“Nyi diri mwalo nyonga”

GIYEYEDZO GYA VAVELEGI VANGU

Papayi ni Mamayi va di gu khozeya ga tshetshe nya Katolika. Ganiolu, tepo va nga hevbula omu nya Bhibhiliya gu khavo lina la Nungungulu khu Jehovha, avo va di khala Dzifakazi dza Jehovha nyo vbisege. Papayi a di ema gu vata sifananiso sa Jesu. Vbavbandze nya isoso, uye a di thumisa makodzelo yaye nya wukarpinteru gasi gu vbindrugedza andhari ya vbavbatshi nya nyumba yathu yi khala Salawu nya Mufumo nyo pheye ya San Juan del Monte, vbafuvbi ni Manila, kapitali ya Filipinas.

Hwane nya gu ba nyi velegidwe khu 1952, vavelegi vangu va di pheya gu nyi hevbudza Bhibhiliya gu fana ni edzi va nga ba va hevbudza khidzo 4 vandriyangu nya vama ni 3 vandriyangu nya vanyamayi. Tepo nyi ga ba nyi dandra, papayi wangu a di gu nyi kutsa gu leri gipimo gimwegyo nya Bhibhiliya matshigu yatshavbo, nigu hevbude ni eni mabhuku nya gu hambane-hambane nya hengeledzano. Dzimbe dzitepo, vavelegi vangu va di gu kovhidhari va woneleye nya sirkwitu ni va emeyi nya Bheteli gasi vata gaya gwathu. Hatshavbo, hi di gu tsaka khu gu tiyiswa hi nga gu mana khu kotani nya dziexperiensiya dza vandriyathu vava, nigu si hi kutside gu thangisa dzitepo dzatshavbo thumo nyo tshumayele womini gwathu.

Nyi hevbude silo nya singi khu giyeyedzo gya papayi wangu, kholu uye a diri ni gukhodwa nyo tiye ga Jehovha. Khu 1971, hwane nya gu ba mamayi wangu a fude khu kotani nya madwali, eni ni papayi wangu hi di pheya gu thuma kha nga vapiyonero. Ganiolu, khu 1973, tepo nyi nga ba nyiri ni 20 myaga, papayi wangu a difa. Gu luza vavelegi vangu si nyi giride nyi dzipwa nyonga. Ganiolu, gitumbiso egi gi fanago ni “girikiso nya womi wathu” gi nyi phaside gu simama na nyi dzipwa gwadi, nigu gi nyi phaside gu simama na nyi tiyide khu liphuvboni. (Hebh. 6:19) Na gu nga si vbindri tepo nya yingi papayi wangu na fude, nyi di dzumeya guya thuma kha nga piyonero nyo hathege gidwani gya Coron, provhinsya ya Palawan.

MITHUMO NYI NGA GIRA NA NYI ROMO NYONGA

Nyi diri ni 21 myaga tepo nyi nga vboha Coron. Kha nga olu nyi nga dandreya dhoropani, nyi di hlamala tepo nyi nga wona gidwa gi nga ba giri ni maghezi nya madugwana, mati nya madugwana, nigu gu diri mwalo dzimota ni dzimovha nya dzingi. Ambari olu gu nga ba guri ni vandriyathu nyo khaguri, eni nyi diri mwalo pari nya piyonero, nigu dzimbe dzitepo nyi di yede gu tshumayela nyonga. Ga ngima nyo pheye, nyi di pheya gu suva ngudzu valongo vangu ni dzipari dzangu. Matshigu yatshavbo vbawutshigutunu, nyi di gu khedziseya dzinyeledzi na nyi gu liya. Nigu nyi di gu pimisa gu diga thumo wangu nyi bweleya gaya.

