‘ʻOku Totonu Ke Mou Ongoʻi Laukau ʻi he Meʻá Ni’
ʻOKU ʻiloʻi ʻe he kau sevāniti ʻa e ʻOtuá ʻa e mahuʻinga ʻo e faitotonú. ʻOku ueʻi kinautolu ʻe he ʻofa ki honau Tokotaha-Fakatupú ke nau ongoʻi pehē. Ke fakatātāʻaki, fakakaukau ki he meʻa fekauʻaki mo Lázaro. ʻI ha taimi ʻi he kuohilí ʻi heʻene hoko ko ha tokotaha ngāue ʻi ha hōtele ʻi Huatulco, Mekisikou, naʻá ne ʻilo ai ha paʻanga ʻe 70 naʻe tō ʻi he loki hūʻangá. Naʻá ne ʻave he taimi pē ko iá ʻa e paʻangá ki he pule naʻe ngāué. Hili ha taimi siʻi mei ai naʻá ne ʻilo ha uāleti ʻi ha fale kaukau. Naʻá ne fakafoki ia ki he tesi talitali kakaí, ʻo ʻohovale pea fiefia ai ʻa e tokotaha naʻe mole mei aí.
Naʻe hoko ʻa e ongo foʻi ngāue ko ʻení ʻo ʻilo ki ai ʻa e pule lahí, ʻa ia naʻá ne ʻeke ange kia Lázaro pe ko e hā naʻá ne ueʻi ia ke ne fakafoki ʻa e paʻangá mo e uāletí. Naʻe tali ange ʻe Lázaro ko e ngaahi tefitoʻi moʻoni fakaeʻulungāanga naʻá ne ako mei he Tohi Tapú naʻá ne taʻofi ia mei hono toʻo ha meʻa naʻe ʻikai ʻaʻaná. ʻI ha tohi ʻo fakahaaʻi ʻa e houngaʻiá, naʻe tala ange ai ʻe he pule lahí kia Lázaro: “ʻI he ʻahó ni ʻoku faingataʻa ke maʻu ha kakai ʻoku nau pouaki ʻa e ngaahi tefitoʻi moʻoni māʻolunga fakaeʻulungāangá. ʻOku mau fakaongoongoleleiʻi koe ʻi hoʻo tōʻongá. Kuó ke fakahāhaaʻi mai koe ko ha tangata lelei, ko ha faʻifaʻitakiʻanga ki ho ngaahi kaungāngāué. Ko koe mo ho fāmilí ʻoku totonu ke mou ongoʻi laukau ʻi he meʻá ni.” Ko Lázaro ʻa e tokotaha ngāue tuʻu-ki-muʻa ʻo e māhina ko iá.
Naʻe fakakaukau ʻa e niʻihi ʻo e kaungāngāué naʻe hala ʻa Lázaro ʻi heʻene fakafoki ʻa e ongo meʻa ko iá. Ka ʻi he hili ʻenau sio ki he tali ʻa honau pule ngāué, naʻa nau talamonū kia Lazaro ki hono pouaki ʻene ngaahi tefitoʻi moʻoni fakaeʻulungāangá.
ʻOku enginaki mai ʻa e Tohi Tapú ki he kau muimui faitōnunga ʻo Sīsuú ke nau “fai lelei ki he kakai kotoabe” pea ke “moui agatonu i he mea kotoabe.” (Kaletia 6:10, PM; Hepelu 13:18, PM) ʻOku ʻikai ha veiveiua, ko hono fakahāhaaʻi ʻa e faitotonú ʻi he tuʻunga ko e kau Kalisitiané ʻokú ne ʻomai ʻa e lāngilangi ki he ʻOtua “agatonu mo maonioni” ʻo e Tohi Tapú, ʻa Sihova.—Teutalonome 32:4, PM.