Ndingukopa Mulumu Wangu “Kwambula Mazu”

Ndikuwa mu 1952 ku Romania. Chinanga kuti ama ŵenga Akaboni akubatizika kweni ŵenga akulopwa mu uneneska ndipu venivi vinguchitiska kuti ndilekengi kusanirika pa maunganu Ngachikhristu. Kusazgiyapu yapa, charu cha Romania chalamulikanga ndi ulamuliru wachikomyunizimu ndipu ntchitu ya Akaboni aku Yehova, yakupharazga kweniso kusindikiza mabuku yingukanizika. Mwaviyo, pa vyaka 36 vakwambiriya va umoyu wangu, ndaziŵanga cha kuti Yehova ndiyani pamwenga vo Bayibolu likamba. Kweni mu 1988, pa nyengu yo ini ndi mulumu wangu István tajanga mutawuni ya Satu-Mare, panguchitika chinthu chinyaki cho chingusintha umoyu wangu.

Ndatingi Ndikaniyengenji!

Zuwa linyaki ama anguza kuzindiwona. Yiwu angukamba kuti: “Ndiluta kuchiwona ankhazi ŵaku. Tilutiyengi limoza cha? Asani taweku, tamuguliya limoza vinthu.” Pakuti ndengavi vakuchita, ndinguzomera kuluta nawu limoza.

Tati tafika kwa ankhazi, tingusaniya kuti ŵe pa maunganu nga Akaboni aku Yehova ndipu ŵengapu ŵanthu 9. Ndaziŵanga cha kuti pa nyengu iyi, ama ndipu ayamba so kuchita phamphu nge Kaboni. Vo ndinguvwa mlenji wa zuŵa lenili vingundikondwesa ukongwa.

Unganu wenuwu wati wamala, munthu yo walongozganga wangunditauzga kweniso wangujikonkhoska kuti ndi yani. Iyu wangukamba kuti: “Zina langu ndini János. Po tenga pa maunganu ndakuwonanga kuti wavwisiyanga mwakuphwere ukongwa. Uwoneka kuti wakondwa ukongwa ndi vo wavwa msanawale anthu?” Ndinguŵamuka kuti ndechendajepu pa unganu nge uwu ndipu ndikhumbisiska kuti zuŵa linyaki ndiziŵepu so. Angundifumba kuti: “Kumbi ungayanja kusambira Bayibolu?” Ndatingi ndikaniyengenji nkhani yakukondwesa yeniyi. Yapa ndinguziŵa kuti Chiuta ndiyu wandizisa ku ŵanthu ŵenaŵa.

Zuŵa lakulondopu, János wangundiziŵikisa kwaku Ida, yo pavuli paki wangwamba kusambira nani Bayibolu. Kweni ndafipanga mtima ndi mo mulumu wangu István wachitiyengi asani waziŵa kuti ndayamba kusambira Bayibolu ndi Akaboni aku Yehova. Ndingwesapu kwa maulendu nganandi kukambiskana nayu kweni wakondwanga navu cha. Ndinguziŵa kuti ndasokomore dala masanganavu.

Chinanga kuti venga viyo, ndingulutirizga mbwenu kusambira Bayibolu ndipu ndingubatizika mu August 1989. Pati pajumpha waka miyezi inayi, ulamuliru wa Chikomyunizimu ku Romania ungumala ndipu mulongozgi wawu wangumangika.

Kususkika Kukulu

Kumala kwa ulamuliru wenuwu kunguwovya kuti ŵanthu aje ndi wanangwa. Ndipu Akaboni aku Yehova nawu anguzomerezeka kwamba kuwungana pakweru kweniso kupharazga. Kweni ini, wanangwa wenuwu unguchitiska kuti ndiyambi kususkika ukongwa. Mulumu wangu István wangundikambiya kuti, “Ndilivi navu suzgu vo ugomezga, chikulu uluta cha kuti ukapharazgengi nyumba ndi nyumba.”