Ga dzitepo dzodzo, nyi di gu embeya Jehovha esi si nga ba si romo monyoni gwangu. Nyi ngu dundruga malito nyi leridego umo nya Bhibhiliya ni omu nya mabhuku yathu. Tepo yatshavbo nyi di gu dundruga libhuku la Ndzimo 19:14. Eni nyi tugude gu kheni Jehovha a di hadzi gu khala “Muvhikeli ni Muvbanyisi wangu” nya gu dundrugeya khu silo si mu tsakisago, nya nga mithumo ni makhalelo yaye. Ndrima nya Mukhedziseyi yi gu khiyo: “Nunca está sozinho”a yi nyi phaside ngudzu. Nyi leride ndrima yeyi khu gu phindra-phindra. Khu ndziya yeyi, nyi di gu khala nyonga ni Jehovha nigu isoso si di gu nyi ninga mathomo nya gu gombeye, gu hevbula ni gu dundrugeya.

Hwane nya gu ba nyi vbohide Coron, nyi di pheya gu thuma kha nga lidhota. Kha nga olu nyi nga ba nyi thuma nyonga kha nga lidhota, nyi di yede gu gimbidzisa Xikola nya Wuthumeli wa Nungungulu, Tshangano nya thumo, Gihevbulo nya Bhibhiliya nya libandla ni gihevbulo nya Mukhedziseyi. Nigu gambe eni nyi di gu vega ganelo dzisemana dzatshavbo. Khu lisine, yi diri mwalo tepo nya gu nyi dzipwa nyonga kholu nyi di gu pharegide!

Thumo nyi giridego Coron wu ningide mihandro nya yadi, nigu sihevbuli nyo khaguri si bhabhatisidwe. Ganiolu, si manegide sigaradzo nyo khaguri. Dzimbe dzitepo, nyi di gu gimbiya metadu nya litshigu gasi gu vboha omu nya teritoryu, ganiolu nya mba dziti avba nyi na lalago nya gu vboha. Teritoryu nya libandla lathu ya gu pata sidwa nya sidugwana. Dzitepo nya dzingi nyi di gu endra khu ngalava yi thumago khu motori omu nya mati nya mangi gasi gu vboheya sidwa soso ambari olu nyi nga ba nyi si kodzi gu hambeya. Vbakari nya sigaradzo sesi, Jehovha a nyi vhikede ni gu nyi khathaleya. Khu gu landreya, nyi tugude gu kheni Jehovha a di gu nyi dongiseya gasi gu emisana ni sigaradzo nyi nga hadzi tshangana naso ga thumo nyi nga hadzi gu gira.

PAPUA-NOVA GUINÉ

Khu 1978, nyi di rumedwa gasi guya thuma Papua-Nova Guiné, norte ga Austrália. Papua-Nova Guiné litigo li tadego khu sigomo li vbwetago gufana ni Espanha khu wukhongolo. Nyi hlamadzisidwe khu gu tugula gu kheni 3 dzimiliyoni nya vathu va vbanyago mule va di gu ganeya tanga nya 800 malimi. Egi gi tsakisago khu gu vathu nya vangi va di gu ganeya Gipidgin melanésio, li tidwago ngudzu kha nga Tok pisin.

Nyi lumbide khu gitepwana libandla nya Ginghisa li nga ba li romo Port Moresby, a gu kapitali yakone. Khu gu landreya, nyi di vbindrugedza libandla nyi hongola ga libandla la Tok pisin ni gu nyi hevbude limbe lidimi. Nyi di thumisa esi nyi nga ba nyi hevbula thumoni nyo tshumayele. Isoso si nyi phaside gu hevbuleya lidimi lolo khu givbiredza. Hwane nya gitepwana, nyi si kodzide gu gira dziganelo libandlani la Tok pisin. Nga dundrugeya edzi nyi nga hlamala khidzo tepo khiyo nyi nga pheya gu thuma nga muwoneleyi nya sirkwitu ga libandla la Tok pisin ni mambe mabandla ya mule, hwane nya mwaga moyo na nyi vbohide Papua-Nova Guiné.

