Gu khathala khu vambe gu ngu resa mihandro yi dzegago tepo nyo laphe

Papayi wangu a diri khongolo avba nya Igreja Unida ya Canadá. Dzidhomingu dzatshavbo a di gu dzega eni ni ndriyangu gasi hi hongola tshetsheni ha mana sihevbudzo nya sanana, khu dzi 11 ora hi di gu hongola ha khongeya. Ni siyambo hi di gu hongola Salawuni nya Mufumu ni mamayi. Si di gu hi vbevbugeya gu wona gu hambana nya dzitshetshe dzedzi dza dzimbili.

Mamayi a di bhuleya esi a si hevbudego Bob ni Marion Hutcheson, dzi nga ba dziri dzipari dzaye, nigu idzo dzi dzumede lisine. Khu 1958, Hutcheson ni mwangadzi waye va di nyi dzega gasi gu hongola Asembleya Internacional da Vontade Divina, yi nga ba yi vbedza 8 matshigu dhoropani ga Nova York. Olu nyi ngu dziti gu kheni kha sa va vbevbugeya gu nyi dzega gasi nyi hongola navo. Ganiolu, asembleya yeyi yi kuhide ngudzu womi wangu.

VANDRIYANGU VA NYI PHASIDE GU GIRA NYA SINGI THUMONI GA JEHOVHA

Tepo nyi nga ba nyiri muphya, hi di gu khala ga wulanga gu nga ba gu fuywa sirengo. Nyi di hunga gu hevbula gasi gu khathaleya sirengo. Mamayi wangu a di bhuleya silo sesi lidhota nyo khaguri libandlani. Khu gwadi, li di nyi dundrugisa gu khilo ha gu vbanya “matshigoni nya guhegise,” li bwe li nyi dundrugisa gu khilo myaga nyi na vbedzago Univhersidhadhe, yi na kuha wupari wangu ni Jehovha. (2 Thim. 3:1) Khu kharato, nyi di hunga gu mba hongola Univhersidhadhe.

Nyi di gu dzi wudzisa gu kheni ginani nyi na girago hwane nyo ba nyi vbedzide gu hevbula. Ambari olu nyi nga ba nyi patega thumoni nyo tshumayele dzisemana dzatshavbo, eni kha nya nga ba nyi tsaka khu thumo wowu nigu gima kha nya nga ma nyi pimisa gu khala piyoneru. Papayi wangu a nga ba siri Fakazi ni tiyu wangu, tepo yatshavbo va di gu nyi kutsa gu gira thumo nya lisima ngudzu avba nya empreza nyo khaguri nya dziseguru, Toronto. Tiyu wangu a diri ni gikhalo nya lisima iyoyo, khu kharato eni nyi di dzumeya thumo.

Toronto, nyi di gu vbedza tepo nya yingi na nyi gu thuma ni gu vbungadza ni vathu va gu mba khodwa ga Nungungulu, nigu isoso si nyi giride nyi si hongoli mitshanganoni ni thumoni nyo tshumayele tepo yatshavbo. Eni nyi di gu vbanya ni vhovho wangu a gu siri Fakazi, ganiolu hwane nya gu ba a fude nyi di yede gu vbwetedzeya gumbe wulanga gasi gu khala.

Ndranga ya Hutcheson, yi nga nyi dzega gasi gu hongola Asembleya khu 1958, va di khala valongo vangu. Avo va di nyi rana gasi guya khala gaya gwawe, va bwe va nyi phasa gu dandra khu liphuvboni. Khu 1960, nyi di bhabhatiswa gumogo ni gyanana gyawe John. John a di pheya gu thuma kha nga piyoneru, a bwe a nyi kutsa gu gira nya singi thumoni nyo tshumayele. Vandriyathu libandlani, va di wona gu khavo nyi di gu vidzidwe khu liphuvboni. Khu kharato, nyi di pheya gu thuma kha nga Muwoneleyi nya tshangano nya Thumo ni mavbanyelo nya wuKristo.

NYI DI MANA PARI NYA YADI NYI BWE NYI KHALA PIYONERU

Khu 1966, nyi di tshadha ni Randi Berge, a gu piyonera nya sighingi. Uye a di gu vbweta gu phasedzeya omu gu nga ba gu vbwetega giphaso. Muwoneleyi wathu nya sirkwitu a di hi kutsa guya phasedzeya libandla la Orillia, Ontário. Khu kharato, hi di donga dzimala dzathu hi hongola iyoyo.

