Muyesesengi Kusunga Umoza wa Mzimu”

“Mzimu” waku Chiuta ndiwu utitiwovya kusunga “umoza,” pamwenga kuti kuja mwakukoliyana. Kweni nge mo Paulo wangukambiya, pe vinthu vinyaki vo tikhumbika kuchita kuti tilutirizgi kuja mwakukoliyana. Mwaviyo, Mkhristu weyosi wakhumbika kuchitapu kanthu kuti tilutirizgi “kusunga umoza wa mzimu.”

Tiyeruzgiyi kuti munthu munyaki wakuguliyani foni. Kumbi ndiyani yo we ndi udindu wakuyinozesa asani yanangika? Yapa ntchakuziŵaziŵa galu waku kalulu. Yimwi mungamumba mulandu cha munthu yo wangukupaskani foni asani foni yo yanangika.

Mwakuyanana ŵaka, Chiuta ndiyu wakutipaska mphasu yakuti tikoliyanengi. Kweni Mkhristu weyosi wakhumbika kuyesesa kuchitapu kanthu kuti tilutirizgi kukoliyana. Asani tikoliyana cha ndi Mkhristu munyidu titenere kujifumba kuti, ‘Kumbi nditesesa kusunga umoza wa mzimu mwakuchitapu chigaŵa changu kuti ndimalisi nkhani iyi?’

‘MUYESESENGI’ KUJA MWAKUKOLIYANA

Mwakukoliyana ndi vo Paulo wangukamba, tikhumbika kuyesesa kusunga umoza wa mzimu, ukongwa asani Mkhristu munyidu watiguŵisa. Kumbi tikhumbika kukambiskana nayu pe munthu yo watiguŵisa kuti tilutirizgi kuja akukoliyana? Viŵi cha. Mwaviyo, mutenere kujifumba kuti, ‘Kumbi asani takambiskana nkhani yeniyi tilutirizgengi kuja mwakukoliyana pamwenga vinthu vinangikiyengi limu?’ Nyengu zinyaki mbumampha kuyileka ŵaka nkhani yo pamwenga kugowoka.—Nthanthi 19:11; Mariko 11:25.

Nge mo wakutumika Paulo wangukambiya, tiyeni tosi tilutirizgi ‘kuzizipizgiyana mwachanju.’ (Aefe. 4:2) Buku linyaki likamba kuti fundu yeniyi yingang’anamuwa “kuŵalonde nge mo aliri.” Venivi ving’anamuwa kuti tikhumbika kuzomereza kuti Akhristu anyidu nawu mbakubuda nge isi. Mbuneneska kuti tosi titesesa “kuvwala umunthu wufya.” (Aefe. 4:​23, 24) Kweni palivi munthu yo wangachita vinthu mwakufikapu. (Aro. 3:23) Asani tizomereza fundu yeniyi, vitisuzgengi cha kuzizipizga vinthu vo anyidu atitinangiya, kuŵagowoke kweniso “kusunga umoza wa mzimu.”

Mumpingu, tingalutirizga kuja ndi “chimangu cho chimanga pamoza” asani titiŵagowoke Akhristu anyidu kweniso kuluwa vo atinangiya. Mazu nga Chigiriki ngo pa Aefeso 4:3 akungafwatuliya kuti “kumanga pamoza,” pa Akolose 2:19 akungafwatuliya kuti “misipi ya mumalunga.” Misipi ya mumalunga ndi misipi yanthazi ukongwa yo yilumikiza chiwanga ku chiwanga chinyaki. Mwakuyanana ŵaka, chimangu kweniso kwanja abali ŵidu kutitiwovya kuti tikoliyanengi ukongwa chinanga kuti tingapambana maŵanaŵanu pa vinthu vinyaki.

Mwaviyo asani Mkhristu munyinu wakuguŵisani pamwenga wakukwiyisani, muyesesengi kuchita nayu vinthu mwalisungu mumalu mwakumuyeruzga. (Ako. 3:12) Chifukwa chakuti tosi te ambula kufikapu, namwi mutenere kuti nyengu yinyaki munguguŵisapu munthu munyaki. Kukumbuka fundu yeniyi, kungakuwovyani kuti “muyesesengi kusunga umoza wa mzimu.”