Junho

Jehovha kategiside Makristo nya lizana myaga nyo pheye tepo ma nga ba ma dzi pwananisa ni gu vbindrugedza nya siemo. Ayo ma di gu wugedwa nya mba si vireya. Wona esi si nga giregeya Bharinabha ni mupostoli Pawulo tepo va nga ba va tshumayela gipandreni gya Listra. Gupheyani, vathu va di va hoyezeya va bwe va va engiseya. Khu gu landreya, vawugeyi va di “kutsedzela vathu,” nigu vathu nyo khaguri va nga ba va va hoyezede va di veta Pawulo khu siwindri kala va pimisa gu khavo a di fude. (Mith. 14:19) Ganiolu, Bharinabha ni Pawulo va simamide gu tshumayela ga mambe malanga. Mihandro muni va yi manidego? Avo va giride “vapizane nya vangi,” nigu va tiyiside vandriyawe khu malito ni siyeyedzo sawe. (Mith. 14:21, 22) Nya vangi va wuyedwe kholu Pawulo ni Bharinabha va nga mba diga gu tshumayela ambari olu va nga ba va wugedwa. Ethu hi na mana makategwa nya mangi ha gu mba diga gu gira thumo owu Jehovha a hi ningidego. Mukhedziseyi 04/23 dzipaj. 16-17 dzipar. 13-14

Pfhumu Dhavhidhe emisanide ni valala nya tshivba ngudzu, nigu dzitepo nya dzingi vbwetedzede giphaso gya Nungungulu khu nombelo. Muembi nya dzindzimo Dhavhidhe a di gu tiyisega gu khuye Jehovha a ngu engiseya ni gu hlamula milombelo yaye. Anuwe u nga manega ni gutumba gogo. Bhibhiliya yi ngu hi tiyisegisa gu khiso Jehovha a nga hi ninga guti ni tshivba hi yi vbwetago gasi gu timiseya sigaradzo. Uye a ngu thumisa vandriyathu ni vale va gu mba mu khozeya gasi gu hi phasa khu ndziya nyo khaguri. Ambari olu, Jehovha dzimbe dzitepo a si hlamuligo milombelo yathu khu ndziya hi nga mba hi yi vireya, ethu hi ngu dziti gu khethu uye a na hi hlamula. Uye a na hi ninga esi hi si vbwetago khu tepo yakone. Simama gu gombeya na wu tiyisega gu khuwe Jehovha a na gu khathaleya olu ni gu a hi khathaleya mafuni nya maphya matago.— Ndzi. 145:16. Mukhedziseyi 05/23 paj. 8 par. 4; paj. 13 dzipar. 17-18

Gwadi ngudzu gu vega gupima avba nya makategwa hi ma manidego khu gu vboheya misuwo yathu. U nga vega gupima avbo nya makategwa muni? Abari gu misuwo yago gu tshukwadzisa malerelo yago nya Bhibhiliya mwendro gu gombeya, dundrugeya khedzi isoso si nga hadzi tiyisa khidzo wupari wago ni Jehovha. (Ndzi. 145:18, 19) Abari gu misuwo yago gu haguleya likhalelo nyo khaguri nya Wukristo, vega gupima ga edzi isoso si nga hadzi gu gu phasa khidzo gu manega ni wupari nya wadi ni vambe. (Kol. 3:14) Wa gu si wona kharini gu gira lista nya sighelo si gu girago u vbweta gu vboheya misuwo yago? Khaleya gu wona lista yago tepo yatshavbo. Vbavbandzi nya isoso,vbedza tepo ni vale va na gu phasago gu vboheya misuwo yago. (Mav. 13:20) Khu lisine, khandri matshigu yatshavbo hi na manegago ni gudogoreya nya gukhongolo gasi gu vboheya misuwo yathu. Ina isoso sa gu thula gu khiso kha hi dzi garadze gasi gu vboheya misuwo yathu? Ahihi. Anethu hi nga thuma khu gu dzi garadza gasi gu vboheya misuwo yathu ambari na hiri mwalo gudogoreya nya gukhongolo. Khu lisine, isoso kha si na nga vbevbuga, ganiolu uwe u na tsaka tepo u na vboheyago misuwo yago. Mukhedziseyi 05/23 dzipaj. 27-28 dzipar. 5-8

Guti gu khethu hi yede gu dzumeya mihandro nya makungo hi hungidego, si na hi kutsa gu ganeya gighoho hi giredego, hi zama gu gi lulamisa hi bwe hi potsa gu gira gihoso gya gimwegyo. Gu gira silo sesi, si na hi phasa gu tutuma gasi hi mana womi nya mba vbeya. Wa gu ba u hungide makungo nya mba yadi u bwe u dzi laya, ginani u yedego gu gira? U nga vbedzi tepo ni tshivba yago na wu zama gu dzi emeleya mwendro gu ninga nandru vambe. Wulangani nya isoso, dzumeya gu khuwe u ghohide u bwe u gira satshavbo u si kodzago gasi gu tshukwadzisa, ga giemo u gomogo ga igyo. Wa gu ba u dzipwa nandru khu gighoho u giredego, dzi nogise, u gombeya ga Jehovha, u dzumeya gu khuwe u ghohide u bwe u lomba gu divaledwa khuye. (Ndzi. 25:11; 51:3, 4) Lomba divalelo ga vale u va ghohedego, nigu so vbwetega vbwetedzeya giphaso gya madhota. (Jak. 5:14, 15) Hevbula khu sihoso sago u bwe u gira satshavbo u si kodzago gasi u si giri gambe. Wa gu gira isoso, u nga tiyisega gu khuwe Jehovha a na gu yeyedza wuhindzi a bwe a gu ninga giphaso u gi vbwetago. — Ndzi. 103:8-13. Mukhedziseyi 08/23 dzipaj. 28-29 dzipar. 8-9