Tepo hi nga vboha Orillia, nyi di thuma ni Randi kha nga piyoneru nya tepo yatshavbo. Eni nyi di gu tsakide ngudzu khu gu gira thumo wowu nga uye. Tepo nyi nga pheya gu thuma khu sighingi nga piyoneru, nyi di tsaka khu gu thumisa Bhibhiliya ni gu wona vathu na va gu pwisisa lisine. Nyi tsakide ngudzu khu gu phasa patwa nyo khaguri, Orillia, gu gira guvbindrugedza nyo khaguri womini gwawe, wu bwe wu khala Dzifakazi dza Jehovha.

HI DI HEVBULA LIDIMI NYA LIPHYA HI BWE HI VBINDRUGEDZA MAPIMISELO YATHU

Tepo nyi nga hongola Toronto, nyi diti ndriyathu moyo nyo pwani khu Arnold MacNamara, a nga ba ari moyo nya vandriyathu a nga ba va thangeya Bheteli. Uye a di hi wudzisa gu khuye hi ngu dzina gani gu thuma kha nga vapiyoneru nyo hathege. Nyi di mu embeya gu kheni: “Nyi ngu dzina, ganiolu kha nyi dzini gu hongola Quebeque.” Vavbanyi nyo khaguri va Canadá va ganeyago Gingiza va di nyi embede silo nyo vivbe maningano khu litigo la Quebeque. Ga tepo yile, vathu va di gu wugeya dzipfhumu khu kotani nya olu dzi nga hunga gu khidzo litigo la Quebeque kha li na nga fumedwa khu muthu.

Arnold a di nyi embeya gu khuye: “Quebeque khumo basi bheteli yi rumeyago vathu gasi guya thuma eyi ga tepo yile.” Eni nyi di dzegeya gu dzumeya, kholu Randi a di gu dzina ngudzu guya thuma Quebeque. Khu gu landreya, nyi di tugula gu kheni hi di hungide makungu nya yadi womini wathu watshavbo.

Hwane nya gu ba hi hevbude lidimi la França khu 5 dzisemana, eni ni Randi gumogo ni wumbe patwa, hi di hongola Rimouski gu gu ni tanga nya 550 dzikilometru kala Nordeste ya Montreal. Hi diri ni silo nya singi gasi gu hevbula. Nigu isoso nyi si tugude tepo nyi nga leri sitiviso umo nya tshangano nyo khaguri. Nyi di ganeya gu kheni, avba nya Kongresu yi landreyago dzi na manega “vadheleghadhu nya dzingi ngudzu dza Avestruz” wulangani nya “vadheleghadhu dzitago khu Austríacos.”

Rimouski, hi diri ni 4 vandriyathu nya vanyamayi va nga mba tshadha, gumogo ni Huberdeau, mwangadzi waye ni sanana saye sa sivili. Patwa wowu, wu di alugari nyumba nya yikhongolo ngudzu, nigu vatshavbo vapiyoneru va nga ba va khala vbale va di gu phasedzeya gu livba ndranga yile. Hi di gu yi rana gu khethu nyumba nya guage, kholu iyo yi di pitaridwe khu kori nya guage. Hatshavbo hi nga ba hi vbanya vbale hi diri 12 mwendro 14. Kha nga olu hi nga ba hiri vapiyoneru nyo hathage, eni ni Randi hi di gu tshumayela dzimindrudzile, siyambotuno ni wutshigutuno. Khu kharato, hi di gu bonga ngudzu ha gu mana muthu nyo duge naye thumo nyo tshumayele ambari vbawutshigutuno.

Hi diri ni wupari nyo tiye ni vapiyoneru vale nyo tumbege nyo bwe gu gira gu khatshi hi valongo. Dzimbe dzitepo, hi di gu khala hatshavbo hi wora nilo mwendro gu phula gumogo. Ndriyathu moyo a diri muembeleyi na si khale Fakazi, khu kharato Dzisabhadhu dzatshavbo ni wutshigu hi di gu embeleya ni gu hana.

Vathu nya vangi Rimouski va di gu vbweta gu hevbula nya singi khu Bhibhiliya. Ndrani nya 5 myaga hi tsakide ngudzu khu gu wona sihevbuli nya Bhibhiliya na si bhabhatiswa. Khu kharato, Libandla li di dandra li manega ni 35 vahuweleyi.

Quebeque, hi hakhide trenamentu gasi gu khala vatshumayele nya vadi. Hi wonide edzi Jehovha a hi phasidego khidzo thumoni nyo tshumayele ni gu hi ninga esi hi nga ba hi si vbweta khu nyamani. Gu diga isoso, hi hevbulede gu gola vathu vale va nga ba va ganeya Gifrança, lidimi lawe ni mavbanyelo yawe. Nigu isoso, si hi phaside gu gola vambe va nga ba vari ni mavbanyelo nyo hambane ni yathu. — 2 Kor. 6:13.

