Ko e Hā ʻa e Ongoongo Leleí?

1. Ko e hā ʻa e ongoongo mei he ʻOtuá?

ʻOku fiemaʻu mai ʻe he ʻOtuá ke fiefia ʻa e kakaí ʻi he moʻui ʻi he māmaní. Naʻá ne fakatupu ʻa e foʻi māmaní mo e meʻa kotoa ʻoku ʻi aí koeʻuhí ko ʻene ʻofa ʻi he faʻahinga ʻo e tangatá. Kuo vavé ni ke ne ngāue ke tokonaki mai ha kahaʻu lelei ange maʻá e kakai ʻi he fonua kotoa pē. Te ne toʻo atu mei he faʻahinga ʻo e tangatá ʻa e ngaahi tupuʻanga ʻo e faingataʻá.​—Lau ʻa e Selemaia 29:11.

ʻOku ʻikai ha founga-pule kuo faifai ange pea lavameʻa ʻi hano toʻo atu ʻa e fakamālohí, mahamahakí, pe maté. Ka ʻoku ʻi ai ha ongoongo lelei. ʻOku vavé ni ke fetongi ʻe he ʻOtuá ʻa e ngaahi founga-pule fakaetangata kotoa pē ʻaki ʻene founga-pule pē ʻaʻaná. Ko e faʻahinga ʻi he malumalu ʻo e founga-pule ko iá te nau fiefia ʻi he melino mo e moʻui lelei.​—Lau ʻa e ʻAisea 25:8; 33:24; Taniela 2:44.

2. Ko e hā ʻoku mātuʻaki mahuʻinga ai ʻa e ongoongo leleí?

ʻE toki ngata pē ʻa e faingataʻá ʻi hano tafiʻi atu ʻe he ʻOtuá mei he foʻi māmaní ʻa e kakai koví. (Sēfanaia 2:3) ʻE hoko ia ʻafē? Naʻe tomuʻa tala ʻe he Folofola ʻa e ʻOtuá ʻa e ngaahi tuʻunga ko ia ʻokú ne fakamanamanaʻi he taimí ni ʻa e faʻahinga ʻo e tangatá. ʻOku fakahaaʻi ʻe he ngaahi meʻa ʻoku lolotonga hokó ʻoku ofí ni ʻa e taimi ke ngāue mai ai ʻa e ʻOtuá.​—Lau ʻa e 2 Tīmote 3:1-5.

3. Ko e hā ʻoku totonu ke tau faí?

ʻOku totonu ke tau ako fekauʻaki mo e ʻOtuá mei heʻene Folofolá, ko e Tohi Tapú. ʻOku hangē ia ha faitohi mai kiate kitautolu mei ha tamai ʻofá. ʻOku tala mai ai kiate kitautolu ʻa e founga ke maʻu ai ha founga moʻui lelei ange he taimí ni pea mo e founga ke maʻu ai ʻa e moʻui taʻengata ʻi he māmaní ʻi he kahaʻú. Ko e moʻoni, ʻe ʻi ai nai ha niʻihi heʻikai te nau saiʻia ke ke maʻu ha tokoni ke mahinoʻi ʻa e Tohi Tapú. Ka ko e faingamālie ki ha kahaʻu lelei angé ʻoku ʻikai tuha ia ke liʻaki.​—Lau ʻa e Palōveepi 29:25; Fakahā 14:6, 7.