Joyadha phaside pfhumu Jowasi gu khala muthu nya wadi. Kha nga handro wakone tepo Jowasi a nga ba ari muphya a di vbweta gu tsakisa Jehovha. Ganiolu, hwane nya gu ba Joyadha a fude Jowasi a di engisa wusingalagadzi nya va wugeyi. (2 Dzik. 24:4, 17, 18) Ambari olu Jehovha a nga ba a gorogide khu kotani nya isoso, uye “a di va rumeya vaprofeti gasi gu ta va wuyisa gwaye nyaluphye . . . aholu avo ka va va engisa” avo kha va engisa ambari gyanana gya Joyadha, Zakariya, oyu a nga ba a siri muprofeti basi ni muphasi nya khongolo nya mhamba wa Jehovha, ganiolu a nga ba ari primu wa Jowasi. Ni gu Jowasi a di gu vbweta gu songa Zakariya, ambari olu vavelegi va Zakariya va nga ba va vbulugiside womi waye. (2 Dzik. 22:11; 24:19-22) Khu kotani nya olu Jowasi a nga ba a si thavi Jehovha, Jehovha ganede gu khuye: “Avo va nyi kanganyisago va na thega dzitshoni.” (1 Sam. 2:30) Libutho nya lidugwana la Vasiriya li di pala “masotshwa nya mangi” ya Jowasi ni gu uye bayisidwe ngudzu. (2 Dzik. 24:24, 25) Hwane nya gu bani Vasiriya va bwelede, Jowasi a di songwa khu sithumi saye khu kotani nya olu a nga songa Zakariya. Mukhedziseyi 06/23 dzipaj. 18-19 dzipar. 16-17

Mupostoli Pawulo a di gu khade Efeso khu tepo nyo khaguri gasi gu tshumayela ni gu hevbudza mahungu nya yadi. (Mith. 19:1, 8-10; 20:20, 21) Uye a di gu haladza vandriyaye, nigu a di gu vbweta gu va phasa gu simama na va tumbegide ga Jehovha. Vaefeso ava Pawulo a va lovedego lidangaliya va di gu khodwa avba nya sihevbudzo nya malipha ni gu tumba wudhemoni. Dhoropani ga Efeso, vathu va diri ni mavbanyelo nyo vivbe nigu kha va nga ba va khala dzitshoni khesi va nga ba va gira. Omu nya dzifesta ni dziteatru dzawe va di gu khaleya gu ganeya khu silo nya malawu. (Efes. 5:3) Vaefeso nya vangi va di gu mwalo “wuthu,” khu ndziya nyo kongome si thulago gu khiso gu “diga gupwa guvbisa.” (Efes. 4:17-19) Na va si hevbuli esi nya sadi ni esi nya mba sadi, livhalo la Vaefeso kha la nga ba li vbisa mwendro gu va garadza. Khu sighelo sesi, Pawulo a di ganeya gu khuye si di gu gira nga khatshi “mapimo yawe momo gidemani nigu momo hwindzo ni womi wu lumbago Nungungulu.” Ganiolu, Vaefeso nyo khaguri kha va simama gidemani. Mukhedziseyi 03/24 paj. 20 dzipar. 2, 4; paj. 21 dzipar. 5-6

Ghidheyoni a di gu dzi garadza gu gira thumo waye nya guthangeye. Tepo Vamedhiyani va nga thava khu nyimpituno ni wutshigu, Ghidheyoni a di va landra gukhugeya gitsongwanatuno gya Jezireyeli kala tsongoni wa Joridhani. (Val. 7:22) Ina Ghidheyoni a di va landra basi kala tsongoni ga Joridhani? Ahihi. Ambari olu uye ni 300 vama a nga ba ari navo va nga ba va garade, uye a di simama gu va landra kala ava mana. Khu gu hegisa, avo va di pala Vamedhiyani. (Val. 8:4-12) Ghidheyoni a di gu tiyisega gu khuye Jehovha a di hadzi gu mu tiyisa, nigu Jehovha a giride kamo isoso. (Val. 6:14, 34) Khu tepo nyo khaguri, Ghidheyoni ni vama a nga ba ari navo va tutumiside dzipfhumu dzimbili nya Vamedhiyani khu mawundru, ganiolu idzo na dzi khilede dzikamelo. (Val. 8:12, 21) Ganiolu, khu gu phaswa khu Nungungulu, avo va si kodzide gu mana dzipfhumu dzile va bwe va dzi pala. Khu ndziya nyo fane, madhota ma nga tumba Jehovha oyu a gu mba “garala.” Uye a na mi tiyisa tepo mu vbeyago tshivba. — Isa. 40:28, 29. Mukhedziseyi 06/23 dzipaj. 6-7 dzipar. 14, 16

Ethu hi nga tiyisa monyo wathu ambari ha gu tshangana ni gigaradzo nyo khale kharini. Khu kharato, tumba Jehovha. Wona edzi Bharaki a dugeledego khidzo khu gu ba a tumbide gileletelo gya Jehovha. Ga tepo nyo khaguri, Vaisrayeli kha va nga ba va dongide gasi gu dwana nyimpi, kholu va diri mwalo matshari. Ganiolu, Jehovha a di embeya Bharaki gasi gu ya dwana ni muthangeyi nya masotshwa ya Khanani, Sisera ni libuthu laye. (Val. 5:8) Muprofeti nya nyamayi Dhebhora, a di embeya Bharaki gu tshiga khu sigomoni, gasi guya manana ni Sisera a nga ba ari ni 900 dzikareta nya nyimpi. Ambari olu si nga ba si wonega gu khatshi Vakhanani va di hadzi gu pala, Bharaki a di engisa gileletelo gya Dhebhora. Tepo masotshwa ma nga tshiga khu gigomoni gya Tabhori, Jehovha a di wisa ndzadzi nya yikhongolo ngudzu. Dzikareta dza Sisera, dzi di pfhugeya maragani, khavbovbo Bharaki a pala khu gu phaswa khu Jehovha. (Val. 4:1-7, 10, 13-16) Khu ndziya nyo fane, ethu hi na si kodza gu pala ha gu tumba Jehovha ni sileletelo a hi ningago, khu gu thumisa hengeledzano yaye. Mukhedziseyi 07/23 paj. 19 dzipar. 17-18

