“Fakahaaʻi Hoʻomou Fakamālō”
1 ʻI hono fakamoʻui ʻe Sīsū ʻa e kau kilia ʻe toko hongofulú, ko e toko taha pē naʻe toe foki ke fai ʻa e fakamālōʻiá. Naʻe ʻeke ʻe Sīsū: “ʻIkai naʻe toko hongofulu naʻe fakamaʻa? pea kofaʻā ʻa e toko hiva?” (Luke 17:11-19) He mahuʻinga ē kiate kitautolu ke tau hoko ʻo houngaʻia pea fakahaaʻi ʻetau fakamālōʻia ki he ngaahi meʻaʻofa lelei kotoa pē kaeʻumaʻā ʻa e meʻaʻofa haohaoa kuo foaki mai maʻa kitautolu ʻe heʻetau Tamai fakahēvani ʻofa mo nima-homo, ko e ʻOtua ko Sihová!—Kol. 3:15, NW; Sem. 1:17.
2 Ko e hā ʻa e ngaahi meʻa ʻe niʻihi ke tau fakamālōʻiá? ʻOku tau houngaʻia ʻi he feilaulau huhuʻí, ʻa e meʻaʻofa lahi taha ʻa e ʻOtuá ki he faʻahinga ʻo e tangatá. (Sione 3:16) ʻOku tau toe fakamālō kia Sihova ʻi heʻene tohoaki kitautolu kiate iá. (Sione 6:44) Ko ʻetau fāʻūtaha faka-Kalisitiané ʻa e toe ʻuhinga ʻe taha ke tau hoko ai ʻo fakamālōʻiá. (Sāme 133:1-3) ʻOku ʻikai ha veiveiua ʻe lava ke ke fakakaukau ki ha toe ngaahi meʻaʻofa lahi meia Sihova. ʻOku ʻikai haʻatau teitei loto ke tau hangē ko e kau ʻIsileli taʻehoungaʻiá ʻa ia naʻe ngalo ʻiate kinautolu ʻa e ngaahi ngāue naʻe fai ʻe Sihova maʻa kinautolú!—Sāme 106:12, 13.
3 Fakahāhā ʻa e Fakamālōʻia: Neongo naʻe houngaʻia nai ʻa e kau kilia ʻe toko hongofulú ʻi he ngāue naʻe fai ʻe Sīsū maʻa kinautolú, ko e toko taha pē naʻá ne fakahaaʻi ʻene fakamālōʻiá. (Luke 17:15) ʻI he founga meimei tatau, ʻoku tau fakahāhā ʻa e houngaʻia ʻaki ʻa e kau faivelenga ʻi he ngāue fakafaifekaú. Kapau ʻoku tau fakamālōʻia moʻoni ʻi he ngaahi ngāue kotoa kuo fai ʻe heʻetau Tamai ʻofa fakahēvaní, ʻe ueʻi ai hotau lotó ke tau tapua atu ʻene ʻofá mo ʻene nima-homó ʻaki ʻetau tala ki he niʻihi kehé fekauʻaki mo ia. (Luke 6:45) Ko ia ai, ʻi heʻetau fakamatala ki he niʻihi kehé ʻa e ‘ngaahi ngaue fakaofo ʻa Sihová pea mo ʻene ngaahi fakakaukau maʻa hotau faʻahingá,’ ʻoku tupulaki ai ʻetau ʻofa mo e houngaʻia kia Sihová.—Sāme 40:5.
4 Fakahūhū ʻa e Houngaʻia ʻi he Niʻihi Kehé: ʻOku totonu ke tau tokanga ke tokoniʻi ʻetau fānaú pea mo e kau ako Tohi Tapú ke nau fakatupulekina ʻa e houngaʻiá. ʻOku lahi ʻa e ngaahi faingamālie ʻoku maʻu ʻe he ngaahi mātuʻá ke nau fai ai ení, hangē ko ʻenau talanoa fiefia fakataha mo ʻenau fānaú ki he fakatupú. (Loma 1:20) ʻI hono fakahoko ʻo ha ako Tohi Tapu, te tau ʻeke nai ki heʻetau tokotaha akó, “Ko e hā ʻoku tala mai ʻe he meʻá ni fekauʻaki mo Sihová?” ʻI he tupulaki ʻa e houngaʻia ʻa e tokotaha akó, ʻe pehē pē ʻa e tupulaki ʻene ʻofa ki he ʻOtuá mo ʻene fakapapau ke fakahōifuaʻi iá.
5 ʻI he lolotonga ʻo e ngaahi ʻaho fakaʻosí ni, ʻoku tokolahi ʻa e kau taʻehoungaʻiá mo e kau taʻefakamālōʻiá. (2 Tim. 3:1, 2) He fiefia moʻoni ʻa Sihova ʻi heʻene ʻafio mai ki heʻene kau sevāniti līʻoá ʻoku nau fakahāhā ʻa e fakamālōʻiá ʻaki ʻenau kau faivelenga ʻi he ngāue fakafaifekaú!—Sem. 1:22-25.