Pimedzeya Jesu khu gu tshumayela khu sighingi

1. Gu hambana muni gu gomogo avba nya vathu va Jehovha ni vale va dzi girago gu khatshi Makristo?

SITHUMI sa Jehovha, si na ni gudogoreya nya gukhongolo ngudzu nya gu tshumayele mahungu nya yadi, nigu sa gu gira thumo wowo khu sighingi. Khiso si si hambanisago ni vale va dzi girago gu khatshi Makristo. (Tit. 2:14) Dzimbe dzitepo, si nga gu garadzeya gu tsakiswa khu thumo nyo tshumayele. Adzina u nga dzipwa nga ndriyathu moyo a thumago kha nga lidhota. Uye a di ganeya gu khuye: “Dzimbe dzitepo nyi mwalo gudogoreya nyo tshumayele.”

2. Khu ginani si nga garadzago gu simama ni sighingi thumoni nyo tshumayele?

² Adzina saye, hi nga tsaka ngudzu khu gu gireya silo vambe thumoni ga Jehovha guvbindra gu tshumayela. Khu ginani? Kholu tepo hi vbahago mwendro gu lungisa-lungisa Salawu nya Mufumo, gu phasa vandriyathu va nga thegedwa khu dzimhango ni gu va tiyisa, ethu ha gu dzegeya gu wona mihandro yakone hi bwe hi dzipwa gwadi. Tepo hi thumago ni vandriyathu, ha gu gira isoso gurulani ni gu yeyedzana lihaladzo. Nigu hi ngu dziti gu khethu vandriyathu va ngu bonga khesi hi va gireyago. Ganiolu, si nga gira na hi gu tshumayela ga wulanga wa wumowo khu myaga nya yingi, nigu adzina saye vadugwana va engiseyago mahungu nya Bhibhiliya. Mwendro vambe vakone kha va tsakiswi khu mahungu yathu. Ethu gambe hi ngu dziti gu khethu khu kotani nya olu mahegiso ma gu romo vbafuvbi, hi nga vireya gu engedzedwa gu wugedwa. (Mat. 10:22) Ginani gi na hi phasago gu engedzeya sighingi thumoni nyo tshumayele?

3. Ha gu hevbula ginani khu gipimaniso gi gu romo omu ga Luka 13:6-9?

³ Hi nga hevbula khu giyeyedzo gya Jesu nya edzi a yeyedzidego khidzo sighingi thumoni nyo tshumayele. Tepo khiyo a nga ba a romo mafuni, Jesu gima kha ema gu thuma khu sighingi. Uye engedzede gu thuma khu sighingi thumoni gwaye nyo tshumayele. (Leri Luka 13:6-9.) Avba nya gipimaniso nyo khaguri, Jesu a di fananisa thumo waye ni thumo wa mwama moyo a nga thuma 3 myaga khu sighingi gasi gu khathaleya nguyu (figueira), ganiolu wu nga mba dusa mihandro. Khu ndziya nyo fane, Jesu vbedzide 3 myaga na tshumayela Vajudha, ganiolu nya vangi vakone kha va khala vapizane vaye. Gu fana ni mwama wule a nga ba a vireya gu wona mihandro nya nguyu, Jesu kha vbeya tshivba, uye a di simama gu va tshumayela. Wulangani nya isoso, uye a di engedzeya gu thuma khu sighingi gasi gu va phasa gu dzumeya mahungu nya yadi.

4. Silo muni nya 4 hi nga si hevbulago khu giyeyedzo gya Jesu?

⁴ Avba nya ndrima yeyi, hi na bhula khedzi Jesu a yeyedzidego khidzo sighingi saye, ngudzu-ngudzu guhegisani nya 6 migima nya thumo waye. (Luka 10:1) Gu hevbula khesi a hevbudzidego ni gu pimedzeya esi a giridego, si na hi phasa gu simama ni sighingi. Hongoleni hi wona giyeyedzo gya Jesu avba nya 4 silo: 1) Uye a di vega gupima avba nya gu gire gugola ga Jehovha; 2) a di gu vega gupima avba nya siprofeto nya Bhibhiliya, 3) a di gu tumba gu khuye Jehovha a di hadzi gu mu phasa nigu 4) a di gu tumba gu khuye vathu nyo khaguri va di hadzi gu mu engiseya.

