Fakataha-Lahi Fakavahe 2004 “ʻAʻeva mo e ʻOtuá” ʻa e Kau Fakamoʻoni ʻa Sihová
1 Ko e hā ʻokú ne ʻai ke makehe kiate koe ʻa ʻetau ngaahi fakataha-lahi fakavahe fakataʻú? Ko e ngaahi malanga fakatupu langa hake mo ha tulama kuo teuteuʻi maʻatautolu ʻe he “tamaioeiki agatonu mo boto”? (Mt. 24:45-47, PM) Ko e ʻū tohi foʻou ʻoku ʻi ai ʻa e meʻakai taimi totonu fakalaumālié? Ko e fanga tokoua mo e fanga tuofāfine ʻoku nau fakamatala ki heʻenau ngaahi hokosia ʻo e anga hono liliuʻi ʻe he Tohi Tapú ʻenau moʻuí ki he tuʻunga lelei angé? Ko e ngaahi līpooti ʻo e fakalakalaka ʻa e ngāue malangaʻi ʻo e Puleʻangá ʻi he ngaahi fonua kehé? Ko e feohi mo e kaungātui ʻo e taʻumotuʻa kotoa? ʻIo, ʻoku tau fakatuʻotuʻa atu ki heʻetau ngaahi fakataha-lahí fakataha mo e ʻamanaki ki he ngaahi meʻá ni pea mo e ngaahi meʻa lahi kehe!
2 Maʻu ʻa e ʻAho ʻe Tolú Kotoa: Fakafou ʻia Mōsese, naʻe fekau ʻe Sihova: “Fakataha ʻa e kakai, . . . koeʻuhi ke nau fanongoa, pea koeʻuhi ke nau maʻu akonaki.” (Teu. 31:12) Fakafou ʻi he kalasi tamaioʻeiki anga-tonu mo potó, kuo teuteuʻi ʻe Sihova ha polokalama makehe ʻo e ako maʻatautolu, ʻi he ʻaho taki taha ʻo ʻetau fakataha-lahí. Koeʻuhi ʻokú ne akoʻi kitautolu ke “fai meʻa ʻaonga,” ʻoku tau loto ke ʻi ai ʻi he kotoa ʻo ʻene fakahinohinó. (Ai. 48:17) Kapau ʻokú ke fiemaʻu ke kole ha taimi ʻatā mei ho pule ngāué, lotu kia Sihova pea fai hoʻo kolé, ʻi he muimui ki he faʻifaʻitakiʻanga loto-toʻa ʻa Nehemaiá. (Nehe. 1:11; 2:4) Pehē foki, ʻe hoko ko e anga-ʻofa ia ke fakahaaʻi ki he ngaahi mēmipa taʻetui ʻi he fāmilí ʻa hoʻo ngaahi palani ki he fakataha-lahí ʻi he vave taha ʻe ala lavá.
3 Nofoʻangá: Ko e tokolahi taha ʻo e kau malangá ʻoku nau tokanga ki he fakahinohino mahino ʻa ia naʻe ʻomai ʻi he ngaahi taʻu siʻi kuo maliu atú ʻi he ngaahi fakalahi ki he fakataha-lahí ʻi he ʻEtau Ngāue Fakafaifekau ʻo e Puleʻanga ʻo Meé, pea ʻoku hokosia ai ʻa e ngaahi ola lelei lahi. Kae kehe, ʻoku kei fiemaʻu pē ke kole atu ki he tokotaha kotoa pē ke KĀTAKI ʻO NGĀUEʻAKI ʻA E FAKAHINOHINO HOKÓ KI HONO MAʻU ʻA E NGAAHI NOFOʻANGA MŌTELÉ:
(a) Kātaki ʻoua ʻe taʻofi ha mōtele ʻoku ʻikai te ke fakataumuʻa ke ngāueʻaki pe ko ha mōtele lahi ange he tahá ʻi he fakakaukau ki hano ʻuluaki vakaiʻi ʻa e mōtele taki taha pea toki filiʻi leva ʻa e mōtele ʻoku lelei tahá, kae kaniseli ʻa e ʻū mōtele kehé. (Mt. 5:37) Ko e taʻeʻofa eni, pea ʻoku taʻofi ai ʻa e ʻū mōtelé mei hono maʻu ʻa e pisinisi naʻe mei malava ke nau maʻú. ʻOku toe toʻo ai foki mei he kau malanga kehé ʻa hono ngāueʻaki ʻa e ngaahi loki ko iá, ʻa ia ʻoku faʻa mātuʻaki fiemaʻú.
