Vakai ki he Māmaní

◼ ʻI Sepitema 2004, naʻe fakatupunga ai ʻe he afā ko Ivan ʻa e ngaahi foʻi peau ʻo ʻikai toe siʻi hifo he 24 ʻi he kūlifa ʻo Mekisikoú ʻa ia naʻe laka hake honau māʻolungá ʻi he mita ʻe 15. Ko e foʻi peau māʻolunga tahá naʻe feʻunga ia mo e mita ʻe 27.7.​—MAKASINI SCIENCE, ʻAMELIKA.

◼ Ko hono ngāueʻaki ʻa e telefoni toʻotoʻó lolotonga ʻa e fakaʻulí ʻoku iku ia ki he tupu liunga fā ʻo e ngalingali ko ia ʻe hoko ha fakatuʻutāmaki ʻa ia ʻe fiemaʻu ki ai ʻa e aʻu ki he falemahakí, ʻo tatau ai pē pe ʻoku ngāueʻaki ʻe he kau fakaʻulí ha telefoni ʻoku toʻotoʻo ʻi he nimá pe ko e kalasi ko ē ʻoku tau-uaea pē ki he telingá mo e ngutú.​—BMJ, PILITĀNIA.

Ngaahi Vakai ki he Tuʻumālié

ʻOku līpooti ʻe he ABC News Online ʻo pehē kuo maʻu ʻi ha fakatotolo ʻa ha senitā fakatotolo ʻi ʻAositelēlia ʻo fekauʻaki mo e ngaahi vakai fekauʻaki mo e tuʻumālié, ko e toko 1 pē ʻi he toko 20 kotoa pē ʻi he kau milionea ʻo ʻAositelēliá ʻokú ne fakakaukau kiate ia tonu ʻokú ne tuʻumālie. Fakatatau kia Clive Hamilton, ʻa ia ko e talēkita pule ʻo e kautaha fakatotoló, “ko e lahi ange ʻo ʻetau tuʻumālié, ko e lahi ange ia ʻetau taʻetopono ʻi he paʻanga hū mai ʻoku tau maʻú.” Ko hono moʻoní, ko e peseti pē ʻe 13 ʻo e kakai ʻi he faʻahinga ʻoku nau maʻu ʻa e paʻanga hū mai lahi tahá ʻoku nau ongoʻi fiemālie fakaʻaufuli ʻi he moʻuí. ʻOku pehē ʻe Hamilton: “ʻOku totonu moʻoni ke ke ʻeke pe ko e hā koā ʻoku tau tuli ai ʻa kitautolu ʻi hotau faʻahingá ki he lavameʻa fakapaʻangá ʻo lahi ange ia ʻi ha toe meʻa kehe, lolotonga iá ʻoku tala mai kātoa ʻe he ngaahi fakamoʻoní ko e ngaahi tafaʻaki kehe ia ʻo e moʻuí ʻa ē ʻokú ne ʻomai moʻoni ʻa e fiefiá.”

◼ Ko ʻete nāmuʻi ha ʻahu mei ha sikaleti ʻa ha taha ʻoku “fakatuʻutāmaki ange ia ʻi he taha ko ē ʻoku ifi tapaká.” ʻI he māhina ʻe 18 naʻe fai ai hano tapui ʻa e ifi tapaká ʻi he ngaahi ʻōfisí, falekaí pea mo loto ʻi he ngaahi langa lalahi ʻi Pueblo, Colorado ʻi ʻAmelika, pea naʻe holo ai ʻa e lahi ʻo e tuʻu e tā ʻo e mafu ʻo e kakai aí ʻaki ʻa e peseti ʻe 27.​—TIME, ʻAMELIKA.