UYE VEGIDE GUPIMA AVBA NYA GU GIRE GUGOLA GA JEHOVHA

5. Jesu yeyedzide kharini gu khuye a di gu vega gupima avba nya gu gire gugola ga Nungungulu?

⁵ Jesu tshumayede khu sighingi “mahungu nya yadi nya Mufumo” kholu a di gu dziti gu khuye gu diri gugola ga Nungungulu. (Luka 4:43) Jesu a di gu wona gu tshumayela mahungu nya yadi nga gilo nya lisima womini waye. Ambari guhegisani nya thumo waye, uye a di gu “gimbiya khu lidhoropa ni lidhoropa ni alidheya ni alidheya” na gu hevbudza vambe. (Luka 13:22) Uye gambe trenaride vapizane nya vangi gasi gu tshumayela mahungu nya yadi gufana naye. — Luka 10:1.

6. Thumo nya gu tshumayele wa gu pwanana kharini ni yimbe mithumo eyi hi nga manegago nayo? (Wona fotu.)

⁶ Gu tshumayela mahungu nya yadi muhuno, i thumo nya gupheye owu Jehovha ni Jesu va vbwetago gu khavo hi wu gira. (Mat. 24:14; 28:19, 20) Ni wevbini thumo hi gireyago Jehovha wu ngu pata gu tshumayela mahungu nya yadi. Khu giyeyedzo, hi ngu vbaha Dzisalawu nya Mufumo gasi vathu hi va tshumayelago va khozeya Jehovha umo. Nigu thumo hi wu girago Bheteli wu ngu phasedzeya thumo nya gu tshumayele. Tepo dzi giregago dzimhango nya tumbunugo, hi ngu gira satshavbo hi si kodzago gasi hi tiyisega gu khethu vandriyathu va ngu mana silo si na va phasago gu simama ni giolovedzo nya gu hongole mitshanganoni ni gu tshumayela. Tepo hi dundrugeyago lisima nya thumo nyo tshumayele ni gu dundruga gu khethu thumo wowo i thumo nya lisima Jehovha a vbwetago gu khuye hi gira, hi na kutsega gu simama gu tshumayela tepo yatshavbo. János, lidhota la Hungria wari, khuye, “Nya gu dundrugeya gu kheni wu mwalo ni wevbini thumo wu tshikedzago thumo nyo tshumayele; owu i thumo wathu nya lisima.”

7. Khu ginani Jehovha a vbwetago gu khuye hi simama gu tshumayela? (1 Thimoti 2:3, 4)

⁷ Hi nga engedzeya sighingi sathu khu thumo nya gu tshumayele ha gu wona vathu khu ndziya eyi Jehovha a va wonago khiyo. Jehovha a gu vbweta gu khuye vathu va engiseya mahungu nya yadi ni gu hevbula khayo. (Leri 1 Thimoti 2:3, 4.) Kholu mahungu nya yadi ma nga vbulugisa womi nya vathu nigu Jehovha a ngu hi phasa gu tshukwadzisa ndziya eyi hi tshumayelago khiyo. Khu giyeyedzo, broxura Haladza vathu — Gira vapizane yi ngu hi ninga wusingalagadzi wu hi phasago gu pheya mabhulo ni makungo nya gu gire vapizane. Ambari vathu va gu mba pheya gu thumeya Jehovha olu, avo va na mana lithomo lolo na yi nga si vbeyi tshanisa nya yikhongolo. Esi hi va embeyago olu adzina saye si na va kutsa gu pheya gu thumeya Jehovha mindru wa tshigu. Ganiolu, isoso si na girega basi ha gu simama gu tshumayela.

UYE VEGIDE GUPIMA AVBA NYA SIPROFETO NYA BHIBHILIYA

8. Khu sevbini siprofeto si phasidego Jesu gu thumisa tepo yaye khu wugengeyi?

⁸ Jesu a di gu pwisisa edzi siprofeto nya Bhibhiliya si nga hadzi gu tadzisega khidzo. Uye a di gu dziti gu khuye thumo waye nyo tshumayele mafuni wu di hadzi gu dzega 3 myaga ni metadu. (Dhan. 9:26, 27) Uye a di gu pwisisa siprofeto si nga ba si ganeya khu tepo ni ndziya eyi a nga hadzi gufa khiyo. (Luka 18:31-34) Khu kotani nya olu a nga ba a siti esi si nga ba si profetidwe maningano khuye, Jesu thumiside tepo yaye khu ndziya nya yadi. Kha nga handro wakone, uye tshumayede khu sighingi gasi gu tadzisa thumo a nga ningwa gu gira.

