Naʻe ʻi ai ha taʻahine ʻa Sisipeli ko ʻAtalaia, ʻa ia naʻe fulikivanu tatau pē mo ʻene faʻeé. Naʻe mali ʻa ʻAtalaia mo e tuʻi ʻo Siutá. ʻI he mate ʻa hono husepānití, naʻe kamata ke pule ʻa ʻene tamasiʻí. Ka ʻi he mate ʻene tamasiʻí, naʻe ʻai ʻe ʻAtalaia ʻa ia tonu ke ne pule ki Siuta. Pea naʻá ne feinga ke fakaʻauha ʻa e fale kotoa ʻo e tuʻí, ʻo tāmateʻi ha taha pē ʻe lava ke hoko ko e pule kae ʻikai ko ia, ʻo aʻu pē ki hono fanga mokopuná tonu. Naʻe ilifia ʻa e tokotaha kotoa ʻiate ia.

Ko e Taulaʻeiki Lahí ko Sihoiata mo hono uaifí ko Siosepa, naʻá na ʻiloʻi ko e meʻa naʻe fai ʻe ʻAtalaiá naʻe kovi ʻaupito. Naʻá na tuku ʻena moʻui ki ha tuʻunga fakatuʻutāmaki ʻi heʻena fūfuuʻi ʻa e taha ʻo e fanga mokopuna ʻo ʻAtalaiá, ko ha pēpē ko Sihoasi. Naʻá na tauhi hake ia ʻi he temipalé.

ʻI he taʻu fitu ʻa Sihoasí, naʻe fakatahatahaʻi mai ʻe Sihoiata ʻa e ngaahi ʻeikí mo e kau Līvaí kotoa peá ne tala ange kiate kinautolu: ‘Leʻohi ʻa e ngaahi matapā ʻo e temipalé, pea ʻoua ʻe tuku ke hū ha taha ki loto.’ Naʻe fakanofo leva ʻe Sihoiata ʻa Sihoasi ke tuʻi ki Siuta peá ne ʻai ʻa e kalauní ki hono ʻulú. Naʻe kaila ʻa e kakai ʻo Siutá: ‘Ke moʻui fuoloa ʻa e tuʻí!’

Naʻe fanongo ʻa Kuini ʻAtalaia ki he longoaʻa ʻa e kakaí peá ne fakavave atu ki he temipalé. ʻI heʻene sio ki he tuʻi foʻoú, naʻá ne kaila: “Ko e faʻufaʻufono! Ko e faʻufaʻufono!” Naʻe puke ʻe he ngaahi ʻeikí ʻa e kuini fulikivanú, ʻo nau ʻave ʻo tāmateʻi ia. Kae fēfē ʻa e tākiekina kovi naʻá ne fai ki he puleʻangá?

Naʻe tokoniʻi ʻe Sihoiata ʻa e puleʻangá ke nau fai ha fuakava mo Sihova ʻa ia naʻa nau palōmesi ai te nau lotu pē kiate Ia. Naʻe ʻai ʻe Sihoiata ke nau holoki ʻa e temipale ʻo Pēalí pea laiki ʻo momomomo ʻa e ngaahi ʻaitolí. Naʻá ne fakanofo ʻa e kau taulaʻeiki mo e kau Līvai ke nau ngāue ʻi he temipalé koeʻuhi ke lava ʻo toe lotu ʻi ai ʻa e kakaí. Naʻá ne vaheʻi ʻa e kau leʻo matapā ke nau leʻo ʻi he temipalé ke ʻoua ʻe hū ki ai ha tokotaha taʻemaʻa. Naʻe ʻave leva ʻe Sihoiata mo e ngaahi ʻeikí ʻa Sihoasi ki he palasí ʻo ʻai ke ne nofo ʻi he taloní. Naʻe fiefia ʻa e kakai ʻo Siutá. Naʻe lava ke nau tauhi kia Sihova, ʻi he faifai pea nau ʻatā mei he tokotaha fulikivanu ko ʻAtalaiá pea mei he lotu Pēalí. ʻOkú ke sio ki he tokoniʻi ʻe Sihoiata ʻa e kakai tokolahi ʻi heʻene loto-toʻá?