Hi yede gu laphisa monyo ha gu ba hi vbweta gu vbanya kala gupindruga. Gufana ni sithumi nyo tumbege sa gale, hi yede gu laphisa monyo hi vireya Jehovha a tadzisa situmbiso saye. (Hebh. 6:11, 12) Bhibhiliya ya gu fananisa giemo gyathu mi giemo gya mulimi. (Jak. 5:7, 8) Mulimi a gu dzi garadza gu lima, gu yala ni gu regari, ganiolu kha dziti gu khuye esi a yadego si na buga lini. Khu kharato, mulimi a yede gu vireya, a laphisa monyo na gu tumba gu khuye litshigu limwedo a na vbwera esi a yadego. Khu ndziya nyo fane, hi yede gu simama na hi pharegide khu silo sa liphuvboni ambari na hi si “liti litshigu yi na tago khilo Pfhumu ya[thu].” (Mat. 24:42) Ethu ha gu vireya khu gulaphisa-monyo, na hi gu tiyisega gu khethu khu tepo yakone, Jehovha a na tadzisa situmbiso satshavbo a giridego. Ha gu mba laphisa monyo, hi na garala khu gu vireya hi bwe hi dzi hambanisa ni Jehovha. Hi nga pheya khu gu vega gupima avba nya silo si na hi ningago litsako olu. Ganiolu, ha gu timiseya hi na si kodza gu vboha kala mahegiso hi bwe hi vbuluga. — Mik. 7:7. Mukhedziseyi 08/23 paj. 22 par. 7

Ha gu faninisa giprofeto ga Dhaniyeli 2:41-43 ni mambe mabhuku ya Dhaniyeli ni Gutuledwa, ha gu pwisisa gu khuthu migondro ya gu thamuseya pwananu wa Estados Unidos ni Grã-Bretanha, a gu uwo mufumo nya tshivba wa mafuni gwatshavbo muhuno. Guya khu mufumo womu nya tshivba, Dhaniyeli a di khuye: “Gimbe gipandre gi na tiya, gimbe gipandre [gi] na vbevbuga.” Khu ginani gimbe gipandre gi vbevbugago? Kholu vathu va emedwago khu libumba va gu girisa gu mufumo wowu wu si manegi ni tshivba. Hi nga hevbula silo nya lisima ngudzu khu githombe gi tshamusedwego khu Dhaniyeli. Gupheya, hi hevbude gu khethu mufumo nya tshivba Anglo-Americana wu ngu yeyedza tshivba wu gu nayo khu dzindziya nya gu hambane-hambane. Khu giyeyedzo, Estados Unidos ni Grã-Bretanha mifumo yi nga ba yi patega avba nya mayigo ma padego Nyimpi nyo pheye ni Nyimpi nya wuvili nya Mafu Yatshavbo. Ganiolu, mufumo wowu nya tshivba kha wa tiya, nigu wu na simama gu mba tiya, kholu vathu va gu dwana khu gyawe, nigu kha va tsakiswi khuwo. Nya wuvili, Anglo-Americana khuwo mufumo nya tshivba wu na hegiseyago gu fuma mafuni, Mufumo wa Nungungulu na wu nga si fuvisi yimbe mifumo. Mukhedziseyi 08/23 dzipaj. 10-11 dzipar. 12-13

Dzimbe dzitepo, Dhavhidhe a di gu dzipwa na garadzega khu kotani nya sigaradzo a nga ba a tshangana naso. (Ndzi. 18:4, 5) Ambari ulolo, lihaladzo la Jehovha li mu tangadziside. Jehovha a di dzega pari yaye a ya yi “hefemudza panini, nya mwasi nya gunyuge” a bwe a yi yisa “matini nya gutenge.” Kha nga handro wakone, Dhavhidhe a di tiyiswa a bwe a simama gu thumeya Jehovha na tsakide. (Ndzi. 18:28-32; 23:2) Khu ndziya nyo fane, muhuno, ‘ethu kha hi mbembiswi khu kotani nya wuhigo wa Pfhumu Nungungulu’ tepo hi tshanganago ni sigaradzo womini gwathu. (Gil. 3:22; Kol. 1:11) Dzitepo nya dzingi, womi wa Dhavhidhe wu di gu romo mhangoni, nigu a diri ni valala nya vangi nya tshivba. Ambari ulolo, lihaladzo la Jehovha li mu giride a dzipwa na vhikelegide. Dhavhidhe a di gu dziti gu khuye Jehovha a diri naye ga siemo satshavbo nigu isoso si mu tangadziside. Khu kharato, uye a di embeleya gu khuye: “[Jehovha] a nyi tshu[de] guthavani gwangu gwatshavbo.” (Ndzi. 34:4) Khu lisine, Dhavhidhe a di gu thava, ganiolu lihaladzo la Jehovha li diri ni tshivba guvbindra hwanga waye. Mukhedziseyi 01/24 paj. 30 dzipar. 15-17

