Kumi ʻa e Halá

ʻOKÚ KE PEHĒ KO HA TOKOTAHA FIEFIA KOE? Kapau ko ia, ko e hā ʻokú ne ʻai koe ke ke fiefiá? Ko ho fāmilí, ko hoʻo ngāué, ko hoʻo tui fakalotú? Mahalo ʻokú ke fakatuʻotuʻa atu ki ha meʻa te ne ʻai nai koe ke ke fiefia, hangē ko hono fakaʻosi hoʻo akó, maʻu ha ngāue lelei, pe fakatau mai ha meʻalele foʻou.

ʻOku fiefia ʻa e tokolahi ʻi heʻenau aʻusia ha taumuʻa pau pe ko hono maʻu ha meʻa naʻa nau fakaʻamua. Ka ko e hā ʻa e fuoloa hono maʻu ʻa e fiefia ko iá? ʻOku faʻa fakataimi pē, ʻa ia ʻe lava ke hoko ʻo fakalotomamahi.

Ko e fiefiá kuo fakamatalaʻi ia ko e tuʻunga ʻo e ongoʻi lelei ʻa ia ʻoku meimei tuʻuloa, ko e ongoʻi fiemālie ʻo aʻu ki ha fiefia loloto mo lahi, pea mo ha holi fakanatula ki he tuʻunga lelei ko iá ke hokohoko atu.

Tānaki atu ki aí, ʻi he tuʻunga ʻo e ongoʻi lelei hokohokó, ko e fiefiá kuo fakamatalaʻi ia, ʻo ʻikai ko ha feituʻu pē naʻá te taumuʻa ki ai, ko ha hala fononga ia ʻi he moʻuí. Ke lea ʻo pehē, “Te u toki fiefia ʻo kapau ʻe . . .” ko hono moʻoní, ʻokú ne toloi ʻa e fiefiá.

Ke fakatātaaʻí, fakahoa ʻa e fiefiá ki he moʻui leleí. ʻOku anga-fēfē ʻetau maʻu ʻa e tuʻunga moʻui lelei fakaesino ko iá? ʻOku tau muimui ʻi ha ʻalunga fakapotopoto ʻi he fekauʻaki mo e founga kaí, fakamālohisinó mo e tōʻonga moʻuí fakalūkufua. ʻI he tuʻunga meimei tatau, ko e fiefiá ʻoku maʻu ia mei he muimui ʻi ha ʻalunga moʻui lelei, ʻa ia ko e moʻui ʻo fehoanaki mo e ngaahi tefitoʻi moʻoni falalaʻangá.

Ko e hā ʻa e ngaahi tefitoʻi moʻoni pe ʻulungaanga ʻi he moʻuí ʻoku ʻiloʻiʻaki ʻa e hala ʻo e fiefiá? Neongo ʻoku ʻi ai ʻa e ngaahi tefitoʻi moʻoni pe ʻulungaanga ʻoku mahuʻinga ange ia ʻi he niʻihi, ko e ngaahi meʻa hono hokó ʻoku ʻi ai ʻene kaunga tefito ki ai:

• FIEMĀLIE MO E NIMA-HOMO

• MOʻUI LELEI MO E KĀTAKI

• ʻOFA

• FAKAMOLEMOLE

• TAUMUʻA ʻI HE MOʻUÍ

• ʻAMANAKI

Ko ha tohi ʻo e potó ʻoku fakaʻapaʻapaʻi lahi, ʻoku pehē ai: “Fiefia ē ko kinautolu ʻoku taʻemele ʻa honau halá.” (Saame 119:1) Tau lāulea angé ʻi he taimí ni ki he hala ko iá.