Kha nga olu mabandla ma nga ba romo malanga nyo hambane-hambane, nyi di yede gu dongiseya dziasembleya nya dzingi, nigu nyi di yede gu endra ngudzu. Gupheyani nyi dzipwide nyonga khu kotani nya silo nya siphya nyi nga mba si oloveya, nya nga limbe litigo, lidimi nya liphya ni siolovedzo nya siphya. Kha nya nga ba nyi endreya mabandla khu gu thumisa dzi ruwa kholu dzi di siri dzadi, nigu dzi diri ni siwindri nya singi. Khu kharato, semana yatshavbo nyi di yede gu endra khu gu thumisa avhiyawu. Dzimbe dzitepo, nyi diri eni nyonga nyi nga ba nyi romo omu nya avhiyawu, yi nga ba yi thumiswa khu vathu va nga ba vari mwalo dzitsapawu nya dzingi. Eni nyi di gu garadzega tepo khiyo si nga ba si lombega gu nyi endra khu ngalava!

Vathu nya vangi va diri mwalo dzitelefoni, khu kharato nyi di gu thumisa malangaliya gasi gu ganeya ni mabandla. Dzimbe dzitepo, nyi di gu pheya kheni nyi vboha na ma nga si vbohi malangaliya nyi nga lova, khu kharato nyi di yede gu wudzisa maningano khu Dzifakazi nya libandla lolo. Tepo khiyo nyi nga ba nyi manana ni vandriyathu, nyi di gu hakhwa khu ndziya nya yadi si nga nyi gira nyi dundruga gighelo nya gudzigaradze gwatshavbo gwangu. Nyi pwide Jehovha na gu nyi phasa khu dzindziya nya dzingi, nigu wupari wangu naye wu di engedzeya gu tiya ngudzu.

Ga tshangano wangu nyo pheye gidwani gya Bougainville, nyi di hidzimeledwa khu patwa moyo, wu nga nyi wudzisa gu khuwo: “U ngu hi dundruga?” Nyi di dundruga gu kheni nyi di tshumayede patwa wowu tepo nyo pheye nyi nga vboha eyi Port Moresby. Nyi di phede gu hevbula navo Bhibhiliya na nyi nga si va ningeyi ga ndriyathu wa tigoni mule. Nigu ga tepo yeyi, vatshavbo va di gu bhabhatisidwe. Eli limwedo nya makategwa nyi ma hakhidego ndrani nya thumo wangu nya 3 myaga eyi Papua-Nova Guiné.

NDRANGA NYA YIDUGWANA YI NGA BA YI PHAREGIDE

Na nyi nga si dugi khu Coron khu 1978, nyi tide ndriyathu nya sighingi nyo pwani khu Adel. Uye a diri piyonera nya tepo yatshavbo, nigu a di gu dandrisa sanana sivili, a gu Samuel ni Shirley. Khu tepo yamweyo, a di gu khataleya mamayi waye a nga ba dandride khu tanga. Khu Maio nya 1981, nyi bwelede Filipinas gasi nyi ya tshadha ni Adel. Hwane nya gu ba hi tshadhide, hi simamide nga vapiyonero nya tepo yatshavbo, na hi gu khataleya ndranga yathu.

Ambari olu nyi nga ba nyiri ni ndranga, khu 1983, nyi manide lithomo nya gu thume gambe kha nga piyonero nyo hathege, nigu ga tepo yeyi nyi di yede guya thuma gidwani gya Linapacan, provhinsya ya Palawan. Ndranga yatshavbo yi di yede gu rura yi hongola gidwani gi nga ba gi romo hwindzo, nigu iyoyo gu diri mwalo Dzifakazi. Nigu hwane nya mwaga moyo, mamayi wa Adel a di luza womi. Khu kharato, hi di gu simama gu pharega thumoni nyo tshumayele, a gu iso si nga hi phasa gu timiseya gigaradzo gile. Hi phede sihevbulo nya singi eyi Linapacan, avbo nya gu yi lombega Salawu nya Mufumo nya yidugwana. Khu kharato, hi di vbaha Salawu nya yidugwana. Hwane nya 3 myaga na hi vbohide, hi tsakide ngudzu khu gu wona tanga nya 110 vathu va nga patega avba nya Gidundrugiso nya gufe ga Jesu, nigu vangi nya avo va dandride khu liphuvboni kala va bhabhatiswa.

