Ngaahi Fehuʻi ʻOku Faʻa ʻEke ʻe he Kakai Mahuʻingaʻiá

Kapau ko e ʻOtuá ko e ʻofa, ko e hā ʻokú ne fakaʻatā ai ʻa e fulikivanú?

ʻOKU fakaʻatā ʻe he ʻOtuá ʻa e fulikivanú, pea ko e laui miliona ʻi he māmaní ʻoku nau tōʻongaʻaki loto-lelei ia. Hangē ko ení, ʻoku nau fanongonongo ʻa e ngaahi tau, laku pomu ʻi he fānaú, fakaʻauha ʻa e foʻi māmaní, pea fakatupunga ʻa e ngaahi honge. ʻOku ifi ʻa e laui miliona pea nau maʻu ʻa e kanisā ʻi he maʻamaʻá, tōʻongaʻaki ʻa e tonó pea maʻu ʻa e ngaahi mahaki ko e fetuku holo ʻe he fehokotaki fakasinó, ngāueʻaki ʻa e ʻolokaholó ʻo fuʻu tōtuʻa pea mohomoho ai ʻa e ʻaté, mo e hā fua. Ko e kakai peheé ʻoku ʻikai te nau fiemaʻu moʻoni ke ngata ʻa e fulikivanú kotoa. ʻOku nau fiemaʻu pē ʻe kinautolu ke fakangata ʻa e ngaahi tautea ki aí. ʻI heʻenau utu ʻa e meʻa kuo nau toó, ʻoku nau kalanga, “Ko e hā ʻoku hoko ai ia kiate aú?” Pea ʻoku nau tukuakiʻi ʻa e ʻOtuá, ʻo hangē ko e lau ʻa e Palovepi 3:9: “Ko e vale ʻa e tangata ʻoku fulihi hono hala: ka ʻoku hanu hono loto kia Sihova.” Pea kapau ʻoku fakangata ʻe he ʻOtuá ʻenau faikoví, te nau lea fakafepaki ʻi he mole ʻenau tauʻatāina ke fai iá!

Ko e ʻuhinga tefito ʻa Sihova ki hono fakangofua ʻa e koví koeʻuhi ke tali ai ʻa e pole ʻa Sētané. Naʻe pehē ʻe Sētane ko e Tēvoló ʻe ʻikai lava ʻe he ʻOtuá ʻo tuku ʻi he māmaní ʻa e kau tangata ʻa ia te nau faitotonu kiate Ia ʻi he malumalu ʻo e ʻahiʻahí. (Siope 1:​6-​12; 2:​1-​10) ʻOku fakaʻatā ʻe Sihova ʻa Sētane ke kei ʻi aí ke ne maʻu ai ʻa e faingamālie ke fakamoʻoniʻi ʻa ʻene polé. (Ekisoto 9:​16) ʻOku hokohoko atu ʻa Sētane ke ʻomai ʻa e ngaahi mala he taimí ni, ke fakatafokiʻi ʻa e tangatá mei he ʻOtuá, ʻi heʻene feinga ke fakamoʻoniʻi ʻa ʻene polé. (Fakahā 12:12) Kae kehe, naʻe tauhi anga-tonu ʻa Siope. Naʻe pehē pē mo Sīsū. ʻOku pehē mo e kau Kalisitiane moʻoní he taimí ni.​—Siope 27:5; 31:6; Mātiu 4:​1-​11; 1 Pita 1:​6, 7.

Te u saiʻia ke tui ki ha palataisi fakaemāmani ʻa ia ʻe moʻui taʻengata ai ʻa e kakaí, kae ʻikai ʻoku faingataʻa ke tui ki he meʻa ko iá?

ʻOku ʻikai pehē ia fakatatau ki he Tohitapú. ʻOku hā ngali faingataʻa ke tui ki ai koeʻuhi pē kuo ʻilo ʻe he faʻahinga ʻo e tangatá ʻa e koví ʻi he laui senituli lahi. Naʻe fakatupu ʻe Sihova ʻa e māmaní pea tala ki he faʻahinga ʻo e tangatá ke nau fakafonu ia ʻaki ʻa e kakai tangata mo e kakai fefine māʻoniʻoni ʻa ia te nau tokangaʻi ʻa hono ngaahi ʻuluʻakaú mo e moʻui ʻa e fanga manú pea fakatolonga ʻa hono fakaʻofoʻofá ʻo ʻikai ko hono fakaʻauha ia. (Sio ki he peesi 12 mo e 17.) ʻI he ʻikai faingataʻa ke tui ʻe hoko ʻa e talaʻofa ko ē ki he Palataisí, ko e tuʻunga fakamamahi lolotongá ʻoku fuʻu kovi ia ke kei hokohoko atu. ʻE fetongi ia ʻe he Palataisí.

