Ginani hi gitigo maningano khedzi Jehovha a na lamulago khidzo vathu mindru wa tshigu?

1. Khu ginani hi ganeyago gu khethu ha gu vbanya dziteponi nya gu hlamadzisi?

HO VBANYA matshigoni nyo hlamadzisi. Tshigu ni tshigu hi ngu wona siprofeto nya Bhibhiliya na si gu tadzisega. Khu giyeyedzo, hi ngu wona “pfhumu ya norte” ni “pfhumu ya sul” na dzi gu dwana gasi gu fuma litigo. (Dhan. 11:40) Hi ngu wona mahungu maningano khu Mufumo wa Nungungulu na ma gu tshumayedwa mafuni gwatshavbo nigu dzimiliyoni nya vathu va ngu hatha gu thumeya Jehovha. (Isa. 60:22; Mat. 24:14) Nigu gambe, hi ngu hakha guhodza nya gungi ga liphuvboni “khu tepo yakona.” — Mat. 24:45-47.

2. Hi nga tiyisega khu ginani, ganiolu ginani hi yedego gu giti?

² Jehovha a nga gu simama gu hi phasa gu pwisisa sigiro si nga gutago. (Mav. 4:18; Dhan. 2:28) Hi nga tiyisega gu khethu tepo khiyo yi na pheyago tshanisa nya yikhongolo, hi nati satshavbo si vbwetegago gasi gu timiseya khu gutumbega hi bwe hi dugeleya ga tepo yoyo nyo garadze. Ambari ulolo, hi yede gu dziti gu khethu khandri satshavbo hi sitigo maningano khu wumindru. Ga ndrima yeyi, hi na pheya khu gu wona gu khethu, khu ginani hi wusedzago silo nyo khaguri hi ganedego khiso maningano khu sigiro sesi. Khu gu landreya, hi na ganeya khu silo nyo khaguri hi sitigo maningano khu wumindru ni esi Papayi wathu wa ndzadzini a na girago.

ESI HI GU MBA SITI

3. Ginani hi pimisago maningano khu vathu va nga hadzi gu mba mana lithomo nya gu vbulugiswe khu Jehovha nigu khu ginani hi pimisago isoso?

³ Gale, hi di gu ganeya gu khethu tepo yi na pheyago tshanisa nya yikhongolo vathu kha va na nga mana gambe lithomo nya gu khodwe ga Jehovha ni gu vbuluga Arimagedhoni. Ethu ha gu ganeya isoso kholu hi di gu pwisisa gu khethu matimo ma ganeyago khu ndrambi ya Nowa ma diri giprofeto. Khu giyeyedzo, hi di gu pimisa gu khethu kha nga olu Jehovha a nga sega malimba nya litaro na yi nga si pheyi ndrambi, khu ndziya yayimweyo a na “sega malimba” nya litigo leli la Sathane gasi gu himbedzeya vathu nya vangi gu vbulugiswa. — Mat. 24:37-39.

4. Khu ginani hi gu mba yela gu ganeya gu khethu matimo ma ganeyago khu ndrambi ya Nowa giprofeto? Tshamuseya.

⁴ Ina hi yede gu wona matimo nya ndrambi ya Nowa nga giprofeto? Ahihi. Khu ginani? Kholu Bhibhiliya kha yi ganeyi khu gu kongoma khu isoso.a Lisine gu Jesu fananiside ‘matshigu ya Nowa’ ni tepo a na wuyago khiyo, ganiolu uye kha ganeya gu khuye satshavbo si nga girega matshigoni ya Nowa si na ni mitshamuselo nyo khaguri, nya nga tepo yile Jehovha a nga sega lidimba nya litaru. Ganiolu, isoso kha si thuli gu khiso kha hi hevbuli gilo khu matimo ya Nowa ni ndrambi.

5. a) Ginani a giridego Nowa na yi nga si vbohi ndrambi? (Vahebheru 11:7; 1 Pedro 3:20) b) Khu gwevbini gupwanana gu gomogo avbo nya thumo nyo tshumayele matshigoni yathu ni matshigoni ya Nowa?