(e) ʻOua ʻe taʻofi ha ngaahi loki mōtele maʻau pe ki ha niʻihi kehe ʻo ʻikai ke fakahā ʻa e ngaahi hingoá mo ʻave leva ʻa e ngaahi tipōsiti ki he loki taki taha. ʻI he ʻikai ha tipōsití, ʻoku ʻi ai leva ʻa e totonu ʻa e mōtelé ke ʻave ho lokí ki ha taha kehe.
(f) ʻOua ʻe ʻai ha kakai tokolahi ange ke nau nofo ʻi he lokí ʻo tokolahi ia mei he meʻa ʻoku fakaʻatā ʻe he laó mo e fokotuʻutuʻú, ʻa ia ʻoku faʻa anga-maheni ʻaki ke ʻoua ʻe toe laka hake he toko fā pe ko e toko nima, ʻo kau ai ʻa e fānaú. Manatuʻi, ʻokú ke totongi ʻa e mahuʻingá ʻo fakatatau ki he lahi ʻo e faʻahinga naʻá ke ALEA ke ʻi he lokí.
(h) ʻOua ʻe lēsisita ki muʻa ʻi he 1:00 hoʻataá pe ko e hā pē ʻa e founga ngāue ʻa e mōtelé. Te ke lēsisita nai hili ʻa e polokalama ʻo e ʻaho ko iá, koeʻuhi he ʻoku maluʻi ʻe hoʻo tipōsití ho lokí.
(i) ʻOua ʻe feimeʻakai pe fakamafana meʻakai ʻi he lokí tuku kehe ka ʻoku ʻi ai hano peito ki he taumuʻa ko iá, pea ke tokanga ke ʻoua ʻe ʻuliʻi ha meʻa pē ʻi he lokí ʻaki ʻa e meʻakaí.
4 Ngaahi Fiemaʻu Makehe: Naʻe fakamanatu ʻe he ʻapositolo ko Paulá ki he ngaahi fakatahaʻanga ʻi Kalētiá ke “ngaue ʻaonga ki he kakai kotoa pe: kae lahi pe kiate kinautolu ʻoku ʻi he famili ʻo e lotu.” (Kal. 6:10) Ko e fanga tokoua mo e fanga tuofāfine taʻumotuʻá, ko e kau vaivaí, ngaahi mātuʻa taʻehoá, pe ko e faʻahinga ʻi he ngāue taimi-kakató ʻe ʻikai nai te nau kole ki hoʻo tokoní, ka ʻoku nau maʻu nai ha ngaahi tuʻunga faingataʻa ke ikuʻi koeʻuhi ke maʻu ai ʻa e fakataha-lahí. ʻOkú ke ʻi ha tuʻunga ke “ngaue ʻaonga” kia kinautolu pea fai ha tokoni? Ko e ngaahi kāinga Kalisitiané mo e kau mātuʻá ʻoku totonu ke nau lāuʻilo tautefito fekauʻaki mo e ngaahi tuʻunga ʻo e faʻahinga peheé.
5 Kapau ʻoku ʻoatu ha foomu Special Needs Room Request ʻe ha tokotaha malanga, ʻe vakaiʻi ia ʻe he Kōmiti Ngāue ʻa e Fakatahaʻangá, ʻo ngāueʻaki ʻa e ngaahi fakahinohino ʻi he fōmú. ʻOku totonu ke nau fakakaukau pe ʻe malava ke tokangaʻi fakalotofonua ʻa e fiemaʻú. Ko e tokonaki ko ení ʻoku maʻá e kau malanga pē ia ʻoku ʻi he tuʻunga leleí, fakataha mo ʻenau fānau ʻulungāanga lelei. Kapau ko e Potungāue Nofoʻangá ʻoku ʻi ai haʻane ngaahi fehuʻi fekauʻaki mo ha ngaahi fiemaʻu kole makehe, te nau fetuʻutaki ki he sekelitali ʻa e fakatahaʻangá.
6 Maʻu ha Toe Fakataha-Lahi ʻe Taha: Ko e feituʻu ʻoku vaheʻi atu kia koe ke ke maʻú ko e taha ko ia ʻoku ofi taha ki hoʻo fakatahaʻangá. Ko e ngaahi fokotuʻutuʻu ki hono maʻu ʻa e sea feʻunga, ʻū tohi, nofoʻanga, mo e alā meʻa peheé, ʻoku makatuʻunga ia ʻi he tuʻunga ko e tokolahi taha ʻo e kau malangá te nau maʻu ʻa e fakataha-lahi ʻa ia ʻoku vaheʻi ki ai ʻenau fakatahaʻangá. Kae kehe, kapau te ke maʻu ʻi ha ʻuhinga lelei ha fakataha-lahi kehe ia mei he taha ko ia ʻoku vaheʻi koe ki aí pea fiemaʻu ai ha nofoʻanga, mo e hā fua, ʻe lava ke ʻoatu ʻe he sekelitali ʻa e fakatahaʻangá kiate koe ʻa e tuʻasila ʻo e ʻuluʻi ʻapitanga ʻo e fakataha-lahí kapau ʻoku ʻikai te ke lava ke fai ʻa hoʻo ngaahi fokotuʻutuʻú. ʻI he taimi ʻokú ke tohi ai ki ha nofoʻanga pe fakahinohino kehé, fakakau ʻi hoʻo kolé ha sitapa, mo ha sila fakatuʻasila kia koe. Kapau ʻoku laka hake he tahá ʻa e fakataha-lahi ʻoku fai ʻi he kolo ko iá, fakapapauʻi ke fakahaaʻi ʻa e ngaahi ʻaho ki he fakataha-lahi te ke maʻú.