ʻE lava fēfē ke u fai ha tali ki he kakai ʻoku nau manuki ʻo pehē ko e Tohitapú ko ha talatupuʻa ia pea ʻoku taʻefakasaienisi?

Ko e tui ki he ngaahi talaʻofa ko ení ʻoku ʻikai ko ha meʻa ia ke tuingofua ki ai. “ʻOku tupu ʻa e tui mei he fanongo.” ʻI hono ako ʻa e Folofola ʻa e ʻOtuá, ʻoku hoko ai ʻo hā mahino ʻa ʻene fakapotopotó pea ʻoku tupulaki ai ʻa e tuí.—Loma 10:17; Hepelu 11:⁠1.

Ko e ʻāsioloki faka-Tohitapú ʻokú ne fakapapauʻi ʻa e tonu fakahisitōlia lahi ʻa e Tohitapú. Ko e saienisi moʻoní ʻoku feongoongoi ia mo e Tohitapú. Ko e ngaahi moʻoniʻi meʻa hono hokó naʻe ʻi he Tohitapú fuoloa ia ki muʻa ke ʻiloʻi kinautolu ʻe he kau mataotao fakamāmaní: ko e maau ʻa e ngaahi tuʻunga ʻa ia ʻoku ngaʻunu ai ʻa e foʻi māmaní ʻi hono faʻú, ko e foʻi māmaní ʻoku fuopotopoto, ʻoku tautau ia ʻi he ʻataá ʻo ʻikai ki ha meʻa, pea ʻoku fehikitaki fakataimi ʻa e fanga manupuná.​—Senesi, vahe 1; Aisea 40:22; Siope 26:7; Selemaia 8:⁠7.

Ko e fakamānavaʻi ʻo e Tohitapú ʻoku hā ia ʻi he ngaahi kikite kuo fakahokó. Naʻe tomuʻa tala ki muʻa ʻe Taniela ʻa e mahiki hake mo e tō ʻa e ngaahi puleʻanga hau ʻi he māmaní, pea pehē ki he taimi ʻe hoko mai ai ʻa e Mīsaiá pea tāmateʻí. (Taniela, vahe 2, 8; Taniela 9:​24-​27) ʻI he ʻahó ni, ʻoku kei ʻi ai ʻa e ngaahi kikite kehe ʻoku fakahoko, ʻo fakahaaʻi ʻa e ngaahi meʻá ni ko e “kuonga fakamui.” (2 Timote 3:​1-5; Mātiu, vahe 24) Ko e tomuʻa ʻilo peheé ʻoku ʻikai ʻi he mafai ia ʻo e tangatá. (Aisea 41:23) Ki hano fakapapauʻi lahi ange, sio ki he ongo tohi The Bible​—God’s Word or Man’s? mo e Is There a Creator Who Cares About You?, ko e pulusi ʻe he Sōsaieti Taua Leʻo Tohitapu mo e Tulekí.

ʻE lava fēfē ke u ako ke tali ʻa e ngaahi fehuʻi ʻi he Tohitapú?

Kuo pau ke ke ako ʻa e Tohitapú pea fakalaulauloto ki ai, ʻo kole ʻi he taimi tatau ʻa e laumālie ʻo e ʻOtuá ke ne tataki koe. (Palovepi 15:28; Luke 11:​9-​13) “Ka ʻo kapau ko e poto ʻoku masiva ai ha taha,” ʻoku pehē ʻe he Tohitapú, “ke ne kole mei he ʻOtua, ʻa ia ʻoku ne foaki ʻataʻatā pe ki he kakai kotoa pe, ʻo ʻikai ʻatu mo e lau; pea ʻe foaki ia ki ai.” (Semisi 1:⁠5) Pehē foki, ʻoku ʻi ai ʻa e ngaahi tokoni faka-Tohitapu ʻoku taau ke kumi ki ai. ʻOku faʻa fiemaʻu ʻa e tokoni mei he niʻihi kehé, ʻo hangē ko e taimi naʻe ako ai ʻa Filipe mo e ʻItiopeá. (Ngāue 8:​26-​35) ʻOku fai ʻe he Kau Fakamoʻoni ʻa Sihová ʻa e ngaahi ako Tohitapu taʻetotongi mo e kakai mahuʻingaʻiá ʻi honau ngaahi ʻapí. ʻAi ke ke ongoʻi tauʻatāina ke kole ki he tokoni ko ení.