Khu 1986, nyi rumedwe gasi guya thuma gidwani gya Culion, gi nga ba giri ni vathu nya vangi va nga ba vari ni sokono. Hwane nya isoso, Adel a di pheya gu thuma kha nga piyonera nyo hathege. Gu pheyani, hi di gu thava gu tshumayela vathu va nga ba vari ni sokono. Ganiolu, vahuweleyi va di hi tiyisegisa gu khavo vathu vale va di gu khataleya madwali yawo, khu kharato ethu hi diri mwalo mhangoni. Vambe vakone va di gu hongola mitshanganoni ndrangani ga ndriyathu moyo nya nyamayi. Ethu hi di dzi pwananisa ni giemo, nigu hi manide litsako nya likhongolo nyo tshumayele khu gutumba gwathu ga vathu va nga ba vari mwalo gutumba, kholu va nga ba va pimisa gu khavo va di tsukudwe khu Nungungulu ni vathu. Si di gu tsakisa ngudzu gu wona vathu va nga ba va dwala ngudzu, va mana litsako khu gutumba nya gu mane womi nya wadi mindru wa tshigu. — Luka 5:12, 13.

Sanana sathu si dzi pwananiside kharini ni womi tepo hi nga ba hi romo Culion? Eni ni Adel hi di kovhidhari vandriyathu vavili nya vanyamayi va nga ba vari vaphya gasi va hongola ni ethu Coron, khu ndziya yoyo sanana sathu si di hadzi gu mana dzipari nya dzadi. Samuel, Shirley ni vaphya vava nya vavili va di gu tsaka thumoni nyo tshumayele, khu gu hevbula ni sanana nya singi, esi vavelegi vakone hi nga ba hi hevbula navo. Khu kharato, hi vbohide avbo nya gu hi hevbula ni 11 dzindranga. Hwane nya tepo nyo khaguri, hi diri ni sihevbuli nya singi si nga ba si dandra khu liphuvboni, si nga hadzi gu gira gu si kodzega gu wumba libandla!

Gupheyani, nyi di gu thuma nyonga nga lidhota gipandreni mule. Khu kharato, Bheteli yi di nyi lomba gasi nyi gimbidzisa mitshangano nya libandla ga 8 vahuweleyi va Culion, nigu nyi di yede gu gira sasimweso ga 9 vahuweleyi va libandla la Marily, hi nga ba hi yede gu vbedza 3 dziora khu ngalava na hi gu endra. Hwane nya mitshangano, hi di gu tshumayela khu ndranga, nigu hi di yede gu gimbiya khu musigomoni kala hi vboha ga gidhoropana gi nga ba gi ranwa Halsey, gasi guya gimbidzisa sihevbulo nya Bhibhiliya.

Hwane nya tepo nyo khaguri, hi phede gu wona mihandro eyi Marily ni Halsey, avbo nya gu hi gira Dzisalawu nya Mufumo ga malanga yoyo. Gufana ni Linapacan, vandriyathu va di gu dusa silo nya singi si nga ba si vbwetega gasi gu vbaha, nigu va di gu phasedzeya gu vbahwa nya Dzisalawu dzodzo. Salawuni ya Marily, va di gu beya tanga nya 200 vathu nigu si di gu kodzega gu yi engedzedwa, khu kharato yi di gu thumiswa gasi gu gira dziasembleya.

WUTUNDZO, GU DZIPWA NYONGA NI GU MANA GAMBE LITSAKO

Khu 1993, tepo sanana sathu si nga ba si dandride, eni ni Adel hi di pheya gu thuma omu nya sirkwitu ya Filipinas. Nigu khu 2000, nyi di ranwa gasi guya kursari Escola de Formação Ministerial, gasi nyi khala muhevbudzi nya dzixikola dzodzo. Nyi di dzipwa na nyi si fanedwi khu thumo wowo, ganiolu Adel a nyi tiyiside. Uye a di nyi dundrugisa gu khuye Jehovha a di hadzi gu nyi ninga tshivba gasi nyi gira gwadi thumo wowo. (Filp. 4:13) Adel a di gu siti gwadi isoso, kholu uye a di gu gira thumo waye ambari olu a nga ba a emisana ni madwali.

