Ko e Vakai ʻa e Tohi Tapú

ʻOku Fiemaʻu ʻe he ʻOtuá Ke Ke Koloaʻia?

“Ko e ʻaho foʻou ia kuo ʻomai ʻe he ʻOtuá kiate au! Te u tuʻumālie!”

“ʻOku ou fakaʻamu ke koloaʻia—koeʻuhi ʻoku loto mai ʻa hēvani kotoa ke u koloaʻia.”

“ʻOku ʻomai ʻe he ʻOtuá kia kitautolu ʻa e mafai ke hoko ai ʻo koloaʻia.”

“ʻOku ou tuʻumālié koeʻuhi ko e Tohí [ʻa e Tohi Tapú].”

KO E ngaahi fakamatala ko ení ʻoku tapua atu ai ʻa e vakai ʻa ha ngaahi kulupu fakalotu ʻoku pehē ai ko hono maʻu ʻa e koloa fakamatelié ko e tāpuaki ia ʻa e ʻOtuá. Kapau ʻokú ke fai ʻa e meʻa totonu ki he ʻOtuá, ko ʻenau malangá ia, te ne fakaivia koe ke ke maʻu ʻa e ngaahi meʻa lelei ʻo e moʻui ko ení pea fakapaleʻi koe foki ʻi he kahaʻú. Kuo manakoa lahi ʻa e fakakaukau ko iá pea ko e ngaahi tohi ʻoku poupou ki aí ʻa e ngaahi tohi fakataua lelei tahá. Ka ʻoku feongoongoi ʻa e “fakakaukau tuʻumālie” ko ení mo e Tohi Tapú?

Ke fakapapauʻí, ko hotau Tokotaha-Fakatupú, ʻa ia ʻoku ui ʻe he Tohi Tapú ko e “ʻOtua fiefiá,” ʻokú ne fiemaʻu ke tau maʻu ha moʻui fiefia mo lavameʻa. (1 Timote 1:11, NW; Sāme 1:1-3) ʻIkai ngata aí, ʻokú ne tāpuakiʻi ʻa kinautolu ʻoku nau fakahōifuaʻi iá. (Palovepi 10:22) Ka kia kitautolu he ʻaho ní, ko e tāpuaki ko iá ko ha tuʻumālie fakamatelie pē ia? ʻOku mahino ʻa e talí ʻi heʻetau ʻiloʻi ʻa e taimi ʻoku tau ʻi aí ʻo fakatatau ki he taumuʻa ʻa e ʻOtuá.

Ko ha Taimi Eni ke Koloaʻia Ai?

ʻI he kuohilí, naʻe tāpuakiʻi ai ʻe he ʻOtua ko Sihová ʻa e niʻihi ʻo ʻene kau sevānití ʻaki ʻa e koloa fakamatelie, ko e pēteliake ko Siopé mo Tuʻi Solomone ko e ongo fakatātā lelei ia ʻo e tuʻunga ko iá. (1 Tuʻi 10:23; Siope 42:12) Neongo ia, ko e kau tangata manavahē-ʻOtua tokolahi kehe naʻe siʻi e meʻa naʻa nau maʻú, ʻo kau ai ʻa Sione Papitaiso mo Sīsū Kalaisi. (Maake 1:6; Luke 9:58) Ko e hā e poiní? Fakatatau ki he Tohi Tapú, ʻoku feangainga ʻa e ʻOtuá mo ʻene kau sevānití ʻo fehoanaki mo ʻene taumuʻa kia kinautolu ʻi he taimi ko iá. (Koheleti 3:1) ʻOku anga-fēfē ʻa e kaunga ʻa e tefitoʻi moʻoni ko iá kia kitautolu he ʻaho ní?