9. Khu ginani siprofeto nya Bhibhiliya si hi kutsago gu tshumayela khu sighingi?

⁹ Gupwisisa gwathu nya siprofeto nya Bhibhiliya, si na hi phasa gu tshumayela khu sighingi. Ethu hi ngu dziti gu khethu nya mba hweya mahegiso nya litigo leli ma na vboha. Bhibhiliya yi hi embede edzi vathu va nga hadzi gu dzi phara khidzo matshigoni nyo hegise ni esi si nga hadzi girega, nigu ethu hi ngu wona siprofeto soso nya Bhibhiliya na si gu tadzisega. Bhibhiliya yi profetide gu khiyo pfhumu ya Norte ni pfhumu ya Sul, dzi di hadzi gu dwana khu gyawe “khu mahegiso nya gikhati.” Ethu hi ngu pwisisa gu khethu siprofeto soso sa gu thula gu mba pwanana gu gumogo avba nya Mufumo nya tshivba nya Mafu yatshavbo, Anglo-América ni Rússia gupata ni ava va va seketeyago. (Dhan. 11:40) Ethu hi ngu pwisisa gambe gu khethu Mufumo nya tshivba nya Mafu yatshavbo Anglo-América wa gu emeya migondro nya gifananiso gi tshamusedwago ga Dhaniyeli 2:43-45. Ethu hi ngu tiyisega gu khethu kha nga edzi siprofeto si ganeyago khidzo, nya mba hweya Mufumo wa Nungungulu wu na ta tshungunula mifumo yatshavbo nya vathu. Satshavbo siprofeto sesi sa gu yeyedza gu khiso ho vbanya dzitsokani nya matshigu nya gu hegise, khu kharato hi yede gu thumisa tepo yathu khu ndziya nya yadi gasi hi si kodza gu tshumayela mahungu nya yadi.

10. Siprofeto sa gu hi kutsa gu tshumayela khu dzindziya muni?

¹⁰ Siprofeto nya Bhibhiliya si ngu hi ninga gambe mahungu hi tsakeyago gu bhuleya vambe. Ndriyathu a ranwago Carrie, a thumeyago República Dominicana wari, khuye: “Tepo nyi pimisago khu silo nyo gu mbure esi Jehovha a hi tumbisago gu hi gireya mindru wa tshigu, so nyi kutsa gu bhuleya vambe maningano khiso.” Nigu a gu engedza gambe, khuye: “Tepo nyi wonago sigaradzo esi vathu muhuno va tshanganago naso, nya gu wona gu kheni anavo va yede gu dziti gu khavo Jehovha a tumbiside silo nyo mbure va nga wuyedwago khiso mindru wa tshigu.” Siprofeto nya Bhibhiliya sa gu hi yeyedza gu khiso Jehovha a ngu hi phasa gu gira thumo wowo, nigu guti esi si ngu hi tiyisa gasi hi simama gu tshumayela. Leila, wa Hungria wari, khuye: “Isaya 11:6-9 a gu yeyedza gu khuye khu gu phaswa khu Jehovha, ni wevbini muthu a nga vbindrugedza. Esi si ngu nyi phasa gu bhuleya mahungu nya yadi ga vathu adzina saye nyi pimisago gu kheni kha va na nga engiseya mahungu nya yadi.” Nigu Christopher, ndriyathu wa Zâmbia wari, khuye: “Kha nga si ganedwego ga Marko 13:10, mahungu nya yadi ma yede gu tshumayedwa mafuni gwatshavbo nigu lithomo nya likhongolo gu patega avba nya gu tadzisi giprofeto gegi.” Khu sevbini siprofeto nya Bhibhiliya si gu kutsago gu tshumayela?