Nya mba si vireya, bheteli yi di hi lomba gasi gu hongola dhoropani ga Tracadie, khugadambo ga New Brunswick. Esi si giride gu khatshi si di hadzi gu vanga sigaradzo, kholu hi di gu giride kontratu ni muthangeyi nya xikola gasi gu alugari nyumba hi nga ba hi khala avbo. Nigu gambe sihevbuli nyo khaguri, si di ngari gu khala vahuweleyi nigu hi di gu vbaha Salawu nya Mufumu.

Guvbeyani nya semana, ethu tepo yatshavbo hi di gombeya khu gu vbindrugedza gogu, khavbovbo hi diya wuseya Tracadie gu nga ba gu hambanide ngudzu ni Rimouski. Ganiolu, hi di hunga gu khethu kha nga olu Jehovha a vbwetago gu khuye hi hongola eyi, ethu hi yede gu hongola. Ethu hi di hunga gu linga Jehovha, nigu hi wonide edzi a nga ba a dusa khidzo sigaradzo womini gwathu. (Mal. 3:10) Khu kotani nya olu Randi a nga ba ari ni wupari nyo tiye ni Jehovha, sighingi ni gu khaleya gu tsaka, si hi vbevbugede gu dzi pwananisa ni guvbindrugedza gogu.

Umo nya libandla nya liphya, oyu a nga ba ari lidhota basi khu ndriyathu Robert Ross. Uye a di gu thumide kha nga piyoneru ni mwangadzi waye, nigu avo va di hunga gu khala tigoni mule hwane nya gu ba va velegide gyanana gyawe nyo pheye. Ambari olu va nga ba va sayisa gyanana gyawe, avo va hi tiyiside kholu va hi hakhide gwadi, nigu va di gu tshumayela khu sighingi.

HI MANIDE LITSAKO KHU GU THUMA NI GWEVBINI GU NGA BA GU VBWETEGA GIPHASO

Hwane nya gu ba hi thumide Tracadie khu myaga mivili kha nga vapiyoneru, hi di ningwa wumbe thumo nya gu endreye mabandla. Hi thumide khu 7 myaga omu nya sipandre vathu va nga ba va ganeya Gingiza, khavbovbo hi ya thuma Quebeque omu nya sipandre gu nga ba gu ganedwa Gifrança. Muwoneleyi wathu nya dhistritu, a diri Léonce Crépeault nigu a di gu gola gu nyi zundza khu dziganelo nyi vegago. Ganiolu, tepo yatshavbo a di gu nyi wudzisa gu khuye: “Dziganelo dzago dzi nga engedzeya gu hi phasa kharini?”a Malito yaya, ma nyi phaside gu vega gupima avba nya edzi nyi nga tshukwadzisago khidzo mahevbudzelo yangu.

Thumo nya gu tsakise nya gu gima kha nyi na nga wu divala, khuwo nyi nga gira khu 1978 avbo nya Kongresu nyo hathege, Montreal wu nga ba wuri ni hungo nya mahungu wu gu khuwo: “Fé Vitoriosa.” Nyi di gu romo avba nya tsawa nya gu dongiseye guhodza. Hi di gu vireya gu khathaleya 80.000 vathu, nigu gu di giridwe malulamiselo nya maphya. Satshavbo si diri siphya: mitshini, guhodza ni edzi gu nga hadzi gu dongisedwa khidzo. Hi diri ni 20 dzikongeladhori dzi nga ba dzi si thumi gwadi dzimbe dzitepo. Na li si vbohi litshigu nyo pheye nya Kongresu, si di gu hi garadzeya gu beya ndrani nya estadhiyu gasi gu dongiseya wulanga wule, kholu yi di romo jogu. Hi di yede gu vireya kala vbakari nya wutshigu gasi gu gira isoso. Na gu si gugi, hi di yede gu ligari dzifornu gasi gu gira gilo nyo hodze. Hi di gu garade ngudzu, ganiolu nyi hevbude gu gira thumo khu sighingi, nyi khala muthu nya guti nyi bwe nyi tsaka khu gu thuma ni vambe vandriyathu. Kala muhuno hi ngari dzipari nya dzadi. Nyi tsakide ngudzu gu wona Kongresu Quebeque, a gu litigo vandriyathu va nga ba va wugedwa khu myaga nya 1940 ni 1950.

Nyi hevbude nya singi ni vambe vawoneleyi nya sirkwitu, avba nya kongresu yeyi yi giregidego Montreal. Ga mwaga nyo khaguri, David splane, olu a girago gipandre nya Huwo nya Guthangeye, a diri muthangeyi nya kongresu. Khu gu landreya, tepo nyi nga lombwa gasi gu khathaleya thumo wowu, David a phasedzede ngudzu.