ʻOku fakahaaʻi ʻi he kikite ʻa e Tohi Tapú ʻoku tau moʻui ʻi he “faka ʻosi ʻo e kuonga,” pe “kuonga fakamui” ʻo e māmani lolotongá. Ko e kuonga ko ení ʻe fakaʻilongaʻi ia ʻaki ʻa e tau, mahaki, ngaahi honge, mofuike, mo ha movetevete ʻi he sōsaietí—ko e ngaahi tuʻunga kuó ne fakamamahiʻi ʻa e faʻahinga ʻo e tangatá ʻi ha tuʻunga lahi taʻehanotatau talu mei he taʻu 1914. (Mātiu 24:3; 2 Timote 3:1-5; Luke 21:10, 11; Fakahā 6:3-8) ʻI hono fakanounoú, ko e māmani ko ení, ʻoku hangē ia ko ha vaka ʻoku ʻamanaki ke ngotó! ʻI he vakai atu ki he ngaahi moʻoniʻi meʻa ko iá, ʻe ʻuhinga lelei ke tāpuakiʻi ʻe he ʻOtuá ʻa ʻene kau sevānití taki taha ʻaki ʻa e koloa fakamatelie, pe ʻoku ʻi ai ʻa e ngaahi meʻa kehe ʻa e ʻOtuá ke fakamuʻomuʻa maʻatautolu?

Naʻe fakahoa ʻe Sīsū Kalaisi hotau taimí ki he ngaahi ʻaho ʻo Noá. Naʻá ne pehē: “He hange naʻe nofo ʻa e kakai ʻi he kuonga ʻo e Lomaki, ʻo nau kai mo inu, ʻo nau maʻu uaifi mo maʻu husepaniti, ʻo aʻu ki he ʻaho ko ia naʻe hu ai ʻa Noa ki he aake; pea naʻe ʻikai te nau ʻaloʻiloa kaeʻoua ke hoko mai ʻa e Lomaki, ʻo ʻave kinautolu fulipe: ʻe pehe foki ʻa e hoko mai ʻa e Fanautama ʻa Tangata.” (Mātiu 24:37-39) Naʻe toe fakahoa foki ʻe Sīsū hotau taimí ki he ngaahi ʻaho ʻo Loté. Ko e ngaahi kaungāʻapi ʻo Lote ʻi Sōtoma mo Komolá naʻa nau ‘kai, inu, fakatau mai, fakatau atu, tō taʻu, mo langa fale.’ “Ka ʻi he ʻaho ko ia naʻe hu atu ai ʻa Lote mei Sotoma, ne fakaʻuha hifo ʻa e afi mo e sulifa mei langi, ʻo fakaʻauha kinautolu fulipe,” ko e lea ia ʻa Sīsuú, peá ne toe hoko atu: “ʻE tatau tofu pe mo ia ʻi he ʻaho ʻe fakapū mei ai ʻa e Fanautama ʻa Tangata.”—Luke 17:28-30.

Ko hono moʻoní, ʻoku ʻikai ha meʻa ia ʻe hala ʻi he kaí, inú, malí, fakatau maí mo e fakatau atú. Ko e fakatuʻutāmakí ʻoku hoko ia ʻi he mātuʻaki nōfoʻi ʻi he ngaahi meʻa ko iá ʻo ʻikai ai te tau ʻaloʻiloa ki he vave ʻa e taimí. Ko ia ai ʻeke hifo kiate koe, ‘Ko e failelei mai ia ʻa e ʻOtuá kapau kuó ne tāpuakiʻi kitautolu ʻaki ʻa e ngaahi meʻa tofu pē ko ia ʻe fakaleluʻi ai ʻa ʻetau moʻuí?’a ʻI hono kehé, ko e maumau lahi ia te ne fai maí. ʻOku ʻikai ko e founga ia ʻa e ʻOtua ʻo e ʻofá!—1 Timote 6:17; 1 Sione 4:8.

Ko ha Taimi Fakahaofi Moʻui!

ʻI he taimi faingataʻa ko eni ʻi he hisitōlia ʻo e tangatá, ʻoku ʻi ai ʻa e ngāue fakavavevave ʻa e kakai ʻa e ʻOtuá ke fai. Naʻe pehē ʻe Sīsū: “ʻE ʻoua ke fanongonongo ki mamani katoa ʻa e ongoongolelei ko eni ʻo e puleʻanga, ke ai ha fakamatala ki he ngāhi kakai kotoa pe, pea toki hoko ʻa e ngataʻanga.” (Mātiu 24:14) ʻOku tokanga fakamātoato ʻa e Kau Fakamoʻoni ʻa Sihová ki he ngaahi lea ko iá. Ko ia ai, ʻoku nau fakaʻaiʻai honau ngaahi kaungāʻapí ke nau ako fekauʻaki mo e Puleʻanga ko iá pea mo e ngaahi fiemaʻu ʻa e ʻOtuá ki he moʻui taʻengatá.—Sione 17:3.