⁵ Tepo khiyo Nowa a ngapwa mahungu ya Jehovha a yeyedzide gukhuye a na ni gukhodwa, khu gu vbaha litaru. (Leri Vahebheru 11:7; 1 Pedro 3:20.) Khu ndziya nyo fane, tepo khiyo vathu vapwago mahungu nya yadi nya Mufumo wa Nungungulu va yede gu vbanya guya khesi va sipwago. (Mith. 3:17-20) Pedro ranide Nowa gu khuye, “mutshumayeli nyo lulame.” (2 Ped. 2:5) Khu kharato, kha nga hi ganedego ga ndrima yi vbindridego kha hi dziti gu khethu Nowa tshumayede vatshavbo va nga ba va vbanya mafuni na yi si gu vbohi ndrambi. Khu ndziya nyo fane, muhuno hi ngu gira satshavbo hi si kodzago gasi gu tshumayela vathu mafuni gwatshavbo. Ambari ulolo, ambari ha gu gira satshavbo hi si kodzago gasi gu tshumayela vathu vatshavbo mafuni, kha hi na nga si kodza gu va enedza na ma nga si vbohi mahegiso. Khu ginani hi ganeyago isoso?

6-7. Khu ginani hi ganeyago gu khethu kha hi na nga si kodza gu bhuleya mahungu nya yadi vathu vatshavbo omu mafuni na ma si gu vbohi mahegiso? Tshamuseya.

⁶ Wona esi Jesu a ganedego maningano khu thumo wathu nyo tshumayele. Uye ganede gu khuye mahungu nya yadi ma di hadzi tshumayedwa “mafuni gwatshavbo, gasi ma khala wufakazi ga mayigo yatshavbo.” (Mat. 24:14) Giprofeto gegi gi ngu tadzisega gwadi muhuno wa tshigu. Mahungu nya Mufumo ma ngu tshumayedwa gu vbindra 1000 malimi nigu vathu nya vangi va ngu hevbula mahungu nya yadi nya Mufumo omu nya jw.org.

⁷ Ambari ulolo, Jesu embede gambe vapizane vaye gu khuye kha va na nga “dzuluwugeya yatshavbo madhoropa” mwendro gu tshumayela vathu vatshavbo na ma si gu vbohi mahegiso. (Mat. 10:23; 25:31-33) Malito ya Jesu ma na khala nya lisine gwathu muhuno. Vathu nya vangi muhuno va gu vbanya ga malanga thumo wathu nyo tshumayele wu himbedzedwago. Gu diga isoso, tepo yatshavbo gwa gu velegwa sanana. Ha gu gira satshavbo gasi gu bhuleya mahungu nya yadi vathu nya ‘mayigo yatshavbo, mahundzu ni malimi.’ (Gutu. 14:6) Lisine gu kha hi na nga si kodza gu bhuleya mahungu nya yadi vathu vatshavbo omu mafuni na ma si gu vbohi mahegiso.

8. Giwudziso muni gi khugago maningano khedzi Jehovha a na lamulago khidzo vathu mindru wa tshigu? (Wona dzifotu.)

⁸ Maningano khesi hi bhudego khiso hi nga dzi wudzisa gu khethu: Jehovha ni Gyanana gyaye, a gi ningidego thumo nya gu lamule, va na phara kharini vale va na ba va si mani lithomo nya gupwe mahungu nya yadi, na yi nga si pheyi tshanisa nya yikhongolo? (Joh. 5:19, 22, 27; Mith. 17:31) Hungo nya mahungu nya ndrima yeyi wo ganeya gu khuwo, Jehovha “kha vbweti gu khuye ne ni moyo a fuviswa.” Wulangani nya isoso, o vbweta gu khuye “vatshavbo va dzi laya.” (2 Ped. 3:9; 1 Thim. 2:4) Ambari olu, hi tigo silo sesi khu Jehovha, uye kha hi embeya edzi a na lamulago khidzo ava va nga mba mana lithomo nya gupwe mahungu nya yadi. Khu lisine, uye kha gurumedzegi gu hi embeya esi a na girago.