Khu 2011, hwane nya gu ba hi thumide kha nga vawoneleyi nya sirkwitu khu 36 myaga, nyi di ranwa gasi gu khala muhevbudzi avba nya xikola nya madhota. Khu myaga mivili basi, eni ni Randi hi lade avba nya 75 dzikama nyo hambane, ganiolu kha hi dzi laye khesi hi hungidego gu gira. Guvbeyani nya dzisemana dzatshavbo, madhota ma di gu bonga ngudzu khu gu wona gu khayo Huwo nya Guthangeye yi ngu ninga lisima wupari wawo ni Jehovha.

Khu gu gimbiya nya tepo nyi khade muhevbudzi avba nya Xikola nya vavhangeli nya Mufumo. Sihevbuli dzitepo nya dzingi, si di gu garade ni gu garadzega kholu si di gu pharegide ngudzu. Si di yede gu hevbula tanga nya 7 dziora khu litshigu, ni gu wusedza tanga nya 3 dziora vbawutshigutuno ni gu dwanisana gambe ni 4 mwendro 5 mithumo va ningidwego khu vahevbudzi, khu semana. Eni gumogo ni mumbe muhevbudzi hi di va tshamuseya gu khethu gasi va si kodza gu gira esi va yede gu lomba giphaso Jehovha. Eni gima kha nyi na nga divala edzi sihevbuli si samadego khidzo, tepo si nga wona gu khiso si si kodzide gu gira satshavbo khu gu phaswa khu Jehovha.

GU KHATHALA KHU VAMBE GU NGU RESA MIHANDRO YI DZEGAGO TEPO NYO LAPHE

Khu kotani nya olu mamayi wangu a nga ba khathala khu vambe, si phaside sihevbuli saye nya Bhibhiliya gu dandra khu liphuvboni, nigu si phaside papayi gu dzumeya lisine. Hwane nya matshigu mararu mamayi na fude, papayi a di hongola Salawu nya Mufumo a engiseya ganelo, a bwe a simama gu hongola mitshanganoni khu tanga nya 26 myaga. Ambari olu papayi a nga mba bhabhatiswa, madhota ma di nyi embeya gu khayo a di gu pheya khuye gu vboha mitshanganoni yatshavbo.

Mamayi a tshiyede giyeyedzo nya gyadi eni ni vandriyangu. Vandriyangu va vararu ni vama vawe va gu thumeya Jehovha khu gu tumbega. Vavili va gu thuma bheteli ya Portugal, mumbe ya Haiti.

Olu, eni ni Randi ha gu thuma kha nga vapiyoneru nyo hathege Hamilton (Ontário). Tepo hi nga ba hi thuma kha nga vawoneleyi nya sirkwitu, hi di gu gola gu duga ni vambe ha gira dzirevhisita ni gu gimbidzisa sihevbulo nya Bhibhiliya. Ganiolu, olu hi ngu tsaka ngudzu khu gu wona sihevbuli sathu na si gu dandra khu liphuvboni. Nigu, kha nga olu hi gu na ni wupari ni vandriyathu va libandlani gwathu nya liphya, hi ngu dzipwa na hi gu tiyiswa khedzi Jehovha ava phasago khidzo dziteponi nya dzadi ni edzi nya mba dzadi.

Ha gu khedza hwane, hi ngu bonga ngudzu khedzi vandriyathu va nga hi khathaleya khidzo. Ha gu zama gu yeyedza gu khethu hi ngu “garadzega” khu vambe, khu gu va tiyisa ni gu va kutsa gu thumeya Jehovha khu ndziya va yi kodzago khiyo. (2 Kor. 7:6, 7) Khu giyeyedzo, avba nya ndranga nyo khaguri mamayi ni sanana saye va di gu thuma kha nga vapiyoneru nya tepo yatshavbo. Nyi di wudzisa mwama wakone gu kheni: U di nga pimisa gu khala piyoneru? Uye a di nyi embeya gu khuye a di gu seketeya vapiyoneru vararu. Khavbovbo nyi mu wudzisa gu kheni: “Ina u nga va seketeya gwadi guvbindra Jehovha?” Nyi di mu kutsa gu linga esi vandrangani gwaye va sipwago khu gu gira thumo wowu. Hwane nya 6 migima, uye a di khala piyoneru.

Eni ni Randi hi na simama gu embeya “melego . . . wu nga gutago” maningano ni “silewugiso” sa Jehovha. Nigu ho vireya gu khethu va tsaka khu gu thumeya Jehovha nga ethu. — Ndzi. 71:17, 18.