NAʻE FAʻU IA KE PEHĒ?

Lauʻi Lōtosi Talitekeʻi ʻa e Vaí

◼ Ngaahi ipu pelesitiki ʻoku nau fufulu pē kinautolu! Ngaahi matapā sioʻata ʻoku mōmoa pē ia ʻi he ʻuhá! Ngaahi mīsini valevale fau ʻoku ngāue ʻo ʻikai loko hoko ai ha fepakipaki! ʻOku pehē ʻe he kau saienisí ko e ngaahi ʻaonga siʻi pē eni ʻa ia ʻe lava ke hoko kapau te tau lavameʻa ʻi hono ʻiloʻi ʻa e ngaahi fakapulipuli ʻi he lau ʻo e lile ʻoku tupu he vaí ko e lōtosí.

Fakakaukau atu: Ko e tafaʻaki ki ʻolunga ʻo e lauʻi lōtosí ʻoku ʻufiʻufi ia ʻe he fanga kiʻi pupula valevale fau ʻa ia ʻoku ʻufiʻufi ʻe he meʻa hekeheke ngingila hangē ko e teʻelangó. Ko e ngaahi tulutā vai ʻoku ngangana ʻi he lauʻiʻakaú ʻoku puke ia ʻe he ngaahi meʻá ni, ʻa ia ʻoku ngāue ko ha meʻa ke ne talitekeʻi ʻa e vaí. Ko e ngaofe ʻo e lauʻiʻakaú ʻoku fakatupunga ai ke tafe ʻa e vaí ki muʻa ke ʻi ai hano faingamālie ke aʻu ai ki he tafaʻaki ki loto ʻo e lauʻiʻakaú. Ko e hā hono olá? ʻOku ʻikai ngata pē ʻi he mōmoa ʻa e lauʻi lōtosí ka ʻoku toe maʻa ai foki ia, ʻi he tafe atu ʻa e ʻulí mo e efú ʻi he ngaahi tulutā vaí.

ʻOku loto ʻa e kau saienisí ke faʻu ha ngaahi naunau ʻo fakatatau ki he lauʻi lōtosí ko ha ngaahi meʻa ke ne talitekeʻi ʻa e vaí. Naʻa mo e fanga kiʻi mīsini valevale faú, ʻa ia ʻe lava ke maumau ʻi he vaí, ʻe maʻu ʻaonga ia mei ha tisaini meimei tatau mo ia ʻi he lauʻi lōtosí. “ʻOku ʻikai hano ngataʻanga ʻo e malava ke ngāueʻakí,” ko e fakamatala ia ʻa e Science Daily.

Ko e hā hoʻo fakakaukaú? Naʻe hokonoa mai pē ʻa e lauʻi lōtosí? Pe naʻe faʻu ia ke pehē?