Ko e hā ʻoku fakafepakiʻi ai ʻe he tokolahi ʻa e Kau Fakamoʻoni ʻa Sihová pea tala mai kiate au ke ʻoua ʻe ako mo kinautolú?

Naʻe ʻi ai ʻa e fakafepaki ki he malanga ʻa Sīsuú, pea naʻá ne pehē ʻe toe fakafepakiʻi foki mo hono kau muimuí. ʻI he taimi naʻe maongo ai ki he niʻihi ʻa e akonaki ʻa Sīsuú, naʻe tali fakaʻita ange ʻa e kau fakafepaki fakalotú: “Kuo taki hē mo kimoutolu foki, ʻo? Hono ai ha taha ʻi he houʻeiki kuo tui kiate ia, pe ha taha ʻo e kau Fālesi?” (Sione 7:​46-48; 15:20) Ko e tokolahi ko ia ʻoku nau faleʻi koe ke ʻoua te ke ako mo e Kau Fakamoʻoní ko ʻenau taʻeʻilo pē pe ko ʻenau tomuʻa fehiʻa. Ako mo e Kau Fakamoʻoní pea ke sio angé pe ʻoku tupulaki ʻa hoʻo mahino faka-Tohitapú pe ʻikai.​—Mātiu 7:​17-​20.

Ko e hā ʻoku ʻaʻahi ai ʻa e Kau Fakamoʻoní ki he kakai ʻoku ʻosi ʻi ai pē ʻenau lotu ʻanautolú?

ʻI hono fai ení ʻoku nau muimui ai ki he faʻifaʻitakiʻanga ʻa Sīsuú. Naʻá ne ʻalu ki he kau Siú. Naʻe ʻi ai pē ʻa e lotu ʻa e kau Siú, ka ʻi he ngaahi founga lahi naʻe tafoki ia mei he Folofola ʻa e ʻOtuá. (Mātiu 15:​1-9) Ko e puleʻanga kotoa pē ʻoku ʻi ai ʻenau ngaahi faʻahinga lotu, tatau ai pē pe ko e Kalisitiane lau pē pe ʻoku ʻikai ko e Kalisitiane. ʻOku mātuʻaki mahuʻinga ki he kakaí ke nau maʻu ʻa e ngaahi tui ʻoku fakatatau ki he Folofola tonu ʻa e ʻOtuá, pea ko e ngaahi ngāue ʻa e Kau Fakamoʻoní ke tokoniʻi kinautolu ʻi hono fai ení ʻoku fokotuʻu ai ʻa hono fakahāhā ʻa e ʻofa ki he kaungāʻapí.

ʻOku tui ʻa e Kau Fakamoʻoní ko ʻenau lotú pē taha ʻoku moʻoní?

Ko ha taha pē ʻoku fakamātoato fekauʻaki mo ʻene lotú ʻoku totonu ke ne fakakaukau ko e lotu ia ʻoku tonú. Kapau ʻoku ʻikai, ko e hā te ne kau ai ki aí? ʻOku enginaki ki he kau Kalisitiané: “Mou sivi kotoa pe: ʻilonga pe ʻa e lelei, puke maʻu ia.” (1 Tesalonaika 5:21) ʻOku totonu ki ha tokotaha ke ne fakapapauʻi ko ʻene ngaahi tuí ʻe lava ke poupouʻi ʻaki ia ʻa e ngaahi Konga Tohitapú, he ʻoku ʻi ai ʻa e tui moʻoni pē ʻe taha. ʻOku fakapapauʻi eni ʻe he Efeso 4:​5, ʻa ia ʻoku pehē ai “ʻoku taha pe ʻa e ʻEiki, taha ʻa e Tui, taha ʻa e Papitaiso.” Naʻe ʻikai loto-tatau ʻa Sīsū mo e vakai fakaeonopooni, mo fiemālie ʻo pehē ʻoku lahi ʻa e ngaahi halá, lahi ʻa e ngaahi lotú, ʻo nau iku kotoa pē ki he fakamoʻuí. ʻI hono kehé, naʻá ne pehē: “ʻOku fāsiʻi ʻa e matapa, pea ʻefiʻefi ʻa e hala, ʻoku fakatau ki he moʻui; pea tokosiʻi ʻa e kakai ʻoku ʻilo ia.” ʻOku tui ʻa e Kau Fakamoʻoni ʻa Sihová kuo nau ʻilo ia. Ka ne ʻikai, te nau kumi ki ha toe lotu ʻe taha.—Mātiu 7:⁠14.

