Nya wu 3: Githawo

SO THULA GINANI

Patwa wa gu yeyedzana githawo wu na simama gu haladzana ambari wa gu mba pwanana ga silo nyo khaguri. Libhuku Dez Lições para Transformar seu Casamento, lo ganeya gu khilo: “Patwa wu yeyedzanago githawo wa gu gira satshavbo wu si kodzago gasi gu lulamisa sigaradzo sawe, wa gu mba pwanana ga gilo nyo khaguri. Moyo ni moyo wawe a gu engiseya mawonelo ya mumbe khu githawo a bwe a gira satshavbo si vbwetago gasi vatshavbo va phasega.”

LITSHINA NYA NAYO NYA BHIBHILIYA: “Lihaladzo . . . kha li vbwetedzeyi esi si phasago ilo basi.” — 1 Vakorinto 13:4, 5.

“Nyi nga yeyedza gu kheni nyi ngu ninga githawo mwangadzi wangu khu mu gira a dzipwa nari ni lisima, nyi bwe nyi si giri silo sa na mu girago a goroga ambari gu tshungunula lipango lango.” — Micah.

KHU GINANI SI GU NA NI LISIMA?

Patwa wa gu mba yeyedzana githawo wu nga khaleya gu solasolana, gu pfadzana ni gu woneyana vbavbatshi — a gu makhalelo aya vagengeyi va ganeyago gu khavo ma ngu gira mipatwa yi tshula mutshadho.

Gu khaleya gu ganeya guvivba mwendro gu goroseya mwangadzi wago si na mu gira a dzipwa na si phasi gilo, a si gu tumbe si bwe si tshungunula lipango lano. — Brian.

GINANI U NGA GIRAGO

DZI GEVESISE

Vega gupima ga esi u girago ni esi u ganeyago khu tanga nya semana mwenyo. Khu hwane u dzi wudzisa gu khuwe:

• Gungani nyi nga solasola mwama mwendro mwangadzi wangu, nigu gungani nyi nga mu zundza?

• Silo muni nyo kongome nyi giredego mwama mwendro mwangadzi wangu si yeyedzago gu khiso nyi ngu mu ninga githawo?

BHUDZISANANI

• Sigiro muni mwendro malito ma nga phasago moyo ni moyo wanu gu adzipwa na gu yeyedzwa githawo?

• Sigiro muni mwendro malito ma nga girago moyo ni moyo wanu gu a dzipwa na si yeyedzwi githawo?

MAWONELO

• Moyo ni moyo a na love dzindziya dziraru a vbwetago gu yeyedzwa khidzo githawo. Khu gu landreya, moyo ni moyo a na ninge mumbe esi a lovidego.

• Lova makhalelo ya mwama mwendro mwangadzi wago ma gu tsakisago ngudzu. Khu gu landreya, mu embeye edzi makhalelo yoyo ma gu tsakisago khidzo

Nyi nga yeyedza gu kheni nyi ngu ninga githawo mwama wangu khu gu mu ninga lisima nyi bwe nyi mu yeyedza gu kheni nyo vbweta gu kheni a tsaka. Khandri tepo yatshavbo si hungago gu nyi gira silo nya sikhongolo, ganiolu silo nya sidugwana nyi ganeyago mwendro nyi girago si nga yeyedza gu khiso nyi ngu mu ninga githawo. — Megan.

Khu gu hegisa, gigaradzo khandri guti gu khuwe u ngu mu ninga githawo mwendro ne, ganiolu khu gu mwama mwendro mwangadzi wago a dzipwa na gu yeyedzwa githawo.

LITSHINA NYA NAYO NYA BHIBHILIYA: “Ambalani pweya-wusiwana, wuwadi, gudzinogisa, gurula ni gu laphisa monyo.” — Vakolosi 3:12.