Hevbula khu makungo nya mba yadi a hungidego Jowasi. Hwane nya gu ba Muphasi nya Mhamba Joyadha a fude, Jowasi a di pheya gu manega ni dzipari nya mba dzadi. (2 Dzik. 24:17, 18) A di hatha gu engisa wusingalagadzi nya manganagana (Príncipes) ya Judha ma nga ba ma si haladzi Jehovha. Adzina u nga ganeya gu khuwe Jowasi a di yede gu dzi hambanisa ni vathu vovo. Wulangani nya isoso, uye a di khala gipumbu a hunga gu engisa wusingalagadzi wowo nya mba wadi. Gu diga isoso tepo Zakariya, primu waye, a nga mu kawuka, Jowasi a di ruma gu va mu songa. (2 Dzik. 24:20, 21; Mat. 23:35) Isoso khu lisine si vivbide ngudzu. Jowasi a diri muthu nya wadi, ganiolu a di khala muwugeyi ni musongi. Khu guhegisa uye a di songwa khu sithumi saye. (2 Dzik. 24:22-25) Silo na si gimbide gwadi nari khatshi a di gu simamide gu engisa Jehovha ni vathu va nga ba va mu haladza. Mukhedziseyi 09/23 paj. 9 par. 6

Jesu gambe a di gu dziti gu khuye mupostoli Pedro a di hadzi simama na tumbegide. Khu wuwadi, Jesu a di embeya Pedro gu khuye “u nga thavi!” Gutumba ogu Jesu a nga ba ari nago khu Pedro, gu vbindrugedzide womi wa Pedro. Pedro ni ndriyaye Andreya va di diga thumo wavo nya gu goge dzindzandzi va khala valandreyi va Jesu. Khavbovbo, Jehovha a di va kategisa khu dzindziya nya gu hambane-hambane. (Marko 1:16-18) Pedro a diri ni matshango nya mangi ngudzu kholu a diri mulandreyi wa Kristo. Uye a wonide Jesu na gu hawulugisa vadwali, gu tutumisa madhemoni ni gu wusa vathu va nga ba va fude. (Mat. 8:14-17; Marko 5:37, 41, 42) Pedro gambe manegide ni giwoniso nyo samadzise ngudzu khu wumindru wa Jesu tepo a na khalago pfhumu nya Mufumo wa Nungungulu, nigu Pedro gima kha divala giwoniso gegi. (Marko 9:1-8; 2 Ped. 1:16-18) Khu lisine, Pedro wonide silo nya singi nya gu gima na sa si wona nari khatshi kha nga ba ari mupizani wa Jesu. Uye tsakide ngudzu khu gu ba na sa dzumeleya gudzipwa nya mba gwadi gu mu gira a luza makategwa yaya. Mukhedziseyi 09/23 paj. 21 dzipar. 4-5

Ga lidangaliya laye nyo pheye, mupostoli Pedro thumiside lito gu ‘haladzana ngudzu.’ Lihaladzo leli, li ngu hi phasa gu mba divaleya basi sighoho nyo khaguri, ganiolu “sighoho nya singi.” (1 Ped. 4:8) Adzina saye Pedro a di gu dundrugide esi a si hevbudego ga Jesu myaga hwane maningano khu gu divaleya. Ga tepo yile, Pedro a di gu pimisa gu khuye a di gu yeyedza wuwadi, tepo a nga khuye a di hadzi gu divaleya ndriyaye “7 nya ugo.” Ganiolu, Jesu hevbudzide Pedro ni vambe gu divaleya “77 nya ugo” mwendro tepo yatshavbo sa gu vbwetega. (Mat. 18:21) Sa gu ba si gu garadzeya gu landrisa wusingalagadzi wowu, u nga vbeyi tshivba. Dzimbe dzitepo, hatshavbo si ngu hi garadzeya gu divaleya. Nya lisima, gu gira satshavbo u si kodzago gasi gu divaleya ndriyago u bwe u andrisa gurula naye. Mukhedziseyi 09/23 paj. 29 par. 12

Tepo Jona a nga ba a romo ndrani ya ndzandzi, a di gu tiyisega gu khuye Jehovha a di hadzi gu engisa nombelo waye ni gu mu phasa. Jehovha a di vbulugisa womi wa Jona, nigu khu landreya uye a di dongide gu gira thumo a nga ningwa khu Jehovha. (Jona 2:10–3:4) Ina u di nga tshangana ni giemo nyo garadze nyo bwe u si si kodzi gu embeya Jehovha edzi u dzipwago khidzo? Mwendro u di nga dzipwa na wu garade nyo bwe u si si kodzi gu hevbula? Dundruga gu khuwe Jehovha a ngu pwisisa giemo gyago. Khu kharato, ambari wa gu gira nombelo nya gu role, tiyisega gu khuwe Jehovha a na gu ninga esi u si vbwetago. (Efes. 3:20) Sa gu ba si gu garadzeya gu leri ni gu hevbula Bhibhiliya khu kotani nya madwali, gu garala mwendro gu garadzega, u nga engiseya Bhibhiliya ni mambe mabhuku ma seketedwago umo nya Bhibhiliya khu awudhiyu. Nigu gambe si na gu phasa wa gu engiseya dzindzimo dzathu mwendro gu sixitiri vhidhyu omu nya jw.org. Tepo hi gombeyago ga Jehovha hi bwe hi vbwetedzeya mihlamulo omu nya mabhuku yathu, sa gu fana ni gu rana Jehovha gasi gu hi tiyisa nigu uye a na gira kamo isoso. Mukhedziseyi 10/23 paj. 13 par. 6; paj. 14 par. 9