9. Ginani egi Jehovha a hi embedego gi gomogo omu nya Bhibhiliya?

⁹ Omu nya Lito laye, Jehovha a hi embede silo nyo khaguri a na girago. Khu giyeyedzo, Bhibhiliya ya gu hi embeya gu khiyo Jehovha a na wusa vathu va vbanya gambe, “ava nya mba lulama” va nga mba mana lithomo nya gupwe mahungu nya yadi va bwe va vbindrugedza. (Mith. 24:15; Luka 23:42, 43) Ganiolu, mahungu yaya ma ngu wusa siwudziso nya singi ngudzu.

10. Khu gevbini gimbe giwudziso hi nga dzi girago?

¹⁰ Vatshavbo va nga mba mana lithomo nya gupwe mahungu nya yadi va na fago ndrani nya tshanisa nya yikhongolo, ina kha va na nga wuswa va vbanya gambe? Milowo ya gu ganeya gu khiyo, vatshavbo vawugeyi va Jehovha ni mabuthu yawe va na songwago ndrani nya Arimagedhoni kha va na nga wuga va vbanya gambe. (2 Tes. 1:6-10) Ganiolu, ahati vambe vathu, khu giyeyedzo vale va ngafa ndrani nya tshanisa nya yikhongolo khu kotani nya madwali, gu gumba, gu giregedwa khu mhango nyo khaguri mwendro gu songwa khu mumbe muthu? (Muh. 9:11; Zak. 14:13) Ina vathu nyo khaguri va girago gipandre nya vathu vovo va na gira gipandre nya “ava nya mba lulama” va na wuswago va vbanya mafuni nya maphya? Gasi gu ganeya lisine kha hi siti.

ESI HI SITIGO

11. Vathu va na lamudwa ndrani nya nyimbi nya Arimagedhoni guya khu ginani?

¹¹ Hi nguti silo nya singi si na giregago mindru wa tshigu. Khu giyeyedzo, hi ngu dziti gu khethu ndrani nya Arimagedhoni, vathu va na lamudwa khu ndziya va nga phara khiyo vandriye va Kristo. (Mat. 25:40) Vale va na lamudwago kha nga dzinvuta va na ba va yeyedzide gu khavo va ngu seketeya ava va todzidwego ni Kristo. Nigu hi ngu dziti gambe gu khethu vandriye va Kristo a gu ava va todzidwego va na ba va nga gu romo mafuni tepo khiyo yi na pheyago tshanisa nya yikhongolo nigu va na hongola ndzadzini na yi nga si pheyi nyimbi nya Arimagedhoni. Vandriye va Kristo na va nga gu romo mafuni, adzina saye va na dugeleya vathu nya vangi va na vbwetago gu va phasa ni gu va seketeya ga thumo va na gu ba va gira. (Mat. 25:31, 32; Gutu. 12:17) Khu ginani lisine leli li gu na ni lisima?

12-13. Ginani egi vathu nyo khaguri va na girago hwane nya gu ba va wonide gufuviswa ga “Bhabhiloni nya Khongolo”? (Wona dzifotu.)

¹² Ambari hwane nya gu ba yi phede tshanisa nya yikhongolo, si nga gira gu vathu nyo khaguri va wona gufuviswa nya “Bhabhiloni nya Khongolo” va bwe va dundruga gu khavo Dzifakazi dza Jehovha dzi di gu ganeya khu myaga nya yingi gu khidzo, silo sesi si na girega. Vathu nyo khaguri va na wonago silo sesi, ina va na vbindrugedza mawonelo yawe? — Gutu. 17:5; Ezek. 33:33.