Mate ʻi he Ngaahi Tupuʻanga ʻOku Ala Faitoʻo Pē

ʻOku pehē ʻe he līpooti ʻi he 2005 ʻa e Kautaha Moʻui ʻa Māmaní: “ʻI he taʻú ni, ko e fānau ofi ʻi he toko 11 milioná ʻoku nau siʻi hifo ʻi he taʻu nimá te nau mate ʻi he ngaahi tupuʻanga ko e lahi taha aí ʻoku ala faitoʻo pē.” ʻOku fakafuofua ko e peseti ʻe 90 ʻo e ngaahi mate ko ʻení ko e tupu ia mei he ngaahi tupuʻanga siʻi pē: ko e ngaahi mahaki ʻo e fānau valevale toki fanauʻí ʻo hangē ko e fāʻele taʻehokó, ngaahi mahaki ʻoku fakapipihi ʻe he vailasí pea mo e ʻikai lava ʻo mānava lelei ʻi he taimi fāʻeleʻí; ko e ngaahi mahaki ʻo e halanga mānavá, ʻo tautautefito ki he niumōniá; fakalelé; malēliá; mīselé; mo e ʻeitisí. “Ko e lahi taha ʻo e ngaahi mate ko ʻení naʻe mei lava pē ia ʻo faitoʻo ʻaki ʻa e ngaahi faitoʻo ʻoku lolotonga maʻú, ʻa ia ʻoku faingofua, ala lava pē ʻo totongi pea toe ola lelei,” ko e fakamatala ia ʻa e līpōtí. ʻIkai ko ia pē, laka hake he kakai fefine ʻe toko nima kilu ʻoku nau mate lolotonga ʻa e feitamá pē fāʻelé ʻi he taʻu taki taha, ʻo lahi tahá koeʻuhí pē ko e “ʻikai maʻu ha tokangaekina pōtoʻi feʻunga.”

◼ Laka hake he peseti ʻe 50 ʻo e ngaahi hoa mali ʻoku nau mali ʻi ʻAmeliká naʻa nau ʻosi nonofo pē kinautolu ki muʻa ʻoku teʻeki fai e malí. Ko e ngaahi hoa mali peheé ʻoku meimei liunga ua ʻa e lahi ange ʻa e ngalingali ko ia ke nau veté ʻi he faʻahinga ko ē ʻoku nau ʻuluaki mali pea toki nofo fakatahá.​—PSYCHOLOGY TODAY, ʻAMELIKA.

Faʻahinga Founga Ngāue Fakatupuʻita Tahá

“Ko e talanoa longoaʻa ʻi he telefoní, [ko hono ngāueʻaki] ʻa e fanga kiʻi sipika fakaleʻolahi ʻi he telefoní mo e ngaahi lāunga hokohoko fekauʻaki mo e fuʻu lahi ʻa e ngāué ʻoku tuʻu-ki-muʻa ia ʻi he fakahokohoko ʻo e ngaahi founga ngāue fakatupuʻita taha ʻo ʻemau kau ngāué,” ko e līpooti ia ʻa e Washington Post. ʻOku kau ʻi he ngaahi founga ngāue ʻokú ne fakaʻitaʻi ʻa e kau ngāue kehé ʻa e “fakakaupangi ʻa e kau ngāué, tōmui ki he ngāué, talanoa pē kiate kitá, fetalanoaʻaki longoaʻa ʻa e kau ngāué ʻi honau fanga kiʻi holisi fakalokilokí, ko e ʻikai maʻa ʻa e sinó pea mo hono lamu longoaʻa ʻa e meʻakaí.” Ko e ngaahi anga peheé ʻokú ne toe holoki ʻe ia ʻa e lahi ʻo e ngāue ʻoku fai ʻe he tokotahá. Kae kehe, naʻe tala moʻoni ʻe he tokolahi taha ʻo e faʻahinga naʻa nau tali ʻa e ngaahi fehuʻi ʻa e kau faifakatotoló, kuo ʻikai ʻaupito ke nau leaʻi ʻe kinautolu ʻa e faʻahinga ko ē ʻoku nau ngāue ʻi he founga fakatupuʻitá. “ʻOku ʻi ai ʻa e ʻuhinga lelei ʻoku ʻikai ke nau leaʻi ai ʻa e faʻahinga ko iá,” ko e lau ia ʻa e nusipepá. “Ko e niʻihi ko ia ʻoku nau lāungá ʻoku nau halaia tatau pē mo kinautolu foki.”