Tabhernakeli ni dzitempele dzi nga vbahwa khu gu gimbiya nya tepo Jerusalema, dzi di gu fana khu ndrani ga kona. Ndrani nya tabhernakeli ni dzitempele, gu di gu romo “Wulanga nya Guage” ni “Wulanga nya Guage Ngudzu,” wu nga ba wu hambaniswa khu kortina. (Hebh. 9:2-5; Ekiso. 26:31-33) Ga wulanga nya Guage yi di romo kandriya nya ouro, giluvelo gu nga ba gu vbisedwa avbo miphaso, meza ni dzipawu nya miningelo. “Vaprista nya vakhongolo” khavo basi va nga ba va yade gu beya wulangani nya guage gasi gu gira thumo wawe. (Mite. 3:3, 7, 10, NM) Ga wulanga nya guage ngudzu gu diri ni arka nya pwanano, yi nga ba yi namagedzedwi ouro malanga yatshavbo nigu iyo yi di gu emeya Jehovha. (Ekiso. 25:21, 22) Muprista nya khongolo, khuye a nga ba a yede gu beya ga wulanga nya guage ngudzu, gumogo khu mwaga gasi gu gira nayo nya gu agiswe. (Levhi 16:2, 17) Uye a di gu beya ni novba nya sirengo gasi gu dzi agisa uye mune ni gu agisa vathu vatshavbo ga sighoho sawe. Khu gu hegisa, Jehovha a di vega guagane tshamuselo nya malanga yaya ya mavili ma nga ba ma romo tabhernakeli. — Hebh. 9:6-7. Mukhedziseyi 10/23 paj. 27 par. 12

Tepo yatshavbo umo nya Lito la Nungungulu, hi ngu mana nayo wu gu khuwo “haladzanani.” (Joh. 15:12; Rom. 13:8; 1 Tes. 4:9; 1 Ped. 1:22; 1 Joh. 4:11) Ganiolu, lihaladzo likhalelo li khugeyago monyoni, li gu mba wonwa khu muthu. Khu kharato, hi nga yeyedza kharini lihaladzo hi gu nalo khu vambe? Khu malito ni mithumo. Hi na ni dzindziya nya dzingi hi nga dzi thumisago gasi gu yeyedza gu khethu hi ngu haladza vandriyathu. Edzi dzindziya nyo khaguri: “Ganelani lisine, muthu ni muthu ga muthu kwawe.” (Zak. 8:16) “Vbanya khu gurula ni vambe.” (Marko 9:50) “Dzi garadzeyeni gupheya khenu mu ninga githawo vambe.” (Rom. 12:10) “Hakhanani khu gyanu.” (Rom. 15:7) “Simamani gu . . . divaleyana.” (Kol. 3:13) “Rwaleyanani sigaradzo sanu.” (Gal. 6:2) “Simamani gu thaveleyana khu gyanu.” (1 Tes. 4:18) “Simamani gu . . . vbahana khu gyanu.” (1 Tes. 5:11) “Mu gombeleyana khu gyanu.” — Jak. 5:16. Mukhedziseyi 11/23 paj. 9 dzipar. 7-8

Tshigu ni tshigu, si ngu lomba na hiri ni gukhodwa nyo tiye gasi gu hunga silo nyo khaguri. Khu giyeyedzo, tepo hi hungago silo si patago dzipari, sivbungadzo, sihevbulo, gu tshadha, sanana ni thumo nyo dzi vbanyise. Hi na ba hi gira gwadi a gu dzi wudzisa gu khethu: ‘Ina esi nyi hathago gu gira sa gu yeyedza gu khiso eni nyi gu tiyisega gu kheni litigo leli nyo hine lomo vbafuvbi ni gu fuviswa, nigu Nungungulu a hi ninga mafu nya maphya? Mwendro nya gu gira esi si girwago khu vale va gu mba khodwa gu khavo va na tshuka va vbanya kala gupindruga?’ (Mat. 6:19, 20; Luka 12:16-21) Ethu hi na si kodza gu hunga makungu nya yadi ha gu tiyisa gukhodwa gwathu avba nya gu khethu mafu nya maphya momo vbafuvbi. Ethu gambe hi ngu tshangana ni sigaradzo si lombago na hiri ni gukhodwa nyo tiye gasi gu si timiseya. Adzina hi ngu emisana ni gu wugedwa, madwali nya makhongolo mwendro simbe silo si nga hi vbedzago tshivba. Gupheyani adzina saye hi nga si kodza gu timiseya sigaradzo sathu. Ganiolu, sigaradzo nya nga esi si ngu oloveya gu dzega tepo nyo laphe. Khu kharato, hi yede gu tiyisa gukhodwa gwathu gasi hi timiseya hi bwe hi thumeya Jehovha na hi tsakide.— 1 Ped. 1:6, 7. Mukhedziseyi 04/23 paj. 27 dzipar. 4-5

Jehovha o vireya gu khuye hi gira esi si gimbeleyanago ni milombelo yathu. Khu giyeyedzo, ndriyathu nyo khaguri a gu lomba giphaso Jehovha gasi a mana tepo thumoni gwaye nya gu hongole kongresu. Jehovha a di hadzi gu hlamula kharini nombelo wowu? Adzina a nga ninga gutiya-hwambo ndriyathu yoyo gasi a ganeya ni patrawu waye. Ganiolu, ndriyathu yoyo a yede gu gira gilombo gyaye khu gu phindra-phindra nigu sa gu lombega uye a nga dusa folga, ganiolu a si hakhiswi. Jehovha o vireya gu khuye hi gombeya khu gu phindra-phindra khesi hi si vbwetago. Jesu a di ganeya gu khuye, simbe silombo sathu kha si na nga hlamudwa khavba ni avba. (Luka 11:9) Ganiolu, kha hi yeli gu vbeya tshivba. Gombeya khu monyo wago watshavbo nigu khu gu phindra-phindra. (Luka 18:1-7) Tepo hi girago isoso ha gu yeyedza Jehovha gu khethu esi hi si gombeleyago si na ni lisima ngudzu. Ha gu yeyedza gambe gu khethu hi ngu tumba giphaso gyaye. Mukhedziseyi 11/23 dzipaj. 22-23 dzipar. 10-11