Khu 2006 tepo nyi nga ba nyiri muhevbudzi, Adel a di popodwa madwali nya Parkinson. Isoso si hi vbedzide tshivba! Tepo nyi ga mu ninga mawonelo nya gu hi ema ni thumo wathu gasi hi khataleya madwali yaye, Adel a di khuye: “Nya gu lomba, vbwetedzeya dhogodheya gasi a nyi phasa ga madwali yangu, nigu nyi ngu tumba gu kheni Jehovha a na hi phasa gu emisana ni giemo gegi.” Ga 6 mwaga yi nga landreya, Adel a di gu simama thumeya Jehovha nya mba ngurangura. Tepo a nga ba a si kodzi gu gimbiya, uye a di gu tshumayela khu kadera nya marodha. Tepo a nga ba a si kodzi gu ganeya gwadi, uye a di gu ningeya mihlamulo yaye mitshanganoni khu malito nya madugwana. Vandriyathu nya vangi va di gu rumeleya dzimensaji nya gu bonge khu giyeyedzo nya gyadi nya gu timiseye, kala a nga luza womi khu 2013. Nyi vbedzide tanga nya 30 myaga ni mwangadzi wangu, Adel, nya gu tumbege nyi nga ba nyi mu haladza, ganiolu hwane nya gu ba a fude nyi di pheya gambe gu dzipwa nyonga.

Adel a di gu vbweta gu khuye nyi simama thumoni wangu, nigu khiso kamo nyi giredego. Nyi di gu khala na nyi pharegide, a gu iso si nga nyi phasa gu mba dzipwa nyonga. Nigu khu 2014 kala 2017, nyi ningidwe thumo nya gu endreye mabandla ma ganeyago Tagalog, ga litigo thumo wathu wu nga ba wu himbedzedwa. Nigu hwane nya isoso, nyi di wuseya mabandla nya Gitagalog eyi Taiwan, Estados Unidos ni Canadá. Khu 2019, nyi gimbidziside Xikola nya Vavhangeli nya Mufumo eyi Índia ni Tailândia. Nyi tsakide ngudzu ga yatshavbo mithumo yoyo. Nigu nyi ngu simama gu tsaka nya gu kala na nyi pharegide thumoni wa Jehovha.

ETHU DZITEPO DZATSHAVBO HI NA NI GIPHASO HI GI VBWETAGO

Ni ga wevbini thumo nya wuphya, lihaladzo nyi gu nalo khu vandriyathu la gu dandra, nigu kha si vbevbugi gu va diga. Ga dzitepo dzodzo, nyi hevbulede gutumba Jehovha khu gu vbeleya. Nigu uye tepo yatshavbo a ngu nyi phasa, nigu isoso si ngu nyi phasa gu dzumeya ni gwevbini gu vbindrugedza gu nga manegago. Muhuno, eni nya gu thuma kha nga piyonero nya gu hathege Filipinas. Nyi ngu dzipwa gwadi umo nya libandla langu nya liphya, li nga khala kha nga ndranga yangu. Nigu nyi ngu tsaka ngudzu khu gu wona Samuel ni Shirley na va gu pimedzeya giyeyedzo gya gukhodwe gya mamayi wawe. — 3 Joh. 4.

Lisine gu nyi mananide ni sigaradzo nya singi womini wangu, gu pata ni gu wona mwangadzi wangu na gu tshaniseka ni gu luza womi khu kotani nya madwali nya gu vbisi ngudzu. Nigu nyi di yede gu dzi pwananisa ni siemo nya siphya. Khu kharato, nyi wonide gu kheni Jehovha a “mwalo hwindzo ga moyo ni moyo wathu.” (Mith. 17:27) Nigu ‘libogo la Jehovha kha la rola’ nyo kala li si kodzi gu phasedzeya sithumi saye, ambari na siri wulangani nya hwindzo. (Isa. 59:1) Jehovha, Giwindri gyangu, uye a nyi phaside womini wangu watshavbo, nigu eni nyi ngu mu bonga ngudzu. Nyi diri mwalo nyonga.