ʻOku Tau Fiemaʻu ke Ngata ʻa e Faingataʻaʻiá!
Naʻe kamata e faingataʻaʻia ʻa Khieu ʻi he taimi naʻe tāmateʻi ai ʻene tamaí heʻene tuku ʻa e fanga pulú ke nau ʻalu holo ʻi ha ngoue koane ofi mai. Ki mui ai, naʻe tāmateʻi ʻa ʻene faʻeé mo hono ongo tuofāfiné—ko e maʻukovia ʻe he kau sōtia Kemipōtiá. Hili iá naʻe kafo ʻa Khieu ʻi ha foʻi maina. Naʻá ne tatali he vaotaá ʻi he ʻaho ʻe 16 ke aʻu mai ha tokoni. Naʻe pau ai ke tuʻusi ʻa hono vaʻé. “Naʻe ʻikai te u loto ke moʻui,” ko e lau ia ʻa Khieu.
KUÓ KE fakatokangaʻi nai ko e faingataʻaʻiá ʻoku ʻikai ke toe fakalaulau ia. Ko e fakatamaki fakanatulá, mahamahakí mo e faingataʻaʻia fakaesinó, faihia fakamālohí, mo e meʻa fakamamahi kehe ʻoku lava ke ne uesia ha taha pē, ʻi ha feituʻu pē, ʻi ha taimi pē. Ko e ngaahi kautaha ngāue ʻofa fakaetangatá kuo nau ngāue taʻehela ke taʻofi pe fakafiemālieʻi ʻi ha tuʻunga ʻa e faingataʻaʻia ʻa e tangatá. Ka ko e hā kuo lavaʻi ʻi heʻenau feingá?
Fakakaukau angé ki ha fakatātā ʻe taha—ko e tauʻi ʻo e fiekaiá. Fakatatau ki he nusipepa Toronto Star, kuo hoko ʻi he fakatamaki fakanatulá ʻo ʻikai ha ʻapi ʻo e tokolahi pea ʻikai haʻanau meʻakai. Kae kehe, ʻoku līpooti ʻi he pepá ʻo pehē “ko e feinga ʻa e ngaahi kautaha ʻoku ngāue ke fakasiʻisiʻi e fiekaiá ʻoku taʻofi ia ʻi he fakautuutu ʻa e fakamālohí.”
Ko e kau taki fakapolitikale, fakasōsiale mo e fakafaitoʻó kuo nau feinga kotoa ʻaki ʻenau lelei tahá ke fakasiʻisiʻi ʻa e faingataʻaʻiá, ka ko e olá kuo fakasiva ʻamanaki. Ko e polokalama ke ne langaʻi ʻa e tupu fakaʻekonōmiká kuo ʻikai fakangata ʻosi ai ʻa e masivá. Ko e huhu maluʻí, faitoʻó, mo e founga tafa fakalakalaká ʻoku ʻikai lava ke fakangata ai e mahaki kotoa pē. Ko e kau ʻōfisa polisí mo e ngaahi kongakau fakamelinó kuo nau siofi ʻo ʻikai lava ha tokoni ʻi he hokohoko atu ʻa e faihia fakamālohí pe naʻa mo ʻene fakalalahí.
Ko e hā ʻoku lahi fau ai ʻa e faingataʻaʻiá? ʻOku tokanga mai ʻa e ʻOtuá ki he meʻa ʻoku kātekina ʻe he tangatá? Kuo maʻu ʻe he laui miliona ʻa e tali fakafiemālie ki he ongo fehuʻi ko iá ʻi he Tohi Tapú, hangē ko ia te tau sio ki aí.