ʻOku nau tui ko kinautolu pē ʻa e faʻahinga ʻe fakamoʻuí?

ʻIkai. Ko e laui miliona ne nau moʻui ʻi he ngaahi senituli kuohilí pea naʻe ʻikai ko e Kau Fakamoʻoni ʻa Sihová te nau toe foki mai ʻi ha toetuʻu pea maʻu ha faingamālie ki he moʻuí. Ko e tokolahi ʻoku nau moʻui he taimi ní te nau fai nai ha tuʻu maʻá e moʻoní mo e māʻoniʻoní ki muʻa ʻi he “mamahi lahi,” pea te nau maʻu ʻa e fakamoʻuí. ʻIkai ngata aí, naʻe pehē ʻe Sīsū ʻoku ʻikai totonu ke tau fefakamaauʻaki. ʻOku tau sio kitautolu ki he fōtunga ʻi tuʻá; ʻoku vakai mai ʻa e ʻOtuá ia ki he lotó. ʻOku totonu ʻa ʻene vakaí pea faimeesi ʻa ʻene fakamāú. Kuó ne tuku ʻa e fakamāú ki he nima ʻo Sīsuú, ʻo ʻikai ki hoʻotautolú.​—Mātiu 7:​1-5; 24:⁠21; 25:⁠31.

Ko e hā ʻa e ngaahi tokoni fakapaʻanga ʻoku ʻamanekina mei he faʻahinga ʻoku nau maʻu ʻa e ngaahi fakataha ʻa e Kau Fakamoʻoni ʻa Sihová?

ʻI he fekauʻaki mo e ngaahi tokoni fakapaʻangá, naʻe pehē ʻe he ʻapositolo ko Paulá: “Ke taki taha fai ki he meʻa kuo ne tuʻutuʻuni ʻi hono loto; pea ʻoua ʻe fai ʻi he mamahi, pe ko e puʻia; he ʻoku ʻofa ʻa e ʻOtua ki ha taha ʻoku vekeveke foaki.” (2 Kolinito 9:⁠7) ʻI he ngaahi Fale Fakatahaʻangá mo e ngaahi faiʻanga fakataha-lahi ʻo e Kau Fakamoʻoni ʻa Sihová, ʻoku ʻikai ʻaupito ke teitei fai ai ha ngaahi tātānaki. ʻOku fokotuʻu ai ʻa e ngaahi puha koeʻuhi ke faingamālie ki ha taha pē ʻoku fakaʻamu ke tokoní ke ne fai pehē. ʻOku ʻikai ʻiloʻi ʻe ha taha ʻa e meʻa ʻoku foaki pe ʻoku fai ha foaki ʻe he niʻihi kehé. ʻOku malava ʻa e niʻihi ke nau foaki ʻo lahi ange ia ʻi he niʻihi kehé; ʻoku ʻikai malava nai ʻa e niʻihi ke foaki ha meʻa. Naʻe fakahaaʻi ʻe Sīsū ʻa e fakakaukau totonú ʻi heʻene fakamatala ki he puha tukuʻanga paʻanga ʻi he temipale ʻi Selusalemá pea mo e faʻahinga naʻe tokoní: Ko e malava ʻa ha taha ke foakí pea mo e laumālie ʻo e foakí ʻoku laú, ʻo ʻikai ko e lahi ʻo e paʻangá.​—Luke 21:​1-4.

Kapau te u hoko ko e taha ʻo e Kau Fakamoʻoni ʻa Sihová, ʻe ʻamanekina ke u malanga ʻo hangē ko ia ʻoku nau faí?