Jehovha tumbiside pari yaye Abrahama gu khuye a na velega gyanana nigu vathu vatshavbo mafuni va na kategiswa khu kotani yagyo. (Gen. 15:5; 22:18) Abrahama a diri ni gukhodwa nyo tiye khu Nungungulu, khu kharato uye a di gu tiyisega gu khuye Nungungulu a na tadzisa gitumbiso gyaye. Gu di gu keneleya vbadugwana gasi Abrahama a enedza 100 myaga ni gu Sara a diri ni 90, ambari ulolo va di ngari mwalo gyanana. (Gen. 21:1-7) Ganiolu, Bhibhiliya yari, khiyo: “Khu kotani nya gutumba a nga ba ari nago, [Abrahama] a di gu khodwa gu khuye a di hadzi khala papayi nya mayigo nya mangi, khu guya khesi Nungungulu a ganedego.” (Rom. 4:18) Uwe u ngu dziti gu khuwe gitumbiso egi Abrahama a nga ba a gi vireya gi tadzisegide. Uye a khade papayi wa Isaki. Khu ginani Abrahama a nga ba a yede gu tumba Jehovha? Kholu Abrahama a di gu muti gwadi Jehovha, khu kharato “uye a di gu tiyisega gu khuye Nungungulu a na ni makodzelo nyo gire esi a mu tumbisidego” nigu si di hadzi gu tadzisega. (Rom. 4:21) Abrahama a di gu tsakedwa khu Jehovha, nigu a mu wonide na lulamide khu kotani nya gukhodwa gwaye. — Jak. 2:23. Mukhedziseyi 12/23 paj. 8 dzipar. 1-2

Muphya nyo tumbege a ngu khathaleya gwadi mithumo yaye. Dundrugeya khu giyeyedzo nyo vbeleye gya Jesu. Jesu gima kha nga ba a gira silo khu makolo mwendro gu mba gira mithumo yaye. Wulangani nya isoso, uye a di gu gira gwadi mithumo a nga ba a ningidwe khu Jehovha ambari dzimbe dzitepo si nga ba si garadza gu gira isoso. Uye a di gu haladza vathu, ngudzu-ngudzu vapizane vaye nigu a di gu dzi emisede gufa khu kotani yawe. (Joh. 13:1) U nga pimedzeya Jesu khu gu thuma khu gu dzigaradza gasi gu gira ni wevbini thumo u na ningwago. Wa gu mba si kodza gu gira gwadi mithumo yoyo, dzi nogise u bwe u lomba giphaso vandriyathu va vidzidwego. U nga giri basi silo nyo vbevbuge. (Rom. 12:11) Vbavbandze nya isoso, gira mithumo yago gasi gu tsakisa “Jehovha, nasiri vathu.” (Kol. 3:23) Lisine gu kha wa vbeleya, ganiolu dzi nogise u bwe u dzumeya miphazamo u girago. — Mav. 11:2. Mukhedziseyi 12/23 paj. 26 par. 8

Ethu hi ngu tsaka tepo hi bhabhatiswago hi bwe hi gira gipandre nya ndranga ya Jehovha. Ethu hi ngu dzumeleyana ni muembi nya dzindzimo Dhavhidhe, tepo a nga ganeya gu khuye: “Kategide muthu u mu hathago a hidzimela vbafuvbi gwago, gasi guta vbanya nyumbani gwago.” (Ndzi. 65:4) Jehovha kha hathi ni wevbini muthu gasi guta nyumbani gwaye. Uye a gu ndridredzeya vale va vbwetago gu manega ni wupari nyo tiye naye. (Jak. 4:8) Tepo u dzi hendzeledzago ga Jehovha u bwe u bhabhatiswa, tiyisega gu khuwe hwane nya gu ba u bhabhatisidwe uye “a na [gu] guhuleya makategwa kala [u] si keneledwi khu gilo.” (Mal. 3:10, NM; Jer. 17:8) Tepo u bhabhatiswago, wa gu pheya womi nya wuphya thumoni ga Jehovha. U na gira satshavbo u si kodzago gasi gu simama ni gitumbiso gyago nya gu thumeye Jehovha ni gu simama na wu tumbegide gwaye ambari wa gu lingwa gu gira silo nyo vivbe mwendro gu tshangana ni sigaradzo. (Muh. 5:4, 5) Kha nga mupizane wa Jesu, u na pimedzeya giyeyedzo gyaye ni gu landrisa sileletelo saye. — Mat. 28:19, 20; 1 Ped. 2:21. Mukhedziseyi 03/24 paj. 8 dzipar. 1-3