UYE TUMBIDE GU KHUYE JEHOVHA A NA MU PHASA

11. Khu ginani Jesu a nga ba a yede gutumba Jehovha gasi a simama gu tshumayela khu sighingi? (Luka 12:49, 53)

¹¹ Jesu a di gu tumba gu khuye Jehovha a di hadzi gu mu phasa gu simama gu tshumayela khu sighingi. Ambari olu Jesu a nga ba a ganeya khu ndziya nya githawo ni vambe tepo a nga ba a tshumayela, uye a di gu dziti gu khuye mahungu nya yadi nya Mufumo ma di hadzi gira vambe va goroga nigu vambe va di hadzi gu hi wugeya khu tshivba. (Leri Luka 12:49, 53.) Vathangeyi nya wukhongeyi kha va nga ba va tsakiswa khesi Jesu a nga va tshumayela, khu kharato va zamide dzitepo nya dzingi gu mu songa. (Joh. 8:59; 10:31, 39) Ganiolu, Jesu a simamide gu tshumayela kholu a di gu dziti gu khuye Jehovha a diri naye. Uye a di khuye: “Kha nyiri nyonga, ganiolu Papayi, a gu uye a nyi rumedego, na ni eni. . . . Uye kha nyi diga nyonga, kholu tepo yatshavbo nyo gira esi si mu tsakisago.” — Joh. 8:16, 29.

12. Jesu dongisede kharini vapizane vaye gasi va simama gu tshumayela ambari va gu wugedwa?

¹² Jesu a dundrugiside vapizane vaye gu khuye va nga tumba Jehovha gasi gu va ninga giphaso va gi vbwetago. Uye a di va tiyisegisa khu gu phindra-phindra gu khuye Jehovha a di hadzi gu va phasa ambari va gu wugedwa. (Mat. 10:18-20; Luka 12:11, 12) Khu kharato, uye a di va embeya gasi va dzi woneya. (Mat. 10:16; Luka 10:3) Uye gambe a di va embeya gu khuye va gu tshuka vathu nyo khaguri va si vbweti gu va engiseya, avo kha va yeli gu va gurumedza. (Luka 10:10, 11) Nigu a di va embeya gasi va tutuma va gu tshuka va wugedwa. (Mat. 10:23) Ambari olu Jesu a nga ba ari ni sighingi ni gu tumba Jehovha, uye kha nga ba a vega womi waye mhangoni nya mba na gighelo nyo pwale. — Joh. 11:53, 54.

13. U nga tiyisega kharini gu khuwe Jehovha a na gu phasa?

¹³ Ethu hi ngu vbweta giphaso gya Jehovha gasi hi simama gu tshumayela khu sighingi ha gu emisana ni gu wugedwa muhuno. (Gutu. 12:17) U nga tiyisega kharini gu khuwe Jehovha a na gu phasa? Hongoleni hi wona nombelo wa Jesu wu gomogo omu ga Johane gipimo 17. Jesu lombide Jehovha gasi a woneleya vapostoli vaye nigu Jehovha hlamude nombelo wowo. Libhuku la Mithumo la gu yeyedza gu khilo uye a phaside vapostoli gu simama gu tshumayela khu sighingi ambari olu va nga ba va wugedwa. Ga nombelo waye, Jesu lombide gambe Jehovha gasi gu woneleya vale va nga hadzi gu khodwa avba nya mahungu ma nga ba ma tshumayedwa khu vapostoli. Anuwe u ngu patega. Jehovha kha ema gu hlamula nombelo wa Jesu, Uye a na gu phasa nga edzi a phasidego khidzo vapostoli. — Joh. 17:11, 15, 20.

14. Ha gu dziti kharini gu khethu hi na simama gu tshumayela khu sighingi? (Wona fotu.)

¹⁴ Ambari so engedzeya gu garadza gu tshumayela mahungu nya yadi khu sighingi matshigoni yaya nyo hegise, ethu hi na hakha giphaso hi gi vbwetago. (Luka 21:12-15) Gufana ni Jesu ni vapizane vaye, ethu ho diga vathu va hatha gu khavo va na hi engiseya mwendro ne hi bwe hi potsa gu ganedzisana. Ambari olu mambe mayigo vandriyathu va gu mwalo gu tshulega nyo tshumayele, avo va ngu si kodza gu huweleya mahungu nya yadi kholu va gu tumba Jehovha nasiri tshivba yawe. Gufana ni edzi Jehovha a ningidego khidzo tshivba Makristo nyo pheye, uye a na hi ninga tshivba gasi gu “thumo wu girwa khu tshivba ni tshivba” khu ndziya eyi Jehovha a yi vbwetago. (2 Thim. 4:17) U nga tiyisega gu khuwe wa gu tumba Jehovha, u na simama gu tshumayela khu sighingi.