¹³ Sa gu girega isoso, si na fana ni esi si giregidego Egipto dziteponi dza Mosi. Dundruga gu khuwe, vathu nya vangi va di dzi pata ni Vaisrayeli tepo va nga duga khu Egipto. Adzina saye vathu vovo va phede gu haguleya gukhodwa tepo va nga wona gu khavo esi Mosi a nga ba a ganeya khu 10 mitungu si di gu tadzisega. (Ekiso. 12:38) Sa gu girega silo nya nga esi hwane nya gu ba gu fuvisidwe Bhabhiloni nya Khongolo, ina hi na zangari khu gu ba vathu nyo khaguri va patanide ni ethu na ma si gu vbohi mahegiso? Ahihi. Ha gu vbweta gu fana ni Papayi wathu wa ndzadzini a gu na ni “wuhindzi ni pwela wusiwana, a hwelago gu goroga, a tadego khu wuwadi ni gutumbega.”b— Ekiso. 34:6.

14-15. Ina muthu nyo khaguri a gu mana lithomo nya gu vbanye kala gupindruga tepo khiyo a fago mwendro guya khu wulanga a vbanyago avbo? Tshamuseya. (Ndzimo 33:4, 5)

¹⁴ Vandriyathu nyo khaguri va gu na ni nongo a gu mba thumeya Jehovha, adzina va nga ganeya gu khavo, “i tshukwana afa olu na yi nga si pheyi tshanisa nya yikhongolo kholu si na kodzega gu a ta wuswa a vbanya gambe.” Khu lisine, avo va gu ganeya silo soso khu gighelo nya gyadi. Ganiolu, muthu khandri a gu mana womi nya mba vbeya tepo khiyo a fago. Jehovha mulamuli nyo vbeleye, esi a hungago tepo yatshavbo si lulamide. (Leri Ndzimo 33:4, 5.) Hi nga tiyisega gu khethu mulamuli nya mafu yatshavbo a na gira esi nya sadi. — Gen. 18:25.

¹⁵ Nigu gambe, muthu kha mani lithomo nya gu vbanye kala gupindruga khu gu ba a vbanya ga wulanga nyo khaguri. Jehovha gima kha na nga lamula dzimiliyoni nya vathu kha nga “dziphongo” khu gu ba va vbanya ga wulanga va nga mba manega ni lithomo nya gu engiseye mahungu nya Mufumo. (Mat. 25:46) Mulamuli nya litigo latshavbo a ngu garadzega ngudzu khu vathu va vbanyago ga malanga yoyo. Ethu kha hi dziti edzi Jehovha a na girago khidzo silo ndrani nya tshanisa nya yikhongolo, adzina saye esi va na si wonago ndrani nya tshanisa nya yikhongolo si na va gira va khodwa ga Jehovha, a gu tepo a na tivisago lina laye mafuni gwatshavbo. — Ezek. 38:16.

16. Ginani hi gitigo maningano khu Jehovha? (Wona fotu.)

¹⁶ Gihevbulo gyathu nya Bhibhiliya gi ngu hi phasa gu wona gu khethu Jehovha a ngu ninga ngudzu lisima womi nya vathu. Uye a di ningeya womi wa Gyanana gyaye gasi hatshavbo hi mana lithomo nya gu mane womi nya gupindruge. (Joh. 3:16) Hatshavbo hi ngu wona edzi Jehovha a hi khathaleyago khidzo. (Isa. 49:15) Uye a nguti moyo ni moyo wathu khu lina. A ngu hiti gwadi nigu ambari ha gufa uye a nga hi wusa na hiri ni makhalelo ni mapimo hi nga ba hiri nawo. (Mat. 10:29-31) Khu lisine, hi na ni sighelo nya sadi gasi gu tumba gu khethu Papayi wathu nya lihaladzo wa ndzadzini a na lamula vathu khu ndziya nyo vbeleye, nyo lulame ni wuhindzi. — Jak. 2:13.

17. Ginani hi na bhulago khigyo ga ndrima yi landreyago?

¹⁷ Khu lisine, gu vbindrugedza nya mapwisiselo yaya ma ngu gira gu thumo wathu nyo tshumayele wu khala nya givbiredza. Khu ginani hi ganeyago isoso? Nigu ginani gi hi kutsago gu tshumayela mahungu nya yadi khu sighingi? Hi na bhula khu mihlamulo nya siwudziso sesi ga ndrima yi landreyago.