Tokoni Taʻeʻamanekina mei he Awake!

MEI HE TOKOTAHA-TOHI ʻĀ HAKE! ʻI PENINI

◼ ʻI he taimi naʻe fili ai ʻa e taʻu 23 ko Noël ke tuku ʻene akó kae hoko ko ha faifekau taimi-kakato ʻa e Kau Fakamoʻoni ʻa Sihová, naʻe filingaua ʻa hono kāingá pe te ne maʻu ha paʻanga feʻunga ke tauhi ʻaki ia. Ko e moʻoni, naʻá ne faingataʻaʻia ʻi he kumi ha ngāue konga-taimi ʻoku feʻungamālié. Ko ia ʻi he taimi naʻe pulusi ai ʻi he makasini Awake! ʻa e kupu taimi tonu ko e “Kī ʻe Nima ki Hono Maʻu ʻo ha Ngāué,” naʻe lau fakalelei tā tuʻo lahi ia ʻe Noël.a Naʻe tokoniʻi ia ʻe he meʻá ni? ʻIo, kae ʻikai ʻi he founga naʻá ne ʻamanekiná.

Naʻe sio ʻa e talēkita ʻo ha ʻapiako tāutaha ki he malanga fale ki he fale ʻa Noël peá ne ʻeke ange pe ko e taha ia ʻo e Kau Fakamoʻoni ʻa Sihová. Naʻe fiemaʻu ʻe he talēkitá ha toe faiako ʻe taha, pea ʻi heʻene ʻiloʻi ʻoku ola lelei ʻa e faiako ʻa e Kau Fakamoʻoni ʻa Sihová, naʻá ne ʻeke ange kia Noël pe ʻokú ne ʻiloʻi ha taha ʻe fie faiako. ʻI he ʻikai ange ʻa Noël, naʻe pehē ange ʻe he talēkitá, “Fēfē koe?”

Kuo teʻeki ai ʻaupito ke ngāue ʻa Noël ko ha faiako, pea ʻoku nenu ʻene leá ʻi he taimi ʻe niʻihi. ʻI Penini naʻe hoko ha palopalema ʻi he meʻá ni koeʻuhi ko e poate akó ʻoku fiemaʻu ai ki he kau faiakó ke nau kau ki ha sivi ʻo fakapapauʻi ai ʻoku ʻikai te nau nenu. “ʻAi ke maʻu haʻo tohi fakamoʻoni ako,” ko e palōmesi ange ia ʻa e talēkitá, “pea ʻe lava ke ke maʻu ʻa e ngāué.”

Naʻe fakalakalaka lelei ʻa Noël ʻi he Ako Fakafaifekau Fakateokalatí, ʻa ia ko ha ako ia kuo faʻufaʻu ke fakaleleiʻi ai ʻa e malava ke malanga ki he kakaí pea ʻoku fai fakauike ʻi he ngaahi fakatahaʻanga ʻa e Kau Fakamoʻoni ʻa Sihová. Naʻe aʻu ʻo ne fai ʻa e ngaahi malanga maʻá e kakaí ʻi heʻene fakatahaʻangá. Neongo ia, naʻá ne manavasiʻi ʻi heʻene ʻalu ki he siví.

Naʻe ʻoange kiate ia ʻe he tokotaha faisiví ha makasini pea kole ange ke ne lau leʻo-lahi ha palakalafi naʻe fakaʻilongaʻi kulokula. Naʻe ulo e mata ʻo Noël ʻi heʻene sio hifo ki he kupú ko e “Kī ʻe Nima ki Hono Maʻu ʻo ha Ngāué.” Naʻá ne lau ʻikai toe nenu ʻa e palakalafí ʻo ne maʻu ai ʻa e tohi fakamoʻoni akó.

Naʻe tala ange ki mui ʻe he tokotaha faisiví ʻokú ne lau maʻu pē ʻa e ngaahi makasini ʻa e Kau Fakamoʻoni ʻa Sihová. “Ko e ngaahi makasini ko ení ʻoku fakatupu ʻilo pea ʻoku lelei ʻaupito ʻa hono hikí ʻou faʻa ngāueʻaki ia ki he ngaahi siví,” ko ʻene fakamatalá ia.

Naʻe kamata faiako ʻa Noël, pea naʻe loto ʻa e talēkitá ke ne fakamoʻoni ke hoko atu ʻi he taʻu hono hokó, ka naʻe ʻi ai ʻa e ngaahi palani kehe ʻa Noël. Naʻe fakaafeʻi ia ke ne ngāue ʻi he ʻōfisi vaʻa ʻo e Kau Fakamoʻoni ʻa Sihová, ʻa ia ʻokú ne fakahoko fatongia ai he taimí ni.

[Fakamatala ʻi lalo]