UYE A DI GU TIYISEGA GU KHUYE VATHU NYO KHAGURI VA NA ENGISEYA

15. Ginani gi yeyedzago gu khigyo Jesu a diri ni mawonelo nya yadi khu thumo nyo tshumayele?

¹⁵ Jesu a di gu tiyisega gu khuye va di hadzi gu manega vathu va nga hadzi gu engiseya mahungu nya yadi. Isoso si mu phaside gu simama gu tsaka ni gu simama gu thuma khu gu dzigaradza thumoni nyo tshumayele. Khu giyeyedzo, hwane nya gu ba Jesu a phede gu tshumayela mahungu nya yadi, wonide gu khuye vathu nya vangi va di dzi emisede gu engiseya mahungu nya yadi, avo va di gu fana ni mathembwe ma vidzidwego gasi gu vbwerwa. (Joh. 4:35) Hwane nya mwaga moyo, uye embede vapizane vaye gu khuye: “Thumo nya gu vbwere wukhongolo.” (Mat. 9:37, 38) Hwane nya tepo nyo khaguri, uye a tshingiside gambe gu khuye: “Thumo nya gu vbwere wukhongolo . . . Lombani Mune thumo gasi a mi rumeleya sithumi, thumoni waye nya guvbwere.” (Luka 10:2) Jesu simamide gu tiyisega gu khuye vambe vathu va di hadzi gu engiseya mahungu nya yadi nigu uye a tsakide tepo va nga gira isoso. — Luka 10:21.

16. Sipimaniso sa Jesu so hi phasa kharini gu wona thumo nyo tshumayele khu ndziya nya yadi? (Luka 13:18-21) (Wona fotu.)

¹⁶ Jesu phaside vapizane vaye gasi va simama ni sighingi, khu gu va hevbudza gu khuye mahungu va ma tshumayelago ma na resa mihandro nyo hlamadzise. Khu giyeyedzo, wona sipimaniso sivili. (Leri Luka 13:18-21.) Jesu fananiside mahungu nya Mufumo wa Nungungulu ni mbewu nya ginapi, yi nga dandra yi khala simbo nya wukhongolo. Isoso so thula gu khiso vathu nya vangi va di hadzi gu dzumeya mahungu nya yadi, nigu gimwalo gi nga hadzi gu himbedzeya gu isoso si girega. Ga gimbe gipimaniso, uye a fananiside mahungu nya Mufumo ni livhirina. Kholu mahungu yoyo nya Mufumo ma di hadzi gu tshumayedwa malangani nya mangi nigu ma di hadzi guvbindrugedza vathu ambari go mba dzegeya gu wonwa khu vambe. Khu kharato, Jesu a di tiyisegisa vapizane vaye gu khuye mahungu va nga ba va tshumayela ma di hadzi gu phasa vathu nya vangi.

17. Sighelo muni hi gu naso nyo simame ni mawonelo nya yadi khu thumo nyo tshumayele?

¹⁷ Tepo hi dundrugeyago khedzi thumo nyo tshumayele wu phasago khidzo vathu nya vangi, hi na kutsega gu simama gu tshumayela. Myaga yatshavbo, dzimiliyoni nya vathu va tsakeyago va ngu patega avba nya Gidundrugiso nya gufe ga Jesu ni gu hevbula Bhibhiliya ni ethu. Mazanazana nya vathu va ngu bhabhatiswa ni gu patega thumoni nyo tshumayele ni ethu. Ethu kha hi dziti gu khethu vathu vangani va na dzumeyago mahungu nya yadi, ganiolu hi ngu dziti gu khethu Jehovha a ngu tshanganisa vathu nya vangi va na vbulugago avba nya tshanisa nya yikhongolo. (Gutu. 7:9, 14) Jehovha khuye mune nya lithembwe, nigu uye a ngu tiyisega gu khuye vathu nya vangi va na dzumeya mahungu nya yadi, khu kharato ethu hi na simama gu tshumayela.

18. Ginani hi gi vbwetago gu khethu vambe va gi wona avba gwathu?

¹⁸ Vapizane va Jesu tepo yatshavbo va di gu tidwa khu sighingi va nga va vari naso thumoni nyo tshumayele. Khu giyeyedzo, vapizane va tshumayede khu sighingi nyo bwe vathu va “tugula gu khavo va di gu gimbiya-gimbiya ni Jesu.” (Mith. 4:13) Ethu nethu ho vbweta gu tshumayela mahungu nya yadi khu sighingi nigu vathu va na wona gu khavo ho pimedzeya Jesu.