Kumi ki he Faʻahinga Tāú
1. ʻOku anga-fēfē ʻetau fakahaaʻi ʻa e houngaʻia ki he monū ʻo e kau ʻi he ngāue fakafaifekaú?
1 Lolotonga ʻa e ngāue fakafaifekau ʻa Sīsuú naʻá ne fononga ki he ngaahi feituʻu mamaʻo ke ʻoatu ʻa e ongoongo lelei fakafiemālie ki he anga-vaivaí. (Ai. 61:1, 2) ʻI he tuʻunga ko e kau fakafofonga mo e kau talafekau maʻa Kalaisí, ʻoku tau maʻu he ʻahó ni ʻa e monū maʻongoʻonga ko e faʻifaʻitaki kiate ia ʻi heʻetau fekumi hokohoko mo fakaʻāuliliki ki he faʻahinga taau ʻi hotau feituʻu ngāué.—Mt. 10:11; 2 Kol. 5:20.
2. Naʻe anga-fēfē hono fakahāhā ʻe Paula ʻene ngaofengofuá, pea ko e hā hono olá?
2 Ngaofengofua: Ko e ʻapositolo ko Paulá naʻá ne tōʻongaʻaki ʻa e tomuʻa ʻalu ki he sinakoké ke malanga ai ki he kau Siú mo e kau ului Siú. (Ng. 14:1) ʻI Filipai, naʻá ne ʻalu ai mo Sailosi ʻo kumi ki he kakaí ʻi he feituʻu ‘naʻá na mahalo ʻoku fai ai ha lotu.’ Naʻá na kamata faifakamoʻoni ki ha kau fefine, pea ko e taha ʻo kinautolu, ko Litia, naʻe vave ʻene tali ʻa e moʻoní.—Ng. 16:12-15.
3. Ko e hā e ngaahi faingamālie ʻo e ngāué te tau fiefia nai ai ʻo tānaki mai ki hotau feituʻu ngāue fale-ki-he-falé?
3 Tānaki atu ki ho feituʻu ngāue fale-ki-he-falé, ʻe lava ke ke toe malanga ki he kakai ʻi he ngaahi tauʻanga meʻalelé, paʻaké, ʻū ʻōfisi ngāue, ngaahi hala femoʻuekina, feituʻu fakapisinisí, mo e ngaahi senitā fefakatauʻaki ʻi ho feituʻú? Mahalo ʻe lava ke ke faifakamoʻoni ki he faʻahinga ʻi he ngaahi feituʻu ʻaaʻi malú mo e ngaahi ʻapaatimeni leʻohí fakafou ʻi he faitohi pe telefoni. Ko e fakatokanga meʻa mo ngaofengofua ki he ngaahi fiemaʻu kehekehe ʻi ho feituʻu ngāué ʻe ʻai ai ke ke lava ʻo “tupulekina maʻu ai pe ʻi he ngaue ʻa e ʻEiki.”—1 Kol. 15:58.
4. Ko e hā ha toe feituʻu ngāue ʻoku tau maʻu kapau ʻoku siʻisiʻi ʻa e feituʻu ngāue ʻo ʻetau fakatahaʻangá?
4 Kuo maʻu ʻe he kau malanga tokolahi ʻa e faingamālie ke fakalahi ʻenau ngāue fakafaifekaú ʻaki ʻa e hiki ki ha toe fakatahaʻanga ʻi honau fonuá pe ʻi ha fonua muli. Kuo ako ʻe he niʻihi ha lea foʻou ke lava ai ʻo malanga ki he kakai ʻa ia ko ʻenau ō mai mei ha fonua kehe.
5. ʻOku totonu ke fēfē ʻetau vakai ki he taimi ʻoku tau moʻui aí, pea ʻoku totonu ke tau fakapapauʻi ke fai ʻa e hā?
5 Kuo pau ke tau manatuʻi kotoa ko e “ngoue ko māmani” ia. (Mt. 9:37; 13:38) ʻI he vakai atu ki he tuʻunuku mai ʻa e ngataʻanga ki he fokotuʻutuʻu fulikivanu ko ení, kuo pau ke taki taha fakakaukau fakamātoato hifo ki hoto tuʻungá tonu, talēnití, faingamālié mo e malava ke fakalahi atu ʻete ngāue fakafaifekaú. ʻOku fakapapauʻi mai ʻe Sihova kapau te tau fakamuʻomuʻa ʻa e ngaahi meʻa ʻo e Puleʻangá, te ne faitāpuekina ʻetau feinga loto-moʻoni ke fakalahi ʻetau ngāue fakafaifekaú.—Mt. 6:33.