Kweni uneneska ngwakuti ndingulekapu cha kupharazga. (Machitidu 4:20) Kweni ndachitanga vinthu mwakuphwere ukongwa kweniso mwakuchenje. Kweni zuŵa linyaki, abwezi ŵaki a mulumu wangu angundiwona ndichipharazga nyumba ndi nyumba mwakuti anguchimukambiya. Ndati ndafika kunyumba, mulumu wangu wangundikalipiya. Iyu wanguti, “Utindilengesa ukongwa kweniso ulengesa nyumba yidu!” Iyu wanguchinjika chimayi pakhosi pangu ndipu wangundiwofyeza kuti wandibayengi asani ndilutirizgengi kupharazga.

Ndingwesa kukambiskana nayu mulumu wangu kuti waziŵi chifukwa cho ndipharazgiya ndipu ndingumusimikiziya so kuti nditimuyanja ukongwa. Mazu ngo ndingumukambiya ngangumujalikiskaku viyo mtima pasi kwa kanyengu. Kweni zuŵa linyaki ndati ndakana kuchisanirikapu pa mwambu wa nthengwa ya wachibali yo wenga muchisopa chinyaki, wangundikwiyiya so ukongwa. Venivi vinguchitiska kuti wayambi kundolongolore mazu ngaheni.

Ntchachitima kuti kwa vyaka 13 ndingukunthiyapu vinthu vankhaza vo mulumu wangu István wandichitiyanga. Pa vyaka vosi venivi, wandiwofyezanga kuti nthengwa yimalengi. Nyengu zinyaki wandikanizanga kusere munyumba ndipu wandijaliyanga kubwalu. Kweniso wandikambiyanga kuti ndilongezi katundu wangu ndikengi kwidu.

Kumbi ndi vinthu wuli vo vingundiwovya kukunthiyapu vinthu vakusuzga venivi? Ndapempheranga kwaku Yehova kuti wandiwovyi kuti ndilutirizgi kuja wakuzika ndipu kukamba uneneska, iyu wangundiwovya nadi. (Salimo 55:22) Abali ndi azichi mumpingu, nawu angundiwovya ukongwa. Ŵara kweniso azichi anyaki wo aziŵa vinandi kweniso akunthiyapu mayeseru nganandi angundichiska ukongwa kuti ndingalekanga cha kuteŵete Yehova. Yiwu angundikumbusa vo Bayibolu likamba vakukwaskana ndi anthukazi anyaki wo angukopa alumu ŵawu “kwambula mazu” ndipu angulutirizga kuja akugomezgeka kwaku Yehova. (1 Peturo 3:1) Pati pajumpha nyengu, mazu ngo angundikambiya ngangufiskika nadi kwaku ini.

Mo Vinthu Vingusinthiya

Mu 2001, mulumu wangu István wangutama nthenda yakufwa viŵalu (sitiroku) ndipu yingumuchitiska kuti waleki kwenda. Wanguja mu chipatala kwa mwezi umoza ndipu kwa masabata nganyaki nganandi waŵikikanga kumalu ngo ŵanthu wo achita sitiroku achitiyaku mafizu. Panyengu yosi yeniyi, ndingumusiya yija cha, ndenga nayu limoza nyengu zosi. Ndamuryiskanga chakurya ndipuso ndawonesesanga kuti chechosi cho wakhumbika chilipu.

Abali ndi azichi mumpingu azanga kuzimuwona. Kukamba uneneska, mulumu wangu wanguwona chanju cho abali ndi azichi ŵenachu. Anandi aku yiwu atiwovyanga kugwira ntchitu zinyaki za panyumba. Ndipu nyengu zosi ŵara ajanga akunozgeka kutipembuzga kweniso kutiwovya.

Vo abali ndi azichi ŵenaŵa atichitiyanga vinguchitiska kuti mulumu wangu wayambi kujimba mlandu chifukwa cha nkhaza zo wandichitiyanga. Ndipu wangudandaula so kuwona kuti pengavi mubwezi waki chinanga njumoza yo wanguza kuzimuwona. Mwaviyo, wati watuwa muchipatala wangukamba kuti, “Ndikhumba kwamba kusambira Bayibolu ndikuja Kaboni waku Yehova.” Ndingutuzga masozi chifukwa cha likondwa ndati ndavwa mazu ngenanga!

