Mawonelo nya gihevbulo
Zama gu vegisa hungoni dzindzimo dzathu
Lorraine wa Estados Unidos da América wari, khuye: “Matshigu nyi dzipwago na nyi vbede tshivba, Jehovha a ngu nyi tiyisa khu gu thumisa dzindzimo dzi gomogo umo nya JW Broadcasting.”
Tepo yatshavbo, Makristo ma gu embeleya gasi gu dhumisa Nungungulu. (Kol. 3:16) Wa gu vegisa dzindzimo hungoni, idzo dzi na gu phasa ambari na wu mwalo ndzimo yakone vbafuvbi, khumo nya telefoni mwendro nyo gandlwe. Zama gu gira esi si landreyago gasi si gu phasa gu vegisa dzindzimo hungoni.
Leri gwadi malito yakone gasi u pwisisa tshamuselo wakone. Si na gu vbevbugeya gu dundruga mahungu nyo khaguri wa gu pwisisa gwadi tshamuselo wakone. Dziletra nya dzindzimo dzathu gupata ni dzimuzika ni dzindzimo nya sanana, dzomo omu nya jw.org. Avbo nya gipandre Bhiblioteka, gimbiya avbo va nga pwani Muzika.
Lova ndzimo yoyo avbo nya lidangaliya. Isoso si na gu phasa ngudzu gu dzi dundruga. — Dhet. 17:18.
Embeleya khu lito nyo khugege. Leri mwendro gu embeleya ndzimo nyo khaguri khu gu phindra-phindra.
Wona gu khuwe u ngu yi dundruga. Zama gu embeleya nya mba khedza avba nya ndzimo, u bwe u wona gu khuwe u si kodzide gani.