7 ʻI ha fakataha-lahi ʻa e kakai ʻa Sihová naʻe fai ʻi he meimei taʻu ʻe 2,500 kuo maliu atú, naʻe lau ai ʻa ʻĒsela mo hono kaungā Līvaí mei he Folofola ʻa e ʻOtuá pea fakamatalaʻi ia ki he kakai naʻe fakatahatahá. Ko e hā ʻa e olá? ʻOku tala mai kia kitautolu ʻi he Nehemaia 8:12 naʻe “tutuku ʻa e kakai kotoa ke . . . fakafiefia lahi, koeʻuhi naʻe ʻuhinga kiate kinautolu ʻa e ngaahi meʻa naʻe fakamatala mai.” ʻIkai ʻoku tau houngaʻia ʻi he kalasi tamaioʻeiki paní, hangē ko ʻĒsela mo e kau Līvaí, ʻi heʻenau ngāueʻaki ʻa e Folofola ʻa e ʻOtuá, fakamatalaʻi ia, pea fakahaaʻi kia kitautolu ʻa e founga ke ngāueʻaki ai ia ʻi heʻetau moʻuí? ʻI hono fai iá, ʻoku tapua atu ai ʻe he tamaioʻeiki ko iá ʻa e ʻofa moʻoni ʻa Sihova mo e tokanga ki Heʻene kakaí kotoa. ʻAi ko hoʻo fakapapaú ia ke ʻoua ʻe tō ʻi ha ʻaho ʻo e Fakataha-Lahi Fakavahe “ʻAʻeva mo e ʻOtuá”!
[Puha ʻi he peesi 3]
Taimi ʻo e Polokalamá
Falaite mo e Tokonaki
9:30 pongipongi - 5:05 efiafi
Sāpate
9:30 pongipongi - 4:05 efiafi
[Puha ʻi he peesi 5]
FEITUʻU ʻAHO NGAAHI SĒKETI
TONGA Sep. 17-19, 2004 10 Konga (Tonga)
Holo Fakamanatu Kuini Sāloté
Hala Mateialona (Tonga, faka-Pilitānia ʻe niʻihi)
Nukuʻalofa
LEA FAKA-HAʻAMOA ʻOk. 1-3, 2004 11 (Auckland Samoan; Avondale
South Auckland Assembly Hall Samoan; Christchurch Samoan;
160 Clevedon Road Manukau Samoan; Manurewa
Papakura Samoan; Porirua Samoan)
PALMERSTON NORTH—1 ʻOk. 8-10, 2004 3A, 3B, 3C
Arena Manawatu
Pascal Street
Palmerston North
PALMERSTON NORTH—2 ʻOk. 15-17, 2004 4A, 4B, 5A Konga (North &
Arena Manawatu South Taupo; Turangi),
Pascal Street 5B Konga (North & South
Palmerston North Gisborne; Ruatoria; Wairoa)
CHRISTCHURCH ʻOk. 22-24, 2004 1A, 1B, 2A, 2B
Westpac Trust Centre
Whiteleigh Avenue, Addington (Lea-fakaʻilonga foki)
Christchurch
HAMILTON—1 ʻOk. 29-31, 2004 5A Konga (Murupara; Putaruru;
Mystery Creek Events Centre Fenton Park, Kawaha &
Mystery Creek Road Westbrook, Rotorua; Matarawa &
Hamilton Strathmore,Tokoroa),
5B Konga (Kawerau; Opotiki;
Allendale & Piripai, Whakatane),
6A, 6B, 7A, 7B, 7C,
10 Konga (Auckland Korean)
HAMILTON—2 Nōv. 5-7, 2004 8A, 8B, 9A, 9B, 10 Konga
Mystery Creek Events Centre (Auckland Chinese; Auckland
Mystery Creek Road Niuean; Auckland Rarotongan;
Hamilton Auckland Tongan; Niue Island)
(Lea-fakaʻilonga foki)
LALOTONGA Nōv. 19-21, 2004 10 Konga (ʻOtu Motu Kuki)
Assembly Hall
Vaimaanga, Rarotonga
ʻOtu Motu Kuki