Abari gu uwe ni mwama wago kha mu tsakiswi khu gu dzi ninga tepo nya gu khale mwatshavbo ke? Abari kharato, ginani mu nga girago? Dundrugeyani khu gikho. Tepo u khondrisago nilo, uwo kha wu dzegeyi gu khondra ngudzu, gasi nilo wu si kodza gu khondra u yede gu endzedzeya ni gu thedzeya dzikhuni. Khu ndziya nyo fane, wa gu si wona kharini tshigu ni tshigu mu vbedza tepo nya yidugwana mwatshavbo. Girani silo mu na si golago mwa vavili. (Jak. 3:18) Mwa gu pheya khu silo nya sidugwana, mu na wona gu khenu lihaladzo lanu li naya li dandra vbadugwana-vbadugwana. Githawo gilo nya lisima ndrani nya mutshadhu. Githawo gya gu fana ni phuvbo yi girago nilo wu simama gu dzura khu tshivba. Nya mba phuvbo, nilo wu nga vbiredziseya gu tshimega. Khu ndziya nyo fane, patwa wo mba ningana githawo lihaladzo lavo li nga tshimega. Khu yimbe ndziya, mwama ni ngadzi va dzi garadzeyago gu yeyedzana githawo, va gu thuma gumogo gasi lihaladzo lavo li simama. Kha si eneyi gu pimisa gu khenu mu ngu yeyedzana githawo, ganiolu nya lisima khu gu mu yede gu dzipwa na mu ningana githawo. Mukhedziseyi 05/23 paj. 22 par. 9; paj. 24 dzipar. 14-15

Umo nya Bhibhiliya, sithumi nyo tumbege sa Nungungulu, si ngu ganeya khu dzitepo si nga garadzega khu gu thava valala vaso ni simbe silo. (Ndzi. 18:4; 55:1, 5) Khu ndziya nyo fane, hi ngu wugedwa xikwatuno, thumotuno, khu valongo vathu mwendro mufumo. Ethu adzina hi ngu thava gufa khu kotani nya madwali nyo khaguri. Ga siemo sesi, hi nga dzipwa na hi thava ngudzu gufana ni gyanana nya gidugwana. Jehovha a gu hi phasa kharini ga siemo nya nga esi? Uye a ngu hi thaveleya ni gu hi tangadzisa. Khu kharato, vbedza tepo nya yingi ni Jehovha khu gu gombeya gwaye ni gu leri Bhibhiliya. (Ndzi. 77:1, 12-14) Wa gu dzi olovedza gu gira isoso, si na gu vbevbugeya gu lomba giphaso gya Jehovha wa gu ba u garadzegide. Embeya Jehovha esi si gu girago u thava ni gu garadzega. Khu gu landreya, mu engiseye khu gu leri Lito laye Bhibhiliya u bwe u wona edzi li gu thaveleyago khidzo. — Ndzi. 119:28. Mukhedziseyi 01/24 dzipaj. 24-25 dzipar. 14-16

Si na ni lisima gu manega ni gudogoreya nya gukhongolo gasi gu vboheya misuwo yago. Abari gu u na ni gudogoreya nya gukhongolo nya gu vboheye misuwo yago, u na dzi garadza gasi gu yi tadzisa. Nigu ha gu ba hiri ni gudogoreya si na hi phasa gu vboheya misuwo yathu. Ganiolu, ginani gi na gu phasago gu manega ni gudogoreya gogo? Gombeya gasi u manega ni gudogoreya nya gukhongolo. Khu gu thumisa liphuvbo laye nya guage, Jehovha a na gu phasa gu vboheya misuwo yago. Dzimbe dzitepo, ha gu dzi vegeya misuwo kholu hi ngu dziti gu khethu hi yede gu gira isoso nigu isoso silo nya sadi. Ganiolu, si nga gira hi si manegi ni gudogoreya nya gu yi vboheye. Dundrugeya khesi Jehovha a gu giredego. (Ndzi. 143:5) Mupostoli Pawulo dundrugede khesi Jehovha a mu giredego, nigu isoso si mu kutside gu gireya nya singi Jehovha. (1 Kor. 15:9, 10; 1 Thim. 1:12-14) Khu ndziya nyo fane, wa gu simama gu dundrugeya khesi Jehovha a gu giredego, isoso si na gu phasa gu manega ni gudogoreya nya gu vboheye misuwo yago. — Ndzi. 116:12. Mukhedziseyi 05/23 paj. 27 dzipar. 3-5

Papayi wathu wa ndzadzini a ngu tsaka tepo hi dhumisago lina laye. (Ndzi. 119:108) Ina so thula gu khiso Nungungulu nya tshivba yatshavbo a ngu fana ni vambe vathu va vbwetago gu zundzwa tepo yatshavbo gasi gu tiyiswa? Ahihi. Tepo hi dhumisago Papayi wathu wa ndzadzini, ha gu phasedzeya Jehovha gu yeyedza gu khethu esi Sathane a ganedego maningano khethu malipha. Sathane a di khuye, mwalo muthu a na si kodzago gu dhumisa lina la Nungungulu. Uye ganede gambe gu khuye mwalo muthu a na si kodzago gu simama na tumbegide ga Nungungulu a gu tshangana ni sigaradzo. Nigu ganede gambe gu khuye, hatshavbo hi di hadzi diga Jehovha a gu tshuka muthu nyo khaguri a hi ninga gilo gi wonegago gu khatshi i tshukwana guvbindra esi Jehovha a hi ningago. (Joba 1:9-11; 2:4) Ganiolu, Joba simamide na tumbegide, nigu yeyedzide gu khuye Sathane muliphi. Ethu ke, ina hi na simama na hi tumbegide ga Nungungulu? Moyo ni moyo wathu, a nga dhumisa lina la Papayi wathu khu gu simama gu mu thumeya khu gutumbega ni gu mu gira a tsaka. (Mav. 27:11) Khu lisine, lithomo gu gira isoso. Mukhedziseyi 02/24 dzipaj. 8-9 dzipar. 3-5

