VO MUNGACHITA PO MITENGU YA VINTHU YILUTIRIZGA KUKWERA

Mukhorwengi ndi vo Mwenavu

Ŵanthu wo akhorwa agutisika ndi vinthu vo ŵenavu pa umoyu. Ndipu asani vinthu vasintha pa umoyu wawu, nawu asintha mo achitiya vinthu kuti vikoliyani ndi mo vinthu viliri pa nyengu yo.

NTCHIFUKWA WULI KUKHORWA NDI VO TE NAVU NKHWAKUKHUMBIKA?

Dokotala munyaki zina laki Jessica Koehler wangukamba kuti ŵanthu wo akhorwa, kanandi awona vinthu mwakwenere. Iyu wangukamba so kuti ŵanthu a viyo atiŵachitiya sanji cha anyawu. Mwaviyo, tizizwa cha kuti ŵanthu wo akhorwa ndi vo ŵenavu kanandi akondwa ndipu asuzgika maŵanaŵanu viŵi cha. Ndipu anandi mwa ŵanthu wo akondwa, ŵe ndi vinthu vimanavi pa umoyu. Kuti akondwengi, yiwu aŵika maŵanaŵanu ngawu pa vinthu vo ndalama zitondeka kugula, nge likondwa lo munthu wasaniya chifukwa chakupatuwa nyengu yakucheze ndi ŵanthu a mubanja laki kweniso mabwezi ngaki.

“Asani te ndi chakurya ndi vakuvwala, tije akukhorwa ndi vinthu venivi.”—1 Timote 6:8.

VO MUNGACHITA

Mungajiyeruzgiyanga ndi anyinu cha. Asani mungayamba kuyeruzgiya vinthu vimanavi vo mwenavu ndi vinthu vinandi vo ŵanthu anyaki ŵe navu, mungaleka kukhorwa kweniso mungayamba kuŵapangiya sanji. Kweniso kanandi asani titijiyeruzgiya ndi anyidu, tituŵa kuti tiziŵa cha mo vinthu viliri nadi pa umoyu wawu. Mungayamba kuŵanaŵana kuti ŵanthu wo ŵe ndi vinthu vinandi mbakukhupuka, kweni anyaki atuŵa kuti ŵe ndi ngongoli zikuluzikulu. Nicole yo waja ku Senegal wangukamba kuti: “Ndikhumbika kuja ndi vinthu vinandi cha kuti ndikondwengi. Asani ndikhorwa ndingakondwa chinanga kuti ŵanthu anyaki ŵe ndi vinthu vinandi kuphara vo ini nde navu.”

Yesani kuchita ivi: Mukhwechengi kuwona mavidiyo ngakusasa malonda pamwenga masitetasi ngo ngalongo unandi wa ndalama pamwenga vinthu vakudula vo ŵanthu anyaki ŵe navu.

“Chinanga munthu wangaŵa ndi vinthu vinandi, umoyu waki utuliya mu vinthu vo we navu cha.”—Luka 12:15.

Muwongengi. Ŵanthu wo awonga, kanandi akhorwa kweniso aŵavi mtima wa mbunu. Roberton wa ku Haiti wangukamba kuti: “Nditesesa kusaniya nyengu yakuŵanaŵaniya vinthu vamampha vo ŵanthu anyaki andichitiya kweniso achitiya banja langu. Pavuli paki ndiluta kuchiŵawonga. Ndisambiza so mwana wangu wa vyaka 8 kuti wawongengi asani ŵanthu amupaska chinthu.”

Yesani kuchita ivi: Zuŵa lelosi mulembengi vinthu vamampha vo mwe navu pamwenga vo ŵanthu akuchitiyani. Mungawonga Chiuta chifukwa chakuti mutamatama cha, mwe ndi banja lamampha, mwe ndi mabwezi ngo ngatikuyanjani pamwenga mwawona kutowa kwa lumwi lichisere.

“Munthu yo we ndi mtima walikondwa walutirizga kuchita phwandu.”—Nthanthi 15:15.

Nyengu zinyaki, tosi titondeka kukhorwa ndi vo tenavu. Kweni asani titesesa kukhorwa vititiwovya ukongwa! Asani tikhorwa ndi vo tenavu, vititiwovya kuti tikondwengi ndipu palivi munthu yo wangagula likondwa.