‘Kuo Mau ʻIlo ʻa e Mīsaiá!’

ʻI ha senituli nai ʻe fā mei hono hiki ʻa e tohi fakaʻosi ʻo e konga faka-Hepelū ʻi he Tohi Tapú, naʻe fakahoko ai ʻa e kikite ʻa Maika fekauʻaki mo e Mīsaiá: Naʻe ʻaloʻi ʻa Sīsū ʻi Pētelihema. Hili ʻa e taʻu ʻe 30 mei ai ʻi he 29 TS nai, naʻe fakahoko ai ʻa e konga ʻuluaki ʻo e kikite ʻa Taniela ʻo fekauʻaki mo e hoko mai ʻa e Mīsaiá. Naʻe papitaiso ʻa Sīsū pea naʻe pani ia ʻe he ʻOtuá ʻaki ʻa e laumālie māʻoniʻoní. ʻI he taimi tofu pē ko iá, ko e Mīsaia naʻe fuoloa ʻa e tatali ki aí, ʻa e Hakó kuo aʻu mai!

Naʻe kamata leva ʻe Sīsū ʻene ngāue fakafaifekaú, ʻo “fanongonongo ʻa e ongoongo lelei ʻo e Puleʻanga ʻo e ʻOtuá.” (Luke 8:1) Hangē pē ko ia naʻe kikiteʻí, naʻe fakamoʻoniʻi ai naʻe anga-ʻofa ʻa Sīsū, anga-malū pea mo tokanga moʻoni ki he niʻihi kehé. Ko ʻene akonakí naʻe ʻaonga mo anga-ʻofa, pea naʻá ne fakamoʻui ʻa e kakaí ʻi he “ngaahi faʻahinga faingataʻaʻia kotoa pē,” ʻo fakahāhā ai naʻe kau ʻa e ʻOtuá mo ia. (Mātiu 4:23) Ko e kakai ʻo e taʻu motuʻa kehekehe naʻa nau fakatahataha mai kia Sīsū ʻo nau fakaʻosi ʻaki: ‘Kuo mau ʻilo ʻa e Misaiá!’—Sione 1:41.

Naʻe tomuʻa tala ʻe Sīsū ʻi he ki muʻa siʻi ke pule fakaʻaufuli ʻa hono Puleʻangá, ʻe hokosia ʻe he māmaní ʻa e ngaahi tau, mofuike mo e ngaahi faingataʻa kehe. Naʻá ne ekinaki ke nau “hanganaki leʻo” kotoa.—Maʻake 13:37.

Ko Sīsū ko ha tangata haohaoa naʻá ne talangofua ai pē ki he ʻOtuá, ka naʻe ʻi ai hono ngaahi fili naʻe faifai atu pē ʻo nau tāmateʻi ia. Ko ʻene pekiá naʻe tokonaki ai ha feilaulau haohaoa ke fakatau fakafoki mai ʻaki kiate kitautolu ʻa e meʻa naʻe fakamoleki ʻe ʻĀtama mo ʻIví—ko e ʻamanaki ki he moʻui taʻehanongataʻanga ʻi Palataisi.

Ko e pekia ʻa Sīsuú naʻe fakahoko ai ʻa e kikité ʻo hangē ko hono fokotuʻu hake ʻe he ʻOtuá ʻa Sīsū ko ha meʻa moʻui laumālie mālohi ʻi he hili ʻa e ʻaho ʻe tolu mei ai. Naʻe hā leva ʻa Sīsū ki heʻene kau ākonga ʻe toko 500 tupu. Ki muʻa ke ne ʻalu hake ki hēvaní naʻá ne fekau ki hono kau muimuí ke ʻave ʻa e ongoongo lelei fekauʻaki mo ia mo hono Puleʻangá ki he “kakai ʻo e ngaahi puleʻanga kotoa pē.” (Mātiu 28:19) Naʻe fakaʻauliliki fēfē ʻenau fakahoko ʻa e ngāue ko iá?

—Makatuʻunga ʻi he Mātiu, Maʻake, Luke, Sione, 1 Kolinitō.