Ganela mahungu nya yadi ma gu khayo litigo nya liphya lomo vbafuvbi!

Khu ngima nya Novembro hi na ba hiri ni lidima nyo hathege nya gu huweleye mahungu nya yadi ma gu khayo litigo nya tshukwana lomo vbafuvbi. (Ndz 37:10, 11; Gut 21:3-5) Tshukwadzisa mathumelo yago gasi u kodza gu tshaledwa khu tepo nya gu patege avbo nya lidima leli. Wa gu vbweta gu thuma kha nga piyonero nyo phasedzeye avba nya ngima wowu u nga hatha gu ningeya 30 mwedro 50 dzi ora.

Dzi dongiseye gu yeyedza lowo wu ganeyago khu mafu nya maphya ni ga wevbini muthu si kodzegago. Tepo u dongiseyago lowo nya Bhibhiliya dundrugeya khedzi wu nga kuhago khidzo vathu va gipandreni gwago. A gu tshuka muthu nyo khaguri a yeyedza gu tsakeya avba nya mabhulo nyo pheye mu ninge Mukhedziseyi nya vathu vatshavbo nya N° 2 nya 2021. Khu kharato, nya mba hweya zama gu pheya gihevbulo nya Bhibhiliya khu gu thumisa broxura Vbanya kala gupindruga!. Khandri gu tsakisa gwaso gu patega avba nyo tivise “Mahungu nya yadi nya maphya”. — Isa 52:7.

YEYEDZA VHIDHIYU NYA NDZIMO NYO HATHEGE MAFU NYA MAPHYA MA TAGO, KHU GU LANDREYA GIRA SIWUDZISO SESI:

• Khu wevbini wumindru nyo tsakise wu dundrugedwago khu gyagadzyana gya avba nya vhidhiyu?

• Silo muni u si vireyago mafuni nya maphya?

• Gu dundrugeya khu wumindru nya wadi hi na manegago nawo si nga hi phasa kharini gu dzidongiseya gasi hi patega avba nya lidima li na girwago khu Novembro. — Lu 6:45