ʻI he taimi ʻoku hoko ai ha taha ʻo fonu ʻi he ʻilo fekauʻaki mo e Palataisi fakaemāmani naʻe talaʻofa ʻi he malumalu ʻo e Puleʻanga ʻo Kalaisí, ʻoku loto ʻa e tokotaha ko iá ke vahevahe atu ia ki he niʻihi kehé. Te ke pehē pē mo koe foki. Ko e ongoongo lelei ia!​—Ngāue 5:​41, 42.

Ko hono fai ení ko ha founga mahuʻinga ia ʻo hono fakahaaʻi ko ha ākonga koe ʻa Sīsū Kalaisi. ʻI he Tohitapú, ʻoku ui ai ʻa Sīsū “ko e Fakamoʻoni Falalaʻanga mo Moʻoni.” ʻI heʻene ʻi māmaní naʻá ne malanga, ʻo pehē: “Kuo ofi ʻa e Puleʻanga ʻo Hevani,” pea naʻá ne fekauʻi ʻene kau ākongá ke nau fai ʻa e meʻa tatau. (Fakahā 3:14; Mātiu 4:17; 10:⁠7) Ki mui ai, naʻe fekauʻi ʻe Sīsū ʻa hono kau muimuí: “Ko ia ke mou ō, ʻo ngaohi ʻa e ngāhi kakai kotoa pe ko ʻeku kau ako, . . . mo e akoʻi kinautolu.” Naʻá ne toe tomuʻa tala ʻo pehē ki muʻa ʻi he ngataʻangá, “koe ogoogolelei ni oe buleaga e malaga aki i mamani kotoabe, koe mea fakamooni ki he buleaga kotoabe.”—Mātiu 24:​14, PM; Mātiu 28:​19, 20.

ʻOku lahi ʻa e ngaahi founga ʻo hono talaki ʻa e ongoongo lelei ko ení. Ko e fetalanoaʻaki mo e ngaahi kaumeʻá pea mo e ngaahi mahení ʻoku faʻa fakaʻatā ai ʻa e hala ke fai pehē. ʻOku fai ia ʻe he niʻihi ʻaki ʻa e faitohi pe ko hono ngāueʻaki ʻa e telefoní. ʻOku lī ʻe he niʻihi ʻa e ngaahi tohi ʻi he meilí ʻoku ʻi ai ʻa e fakamatala ʻoku nau fakakaukau ʻe mahuʻingaʻia tefito ai ha maheni. Tupu mei ha holi ke ʻoua ʻe tō ha tahá, ʻoku ʻalu ai ʻa e Kau Fakamoʻoní ʻi he matapā ki he matapā mo e pōpoakí.

ʻOku ʻi he Tohitapú ʻa e fakaafe loto-māfana ko ení: “Ko e Laumalie mo e Taʻahine ʻoku na pehe, Haʻu. Pea ko ia ʻoku ne fanongo ke ne pehe, Haʻu. Pea ko ia ʻoku fieinu ke ne haʻu. Pea ko ia ʻoku ne loto ki ai, ke ne toʻo taʻetotongi ʻa e Vaiola.” (Fakahā 22:17) Ko e talanoa ki he niʻihi kehé ʻo fekauʻaki mo e māmani Palataisí pea mo hono ngaahi tāpuakí ʻoku totonu ke fai loto-lelei ia, mei ha loto ʻoku fonu ʻi he holi ke vahevahe atu ʻa e ongoongo lelei ko ení.

ʻOku mau fakapapauʻi ʻoku ʻi ai hoʻo ngaahi fehuʻi kehe ʻo fekauʻaki mo e Kau Fakamoʻoni ʻa Sihová pea mo ʻenau ngaahi tuí. Mahalo pē ʻoku natula fakaefakakikihi ʻa e ngaahi ʻīsiu ʻe niʻihi. Te mau saiʻia ke tali ʻa hoʻo ngaahi fehuʻí. ʻOku fakangatangata pē ʻa e sipeisi ʻo e polosiuá ni, ko ia ʻoku mau fakaafeʻi atu koe ke ke fehuʻi ki he Kau Fakamoʻoni fakalotofonuá. ʻE lava ke ke fai ia ʻi he ngaahi fakataha ʻi honau Fale Fakatahaʻangá pe ʻi he taimi ʻoku nau ʻaʻahi atu ai kiate koe ʻi ho ʻapí. Pe te ke ʻave nai hoʻo ngaahi fehuʻí ki he Watch Tower, ʻo ngāueʻaki ʻa e tuʻasila feʻungamālie ʻoku fakahokohoko ʻi laló.