Ina Nyi yede gu Gombeya ga Vanyaguaga?

Hlamulo nya Bhibhiliya

Ahihi. Bhibhiliya ya gu yeyedza gu khiyo hi yede gu gombeya basi ga Nungungulu khu lina la Jesu. Jesu a di khuye ga vapizane vaye: “Khu kharato, gombeyani kharati: “‘Papayi wathu u gu romo ndzadzini, lina lago li na agiswe.” (Matewu 6:9, Centro Biblico Católico) Uye gima a si ganeyi gu khuye vapizane va di yede gu gombeya ga vanyaguaga, dzingilozi mwendro gimbe givangwa nasiri Nungungulu.

Jesu gambe embede valandreyi vaye khuye: “Eni kheni ndziya ni lisine ni womi. Mwalo a hongolago ga Papayi nasiri khavbo gwangu.” (Johane 14:6, CBC) Jesu khuye basi a nga dzumeledwa khu Nungungulu gasi hi si kodza gu hidzimeya gwaye khu gu thumisa lina laye. — Vahebheru 7:25.

Ina nyi nga gombeya ga Nungungulu nyi bwe nyi gombeya ga vanyaguaga?

Ga nayo nya wu 10 Nungungulu o ganeya gu khuye: ‘eni kheni PFHUMU Nungungulu wago, nyi Nungungulu nya wufu.’ (Ekisodha 20:5) So thula ginani gu Nungungulu a ganeya gu khuye Nungungulu nya wufu? A nova tradução na linguagem de hoje yo ganeya esi “eni PFHUMU Nungungulu wago kha nyi dzumeleyi vambe Vanungungulu.” Nungungulu o vbweta gu khuye wukhozeyi gumogo ni milombelo yathu si yiswa basi iyo gwaye. — Isaya 48:11

Hi na ba na hi zangarisa Nungungulu ha gu gombeya ga simbe sivangwa ambari go ba guri vanyaguaga mwendro dzingilozi. Tepo mupostoli Johane a nga zama gu khozeya ngilozi yi di mu himbedzeya yi mu embeya gu khiyo: “Ne! U nga giri isoso. Eni nyi githumi nga uwe ni vandriyago, gi gu na ni thumo nya gu ningeye wufakazi maningano ni Jesu. Khozeya Nungungulu! Kholu makungo nya wuprofeti gu ningeya wufakazi maningano ni Jesu.” — Gutuledwa 19:10, CBC.