ʻI he kolo ʻAsīlia ko Ninivé, naʻe fulikivanu ai ʻa e kakaí. Naʻe tala ʻe Sihova ki heʻene palōfita ko Sioná ke ne ʻalu ki Ninive ʻo fakatokanga kiate kinautolu ke liliu ʻenau ngaahi foungá. Ka naʻe hola ʻa Siona ia ki ha feituʻu kehe. Naʻá ne heka ʻo ʻalu ʻi ha vaka ne folau ki Tāsisi.

Lolotonga ʻa e ʻi tahi ʻa e vaká, naʻe tō ha fuʻu matangi mālohi, pea naʻe ilifia ʻaupito ʻa e kau kauvaká. Naʻa nau lotu ki honau ngaahi ʻotuá ʻo ʻeke: ‘Ko e hā ʻoku hoko ai ení?’ Naʻe faifai pē pea tala ange ʻe Siona kiate kinautolu: ‘Ko au ke mou tukuakiʻí. ʻOku ou hola mei he meʻa naʻe tala mai ʻe Sihova ke u fai. Mou lī au ki tahi, pea ʻe tuʻu ʻa e fuʻu matangí.’ Naʻe ʻikai ke loto ʻa e kau kauvaká ke lī ʻa Siona ki tahi, ka naʻá ne vili ke nau fai ia. ʻI heʻenau lī ia ki tahí, naʻe tuʻu ʻa e fuʻu matangí.

Naʻe pehē ʻe Siona te ne mate. ʻI heʻene puli hifo ʻi he tahí, naʻá ne lotu kia Sihova. Naʻe fekauʻi mai leva ʻe Sihova ha fuʻu ika. Naʻá ne folo ʻa Siona, ka naʻe ʻikai te ne mate ai. Naʻe lotu ʻa Siona ʻi he loto kete ʻo e iká: ‘ʻOku ou palōmesi te u talangofua maʻu pē kiate koe.’ Naʻe tauhi malu ʻe Sihova ʻa Siona ʻi he loto kete ʻo e iká ʻi he ʻaho ʻe tolu peá ne toki ʻai ke puʻaki ʻe he iká ʻa Siona ki he fonua mōmoá.

Koeʻuhi ko hono fakahaofi ʻe Sihova ʻa Sioná, naʻe ʻuhinga iá naʻe ʻikai toe fiemaʻu ia ke ne ʻalu ki Ninive? ʻIkai. Naʻe toe tala ange ʻe Sihova kia Siona ke ne ʻalu ki ai. Naʻe talangofua ʻa Siona ʻi he taimi ko ení. Naʻá ne ʻalu ki ai peá ne tala ki he kakai fulikivanu ko iá: ‘ʻI he ʻaho ʻe 40, ʻe fakaʻauha ʻa Ninive.’ Naʻe hoko leva ai ha meʻa taʻeʻamanekina​—naʻe fanongo ʻa e kau Ninivé pea liliu ʻenau ngaahi founga moʻuí. Naʻe tala ʻe he tuʻi ʻo Ninivé ki hono kakaí: ‘Mou ui ki he ʻOtuá, pea fakatomala. Mahalo pē heʻikai te ne fakaʻauha kitautolu.’ ʻI he sio ʻa Sihova kuo fakatomala ʻa e kakaí, naʻe ʻikai te ne fakaʻauha ʻa Ninive.

Naʻe ʻita ʻa Siona ʻi he ʻikai ke fakaʻauha ʻa e koló. Fakakaukau angé: Naʻe anga-kātaki mo meesi ʻa Sihova kia Siona, ka naʻe ʻikai ke meesi ʻa Siona ia ki he kakai ʻo Ninivé. ʻI hono kehé, naʻá ne tangutu ʻi he tuʻa koló ʻo fakamalumalu ʻi ha fuʻu ʻakau totolo ʻo fakafulofula. Pea naʻe mate ʻa e fuʻu ʻakaú, pea naʻe ʻita ʻa Siona. Ko ia naʻe tala ange ʻe Sihova kiate ia: ‘ʻOkú ke tokanga lahi ange koe ki he kiʻi fuʻu ʻakau ko ení ʻi he kakai ʻo Ninivé. Naʻá ku fakahāhā ʻa e meesi kiate kinautolu, pea naʻa nau hao.’ Ko e hā ʻa e lēsoní? ʻOku mahuʻinga ange ʻa e kakai ʻo Ninivé ʻi ha fuʻu ʻakau pē.