Kae kehe, ʻoku ʻikai ʻamanekina mai ʻe he ʻOtuá ʻa ʻene kau sevāniti faitōnungá ke nau fakamamahiʻi kinautolu. ʻI hono kehé, ʻokú ne loto ke nau fiemālie pē ʻi he ngaahi meʻa ʻoku maʻú koeʻuhi ke lava ai ʻo nau tokangataha ki he tauhi kiate iá. (Mātiu 6:33) Ko ia ʻi he tafaʻaki ʻe tahá, te ne fakapapauʻi leva ke fakalato ʻenau ngaahi fiemaʻu fakamatelié. ʻOku pehē ʻi he Hepelu 13:5: “Ke taʻemanumanu hoʻomou toʻonga; pea mou fiemalie ʻi he ngaahi meʻa ʻoku mou maʻu ni: he kuo folofola mai ʻe he ʻEne ʻAfio, ʻE ʻikai siʻi te u mahuʻi meiate koe, kaeʻumaʻā haʻaku momoʻi liʻaki koe.”

ʻE fai ʻa e ʻOtuá ki heʻene leá ʻi ha founga tuʻu-ki-muʻa ʻi heʻene fakahaofi ʻa e “fuʻu kakai lahi” ʻo e kau lotu moʻoní ʻi he ngataʻanga ʻo e fokotuʻutuʻu lolotongá pea taki atu ki ha māmani foʻou ʻo e melino mo e tuʻumālie moʻoni. (Fakahā 7:9, 14) Naʻe pehē ʻe Sīsū: “Kuo u haʻu koeʻuhi ke nau [ko hono kau muimui faitōnungá] maʻu moʻui, pea ke nau maʻu ʻo lahi ʻaupito.” (Sione 10:10) Ko e ‘moʻui lahi ʻaupito’ ko iá ʻoku ʻuhinga iá ʻo ʻikai ki ha moʻui ʻoku lahi ai ʻa e meʻa fakamatelié he taimí ni, ka ki he moʻui taʻehanongataʻanga ʻi Palataisi ʻi he malumalu ʻo e Puleʻanga ʻo e ʻOtuá.—Luke 23:43.

ʻOua ʻe tali ha meʻa ʻoku siʻi ʻa hono mahuʻingá ʻaki ʻa hono kākaaʻi ʻe he fakakaukau tuʻumālie lau peé, ʻa ia ko hono moʻoní, ko e fakakaukau fakalelu moʻui. ʻI hono kehé, tokanga ki he ngaahi lea anga-ʻofa kae fakavavevave ʻa Sīsuú: “Mou lamasi kimoutolu, naʻa ʻiloange ʻe mafatukituki homou loto, ko e meʻa ʻi he faʻa kai, mo e faʻa inu, mo e faʻa lotomoʻua ki he moʻui ni, pea lapasi kimoutolu ʻe he ʻaho ko ia ʻo hangē ko ha hele puna.”—Luke 21:34, 35.

[Fakamatala ʻi lalo]

KUÓ KE FIFILI?

◼ Ko e taimi kotofa eni ki he hā?—Mātiu 24:14.

◼ Naʻe fakahoa ʻe Sīsū hotau taimí ki he taimi ʻo hai ʻi he Tohi Tapú?—Mātiu 24:37-39; Luke 17:28-30.

◼ Ko e hā kuo pau ke tau fakaʻehiʻehi mei ai kapau ʻoku tau loto ke maʻu ʻa e moʻui taʻengatá?—Luke 21:34.

[Fakatātā ʻi he peesi 11]

Ko e fakakaukau tuʻumālie lau peé, ko hono moʻoní, ko e fakakaukau fakalelu moʻui