Mu May 2005, mulumu wangu István wangubatizika. Chifukwa chakuti wayendanga cha yija, pa zuŵa lo wabatizikiyanga, abali angumunyamuwa pa njinga ya ŵanthu akupunduka kuluta nayu ku malu nga ubatizu. Ŵati afika, angumusisa ndi kumunyamuwa mumanja kuluta nayu mumaji kuchimubatiza. Kutuliya ŵaka pa nyengu yeniyi, mulumu wangu wenga mupharazgi wa Ufumu waphamphu. Ndikondwa ukongwa asani ndikumbuka nyengu yo talutiyanga limoza mu upharazgi. Venga vakukondwesa ukongwa! Aŵanaŵaniyani waka, munthu yo pakwamba wandisuskanga kweniso kundikaniza kupharazga uneneska wa Mazu Ngaku Chiuta wanguja kuchigaŵa changu, ndipu tapharazgiyanga limoza uthenga wamampha ku ŵanthu anyaki!

Mulumu wangu István wangufika pakumuyanja ukongwa Yehova ndipu kanandi waŵerenganga Bayibolu kweniso kuloŵeza mavesi. Wayanjanga so ukongwa kukambiyaku abali ndi azichi mumpingu mavesi ngo waŵerenga. Pa nyengu yeniyi, wanguchiska abali ndi azichi anandi mumpingu.

Mulumu wangu wangulutirizga mbwenu kutama mwakuti vinthu vingufika paheni. Wati wachita so sitiroku yinyaki, wanguleka kulongoro ndipu pakumaliya paki wajaliyanga waka kugona. Kweni kumbi suzgu yeniyi yingumuchitiska kuti waleki kuteŵete Yehova? Awa, chinanga nkhamanavi! Iyu wangulutirizga mbwenu kuŵerenga kweniso kusambira Bayibolu mwakukoliyana ndi mo vinthu venge pa umoyu waki. Asani abali ndi azichi ŵaza kuzimuwona, wakambiskananga nawu mwakugwiriskiya ntchitu chipangizu cho chenga ndi kasikilini ndipu waŵachiskanga kuti aje ndi chivwanu chanthazi. Mubali munyaki wangukamba kuti: “Ndikondwa ukongwa asani ndaluta kwaku István kuchimuwona. Nyengu zosi asani ndiwe ko, ndija kuti ndachiskika kweniso kupaskika nthazi.”

Ntchachitima kuti mu December 2015, István wakutayika. Nyifwa yaki yingundiŵaŵa ukongwa. Kweni chinanga kuti wakutayika, nde ndi chimangu chayichu chamumtima. Ndikamba viyo chifukwa wanguja mubwezi waku Yehova wechendafwi. Venivi vitindikondwesa ukongwa, chifukwa iyu kweniso ama, Yehova watiŵakumbuka. Ndipu vazamuja vakukondwesa ukongwa kuziŵalondere wosi ŵaŵi kweniso kuziŵahaga mucharu chifya chaku Yehova cho mwazamuja urunji.

Pajumpha vyaka vakujumpha 35 sonu kutuliya po ini ndi ama tingulutiya kunyumba kwa ankhazi, ndipu zuŵa lenili ndazakuliluwapu cha. Pasonu panu nde ndi vyaka vakujumpha 70 ndipu nditeŵete nge mpayiniya wanyengu zosi. Ndiwona kuti palivi so nthowa yinyaki yamampha yo ndingamuwonge Yehova pa vamampha vosi wandichitiya kuphara kumuteŵete munthowa yeniyi. (Salimo 116:12) Iyu wangundiwovya kuja wakugomezgeka kweniso wakuzika pa nyengu yo ndasuskikanga ukongwa. Ndipu kupatuwaku pakususkika, ndikusambira so kuti vinthu pa umoyu vingasintha. Chinanga kuti ndivu ndakhazanga cha, kweni ndingufiska kumukopa mulumu wangu kwambula mazu.