakimālie mo e konga ʻuluaki ʻo e fakatahá, fakalototoʻaʻi ʻa hono ngāueʻaki ʻi he tuʻuakí ʻa e konga Tohitapu kuo ʻosi fili leleí. Fai hano fakahāhaaʻi ha tuʻuaki nounou ʻe taha pe ua, fakamanatu ki he tokotaha malangá ke lave ki he fokotuʻutuʻu ʻo hono fai ha tokoní ki he tokotaha-ʻapí. Fakamanatu ki he tokotaha kotoa ke ʻave ha ngaahi tohi ke ngāueʻaki ʻi he uike ko ʻení.

Hiva 51 mo e lotu tuku.