Ko e Yearbook—Ko e Maʻuʻanga Lahi ʻo e Fakalototoʻa
1 Ko e ngaahi lipooti mo e ngaahi meʻa naʻe hokosia ʻo kau ki he ngaahi ngāue fakaofo ʻa Sihová ʻoku hoko maʻu pē ko e meʻa fakatupu langa hake ki he kau sevāniti ʻa e ʻOtuá. (Siope 38:4, 7; Pal. 25:25; Luke 7:22; Ng. 15:31) Ko e ʻuhinga ia ʻoku hoko ai ʻa e Yearbook of Jehovah’s Witnesses ko e maʻuʻanga lahi ʻo e fakalototoʻa.
2 ʻOku fakahā ʻe he Yearbook taki taha ʻa e ngaahi lipooti mei he ngaahi fonua kehekehe ʻo kau ki he ngaahi ngāue mo e ngaahi meʻa kuo lavameʻa ai ʻa e Kau Fakamoʻoni ʻa Sihová. ʻOku fakaeʻa ʻa e tataki, maluʻi, mo e tāpuaki meia Sihova ki heʻene kakaí ʻe he ngaahi meʻa naʻe hokosia ʻa ia ʻoku hoko ʻo mālohi ange ai ʻa e tuí. ʻOku fakamatala ʻe he Yearbook ʻo kau ki he kau tangata mo e kau fefine mālohi fakaesino mo e fakaefakakaukau ʻa ia kuo nau mavahe mei honau fāmilí, ngaahi kaumeʻá, mo honau fonua totonú ke nau fakahā ʻa e moʻoni ʻo e Tohi Tapú ki he kakai ʻo e ngaahi konitineniti kotoa mo e meimei kotoa ʻo e ngaahi motu ʻo e tahí.
3 Kuo ueʻi ʻe he Yearbook ʻa e tokolahi ke fakalahi ʻenau ngāue ki he ʻOtuá. Ko e toko taha naʻá ne lau ʻa e Yearbook naʻá ne tohi ʻo pehē: “ʻOku ʻikai lava ke taʻofi ʻeku lau ʻa e tohí ni. Ko e meʻa pē naʻá ku laú kuo hoko ia ko e fakalototoʻa. ʻOkú ne ueʻi au ke u ongoʻi te u malava ʻo kau lahi ange ʻi hono malangaʻi ʻo e ongoongo leleí ʻi heʻeku sio ki he meʻa kuo fai ʻe he niʻihi kehe ʻi he ngaahi feituʻu ʻoku faingataʻá.”
4 ʻI he taʻu kotoa pē talu mei he taʻu 1927, kuo hoko ʻa e Yearbook of Jehovah’s Witnesses ko e maʻuʻanga lahi moʻoni ʻo e ngaahi lipooti mo e ngaahi meʻa naʻe hokosia ʻoku fakalotomāfana. ʻOkú ke maʻu ʻa e ʻaonga kakato mei he maʻuʻanga fakalototoʻa laulōtaha ko ʻení? Ke fai pehē, ʻai ke lau ʻa e Yearbook ʻi hoʻo ʻuluaki maʻu iá. Pea ʻi he lolotonga ʻa e taʻu ko iá, toe vakai ki he ngaahi konga ʻe niʻihi ke maʻu ʻa e fakalototoʻa ʻoku fie maʻu kiate koe mo ho fāmilí.