Nya wu 4: Gu divaleya

SO THULA GINANI

Gu divaleya sa gu thula gu si diga si vbindra ni gu mba vegeya likhulo oyu a nga gu zangarisa. Gu divaleya kha si thuli gu khidzo u yede gu gira gu khatshi kha wa ghohedwa.

LITSHINA NYA NAYO NYA BHIBHILIYA: “Simamani gu laphiseyana monyo mu bwe mu divaleyana khu monyo watshavbo.” — Vakolosi 3:13.

“Wa gu ba u haladza muthu nyo khaguri kha wu na nga vega gupima ga sihoso saye, ganiolu u na dzi garadzeya gu vega gupima ga makhalelo nya yadi a dzi garadzeyago gu manega nawo.” — Aaron.

KHU GINANI SI GU NA NI LISIMA

Wa gu khaleya gu vega likhulo, u na dzi vangeya madwali nya monyo u bwe u tshungunula lipango lago.

“Ga litshigu nyo khaguri, mwama wangu a di gira silo si nga nyi gorosa ngudzu, khu gu hegisa a nyi lomba divalelo. Ganiolu, si nyi garadzede ngudzu gu mu divaleya. Khu gu gimbiya nya tepo nyi mu divalede, ambari ulolo nyi ngu dzi laya khu kotani nya olu nyi mba dzegeya gu mu divaleya, nigu isoso si hi vangede sigaradzo pangoni gwathu.” — Julia.

GINANI U NGA GIRAGO

DZI GEVESISE

Wa gu tshuka u goroswa khu mwama mwendro mwangadzi wago khu kotani nya silo a ganeyago ni gu gira, dzi wudzise gu khuwe:

• Ina nyi ngu zangari guvbindra pimo?

• Ina nyi mu zangariside ngudzu avba nya gu si hunga gu nyi lomba gu nyi divaledwa mwendro nyi si diga si vbindra basi?

BHUDZISANANI

• Tepo muni hi dzegago gasi gu divaleyana?

• Ginani hi nga girago gasi gu dzegeya gu divaleyana?

MAWONELO

• Wa gu ba u zangaride, u nga ningi nandru mwama mwendro mwangadzi wago.

• Dzi garadzeye gu divaleya mwama mwendro mwangadzi wago, na wu dundruga gu khuwe “hatshavbo hi ngu hosisa dzitepo nya dzingi.” — Jakobe 3:2.

“Si ngu vbevbuga gu divaleyana abari gu khethu ha vavili hi nga hosisa, ganiolu si ngu garadza ngudzu abari gu moyo wathu a nga hosisa. Gasi hi si kodza gu divaleya vambe hi yede gu dzinogisa khu lisine.” — Kimberly.

LITSHINA NYA NAYO NYA BHIBHILIYA: “Dzegeya gu lulamisa sigaradzo sanu.” — Matewu 5:25.