KAMATAʻI HA FETALANOAʻAKI
LĒSONI 2
Fakanatula
Tefitoʻi Moʻoní: “Ko ha lea ʻoku leaʻaki ʻi he taimi totonú—hono ʻikai lelei!”—Pal. 15:23.
Meʻa Naʻe Fai ʻe Filipé
1. Sio ʻi he VITIOÓ, pe lau ʻa e Ngāue 8:30, 31. Fakakaukau leva ki he ongo fehuʻi ko ení:
a. Naʻe anga-fēfē hono kamataʻi ʻe Filipe ʻa e fetalanoaʻakí?
e. Ko e hā ko ha founga fakanatula ai eni ke kamataʻi ʻa e fetalanoaʻakí pea vahevahe ha moʻoni foʻou ki he tangatá?
Ko e Hā ʻOku Tau Ako meia Filipé?
2. Kapau ʻoku tau anga-fakafetalanoaʻaki, ʻoku ngalingali ange ʻe ongoʻi fiemālie ʻa e tokotahá pea loto-lelei ke fanongo ki heʻetau pōpoakí.
Faʻifaʻitaki kia Filipe
3. Hoko ʻo fakatokanga meʻa. Ko e fakafōtunga ʻo e matá pea mo e ngaue ʻo e sinó ʻokú ne fakahaaʻi mai ʻa e meʻa lahi fekauʻaki mo ha taha. ʻOku hā ngali ko e tokotahá ʻokú ne loto-lelei ke mo talanoa? ʻE lava nai ke ke fakahaaʻi ha moʻoni Fakatohitapu ʻaki pē hono ʻeke, “Naʻá ke ʻiloʻi . . . ?” Fakaʻehiʻehi mei he vilitaki ke talanoa mo ha taha kapau ʻoku ʻikai te ne loto ki ai.
4. Hoko ʻo anga-kātaki. ʻOua ʻe ongoʻi kuo pau ke ke fakahaaʻi ha moʻoni Fakatohitapu ʻi he taimi pē ko iá. Tatali ki he taimi totonú koeʻuhí ke ke lava ʻo ʻohake ia ʻi ha founga fakanatula. ʻI he taimi ʻe niʻihi ʻoku ʻuhinga nai ení ko e tatali ki he taimi hono hoko te ke talanoa ai mo e tokotahá.
5. Hoko ʻo feʻunuʻakingofua. ʻE kamata nai ke talanoa ʻa e tokotahá ki ha meʻa naʻe ʻikai te ke ʻamanekina. Ko ia loto-lelei ke vahevahe ha meʻa ʻa ia ʻoku kaunga ki he tokotahá, neongo kapau ʻoku ʻuhinga iá ko e fetalanoaʻaki ʻi ha moʻoni Fakatohitapu ʻoku kehe ia mei he meʻa naʻá ke ʻosi teuteú.