Hwane nya gu ba Mosi ni Josuwa va fude, Jehovha a thumiside valamuli gasi gu thangeya vathu vaye. Hwane nya isoso, matshigoni nya dzipfhumu, Jehovha a thumiside vaprofeti gasi gu thangeya vathu vaye. Dzipfhumu nyo tumbege dzi engiside wusingalagadzi wa vaprofeti. Khu giyeyedzo, Pfhumu Dhavhidhe khu gu dzinogisa a dzumede wusingalagadzi wa muprofeti Natane. (2 Sam. 12:7, 13; 1 Dzik. 17:3, 4) Pfhumu Josafati a engiside wusingalagadzi a ningidwego khu muprofeti Jahaziyele a bwe a kutsa Vajudha gu va ‘khodwa ga vaprofeti va Nungungulu.’ (2 Dzik. 20:14, 15) Tepo Pfhumu Ezekhiya a nga ba a tshangana ni sigaradzo, a lombide giphaso ga muprofeti Isaya. (Isa. 37:1-6) Tepo Dzipfhumu dzi nga ba dzi landrisa wusingalagadzi wa Jehovha, dzi di gu katega nigu vathu va nga ba va fumedwa khidzo va di gu vhikelegide. (2 Dzik. 20:29, 30; 32:22) Si vbevbugede vatshavbo gu wona gu khavo Jehovha a di gu thumisa vaprofeti gasi gu thangeya vathu vaye. Mukhedziseyi 02/24 paj. 21 par. 8

Sathane o vbweta gu khuye hi gira wupari ni vathu va na hi girago si hi garadzeya gu engisa milayo ya Jehovha. Ganiolu, ethu hi yede gu dzi woneya gwadi guvbindra Vaefeso va gale, kholu muhuno kha hi vbungadzi basi ni vathu khu khovbe ni khovbe, ganiolu khumo nya dzi redes sociais gambe. Hi yede gu dwana ni mapimo nya litigo leli ma gu khayo mavbanyelo nya mba handzega kha ma vivba. Ethu hi ngu dziti gu khethu ayo khandri yadi. (Efes. 4:19, 20) Ganiolu, si na ba siri sadi gu hi dzi wudzisa gu khethu: ‘Ina nyi ngu gira satshavbo nyi si kodzago gasi gu potsa wupari ni sithumi khwathu, sihevbuli khwathu ni vambe va gu mba ninga githawo milayo nyo lulame ya Jehovha? Ina nyi ngu emeya milayo ya Jehovha khu gu tiya-hwambo, ambari vambe va gu nyi wona nga khatshi kha dzi veti gwadi khu gu gira isoso?’ Kha nga si khumbugidwego omu ga 2 Thimoti 2:20-22, hi yede gambe gu hatha gwadi ava va na khalago dzipari dzathu ndrani nya libandla nya Wukristo. Hi ngu dziti gu khethu vambe vakone kha va na nga hi phasa gu simama na hi tumbegide thumoni gwathu ga Jehovha. Mukhedziseyi 03/24 dzipaj. 22-23 dzipar. 11-12

U di nga dundrugeya edzi Jehovha a gu idzo? Kha hi si kodzi gu wona Jehovha, ganiolu Bhibhiliya yi ngu mu tshamuseya khu dzindziya nya dzingi. Jehovha a ngu ranwa gupwani ‘lihani ni muvhikeli’ ni “nilo wu tshungunulago.” (Ndzi. 84:11; Hebh. 12:29) Ezekiyeli a di tshamuseya gu khuye Jehovha a gu fana ni giwindri nya safira, simbi nya gukhedzige ni arco-íris. (Ezek. 1:26-28) Khu kotani nya olu hi gu mba wona Jehovha, si nga hi garadzeya gu khodwa gu khethu a ngu hi haladza. Vambe si ngu va garadzeya gu khodwa gu khavo Jehovha a ngu va haladza khu kotani nya olu va nga tshangana ni sigaradzo nya singi gale. Jehovha a ngu pwisisa edzi hi dzipwago khidzo ni edzi si hi kuhago khidzo. Gasi gu hi phasa, uye a ngu ganeya khu makhalelo yaye nyo mbure omu nya Lito laye. Lito li tshamuseyago gwadi Jehovha, lihaladzo. (1 Joh. 4:8) Satshavbo a girago a gu kutswa khu lihaladzo. Lihaladzo la Nungungulu li na ni tshivba nya gu gireye silo nya sadi ni vale va gu mba mu haladza. — Mat. 5:44, 45. Mukhedziseyi 01/24 paj. 26 dzipar. 1-3

Jehovha hathide Mosi gasi gu thangeya Vaisrayeli tepo va nga duga khu Egipito. Nigu a thumiside siwoniso gasi gu va yeyedza ndziya, mihani a di gu thumisa lipfhi, vbawutshigutuno a di gu thumisa nilo. (Ekiso. 13:21) Mosi a di gu landriseya lipfhi li nga ba li va vbwegedza yiphwani nyo fuviye. Ganiolu, Vaisrayeli tepo va nga landrwa khu Vagipito va thavide ngudzu kholu va di gu pimisa gu khavo va na songwa. Ganiolu, isoso gu diri malipa. Jehovha a thumiside Mosi gasi gu thangeya vathu vaye. (Ekiso. 14:2) Nungungulu ava tsudziside khu ndziya nya gu hlamadzise. (Ekiso. 14:26-28) Hwane nya 40 myaga, Mosi simamide gu tumba gu khuye Jehovha a di gu thumisa lipfhi gasi gu thangeya vathu vaye giwulani. (Ekiso. 33:7, 9, 10) Mosi ganede ni Jehovha khomu nya lipfhi, ni gu khu gu landreya a di ya embeya Vaisrayeli sileletelo a ningidwego khu Jehovha. Vaisrayeli va wonide gwadi gu khavo Jehovha a di gu thumisa Mosi gasi gu va thangeya. Mukhedziseyi 02/24 paj. 21 dzipar. 4-5